O obrazki andre kadi brožura sikaven, sar šukares pes uren le Jehovaskere svedki, te pes zdžan. Phenen tumenge, soske kamas furt te dičhol avri šukares?

Avka sikavas e paťiv amare Devleske. E Biblija phenel, hoj o Del na dikhel pre ada, sar sam urde, ale savo hin amaro jilo. (1. Samuelova 16:7) Ale te pes zdžas, kaj le Devleske te služinas, kamas te sikavel le jilestar e paťiv leske the amare phralenge the pheňenge. Te vareko džal pro sudos, určiťe urela nekfeder gada, so les hin. Thiš, sar džas pro zhromažďeňe, kamas te el šukares urde. Avka sikavas, hoj amen hin paťiv anglo nekbareder sudcas čiže anglo Del Jehovas the anglo than, kaj pes zdžas. (1. Mojžišova 18:25)

Sikavas, hoj andal calo jilo kamas biblicka zasadi. E Biblija phenel le kresťanenge, kaj pes te uren jednoduchones a zdrava goďaha. (1. Timotejovi 2:9, 10) Ola, so pes uren jednoduchones, na presikaven pes le uribnaha, na uren cesna veci, aňi nane lenge sa avri. Ko pes urel zdrava goďaha, na urel džungale aňi čačkimen veci, ale dičhol avri šukares. Na mušinas pes te urel savore rovnakones. Šaj peske kidas avri, so amenge hin pre dzeka, ale mušinas pes te urel pal o biblicka zasadi. Te dičhuvas avri slušňe the šukares, na mušinas te phenel aňi jekh lavoro, the avka šukaľaras o sikaviben [čiže so sikavas] pal o Del... a ašaras le Devles. (Titoske 2:10; 1. Peter 2:12 NZ) Te pes uras šukares, ada šaj pomožinel but manušenge, kaj pes te zmeňinel oda, so peske mišľinen pal o Jehovas the pal leskere služobňika.

Aven pro zhromažďeňe, the te tumen nane šukar gada! Amare gada na mušinen te mol but love aňi te el neve. Stačinel, kaj te en čista the slušna.

• Soske kampel, kaj amare gada te en čista the slušna, sar džas le Devleske te služinel?

• Save zasadi doľikeras, sar peske kidas avri, save gada uraha?