1-2. а) Соске шај те ова увериме кај никогаш на сием коркори кеда иси амен неволје? б) Со ка дикха ки акаја статија?

 КЕДА иси амен пхаре неволје, шај осетинаја амен сар ка пхене сием скроз коркори ко јекх тикно чамцо, ко море коле со иси ле бут бранија. Ама, амен на сием бизи помош. Амаро небесно Дад со грижинела пе аменге, на само со приметинела амаре неволје него хем ветинела кај ка поможинел амен те борина амен ленцар. Пле верна слугенге о Јехова мангипаја дела акава ветување: „Ме... ка поможинав туке“ (Иса. 41:10).

² Ки акаја статија ка дикха сар о Јехова поможинела амен ко штар начинија: 1) водинела амен, 2) дела амен адава со ваљани аменге, 3) аракхела амен хем 4) утешинела амен. О Јехова уверинела амен кај бизи разлика саве пхарипа иси амен ко живото, ов никогаш нане те бистрел амен. Никогаш нане те мукхел амен. Адалеске, амен на сием никогаш коркори.

О ЈЕХОВА ВОДИНЕЛА АМЕН

3-4. Сар о Јехова водинела амен? (Псалм 48:14).

³ Читин Псалм 48:14. О Јехова водинела амен соске џанела кај амен нашти бизо лескоро водство. Сар ов водинела пле верна слуген авдиве? Јекх начин тано преку и Библија (Пс. 119:105). Преку пло Лафи, о Јехова поможинела аменге те ана одлуке хем те овен амен особине кола со ка керен амен посреќна панда авдиве хем кола со ка поможинен аменге те живина вечно ки иднина. a На пример, ов сикавела амен те на икера холи, те ова чесна ко са со кераја хем те манга е јаверен цело вилеа (Пс. 37:8; Евр. 13:18; 1. Пет. 1:22). Асавке шукар особине поможинена аменге те ова пошукар родителија, брачна партнерија хем амала.

⁴ Освен адава, о Јехова мукхља ки Библија те овен пишиме  извештаија башо мануша колен со сине лен слична неволје хем чувствија сар амаре (1. Кор. 10:13; Јак. 5:17). Кеда читинаја адала извештаија хем применинаја о поуке лендар, адава користинела аменге најхари ко дуј начинија. Прво, хаљоваја кај на сием коркори соске јавера да сине ко слична ситуацие хем успејнѓе те истрајнен (1. Пет. 5:9). Хем дујто, сикљоваја сар шај успешно те икљова ко крајо амаре неволјенцар (Рим. 15:4).

5. Кас користинела о Јехова те шај те водинел амен?

⁵ Исто аѓаар, о Јехова водинела амен преку амаре пхраља хем пхења. b На пример, о покраинска надгледникија редовно посетинена о собранија те шај те охрабринен амен. Ленгере говорија бајрарена амари вера хем поможинена аменге те аракха амаро скапоцено јекхипе (Апо. 15:40 — 16:5). О старешине да ко собрание тане искрено заинтересириме башо шукарипе секоле објавителескоро (1. Пет. 5:2, 3). О родителија сикавена пумаре чхавен те манген е Јехова, те сикљон те анен мудра одлуке хем те овен лен шукар навике (Изр. 22:6). А о зрела христијанке поможинена е потерне пхењенге аѓаар со дена лен шукар пример, дена лен практична советија хем охрабринена лен (Тит 2:3-5).

6. Со мора амен те кера те шај те овел амен корист таро е Јеховаскоро водство?

⁶ О Јехова керѓа пло дело аѓаар со денѓа амен о водство со ваљани аменге. Сар шај амен те сикава кај сием благодарна башо адава? Ко Изреки 3:5, 6 вакерела: „Нека овел тут доверба ко Јехова цело вилеа хем те на овел тут доверба ко тло хаљојбе“. Ако кераја адава, „ов ка испрајнел [амаре] друмија“, јавере лафенцар ка поможинел аменге те избегина бут проблемија хем те овел амен посреќно живото. Кобор сием благодарна со о Јехова таро мангипе дела советија со ваљани секоле јекхеске амендар! (Пс. 32:8).

О ЈЕХОВА ДЕЛА АМЕН АДАВА СО ВАЉАНИ АМЕНГЕ

7. Сар о Јехова дела амен адава со ваљани аменге? (Филипјања 4:19).

⁷ Читин Филипјања 4:19. Освен со водинела амен, о Јехова благословинела амен кеда трудинаја амен те овел амен хајбаске, урајбаске хем тхан живибаске (Мат. 6:33; 2. Сол. 3:12). Иако тано нормално те секирина амен башо амаре физичка потребе, о Јехова поттикнинела амен те на ова превише секириме башо адава (Мат. 6:25). Соске? Адалеске со амаро Дад никогаш нане те мукхел амен, посебно кеда ваљани аменге нешто (Мат. 6:8; Евр. 13:5). Шај те овел амен целосно доверба кај ов ка ачхол ко пло лафи кеда вакерела кај ка грижинел пе башо амаре потребе.

8. Со керѓа о Јехова е Давидеске?

⁸ Размислин ко саво начин о Јехова поможинѓа е Давидеске. Ко са адала пхаре берша џикоте о Давид мора сине те нашел, леске хем лескере слугенге о Јехова денѓа адава со ваљанѓа ленге те шај те преживинен. Кеда размислинѓа сар о Јехова грижинѓе пе леске ко са адала берша, о Давид пишинѓа: „Сиум сине терно хем пхуриљум, ама никогаш на дикхљум о праведнико те овел мукхло, ни лескере чхаве те манген мареске“ (Пс. 37:25). Ко тло живото џи акана, веројатно ту да дикхљан сар о Јехова мангипаја грижинела пе башо пле верна слуге.

9. Сар о Јехова авдиве грижинела пе башо потребе пле народоскере кеда иси несави катастрофа? (Дикх хем о слике.)

 ⁹ О Јехова исто аѓаар грижинела пе башо потребе пле народоскере кеда случинела пе несави катастрофа. На пример, кеда ко прво веко сине бокхалипе, о христијања таро разна тхана бичхалѓе материјално помош е пхраленге хем е пхењенге со сине ки пхари ситуација (Апо. 11:27-30; Рим. 15:25, 26). Е Девлескоро народо авдиве тано исто аѓаар дарежливо. Кеда иси несави катастрофа, о Јехова мангипаја поттикнинела пле слуген те ден о основна буќа, сар сој хајбе, пани, шеја хем иљачија е пхраленге коте со случинѓа пе и катастрофа. О тимија баши изградба поправинена о кхера сој оштетиме хем о дворане. Освен адава, е Јеховаскере слуге трудинена пе одма те ден утеха хем охрабрување околенге со нашавѓе пумаре кхера или пумаре манглен. c

10-11. Со сикљовеа таро е Борисескоро искуство?

¹⁰ О Јехова исто аѓаар спремно грижинела пе башо потребе околенгере кола со панда на служинена леске. Амен да родаја прилике те сикава шукарипе околенге со на верујнена ко иста буќа сар аменде (Гал. 6:10). Адава бут пути дела амен прилика те да шукар сведоштво. Размислин башо Борис, директори ки јекх школа кова со живинела ки Украина. Иако нане е Јеховаскоро сведоко, ов секогаш понашинела пе сине љубезно е учениконцар со сине Сведокија хем сикавела сине поштовање башо ленгере верувања. Кеда о Борис одлучинѓа те нашел  таро тхан коте со живинела сине адалеске со сине војна хем те џал ко побезбедно дело тари држава, амаре пхраља поможинѓе леске. Покасно, о Борис гело ки Спомен-свеченост башо е Исусескоро мерибе. Башо адава со о пхраља бут поможинѓе ле, о Борис вакерела: „О Сведокија сине бут љубезна хем грижинѓе пе манге. Благодарно сиум е Јеховаскере сведоконге“.

¹¹ Сарине амен шај те џа пало пример амаре милостиво небесно Дадескоро, аѓаар со ка сикава мангипе спрема окола со иси лен несави потреба, бизи разлика дали тане амаре пхраља или на (Лука 6:31, 36). Надинаја амен кај о мангипе со сикаваја ле е манушенге ка анел џи ко адава јекх диве те овен е Христосескере ученикија (1. Пет. 2:12). Ама бизи разлика дали ка случинел пе адава или на, амен ка осетина и радост со авела таро дејбе (Апо. 20:35).

О ЈЕХОВА АРАКХЕЛА АМЕН

12. Сави заштита ветинела о Јехова пле народоске сар група? (Пс. 91:1, 2, 14).

¹² Читин Псалм 91:1, 2, 14. Авдиве, о Јехова ветинела кај ка аракхел амен ко духовно поглед. Ов никогаш нане те мукхел о Сатана те мељарел о чисто обожавибе (Јован 17:15). А џикоте ка трајнел и „бари неволја“, шај те овел амен целосно доверба кај о Јехова ка исполнинел адава со ветинѓа — ка аракхел пле народо на само ко духовно него хем ко физичко поглед (Отк. 7:9, 14).

13. Ко саве начинија о Јехова аракхела секоле јекхе лично?

¹³ Сар о Јехова аракхела секоле јекхе лично? Преку и Библија о Јехова поможинела амен те хаљова сој исправно, а сој погрешно (Евр. 5:14). Кеда живинаја спрема о начелија таро е Девлескоро Лафи, амен сием заштитиме таро буќа кола со шај те анен аменге штета ко духовно или ко физичко поглед (Пс. 91:4). Исто аѓаар, о Јехова аракхела амен преку о собрание (Иса. 32:1, 2). Кеда сием манушенцар кола со мангена е Јехова хем кола со живинена спрема лескере начелија, амен сием охрабриме хем иси амен сила те борина амен против о лошно влијание (Изр. 13:20).

14. а) Соске о Девел на аракхела амен таро са о неволје? б) Ко со уверинела амен о Псалм 9:10? (Дикх хем и фуснота.)

¹⁴ Ко пурано време, о Јехова понекогаш аракхела сине пле слуген ко физичко поглед. Ама на керела сине адава секогаш. Тари Библија дознајнаја кај секоле јекхеске амендар шај те случинен пе „буќа со нашти те предвидинен пе“ (Проп. 9:11). Освен адава, о Јехова дозволинѓа несаве таро лескере слуге те доживинен прогонство па чак хем мерибе, те шај те докажинел пе кај о Сатана ховавела (Јов 2:4-6; Мат. 23:34). Исто тано авдиве да. Шај о Јехова нане те цидел амаре неволје, ама шај те ова сигурна кај ов никогаш нане те мукхел околен со мангена ле d (Пс. 9:10).

О ЈЕХОВА УТЕШИНЕЛА АМЕН

15. Сар добинаја утеха преку и молитва, е Девлескоро Лафи хем о пхраља? (2. Коринќања 1:3, 4).

¹⁵ Читин 2. Коринќања 1:3, 4. Понекогаш, осетинаја амен бут тажна, секириме или вознемириме. Шај ко моменти накхеа тари несави ситуација која со керела те осетине тут скроз коркори. Дали некој хаљола сар осетинеа тут? Оја, о Јехова. Ов на само со осетинела амари дукх него хем „дела амен утеха ки секоја амари неволја“. Сар? Кеда молинаја амен е Јеховаске таро вило, ов дела амен „о мир таро Девел,  кова сој упредер таро адава со шај о мануш те хаљол“ (Фил. 4:6, 7). Исто аѓаар, утеха аракхаја кеда ки Библија читинаја о лафија кола со о Јехова вакерела лен аменге. Преку ленде, о Јехова сикавела аменге кобор бут мангела амен, сикавела амен сар те ова мудра хем дела амен надеж. Утеха добинаја хем ко амаре состанокија коте со сикљоваја шукар буќа тари Библија хем сием заедно амаре пхраленцар хем пхењенцар кола со мангена амен.

16. Со сикљовеа таро Натан хем тари Присила?

¹⁶ Те шај те дикха сар о Јехова утешинела амен хем охрабринела амен преку пло Лафи, те дикха о искуство е Натанескоро хем е Присилакоро, кола со живинена ки Америка. Англедер некобор берша, ола одлучинѓе те селинен пе ко тхан коте со иси побари потреба таро објавителија. О Натан вакерела: „Сине амен доверба кај о Јехова ка благословинел амаро трудо“. Ама откеда ресле адатхе, бизо те очекујнен сине лен проблемија састипаја хем финансиска проблемија. Пало несаво време, ола мора сине те иранен пе кхере, коте со понадари да на сине шукар ко финансиско поглед. О Натан вакерела: „Пучава ман сине соске о Девел на благословинѓа амен аѓаар сар со очекујнѓем. Чак почминѓум те мислинав кај керѓум нешто погрешно“. Ама сар со накхела сине о време, о Натан хем и Присила халиле кај о Девел на мукхља лен. „Ко адава пхаро периоди и Библија ули аменге сар јекх мудро амал кова со дела амен сине охрабрување хем водство“, вакерела о Натан. „Адава со концентриринѓем амен ко начин сар о Јехова поможинѓа аменге те истрајна, а на ки неволја, поможинѓа амен те ова спремна вераја те издржина о проблемија со ка овен амен ки иднина.“

17. Сар јекх пхен со викинела пе Хелга добинела сине утеха? (Дикх хем и слика.)

¹⁷ О Јехова исто аѓаар шај те дел амен утеха преку о пхраља хем о пхења. Сар? Те дикха о пример е Хелгакоро, која со живинела ки Унгарија. Ој бершенцар боринела пе  сине разна предизвиконцар кола со керена сине те осетинел пе вознемирими хем кај на врединела. Ама кеда сетинела пе ко адава со накхља, ој шај те дикхел сар о Јехова утешинѓа ла преку о собрание. И Хелга вакерела: „О Јехова секогаш поможинела манге сине кеда ка приметинел кај на сине ман више силе адалеске со керава сине бути, грижинава ман сине мле насвале чхавеске хем сине ман јавера проблемија. Ко акала 30 берш на сине диве те на исполнинел пло ветување те утешинел ман. Ов бут пути дела ман сине сила преку о љубезна, бириме хем охрабрувачка лафија таро јавера. Бут пути добинава сине несави порака, картичка или пофалба баш тегани кеда адава највише ваљани сине манге“.

18. Сар шај те утешина е јаверен?

¹⁸ Амен иси амен чест те џа пало пример амаре Девлескоро аѓаар со ка утешина е јаверен. Сар шај те кера адава? Шај стрпливо те шуна лен, те вакера ленге утешна лафија хем те поможина ленге ко практична начинија (Изр. 3:27). Трудинаја амен те утешина саринен со иси лен муке, чак околен со панда на служинена е Девлеске. Кеда амаре пашутне тане бут тажна, тане насвале или секириме, амен посетинаја лен, шунаја лен хем кераја ленцар лафи башо охрабрувачка стихија тари Библија. Кеда џаја пало е Јеховаскоро пример, „о Девел секоле утехакоро“, на само со шај те поможина амаре пхраленге хем пхењенге те истрајнен ко неволје него хем шај те ковљара о вило е јавере манушенгоро те шај те овен поспремна те шунен о хабери (Мат. 5:16).

О ЈЕХОВА СЕКОГАШ КА ПОМОЖИНЕЛ АМЕН

19. Со керела о Јехова аменге, хем сар шај те џа пало лескоро пример?

¹⁹ О Јехова бут грижинела пе сариненге со мангена ле. Ов на мукхела амен кеда аменге пхаро. О Јехова грижинела пе башо пле верна слуге исто сар со јекх родители мангипаја грижинела пе пле чхавеске. Ов водинела амен, дела амен адава со ваљани аменге, аракхела амен хем утешинела амен. Амен џаја пало пример амаре мангле небесно Дадескоро кеда поддржинаја хем охрабринаја околен со иси лен неволје. Иако шај ка овен амен пхарипа хем дукха, шај те ова сигурна кај о Јехова тано аменцар. Те на бистра кај ов ветинѓа аменге: „Ма дара, соске ме сиум туја!“ (Иса. 41:10). Кобор шужо ветување! Чаче, никогаш на сием коркори.