1, 2. а) Ко саво начин акава лошно свето тано слично е криминалцоја кова со ваљани те овел мудардо? (Дикх и слика ко почеток тари статија.) б) Сар ка осетинен пе сарине сој ко небо хем ки пхув кеда ка овел уништимо акава свето?

ЗАМИСЛИН туке акаја ситуација. Јекх опасно криминалцо тано осудимо те мерел. О стражарија ингарена ле те овел мудардо. Иако акава криминалцо тано џивдо хем састо, ов панда хари ка мерел.

² О лошно свето коте со живинаја тано слично сар адава криминалцо кова сој осудимо те мерел. Ки Библија пишинела: „О свето накхела“ (1. Јов. 2:17). О Јехова одлучинѓа кај акава лошно свето панда хари ка завршинел, шај те ова сигурна кај ка овел адава. Ама иси јекх важно разлика машкар о крајо акале светоскоро хем о крајо е криминалцоскоро. Несаве мануша шај те мислинен кај о криминалцо на сине праведно осудимо хем адалеске ка протестиринен, мислиндор кај шај те чхинавен лескири казна. Ама, о Јехова тано совршено судија, хем лескири одлука те уништинел акава свето  тани праведно (5. Мој. 32:4). Ов ка овел уништимо ко време сој одредимо. Кеда ка овел уништимо акава свето, сарине ко небо хем ки Пхув ка согласинен пе кај е Јеховаскири одлука сине праведно. Тегани сарине ка овен ослободиме таро пхарипе акале светоскоро!

3. Кола штар проблемија ка цидел лен е Девлескоро Царство?

³ Кеда ка овел уништимо акава лошно свето, ка овен уништиме са о лошна буќа да со керена пе авдиве. Адава тано дело таро „шукар хабери башо царство“ (Мат. 24:14). Ки акаја статија ка кера лафи башо штар проблемија со ка цидел лен е Девлескоро Царство: о лошна мануша, о лошна организацие, о лошна буќа со керена пе, хем о лошна условија. Ка дикха сар акала проблемија 1) влијајнена упри аменде, 2) со ка керел о Јехова ленцар, хем 3) коле буќенцар ка заменинел лен.

4. Сар влијајнена упри аменде о лошна мануша?

⁴ Сар влијајнена упри аменде о лошна мануша? О апостол Павле вакерѓа кај „ко последна диве ка овел бут пхаро време“. Исто аѓаар вакерѓа: „О лошна хем о ховавне мануша ка овен таро лошна ко полошна“ (2. Тим. 3:1-5, 13). Дали дикхеа сар исполнинела пе акава пророштво? Буте џененге амендар о лошна мануша керѓе лошнипе. Несаве лендар на гаравена адава со керена. Јавера керена пе кај поможинена е манушенге, ама нане чаче асавке него тане лошна. Чак ако амен на доживинѓем лошнипе таро акала мануша, ола влијајнена упри аменде. Пхаро аменге кеда шунаја башо адава кобор лошно постапинена е чхавенцар, е попхуренцар хем јаверенцар со нашти те бранинен пе. Акала лошна мануша понашинена пе ко начин со керела лен слична е дива животненцар или чак е демоненцар (Јак. 3:15). Ама, бахтале сием со е Девлескоро Лафи дела амен надеж.

5. а) Сави прилика панда иси е лошна манушен? б) Со ка овел адаленцар со на мангена те менинен пе?

⁵ Со ка керел о Јехова? Акана о Јехова дела прилика е лошна манушенге те менинен пе (Иса. 55:7). Иако акава свето тано осудимо те овел уништимо, о мануша сар поединција панда на добинѓе конечно пресуда. Со ка овел адаленцар со на мангена те менинен пе хем поддржинена акава свето са џикоте на почминела и бари неволја? О Јехова ветинѓа кај ка уништинел са е лошна манушен тари Пхув. (Читин Псалм 37:10.) Авдиве бут џене џанена сар те гаравен о лошна буќа со керена хем бут пути нане казниме башо адава (Јов 21:7, 9). Ама, и Библија сетинкерела амен: „Е Девлескере јакхја тане упро е манушескере друмија, хем ов дикхела са лескере чекорија. Нане мрако ни густо темница коте со шај те гаравен пе адала со керена лошнипа“ (Јов 34:21, 22). Никој нашти те гаравел пе таро Јехова. Ов шај те дикхел са со керена о лошна мануша. Пало Армагедон, шај ка дикха ко тхан коте со сине, ама ола нане те овен адатхе соске нане те постојнен (Пс. 37:12-15).

6. Кој ка ачхол кеда о лошна мануша нане те овен хем соске тано адава шукар хабери?

 ⁶ Кој ка ачхол ки Пхув кеда о лошна мануша нане те овен? О Јехова ветинѓа: „О кротка ка наслединен и пхув, хем ка уживинен ко баро мир“. Ко исто псалм пишинела: „О праведна мануша ка наслединен и пхув хем ка живинен вечно ки лате“ (Пс. 37:11, 29). Кој тане „о кротка“ хем „о праведна“? О кротка тане о понизна мануша со сикљовена таро Јехова хем тане послушна леске. О праведна тане адала со мангена те керен адава сој исправно англо е Девлескере јакхја. Ко свето авдиве, иси повише лошна мануша а похари праведна. Ама ко нево свето, ка овен само кротка хем праведна мануша, хем ола ка керен и Пхув те овел рај!

7. Сар влијајнена упри аменде о лошна организацие?

⁷ Сар влијајнена упри аменде о лошна организацие? Побаро дело таро лошнипе ко свето авдиве на керена ле поединција него организацие. О религиозна организацие ховавена буте манушен. На пример, ола ховавена башо адава кој тано о Девел, вакерена кај нашти те верујна ки Библија, хем ховавена башо адава со ка овел е манушенцар хем е Пхувјаја. Бут владе поттикнинена ко војне, ки омраза машкар о мануша таро различна расе, малтретиринена е чоролен хем адален со нане кој те бранинел лен. Асавке владе овена са побарвале хем посилна адалеске со сикавена пристрасност хем лена мито. О алчна организацие загадинена и околина, уништинена и природа хем користинена е манушен те шај само некобор џене те барваљовен. Јасно тано кај о лошна организацие тане одговорна башо бут лошна буќа со случинена пе ко свето.

8. Спрема и Библија, со ка случинел пе е организациенцар со изглединена зорале хем стабилна?

⁸ Со ка керел о Јехова? И бари неволја ка почминел кеда о политичка организацие ка нападинен са о ховавне религиозна организацие, касте со и Библија опишинела сар јекх неморално џувли со викинела пе Баро Вавилон (Отк. 17:1, 2, 16; 18:1-4). Акала религиозна организацие ка овен целосно уништиме. Ама, со ка овел са е јавере лошна организациенцар? И Библија спорединела лен сар планине хем островија соске бут лендар изглединена сар зорале хем стабилна. (Читин Откровение 6:14.) Ама, исто аѓаар пхенела кај о владе хем са о јавера организацие кола со на поддржинена е Девлескоро Царство ка овен уништиме. Акава ка овел ко последно дело тари бари неволја (Ерем. 25:31-33). Пало адава, нане те овел нијекх лошно организација!

9. Соске шај те ова сигурна кај и неви пхув ка овел шукар организирими?

⁹ Солеа ка овен замениме о лошна организацие? Пало Армагедон, дали ка овел несави организација ки Пхув? Ки Библија пишинела: „Сар со ветинѓа ов аџикераја нево небо хем неви пхув коте со ка живинел и праведност“ (2. Пет. 3:13). О пурано небо тане о лошна владе, а и пурани пхув тане о мануша упри касте со владинена ола. Кеда ола нане  те овен, кој ка заменинел лен? О нево небо хем и неви пхув. О нево небо тано и неви влада, о Царство колеа со владинела о Исус Христос хем о 144.000 со ка владинен леа. И неви пхув тане о мануша упро кола со ка владинел е Девлескоро Царство. О Исус хем адала со ка владинен леа совршено ка постапинен сар о Јехова, кова сој тано Девел е редоскоро (1. Кор. 14:33). Адава значинела кај и „неви пхув“ ка овел организирими. Ка овен шукар мануша кола со ка грижинен пе башо адава (Пс. 45:16). Акала мануша ка овен водиме таро Исус хем о 144.000 со ка владинен леа. Замислин туке о време кеда са о лошна организацие ка овен замениме јекхе обединето организацијаја која со никогаш нане те руминѓовел!

10. Саве лошна буќа керена пе коте со живинеа ту хем сар влијајнена упри туте хем упри тли фамилија?

¹⁰ Сар влијајнена упри аменде о лошна буќа со керена пе? Живинаја ко свето коте со иси бут неморал, ховајбе хем насилство. О свето керела акала буќа те изглединен привлечна, а е Јеховаскере мерилија башо исправно хем погрешно те изглединен смешна (Иса. 5:20). О родителија мора бут те трудинен пе те шај те заштитинен пумаре чхавен таро влијание акале светоскоро. Са е Девлескере слуге ваљани бут те трудинен пе те шај те заштитинен пло амалипе е Јеховаја ко свето коте со на поштујнена лескере мерилија.

11. Со сикљоваја таро адава со о Јехова уништинѓа о Содом хем о Гомор?

¹¹ Со ка керел о Јехова е лошна буќенцар со керена пе? Размислин башо адава со керѓа о Јехова е лошна буќенцар со керена пе сине ко дизја Содом хем Гомор. (Читин 2. Петрово 2:6-8.) О Лот сине праведно мануш, леске хем лескере фамилијаке сине бут пхаро соске живинена сине машкар о мануша со керена бут лошна буќа. О Јехова уништинѓа цело адава тхан хем чхивѓа крајо е лошна буќенге со керена пе сине. Адалеа исто аѓаар, сикавѓа со ка овел е лошна манушенцар авдиве. Исто сар со керѓа тегани, авдиве да ка чхивел крајо е лошна буќенге кеда ка уништинел акава свето.

12. Кола буќа мангеа те кере лен кеда нане те овел акава свето?

¹² Солеа ка овен замениме о лошна буќа со керена пе? Ко нево свето, ка уживина ко бут буќа со ка керен амен бахтале. На пример, ка кера и Пхув рај, ка кера кхера аменге хем амаре мангленге. Исто аѓаар ка доџакера буте џенен со ка воскреснинен хем ка сикава лен башо Јехова хем башо са о буќа со керѓа лен е манушенге (Иса. 65:21, 22; Дела 24:15). Са адава време, ка кера буќа со ка керен амен бахтале хем ка анен фалба е Јеховаске!

13. Саво сине о резултати таро адава со бунинѓе пе о Сатана, о Адам хем и Ева?

¹³ Сар влијајнена упри аменде о лошна условија? О лошна мануша, о лошна организацие, хем о лошна буќа со керена пе анѓе џи ко адава те овен лошна условија ко свето. Сарине амен сием погодиме таро војне, чоролипе, расизам, насвалипе  хем мерибе. Акала лошна условија иси соске о Сатана, о Адам хем и Ева бунинѓе пе против о Јехова. Адалеске сарине амен трпинаја о последице.

14. Со ка керел о Јехова е лошна условенцар?

¹⁴ Со ка керел о Јехова е лошна условенцар? Ов денѓа лафи кај ка чхинавел о војне. (Читин Псалм 46:8, 9.) Ка цидел о насвалипе (Иса. 33:24). Ка уништинел о мерибе засекогаш (Иса. 25:8). Ка чхивел крајо е чоролипаске (Пс. 72:12-16). О Јехова ка цидел са о јавера да лошна условија кола со керена о живото те овел бут пхаро. Ов ка цидел чак о лошно влијание таро Сатана хем лескере демонија (Еф. 2:2).

15. Кола тане несаве буќа со нане те овен пало Армагедон?

¹⁵ Замислин туке сар ка овел те живине ко свето коте со нане те овел војне, насвалипе хем мерибе! Нане те овен војске, оружје, болнице, докторија хем гробија. Исто аѓаар, нане те овел криминал, адалеске нане те ваљанел аменге полиција, алармија, а шај ни браве ни кључија! Са акала лошна условија со керена те овел аменге пхаро нане више те овен.

16, 17. а) Сар ка осетинен пе адала со ка преживинен о Армагедон? Вакер пример. б) Со ваљани те кера те шај те ачхова џивде кеда ка овел уништимо акава лошно свето?

¹⁶ Саво ка овел о живото кеда нане те овен о лошна условија? Нане локхо те замислина. Добором бут време живинаја ко лошна условија, со шај ни на приметинаја кобор бут ола влијајнена упри аменде. Адава шај те споредина ле манушенцар со живинена узи железничко станица хем више на приметинена и галама. Или, манушенцар со живинена узо тхан коте со иси ѓубре хем више на осетинена о лошно мирис со авела адатхар. Ама, кеда о Јехова ка цидел са о лошна условија, тегани ка овел аменге бут полокхо!

¹⁷ Солеа ка овен замениме са о стресија со доживинаја лен акана? Ко Псалм 37:11 пишинела: „Ка уживинен ко баро мир“. Кобор тано утешно со џанаја кај о Јехова мангела аменге акава! Ко акава пхаро време, кер са со шај те ачхове паше е Јеховаја хем лескере организацијаја. Тли надеж баши иднина тани скапоцено, адалеске размислин хор баши лате, нека овел туке реално хем вакер е јаверенге баши лате (1. Тим. 4:15, 16; 1. Пет. 3:15). Аѓаар шај те ачхове џивдо кеда ка авел о крајо акале светоскоро, хем ка ове бахтало засекогаш!