1. Кола тане несаве поклонија со добинѓем лен таро Исус?

 АНЕ мануш кова со сине добором дарежливо сар о Исус. Џикоте сине ки пхув, о Исус бут пути поможинѓа е манушенге аѓаар со керѓа чудија (Лука 9:12-17). А о најбаро поклон лестар тано адава со денѓа пло живото аменге (Јован 15:13). О Исус понадари да сине дарежливо чак откеда воскреснинѓа. Баш сар со ветинѓа, ов молинѓа е Јехова те дел пли сила те шај те сикавел амен хем те утешинел амен (Јован 14:16, 17, фус.; 16:13). А преку о состанокија о Исус понадари да обучинела амен те кера ученикија ко цело свето (Мат. 28:18-20).

2. Ки касте мислинела пе е лафенцар мануша „сар поклон“ сој спомниме ко Ефешања 4:7, 8?

² Те дикха панда јекх поклон таро Исус. О апостол Павле пишинѓа кај откеда о Исус гело ко небо денѓа манушен „сар поклон“. (Читин Ефешања 4:7, 8.) О Павле објаснинѓа кај о Исус денѓа манушен „сар поклон“ те шај те поможинен ко собрание ко различна начинија (Еф. 1:22, 23; 4:11-13). Авдиве, ко акала мануша „сар поклон“ тане вклучиме о слуга-помошникија, о старешине ко собрание хем о покраинска надгледникија. a Џанѓола пе, акала пхраља нане совршена хем керена грешке (Јак. 3:2). Ама амаро Господари о Исус Христос користинела лен те шај те поможинен амен. Ола тане аменге поклон лестар.

3. Објаснин сар шај сарине те поддржина адава со керена о мануша сој денде „сар поклон“.

³ О Исус чхивѓа акале манушен сој сар поклонија те шај те зајакнинен о собрание (Еф. 4:12). Сарине амен шај те поможина  те шај те керен акаја важно одговорност. Размислин башо акава: несаве амендар тане директно вклучиме кеда градинела пе јекх дворана. Јавера поддржинена акаја бути аѓаар со керена хајбаске, поможинена ко транспорт хем ко јавера буќа. Слично, сарине амен шај те поддржина е слуга-помошникон, е старешинен ко собрание хем е покраинска надгледникон адалеа со вакераја хем со кераја. Те дикха сар користинела аменге ленгири вредно служба хем сар шај те сикава хем ленге хем е Исусеске, кова со денѓа акале манушен „сар поклон“, кај ценинаја лен.

О СЛУГА-ПОМОШНИКИЈА ПОМОЖИНЕНА Е ЈАВЕРЕНГЕ

4. Ко саве начинија поможинена сине о слуга-помошникија ко прво веко?

⁴ Ко прво веко, несаве пхраља сине именујме те служинен сар слуга-помошникија (1. Тим. 3:8). Изгледа кај ола тане адала со поможинѓе е јаверенге, колен со о Павле спомнинѓа ко 1. Коринќања 12:28. Јасно тано кај о слуга-помошникија грижинена пе сине башо повише буќа сој важна хем практична, те шај о старешине те концентриринен пе ко сикајбе хем ки пастирско грижа. На пример, шај о слуга-помошникија поможинена сине те керен пе копие таро света списија или шај кинена сине о материјали со ваљанела сине адале буќаке.

5. Ко саве начинија поможинена о слуга-помошникија авдиве?

⁵ Размислин сар поможинена о слуга-помошникија ко тло собрание (1. Пет. 4:10). Лен шај иси лен задача те поможинен ко сметководство, ко подрачја, ки литература, ко аудио-видео, те служинен сар редарија или те одржинен и дворана. Са акава ваљанела те шај о собрание те функциониринел шукар (1. Кор. 14:40). Освен адава, несаве слуга-помошникон иси лен точке ко состанок Амаро живото хем служба хем икерена јавна говорија. Исто аѓаар, јекх слуга-помошнико шај те овел помошнико е надгледникоске ки несави група. А понекогаш, несаве слуга-помошникија џана е старешиненцар ко пастирска посете.

6. Кола тане несаве причине соске ценинаја амаре буќарне слуга-помошникон?

⁶ Сар адава со керена о слуга-помошникија користинела е јаверенге ко собрание? Јекх пхен тари Боливија со викинела пе Беберли, b вакерела: „Адалеске со амаре слуга-помошникија керена бут бути, шај целосно те уживинав ко состанокија. Шај те гиљавав, те коментиринав, те шунав о говорија хем те сикљовав таро видеоклипија хем слике. Ола грижинена пе баши безбедност е пхраленгири сој ки дворана хем околенге сој ко состанок преку видеоконференција. Пало состанок ола поможинена ко чистибе, те кхеден пе о прилогија хем ки литература. Благодарно сиум со иси амен асавке пхраља!“ И Лесли, која со живинела ки Колумбија хем колакоро ром тано старешина, вакерела: „Ме ромеске ваљани и помош таро слуга-помошникија. Бизи ленде ов ка овел панда позафатимо хем адалеске сиум благодарно баши ленгири ревност хем спремност те поможинен“. Сигурно ту да осетинеа тут аѓаар (1. Тим. 3:13).

7. Сар шај те сикава кај сием благодарна е слуга-помошниконге? (Дикх хем и слика.)

⁷ И Библија поттикнинела амен: „Овен благодарна!“ (Кол. 3:15). Освен со осетинаја благодарност башо трудо е слуга-помошниконгоро, исто аѓаар тано бут важно хем те сикава адава. О Кристофер, јекх старешина тари Финска, вакерела сар ов сикавела пли благодарност: „Бичхалава картичка или  порака колате со цитиринава несаво стихо хем вакерава ко саво конкретно начин охрабринѓа ман о слуга-помошнико или соске ценинава лескири служба“. О Паскал хем и Јаила, кола со живинена ки Нова Каледонија, конкретно молинена пе башо слуга-помошникија. О Паскал вакерела: „Ко последно време бут молинаја амен башо амаре слуга-помошникија, благодаринаја амен е Јеховаске баши ленде хем молинаја ле те овел ленцар хем те поможинел лен“. О Јехова шунела асавке молитве хем адава бут користинела цело собраниеске (2. Кор. 1:11).

О СОБРАНИСКА СТАРЕШИНЕ БУТ ТРУДИНЕНА ПЕ

8. Соске о Павле шај сине те вакерел кај о старешине таро прво веко бут трудинѓе пе? (1. Солунјања 5:12, 13).

⁸ О старешине ко прво веко бут трудинѓе пе башо собрание. (Читин 1. Солунјања 5:12, 13; 1. Тим. 5:17.) Ола предводинена сине ко собрание — водинена сине о состанокија хем анена сине одлуке сар старешинство. Ола исто аѓаар мангипаја дена сине конкретна советија е пхраленге хем е пхењенге те шај те заштитинен о собрание (1. Сол. 2:11, 12; 2. Тим. 4:2). Џанѓола пе, акала пхраља керена сине бути да те шај те грижинен пе башо пумаре фамилие хем те ачховен духовно зорале (1. Тим. 3:2, 4; Тит 1:6-9).

9. Кола тане несаве одговорностија со иси е старешинен авдиве?

⁹ О старешине авдиве тане бут зафатиме. Ола тане проповедникија (2. Тим. 4:5). Ревно предводинена ки служба, организиринена о проповедибе ко пумаро подрачје хем обучинена амен шукар те проповедина хем те сикава. Ола исто аѓаар служинена сар милостива хем непристрасна судие. Кеда некој таро собрание ка керел сериозно грево, о старешине трудинена пе те поможинен леске палем те овел амал е Јеховаја. Ама хем исто пазинена о собрание те ачхол чисто (1. Кор. 5:12, 13; Гал. 6:1). Ама најангле, о старешине тане пастирија (1. Пет. 5:1-3). Ола икерена шукар спремиме библиска говорија, трудинена пе те запознајнен секоле јекхе таро собрание хем керена пастирска посете. Иако иси лен бут задаче, несаве таро старешине поможинена ко градибе хем одржибе о дворане, учествујнена ко организирибе конгресија хем служинена ко Одборија со поможинена машкар о докторија хем е Јеховаскере сведокија хем ко Групе со посетинена е пациентен. О старешине бут трудинена пе аменге!

10. Кола тане несаве причине соске ценинаја амаре буќарне старешинен?

¹⁰ О Јехова пророкујнѓа кај ка овен пастирија кола со шукар ка грижинен пе аменге хем кај таро ништо повише нане те дара (Ерем. 23:4). И Јохана, јекх пхен тари Финска, осетинѓа ки пли кожа акала лафија кеда лакири дај бут насвалили. Ој вакерѓа: „Иако манге пхаро те керав лафи е јаверенцар башо адава сар осетинава ман, јекх старешина коле со на џанава ле сине бут шукар, сине манцар стрпливо, молинела пе сине манцар хем уверинѓа ман кај о Јехова мангела ман. На памтинава со точно вакерѓа, ама сетинава ман кај осетинѓум ман сигурно. Уверими сиум кај о Јехова поттикнинѓа ле те поможинел ман баш ко право моменти“. Сар поможинѓе туке о старешине таро тло собрание?

11. Сар шај те сикава амари благодарност е старешиненге? (Дикх хем и слика.)

¹¹ О Јехова мангела таро вило те сикава амари благодарност е старешиненге „баши ленгири бути“ (1. Сол. 5:12, 13). И Хенриета која со исто аѓаар живинела ки Финска, вакерела: „О старешине тане спремна те поможинен,  ама адава на значинела кај иси лен одвише време хем сила, или кај нане лен пумаре проблемија. Понекогаш само вакерава ленге: ’Џанеа со, ту сиан чаче шукар старешина. Само мангљум те џане адава‘“. Јекх пхен таро Кхоранипе со викинела пе Сара, вакерела: „Е старешиненге ваљани ’гориво‘ те шај те продолжинен понадари. Адалеске шај те пишина ленге картичка, те викина лен ко ручко или те џа ленцар ки служба“. Иси ли несаво старешина колеске со посебно сиан благодарно башо адава со керела ко собрание? Роде начинија сар шај те сикаве тло ценење (1. Кор. 16:18).

О ПОКРАИНСКА НАДГЛЕДНИКИЈА ЗОЈРАКЕРЕНА О СОБРАНИЈА

12. Преку касте сине охрабриме о собранија ко прво веко? (1. Солунјања 2:7, 8)

¹² О Христос денѓа манушен сар поклонија кола со служинена е собраниенге ко јекх јавер начин. Ов водинѓа е старешинен ко Ерусалим те бичхален е Павле, е Варнава хем јаверен сар патувачка надгледникија (Апо. 11:22). Соске? Тари исто причина баши која со сине именујме о слуга-помошникија хем о старешине — те керен позорале о собранија (Апо. 15:40, 41). Акала пхраља керена сине бут жртве, па чак ризикујнена сине пумаро живото те шај те сикавен хем те охрабринен е јаверен. (Читин 1. Солунјања 2:7, 8.)

13. Кола тане несаве одговорностија со иси е покраинска надгледникон?

¹³ О покраинска надгледникија ваљани бут те патујнен. Несаве, те шај те ресен таро јекх џи ко јавер собрание, ваљани саатенцар те патујнен. Секова курко о покраинско надгледнико икерела некобор говорија, џала ко пастирска посете, иси ле состанок е пионеренцар, е старешиненцар хем водинела состанокија службаке. Ов спреминела  говорија хем организиринела конгресија. Служинела сар инструктори ки Школа башо пионерија, спреминела посебно состанок е пионеренцар ки покраина хем керела јавера важна, а понекогаш хем итна задаче кола со дела ле и подружница.

14. Кола тане несаве причине соске ценинаја амаре буќарне покраинска надгледникон?

¹⁴ Сави корист иси е собраниен тари скапоцено служба е покраинско надгледниконгири? Јекх пхрал таро Кхоранипе башо посете е покраинско надгледниконгере, вакерела: „Пали секоја посета сиум панда поохрабримо те накхав повише време мле пхраленцар хем пхењенцар те шај те поможинав ленге. Запознајнѓум буте покраинска надгледникон, ама нијекх лендар никогаш на денѓа ман чувство кај тано бут зафатимо или кај на мангела те керел манцар лафи“. И Јохана кола со спомнинѓем ла англедер, сине ки служба јекхе покраинско надгледникоја ама на аракхле никас кхере. Ој вакерела: „Сепак, никогаш нане те бистрав адава диве. Мле солдуј пхења само со селинѓе пе кхералдан хем бут фалинена сине манге. О покраинско надгледнико бут охрабринѓа ман хем поможинѓа манге те хаљовав кај авдиве о дурипе тано само привремено, ама ко нево свето ка овен амен бут прилике те накха време заедно“. Слично, авдиве бут џене ценинена е покраинска надгледникон баши помош со добинѓе ла лендар (Апо. 20:37 — 21:1).

15. а) Спрема 3. Јованескоро 5-8, сар шај те сикава благодарност е покраинско надгледниконге? (Дикх хем и слика.) б) Соске ваљани те сикава кај ценинаја е именујме пхраленгере ромњен, хем сар шај те кера адава? (Дикх и рамка  Ценин ленгере ромњен.)

¹⁵ О апостол Јован поттикнинѓа е Гаје те сикавел гостопримство е пхраленге со патујнена сине хем те „испратинел лен ко начин сар со личинела е Девлескере слугенге“.  (Читин 3. Јованескоро 5-8.) Јекх начин сар шај амен те кера адава тано аѓаар со ка канина е покраинско надгледнико ко ручко. Јавер начин тано аѓаар со ка џа ко состанокија службаке кеда иси посета. И Лесли, кола со спомнинѓем ла англедер, сикавела пли благодарност ко јавера да начинија. Ој вакерела: „Молинава е Јехова те грижинел пе башо ленгере потребе. Ме хем мо ром пишинѓем ленге писмија коленде со вакерѓем ленге кобор бут поможинѓе аменге ленгере посете“. Ма бистре, о покраинска надгледникија да тане мануша сар аменде. Понекогаш мучинена пе насвалипаја, секирациенцар, па чак хем обесхрабринена пе. Шај тле љубезна лафија или јекх скромно поклон ка овен одговор ки молитва тле покраинско надгледникоскири (Изр. 12:25).

ВАЉАНЕНА АМЕНГЕ МАНУША „САР ПОКЛОН“

16. Спрема Изреки 3:27, башо кола пучиба шај о пхраља те размислинен?

¹⁶ Ко цело свето ваљанена са повише пхраља кола со ка овен мануша „сар поклон“. Ако сиан крстимо пхрал, дали шај те служине ко асавко начин? (Читин Изреки 3:27.) Дали мангеа те пхере о условија те шај те служине сар слуга-помошнико? Дали сиан спремно те трудине тут те грижине тут башо е пхраленгере потребе сар старешина? c Дали шај те кере промене ко тло живото те шај те пхере и молба баши Школа башо полновремена објавителија? И обука тари адаја школа ка спреминел тут те шај о Исус те користинел тут ки панда побари мера. Ако мислинеа кај ту на сиан способно башо акала буќа, молин тут е Јеховаске. Роде лескири сила те шај те поможинел тут успешно те кере секоја задача сој туке денди (Лука 11:13; Апо. 20:28).

17. Со сикавена о мануша сој „сар поклон“ башо амаро Цари о Христос Исус?

¹⁷ О пхраља колен со о Исус чхивѓа те овен мануша „сар поклон“ тане доказ кај ов водинела амен ко акала последна диве (Мат. 28:20). На сиан ли благодарно со иси амен Цари кова сој пхердо мангипаја, дарежливо хем свесно башо амаре потребе хем кова со дела амен пхраља со поможинена амен? Адалеске, роде прилике те сикаве тли благодарност акале буќарне пхраленге. Хем никогаш ма бистре те благодарине е Јеховаске, „кастар со авела секова шукар хем совршено поклон“ (Јак. 1:17).