О БИБЛИСКА писателија понекогаш повторинена сине о иста фразе таро лафи ко лафи. Те дикха трин причине соске шај керена сине адава:

О време кеда сине пишиме. Ко пурано Израел, бут таро мануша на сине лен пло лично примерок таро е Мојсеескоро закони. Единствено кај со шунена сине о читибе таро Закони сине кеда кхедена пе заедно англо шатори (5. Мој. 31:10-12). Бари тани и веројатност кај несаве буќа лена сине ленгоро внимание џикоте шунена хем саатенцар терѓона сине ки адаја бари гужва (Неем. 8:2, 3, 7). Ко асавке прилике, несаве важна фразе сине повториме те шај о народо полокхесте те памтинел о стихија хем те применинел лен. Адалеске со повторинена пе сине несаве лафија посебно поможинела лен сине те памтинен о деталија таро законија со денѓа лен о Јехова (3. Мој. 18:4-22; 5. Мој. 5:1).

Сар сине пишимо. Околу 10 посто таро тексти ки Библија тано гиља, коте сој вклучиме о Псалмија, Песна над Песните хем Плач Еремиин. Ко несаве гиља иси рефрени, јавере лафенцар, лафија со повторинена пе. Аѓаар шај сине те истакнинел пе и тема е гиљакири хем полокхесте те памтинен пе о лафија. На пример, приметин о лафија сој пишиме ко Псалм 115:9-11: „Ту Израел, нека овел тут доверба ко Јехова! Ов тано тли помош хем тло штити. Тумен со авена таро Арон, нека овел тумен доверба ко Јехова! Ов тано тумари помош хем тумаро штити. Тумен со дарана таро Јехова, нека овел тумен доверба ки лесте! Ов тано тумари помош хем тумаро штити“. Адава со повторинена пе акала лафија, поможинела сине е пејаченге те чхивен акала важна чачипа ки пумари годи хем ко пумаро вило.

Соске сине пишиме. О библиска писателија понекогаш повторинена сине о фразе кола со сине важна. На пример, кеда о Јехова заповединѓа е Израелцонге те на хан рат, ов вакерѓа е Мојсееске некобор пути те повторинел соске родела лендар адава. О Девел мангља те истакнинел кај о живото таро секова тело тано лескоро рат, јавере лафенцар кај о рат претставинела о живото (3. Мој. 17:11, 14). Покасно, кеда о старешине хем о апостолија ко Ерусалим пишинѓе таро со ваљани о христијања те аракхен пе те шај те керен адава со родела о Девел, ола палем истакнинѓе кај ваљани те воздржинен пе таро рат (Апо. 15:20, 29).

Иако и Библија повторинела несаве фразе, адава на значинела кај о Јехова мангела те овел амен навика те повторина о библиска фразе. На пример, о Исус вакерѓа: „Кеда молинена тумен ма вакерен секогаш о иста буќа“ (Мат. 6:7). Пало адава ов спомнинѓа несаве буќа коленге со шај те молина амен, а тане спрема е Девлескири волја (Мат. 6:9-13). Адалеске, иако амен на повторинаја о иста лафија ко амаре молитве, сепак адава на значинела кај на смејнаја те молина амен повише пути баши јекх исто бути (Мат. 7:7-11).

Иси шукар причине соске ко е Девлескоро лафи повторинена пе несаве лафија хем фразе. Акава тано јекх таро бут начинија сар амаро Баро Учители сикавела амен амаре шукарипаске (Иса. 48:17, 18).