1. Со ваљани те кера те шај те ова сигурна кај амаро обожавање тано угодно е Јеховаске, хем соске?

 О ИСУС вакерѓа: „Окола со чаче обожавинена е Даде ка обожавинен ле духоја хем чачипаја, соске о Дад родела асавке мануша те обожавинен ле“ (Јован 4:23; 6:44). Секој ваљани те испитинел „сој тано прифатливо е Господареске“ (Ефешаните 5:10). Адава нане секогаш локхо. О Сатана мангела те ховавел амен те кера нешто со нане те угодинел е Јеховаске (Откровение 12:9).

2. Со уло паше узи планина Синај?

² Сар о Сатана мангела те ховавел амен? Јекх начин тано аѓаар со керела те на овел аменге јасно сој тано исправно а сој погрешно. Адава шај те дикхел пе таро пример е Израелцонгоро кеда живинена сине ко логори паше узи планина Синај. О Мојсеј гело упре ки планина, а о мануша аџикерена сине те иранел пе. Изгледа, ола на мангле више те аџикерен ле хем замолинѓе е Ароне те керел ленге девел. Ов керѓа ленге златно телцо сар идоли. Тегани о мануша почминѓе те славинен. Ола кхелѓе околу о телцо хем поклонинѓе пе леске. Верујнена сине кај адалеа со поклонинена пе сине е телцоске, ола уствари обожавинена сине е Јехова. О мануша мислинена  сине кај акава тано „прослава е Јеховаске“. Ама дали адава со керѓе сине исправно? На. О Јехова ко адава дикхела сине сар идолопоклонство, хем бут таро адала Израелција сине мударде (2. Мојсеева 32:1-6, 10, 28). Со сикљоваја таро акава? Ма те дозволина некој те ховавел амен. Ки Библија пишинела: „Ма пипинен ништо сој тано нечисто“. Мукх о Јехова те сикавел тут сој тано исправно, а сој погрешно (Исаија 52:11; Езекиел 44:23; Галатите 5:9).

3-4. Соске тано шукар те дикха котар авена несаве прославе?

³ Кеда о Исус сине ки Пхув, ов сикавѓа пле апостолен сар те овен пример башо чисто обожавање. Пало лескоро мерибе, о апостолија продолжинѓе те сикавен е невен башо е Јеховаскере мерилија. Ама откеда муле о апостолија, о ховавне учителија почминѓе те анен ко собрание погрешна идее хем паганска обичаија хем прославе. Чак менинѓе о анава несаве прославенгере со сине паганска те шај о христијања те прифатинен лен (2. Солуњаните 2:7, 10; 2. Јованово 6, 7). Бут таро адала прославе тане популарна авдиве да хем ки ленде панда иси ховавне верувања, чак демонизам * (Откровение 18:2-4, 23).

⁴ Авдиве ко свето, о празникија хем о прославе тане важно дело таро е манушенгоро живото. Ама, сар со повише сикљовеа сар о Јехова дикхела ко буќа, шај ка дикхе кај ваљани те менине тло мислење башо несаве прославе. Адава шај нане те овел локхо, ама шај те ове сигурно кај о Јехова ка поможинел туке. Акана те дикха  котар авена несаве популарна прославе, те шај те хаљова со мислинела о Јехова баши ленде.

5. Кова доказ иси кај о Исус на бијандило ко 25 декември?

⁵ Ко бут пхувја ко свето, о Божико славинела пе 25 декември, о диве кеда бијандило о Исус сар со мислинена бут мануша. И Библија на вакерела аменге кова диве, чак ни кова масек бијандило о Исус, ама вакерела аменге нешто башо кова време таро берш уло адава. О Лука пишинѓа кај кеда о Исус бијандило ко Витлеем, о овчарија „живинена сине авријал“ хем пазинена сине пумаре бакхрен (Лука 2:8-11). Ко масек декември, ко Витлеем тано шудро, бршимало хем иси ив, адалеске о овчарија на би бешена сине цело рат авријал пумаре бакхренцар. Со сикљоваја таро акава? О Исус сине бијамо кеда о време сине хари потато, а на ко декември. И Библија хем о историска доказија сикавена кај ов сине бијамо негде машкар о масекија септември хем октомври.

6-7. а) Котар авена о обичаија со керена пе ко Божико? б) Која ваљани те овел и причина те да поклонија?

⁶ Тегани котар авела о Божико? Ов авела таро паганска празникија, сар со сине о римско празнико Сатурналија, коте со славинела пе сине о Сатурн, о девел башо земјоделство. Ки јекх енциклопедија пишинела: „О славибе о Божико бут личинела сар о славибе о римско празнико Сатурналија кова со славинела пе сине ки средина таро декември. Ко адава празнико о мануша хана сине хем пиена, дена песке сине поклонија хем тхарена сине момоља“ (The Encyclopedia Americana). Исто аѓаар ко 25 декември славинела пе сине о бијандо диве е девлескоро Митра, кова со сине персиско девел башо кхам.

 ⁷ Бут мануша авдиве со славинена о Божико на размислинена кај иси ле паганско потекло. Ола едноставно дикхена ко Божико сар време кеда шај те овен заедно пле фамилијаја, те уживинен ко шукар хајбе хем те ден поклонија. Џанѓола пе, амен мангаја амаре фамилија хем амаре амален, хем о Јехова мангела лескере слуге те овен дарежлива машкар песте. Ко 2. Коринќаните 9:7 вакерела: „О Девел мангела адале сој бахтало кеда дела“. О Јехова на мангела те ова дарежлива само ко посебна прилике. Амен, сар е Јеховаскоро народо, мангаја те  да поклонија хем те ова заедно амаре амаленцар хем амаре фамилијаја ко било кова време, бизо те очекујна те иранен аменге. Амен кераја адава таро мангипе (Лука 14:12-14).

8. Дали о астрологија анѓе поклонија е Исусеске само со бијандило сар бебе? Објаснин.

⁸ О мануша вакерена кај о дејбе поклонија ко Божико авела таро трин мудра мануша кола со анѓе поклонија е Исусеске кеда бијандило ки штала. Точно тано кај некобор мануша але те дикхен е Исусе хем анѓе леске поклонија. Ко библиско време сине нормално те анен пе поклонија несаве манушеске со сине важно (1. Царевите 10:1, 2, 10, 13). Ама дали џанљан кај и Библија башо акала трин мануша вакерела кај сине астрологија, мануша кола со керена магие хем со на обожавинена сине е Јехова? Исто аѓаар, ола на але те дикхен е Исусе само со бијандило сар бебе ки штала, него покасно, кеда о Исус хари барило хем живинела сине ко јекх кхер (Матеј 2:1, 2, 11).

9. Баши касте ки Библија пишинела кај славинѓе пумаро бијандо диве?

⁹ О диве кеда бијанѓовела јекх бебе тано бахтало диве (Псалм 127:3). Ама адава на значинела кај амен ваљани те славина о бијандо диве. Соске? Ки Библија иси само дуј извештаија башо мануша со славинѓе пумаро бијандо диве. Јекх лендар сине о египетско фараони, а о јавер сине о цари Ирод Антипа. (Читин 1. Мојсеева 40:20-22; Марко 6:21-29.) Солдуј владетелија на служинена сине е Јеховаске. Уствари, нигде ки Библија на читинаја кај е Јеховаскере слуге славинена сине пумаро бијандо диве.

10. Сар дикхена сине о прва христијања ко славибе о бијандо диве?

 ¹⁰ Јекх енциклопедија вакерела кај о прва христијања „ко славибе било каскоро бијандо диве дикхена сине сар паганско обичај“ (The World Book Encyclopedia). Асавке обичаија сине темелиме ко ховавне верувања. На пример, о гркија ко пурано време верујнена сине кај секова мануш сине заштитимо таро јекх духо со сине присутно ко лескоро бијанибе. Ола мислинена сине кај адава духо ко несаво начин тано поврзимо несаве девлеа кова со сине бијамо ко исто датум. Ола мислинена сине кај о мануш ваљани сине те славинел пло бијандо диве те шај адава девел те заштитинел ле. Исто аѓаар, о бијандо диве тано поврзимо е астрологијаја хем е хороскопеа.

11. Со мислинела о Јехова баши дарежливост?

¹¹ Несаве мануша мислинена кај ленгоро бијандо диве тано посебно диве кеда ваљани те сикавел пе ленге ценење хем мангипе. Ама амен шај те сикава мангипе амаре амаленге хем е фамилијаке ко цело берш, а на само јекх посебно диве. О Јехова мангела те ова љубезна хем дарежлива секогаш. (Читин Дела 20:35.) О живото тано чаче поклон таро Девел. Адалеске ваљани те ова леске благодарна секова диве, а на само ко амаро бијандо диве (Псалм 8:3, 4; 36:9).

12. Соске о диве кеда мерела пе тано пошукар него о диве кеда бијанѓовела пе?

¹² Ко Проповедник 7:1 пишинела: „О шукар анав тано пошукар таро шукар масло, хем о диве кеда мерела пе тано пошукар таро диве кеда бијанѓовела пе“. Соске о диве кеда мерела пе тано пошукар него о диве кеда бијанѓовела пе? Кеда бијанѓоваја, нане амен кердо панда ништо ко амаро живото, ни шукар ни лошно. Ама кеда  користинаја амаро живото те служина е Јеховаске хем кераја шукарипе е јаверенге, амен кераја аменге „шукар анав“, или углед, хем о Јехова нане те бистрел амен чак пало амаро мерибе (Јов 14:14, 15). Е Јеховаскере слуге на славинена пумаро бијандо диве, а ни е Исусескоро. Уствари, единствено настан со заповединѓа о Исус те икера тани и Спомен-свеченост (Лука 22:17-20; Евреите 1:3, 4).

13-14. Солеа тано поврзимо о Велигден?

¹³ Бут мануша верујнена кај кеда славинена Велигден ола славинена е Исусескоро воскресение. Ама уствари, о славибе Велигден тано поврзимо е англо-саксонско божицаја, и Естра или Остра, со сине божица башо сабај кеда пхравѓола о диве хем баши пролет. Јекх речнико објаснинела кај ој сине божица баши плодност (The Dictionary of Mythology). Несаве велигденска обичаија тане поврзиме акалеа. На пример, о јаре тане „симбол башо нево живото хем воскресение“ вакерела јекх енциклопедија (The Encyclopædia Britannica). Исто аѓаар, о шошој бут време англедер ко паганско обожавибе користинела пе сине сар симбол баши плодност. Јасно тано кај о Велигден нане ле нисави врска е Исусескере воскреснибаја.

¹⁴ Дали о Јехова осетинела пе шукар кеда дикхела сар о мануша мешинена о ховавне религиозна обичаија лескере Чхавескере воскреснибаја? Сигурно на (2. Коринќаните 6:17, 18). Уствари, о Јехова никогаш на родинѓа те славинел пе е Исусескоро воскресение.

15. Сар почминѓа те славинел пе о Нево берш хем и Рат е вештеркенгири?

¹⁵ О датум хем о обичаија башо славибе о Нево берш разликујнена пе тари пхув ки пхув. Башо адава котар авела акава празнико, ки јекх енциклопедија пишинела: „Ко 46 берш а.а.е., о римско владетели о Јулиј Цезар одрединѓа 1 јануари те овел о диве кеда ка почминел о нево берш. О римјања посветинѓе акава диве е Јанусеске, кова со сине девел башо капије, удара хем почетокија. О масек јануари добинѓа пло анав спрема акава  девел, о Јанус, кова со сине ле дуј муја — јекх муј дикхела англал хем јекх палал“ (The World Book Encyclopedia). Значи о славибе Нево берш иси ле паганско потекло. И Рат е вештеркенгири тани поврзими е вештеркенцар, чудовиштенцар хем духонцар. Акава празнико нане нешто нево. И рат кеда иси пхерди месечина најпаше ко 1 ноември, о пуране Келтија тари Британија хем тари Ирска славинена сине о празнико Сауин. Ола верујнена сине кај ко акава празнико, о духија таро муле иранена пе сине ки Пхув. Те шај акала духија те на керен ленге штета, о мануша икалена сине ленге хајбаске хем пијбаске. Кеда авдиве о чхаве маскиринена пе хем џана таро кхер ко кхер, ола уствари нане свесна кај адалеа икерена акава пурано демонско обичај.

16-17. Башо со ваљани те размислина ако кераја бијав?

¹⁶ О бијав тано бахтало настан. Ко цело свето о бијава керена пе ко различна начинија. О мануша обично на размислинена башо адава котар авена о обичаија со керена пе ко бијава, адалеске шај на џанена кај несаве обичаија авена таро паганска религиозна верувања. Ама амен сар христијања мангаја те кера бијав кова со ка овел угодно е Јеховаске. Ако џанаја котар авела несаво обичај, тегани ка шај те ана шукар одлуке башо бијав (Марко 10:6-9).

¹⁷ Несаве обичаија со керена пе ко бијава о мануша верујнена кај ола анена бахталипе адаленге со лена пе (Исаија 65:11). На пример, ко несаве тхана о мануша фрдена пиринџи, бонбоња, леблеблие или нешто слично упро џамутро хем и бори. Ола верујнена кај акава ка анел ленге чхаве, бахталипе, повише те живинен хем ка  заштитинел лен таро лошнипе. О христијања пазинена хем избегинена секова обичај сој поврзимо е ховавне религијаја. (Читин 2. Коринќаните 6:14-18.)

18. Кола јавера библиска начелија ваљани те применинен пе башо бијава?

¹⁸ Јекх христијанско пари мангела ленгоро бијав те овел бахтало хем достоинствено настан коте са о присутна ка уживинен. О гостија ко јекх христијанско бијав на икерена говорија коте со иси нељубезна хем вулгарна лафија или те вакерен шале со ка лаџакерен е џамутре хем е бојра (Изреки 26:18, 19; Лука 6:31; 10:27). Ко јекх христијанско бијав нане „те фалина амен е буќенцар со иси амен“ (1. Јованово 2:16). Ако планиринеа те кере бијав, кер са те шај кеда ка сетине тут ки лесте те ове бахтало. (Дикх и 28 фуснота.)

19-20. Котар авела о обичај те керел пе „живели“?

¹⁹ Јекх пенџардо обичај ко бијава или кеда кхедела пе друштво тано те керел пе „живели“. Кеда керела пе адава, јекх мануш мангела е јаверенге са најшукар хем о јавера ваздена пумаре чаше упре. Сар ваљани те дикхен о христијања ко адава?

²⁰ Јекх лил вакерела кај акава обичај најверојатно авела таро бут пурано паганско обичај „коте со дела пе е девленге јекх свето течност“. Адава керела пе сине „сар замена те шај те исполнинел пе несави желба, јекх врста молитва вакерди е лафенцар ’Буте бершенге!‘ или ’Живели!‘“ (International Handbook on Alcohol and Culture). Ко пурано време, о мануша ваздена сине пумаре чаше упре те роден берекети таро пумаре девела. Ама адава нане о исправно начин те родел пе берекети таро Јехова (Јован 14:6; 16:23).

21. Саве јавера забаве ваљани те избегинен о христијања?

²¹ Сар шај те одлучине ки која прослава ка ове присутно или на? Пуч тут, сар ка понашинен пе о мануша адатхе хем баши која цел кхедена пе? На пример, ко несаве забаве иси еротско кхелибе, пијбе бизи контрола, па чак неморал. Асавке забаве шај исто аѓаар те поддржинен о начин сар живинена о хомосексуалција или те охрабринен ко национализам. Ако сием присутна ко асавке забаве, дали чаче мрзинаја адава со мрзинела о Јехова? (Псалм 1:1, 2; 97:10; 119:37).

22. Со шај те поможинел е христијаненге те одлучинен ки која прослава ка овен присутна?

²² Сар христијања амен избегинаја прославе кола со на фалинена е Јехова. О апостол Павле пишинѓа: „Било те хан или било те пиен или било со јавер те керен, керен са баши е Девлескири слава“ (1. Коринќаните 10:31; дикх и 29 фуснота.) Џанѓола пе, нане ко са о прославе истакнимо о неморал, и ховавни религија или о национализам. Ако јекх прослава на пхагела несаво библиско начело, ваљани коркори те одлучина дали ка ова присутна или на. Исто аѓаар ваљани те размислина сар амари одлука ка влијајнел упро јавера.

23-24. Сар шај те објаснине тле фамилијаке со нане Сведокија башо несаве прославе со на кереа лен више?

²³ Шај на џаја више ко прославе кола со на фалинена е Јехова. Адалеске некој тари тли фамилија со нане Сведокија шај мислинена кај на мангеа лен више хем кај ола нане туке важна. Ола шај мислинена кај о празникија  тане единствено прилика кеда и фамилија шај те овел заедно. Адалеске, со шај те кере? Иси бут начинија сар шај те уверине лен кај мангеа лен хем кај ола туке важна (Изреки 11:25; Проповедник 3:12, 13). Шај те накхе ленцар време ко јавера прилике.

²⁴ Ако тли фамилија мангела те џанел соске на кереа више несаве празникија, ту шај те роде повише информацие ко амаре публикацие хем ки jw.org кола со ка поможинен туке те објаснине ленге о причине башо адава. Ма распрајн тут ленцар хем ма терин лен те мислинен кај ту чхивеа лен силаја те прифатинен тло мислење. Поможин те хаљовен кај англедер те ане асавки одлука ту бут размислинѓан башо адава. Ачхов смиримо хем размислин башо акава совет: „Сар о лон со керела о хајбе вкусно, аѓаар тумаро лафи секогаш те овел љубезно“ (Колошаните 4:6).

25-26. Сар шај о родителија те поможинен пумаре чхавенге те манген е Јеховаскере мерилија?

²⁵ Бут тано важно, секој амендар шукар те хаљол тари која причина на учествујнаја ки несави прослава (Евреите 5:14). Амен мангаја те угодина е Јеховаске. Ако сием родителија, мора те одвојна време те поможина амаре чхавенге те хаљовен хем те манген о библиска начелија. Ако хаљовена кај о Јехова чаче постојнела хем кај шај те овен леа амала, тегани ола да ка манген те угодинен леске (Исаија 48:17, 18; 1. Петрово 3:15).

²⁶ О Јехова тано бахтало кеда дикхела кај даја амендар са те обожавина ле ко чисто начин хем те постапина чесно (Јован 4:23). Ама бут џене мислинена кај мануш нашти те овел чесно ко акава свето со нане чесно. Дали тано чаче аѓаар? Те кера лафи башо адава ко следно поглавје.