О мануша ки Јуда бут пути бистрена сине е Јехова хем служинена сине ховавне девленге. О Јехова бут берша трудинела пе сине те поможинел лен. Ов бичхалела сине бут пророкија те предупрединел лен, ама ола наместо те шунен лен асана ленге сине. Сар сикавѓа ленге о Јехова кај на ваљани те служинен идоленге?

О Навуходоносор, о цари таро Вавилон, почминѓа те побединел буте народон. Кеда прво пути освојнѓа о Ерусалим, ов заробинѓа е царе е Јоахине, е кнезон, е војникон, е манушен со сине занаетчие, хем ингарѓа лен ко Вавилон. Исто аѓаар, ов леља цело барвалипе таро е Јеховаскоро храми. Пало адава, о Навуходоносор чхивѓа е Седекија те овел цари ки Јуда.

Ко почеток, о Седекија шунела сине е Навуходоносоре. Ама, о народија со сине околу ленде хем о ховавне пророкија вакерена сине е Седекијаске те овел против о Вавилон. О Еремија предупрединѓа ле: „Ако овеа против о Вавилон, ки Јуда ка овел баро мударибе, бокхалипе хем насвалипе“.

Пало ефта берш владибе, о Седекија одлучинѓа те противинел пе е Вавилонеске. Ов родинѓа помош тари египетско војска. Ама, о Навуходоносор бичхалѓа пле војска те нападинел о Ерусалим, хем и војска опколинѓа цели диз. О Еремија вакерѓа е Седекијаске: „О Јехова вакерела кај ако предајнеа тут е Вавилонцонге, ту ка ачхове џивдо хем и диз нане те овел уништими. Ама ако на предајнеа тут, о Вавилонција ка тхарен о Ерусалим, а туте ка лен тут сар робо“. О Седекија вакерѓа: „Нане те предајнав ман!“

 Пало јекх текваш берш, и вавилонско војска рушинѓа о ѕидија таро Ерусалим хем тхарѓа цели диз. Тхарѓа о храми, мударѓа буте манушен хем бут џене сине заробиме.

О Седекија нашља таро Ерусалим, ама о Вавилонција геле пали лесте. Астарѓе ле паше узо Ерихон хем ингарѓе ле ко Навуходоносор. О вавилонско цари нарединѓа о Седекија те дикхел сар мударена лескере чхавен англи лесте. Пало адава, о Навуходоносор корјарѓа е Седекија хем чхивѓа ле ко затвор, хем покасно адатхе муло. Ама, о Јехова е манушенге тари Јуда ветинѓа: „Пало 70 берш палем ка иранав тумен ко Ерусалим“.

Со уло е терненцар со сине ингарде ко ропство ко Вавилон? Дали ачхиле верна е Јеховаске? Ајде те дикха.