1-2. Сар осетинена пе несаве џикоте тане ки врска?

 КЕДА дуј џене тане ки врска адава шај те овел радосно хем интересно периоди. Ако ко моменти сиан ки врска, сигурно мангеа те уживине ко адава. Хем бутенге адава тано радосно периоди. И Сиан, a јекх пхен тари Етиопија вакерела: „Јекх таро најрадосна периодија таро мло живото сине кеда сиум сине ки врска мле ромеа. Кераја сине лафи башо важна буќа, ама исто аѓаар асаја да сине заедно. Бут сиум сине среќно кеда халиљум кај аракхљум некас со мангава хем со мангела ман“.

² Тари јавер страна, о Алесио јекх пхрал тари Холандија вакерела: „Уживинава сине џикоте запознајнава мле ромња џикоте сием сине ки врска, ама исто аѓаар ко адава време сине амен хем предизвикија“. Ки акаја статија, ка дикха несаве предизвикија со шај те икљон адаленге сој ки врска хем несаве библиска начелија со шај те поможинен ленге. Исто аѓаар, ка дикха сар шај о јавера таро собрание те поможинен адаленге сој ки врска.

И ЦЕЛ ЈЕКХЕ ВРСКАКИРИ

3. Која тани и цел е врскакири? (Изреки 20:25).

³ И врска тани јекх шужо периоди ко живото, ама исто аѓаар ој тани јекх сериозно чекори со ингарела ко брако. Кеда венчинела пе, јекх пари дела завет англо Јехова кај ка манген пе хем ка поштујнен пе са џикоте о солдуј тане џивде. Англедер те да било саво завет, ваљани бут шукар те размислина башо адава. (Читин Изреки 20:25.) Аѓаар тано хем кеда дела пе завет башо брако. И врска поможинела дује џененге те запознајнен пе шукар хем те анен шукар одлука. Некогаш адаја одлука шај те значинел, те лен пе или те раскининен. Ако дуј џене сој ки врска, одлучинена те раскининен, адава на значинела кај  ленгири врска на сине успешно. Уствари, и цел е врскакири тани те поможинел ленге те хаљовен дали одговоринена песке или на.

4. Соске ваљани те овел амен исправно стави баши врска?

⁴ Соске тано важно адала со нане ко брако те дикхен исправно ки врска? Адалеске со ако иси лен исправно стави нане те почминен врска некасаја со нане лен намера те лен пе. Уствари, сарине ваљани те дикхен исправно ки врска, а на само адала со нане ко брако. На пример, несаве мислинена кај ако дуј џене тане ки врска, ко крајо ола мора те лен пе. Сар акава стави влијајнела упро окола со нане ко брако? И Мелиса, јекх беќарка таро САД вакерела: „Кеда јекх пхрал хем јекх пхен тане ки врска, несаве очекујнена ола те лен пе хем адава керела ленге баро притисок. Адалеске, несаве парија продолжинена те овен ки врска иако хаљовена кај на одговоринена песке. А јавера палем, ни на почминена врска. Асавко притисок шај те керел некаске баро стрес“.

ЗАПОЗНАЈНЕН ТУМЕН ШУКАР

5-6. Кола буќа ваљани те џанен јекх јекхеске окола сој ки врска? (1. Петарескоро 3:4).

⁵ Ако сиан ки врска, со шај те поможинел туке те одлучине дали те женине тут или на? Шукар запознајнен тумен јекх јекхеа. Веројатно англедер те почмине врска некасаја џанљан несаве буќа баши лате. Ама акана иси тут прилика те запознајне адава сој „гаравдо андре ко вило“ некаске. (Читин 1. Петарескоро 3:4.) Адава значинела те запознајне ла пошукар аѓаар со ка дикхе сар тани ко духовно поглед, саве особине иси ла хем баши со размислинела. Сар ка накхел о време, би ваљани те ове спремно те одговорине ко акала пучиба: „Дали акаја личност ка овел манге шукар брачно партнери?“ (Изр. 31:26, 27, 30; Еф. 5:33; 1. Тим. 5:8). „Дали сием спремна о солдуј те сикава аменге мангипе хем внимание кова со ваљани аменге? Дали сиум спремно те живинав е мааненцар со иси е јавере?“ b (Рим. 3:23). Џикоте запознајнена тумен јекх јекхеа, ма бистрен акава: Дали ка одговоринен туменге, на зависинела таро адава кобор сиен слична, него дали ка овен спремна те прифатинен о разлике со иси машкар туменде.

⁶ Кола јавера буќа ваљани те дознајне е јавереске џикоте сиен ки врска? Англедер те почминен бут те поврзинен тумен хем те овел тумен силна чувствија, веројатно ка манген  те керен лафи башо несаве важна буќа, сар на пример саве целија иси е јавере. Ама, сар тано несаве лична буќенцар сар сој састипаја, финансиска проблеменцар или несави траума со доживинѓа англедер? Нане потреба те керен лафи башо са о теме ко почеток тари врска. (Споредин Јован 16:12.) Ако мислинеа кај тано бут рано те одговорине ко несаве лична пучиба, вакер лаке адава. Сар ка накхел о време, о јавер мора те џанел адала буќа баши туке те шај те анел шукар одлука. Адалеске кеда-теј ка ваљани искрено те керен лафи башо адала буќа.

7. Сар шај пошукар те запознајнен пе адала сој ки врска? (Дикх хем и рамка „ Кеда сиан некасаја ки врска со живинела дур“.) (Дикх хем о слике.)

⁷ Сар шај те дознајне саво тано чаче некој? Јекх таро најшукар начинија тано аѓаар со искрено ка керен лафи, ка пучен пучиба хем пало адава шукар ка шунен (Изр. 20:5; Јак. 1:19). Те шај те керен адава, шај ка поможинел туменге ако керена несаве буќа заедно. Сар на пример, те хан заедно, те икљовен те пхирен ко јавна тхана хем те џан ки служба. Исто аѓаар, шај шукар те запознајнен тумен ако заедно накхавена време амаленцар хем е фамилијаја. Освен адава, планиринен те керен несаве буќа коленде со шај те дикхен сар о јавер постапинела ко различна околностија хем различна манушенцар. Приметин со трудинѓа пе те керел о Ешвин, тари Холандија. Баши пли врска е Алисијаја, ов вакерела: „Трудинѓем амен те кера заедно несаве буќа те шај те запознајна амен бут пошукар. Бут пути адала сине несаве едноставна буќа, сар на пример, те кера заедно хајбаске или несаве јавера кхерутне буќа. Џикоте кераја сине асавке буќа, шај сине те дикха о јака хем о слаба стране јекх јекхескере“.

8. Сар ка поможинел околенге сој ки врска адава со ка проучинен заедно?

⁸ Исто аѓаар, шај те запознајнен тумен јекх јекхеа ако заедно проучинена библиска теме. Јекх диве ако лена тумен, ка ваљани те одвинен време баши Фамилијарно рат е Јеховаске, те шај е Девле те овел ле важно тхан ко тумаро брако (Проп. 4:12). Адалеске, шај те одвинен туменге време те проучинен заедно панда џикоте сиен ки врска. Џанѓола пе, кеда дуј џене тане ки врска ола панда нане фамилија, а ни о пхрал нане поглавари е пхењаке. Ама, ако редовно проучинена, ка шај те дознајнен кобор о јавер тано паше е Јеховаја. О Макс хем и Лаиса, јекх брачно пари таро САД, вакерена ко саво јавер начин користинѓа ленге адава со  проучинена сине заедно. Ов вакерела: „Панда ко почеток тари врска, почминѓем те проучина публикацие коленде со керела пе лафи башо запознајбе, брако хем фамилијарно живото. Адала публикацие поможинѓе аменге те кера лафи башо бут важна теме коленге со обично нане локхо те керел пе лафи.

ЈАВЕРА БУЌА КОЛЕНГЕ СО ВАЉАНИ ТЕ РАЗМИСЛИНЕЛ ПЕ

9. Башо со ваљани те размислинен окола сој ки врска кеда одлучинена каске ка вакерен?

⁹ Каске ваљани те вакерен кај сиен ки врска? Адава ваљани тумен о дуј џене те одлучинен. Ко почеток тари врска, шај ка вакерен само несаве манушенге (Изр. 17:27). Аѓаар ка избегинен бут џене те пучен тумен баши тумари врска хем те керен туменге притисок те анен несаве одлуке. Тари јавер страна, ако на вакерена никаске, шај те овен ки опасност те гаравен тумен тари дар те на дикхен тумен о јавера. Адава нане те овел баш шукар. Адалеске, мудро ка овел те вакерен барем околенге со шај те ден тумен шукар совет или те поможинен тумен ко практично начин (Изр. 15:22). На пример, шај те вакерен некаске тари фамилија, несаве зрело амалеске или е старешиненге.

10. Со шај те керен окола сој ки врска те шај те ачховен морално чиста? (Изреки 22:3).

¹⁰ Сар шај те ачховен чиста ко морално поглед? Сар ка бајрон тумаре чувствија, нормално тано те манген те овен са попаше јекх јекхеа. Со шај те поможинел тумен те на керен нешто со ка разочаринел е Јехова? (1. Кор. 6:18). Ма керен лафи башо неморална буќа, пазинен ко адава те на ачховен коркори хем те пиен превише алкохол (Еф. 5:3). Асавке буќа шај те бајрарен тумаре сексуална желбе хем те керен туменге попхаро те керен адава сој исправно. Мудро ка овел ако редовно керена лафи башо адава саве границе те чхивен туменге те шај тумари врска те ачхол морално чисто. (Читин Изреки 22:3.) Те дикха со поможинѓа е Давидеске хем е Алмаке тари Етиопија. Ола вакерена: „Џаја сине ко тхана коте со иси бут мануша или сием сине ко друштво јаверенцар. Никогаш на сием сине коркори ко врда или ко кхер. Аѓаар, избегинаја сине ситуацие кола со шај те чхивен амен сине ко искушение“.

11. Башо кола буќа ваљани те размислинен окола сој ки врска кеда одлучинена саве постапкенцар ка сикавен песке мангипе хем нежност?

¹¹ Дали шај дуј џене сој тане ки врска те сикавен песке мангипе хем нежност? Сар со накхела о време, тумаре чувствија ка бајрон хем адалеске шај ка одлучинен те сикавен адала чувствија машкар туменде несаве постапкенцар сој прикладна (Песна 1:2; 2:6). Сепак, ако тумаре сексуална желбе овена силна, веројатно ка овел туменге попхаро те концентриринен тумен ко адава сој поважно, сар сој о особине е јаверескере. Исто аѓаар, кеда сикавена туменге мангипе хем нежност, шај локхе те нашавен самоконтрола хем те керен нешто со на свиџинела пе е Јеховаске (Изр. 6:27). Адалеске, панда ко почеток тари тумари врска, чхивен туменге јасна границе кола со темелинена пе ко библиска начелија c (1. Сол. 4:3-7). Сар пари, керен лафи башо акала пучиба: „Ако сикаваја аменге мангипе хем нежност, сар ка дикхен ко адава о мануша тари амари околина? Дали асавке постапке ка бајрарен сексуална желбе некаске амендар?“

12. Ако адален сој ки врска иси лен проблемија, баши кола буќа ваљани те размислинен?

¹² Со шај те поможинел туменге ако иси тумен проблемија хем ако на хаљовена тумен? Ако понекогаш на хаљовена тумен ко нешто, дали адава значинела кај на сиен јекх јекхеске? На ваљани те значинел. Са о парија  понекогаш иси лен несаве разлике машкар песте. Ко јекх шукар брако о ром хем и ромни поштујнена пе јекх јекхеа хем тане спремна те прилагодинен пе ко пумаре разлике. Значи, сар ка решинен тумаре проблемија панда џикоте сиен ки врска, ка сикавел дали тумаро брако ка овел успешно. Сар пари, керен лафи башо акала пучиба: „Кераја ли лафи смирено хем сикаваја ли поштовање? Дали одма признајнаја амаре грешке хем трудинаја амен те на кера лен више? Дали сигате попуштинаја, извининаја амен хем простинаја?“ (Еф. 4:31, 32). Ама, ако цело време акошена тумен хем иси тумен проблемија ки врска, веројатно и ситуација нане те овел пошукар откеда ка женинен тумен. Ако хаљовеа кај адаја личност нане туке, е солдујенге ка овел најшукар ако раскининена. d

13. Со шај те поможинел адаленге со запознајнена пе те одлучинен кобор време ка трајнел ленгири врска?

¹³ Кобор време ваљани те трајнел тумари врска? Ако анаја сигате одлуке, бут пути адава шај те анел аменге лошна последице (Изр. 21:5). Значи, тумари врска ваљани те трајнел добором кобор со ваљани туменге те шај шукар те запознајнен тумен. Ама, тари јавер страна на ваљани те трајнел повише таро адава сој потребно. И Библија вакерела: „Таро бут аџикерибе насваљовела о вило“ (Изр. 13:12). Освен адава, ако бут време сиен ки врска, ка овел туменге попхаро те боринен тумен против о искушение те на керен неморал (1. Кор. 7:9). Наместо те концентририне тут ко адава кобор време сиен ки врска, шај те пуче тут: „Со панда ваљани те дознајнав е јаверестар те шај те анав одлука?“

САР О ЈАВЕРА ШАЈ ТЕ ПОМОЖИНЕН АДАЛЕНГЕ СОЈ КИ ВРСКА

14. Сар шај о јавера те поможинен адаленге сој ки врска? (Дикх хем и слика.)

¹⁴ Ако џанаја кај некој тане ки врска, сар шај те поможина лен? Шај те викина лен те ха заедно, ки амари Фамилијарно рат или те икљова негде те дружина амен ки природа (Рим. 12:13). Ко асавке прилике ка шај те запознајнен пе пошукар. Шај те поможине ленге аѓаар со ка икљове ленцар, те возине тут ленцар ко врда или те викине лен туте кхере те шај те керен песке лафи (Гал. 6:10). И Алисија која со спомнинѓем ла англедер, сетинела пе сар лаке хем е Ешвинеске поможинѓе о јавера. Ој вакерела: „Бут значинѓа аменге адава со несаве пхраља хем пхења вакерѓе аменге кај шај те џа ки ленде кхере ако ваљани аменге тхан коте со  шај те ова заедно, а те на ова коркори“. Ако некој сој ки врска замолинела тут те ове ленцар, дикх ко адава сар прилика те поможине тле амаленге. Пазин те на мукхе лен те ачхон скроз коркори, ама исто аѓаар проценин кеда ваљани те циде тут хари лендар те шај те керен лафи башо лична буќа (Фил. 2:4).

15. Сар шај ко јавер начин о амала те поможинен адаленге сој ки врска? (Изреки 12:18).

¹⁵ Јавер начин сар шај те поможина адаленге сој ки врска тано аѓаар со ка пазина со ка вакера а со нане те вакера. Некогаш, ка ваљани те овел амен самоконтрола. (Читин Изреки 12:18.) На пример, шај едвај ка аџикера те вакера кај некој почминѓа врска, ама шај ола ка манген те вакерен адава е јаверенге. На ваљани те оговорина адален сој ки врска а ни те критикујна лен башо несаве лична буќа (Изр. 20:19; Рим. 14:10; 1. Сол. 4:11). Освен адава, на ваљани те вакера несаве буќа или те пуча несаве пучиба кола со ка керен ленге притисок те женинен пе. Јекх пхен која со викинела пе Елиса, пле ромеа вакерена: „Сине аменге незгодно кеда о јавера пучена амен сине кеда ка овел о бијав хем сар ка овел о бијав, а амен панда на керѓем лафи башо адава“.

16. Сар ваљани те реагирина ако некој сој ки врска раскининела?

¹⁶ Со ако адала сој ки врска одлучинена те раскининен? На ваљани те пуча лична пучиба или те кривина јекхе лендар башо адава со завршинѓа и врска (1. Пет. 4:15). Јекх пхен со викинела пе Лија, вакерела: „Шунава сине сар о јавера ширинена лафија соске ме хем јекх пхрал раскининѓем. Адава бут дукхавѓа ман“. Сар со спомнинѓем ко почеток, ако несаво пари одлучинела те раскининел, адава на значинела кај и врска на сине успешно. Обично адава значинела кај и врска исполнинѓа пли цел — поможинѓа ленге те анен исправно одлука. Сепак, адаја одлука шај некас те дукхавел хем те керел те осетинел пе коркори. Адалеске ваљани те размислина сар шај те поможина лен (Изр. 17:17).

17. Со ваљани те керен понадари да окола сој ки врска?

¹⁷ Сар со дикхлем, ки врска шај те овен предизвикија, ама хем адава шај те овел периоди коте со шај те уживинел пе. И Џесика вакерела: „Искрено, џикоте сием сине ки врска, ваљани сине бут те трудина амен. Ама, исплатинѓа пе са о време хем и сила со денѓем те шај те запознајна амен пошукар“. Ако сиан некасаја ки врска, о солдуј ден тумендар са те шај понадари да шукар те запознајнен тумен. Ако керена аѓаар, ка овел тумен успешно врска, а адава ка поможинел тумен те анен мудро одлука.