Sar pes varekhaj ačhel prirodno katastrofa, le Jehovaskere svedki so neksigeder zorganizinen pomoca peskere phralenge. Ada sikavel, hoj maškar amende hin pravo laska. (Ján 13:34, 35; 1. Jána 3:17, 18) Sar pomožinas?

Pomožinas le lovenca. Sar sas andre Judea ajsi bida, hoj but manuša merenas bara bokhatar, o prava kresťana andre Antiochia bičhade love peskere kresťanske phralenge. (Skutky 11:27-30) The adaďives, sar pes dodžanas, hoj andre varesave krajini, kaj dživen amare phrala, pes ačhiľa katastrofa, bičhavas andre lengero zboros o love abo aver veci, so kampel. (2. Korinťanom 8:13-15)

Džas ode. Sar hin varekhaj katastrofa, o starši vičinen le phralenge, či predžiďile a či hine garude pro lačho than. O viboris prekal e nudzovo pomoca dodikhel, kaj pes ode te anel chaben, pitno paňi the uraviben, kaj o phrala, so lenge sas zňičimen o khera te na soven avri. Thiš pes starinen pal oda, či na kampel dochtoris abo tabletki. But svedki, odborňika, džan ode vaš peskere love. Hine zdravotňika, dochtora, ale thiš stavbara, so prikeren zňičimen khera na ča prekal o phrala, kaj bešen, ale the o khera, kaj len hin o zhromažďeňa. Amen sam jednotna a rado keras buťi jekhetane, vašoda amen hin but skusenosťi, sar sig te zorganizinel ajsi pomoca! Te kampel, rado pomožinas the olenge, so nane andal amaro naboženstvo. (Galaťanom 6:10)

Das lenge zor andal e Biblija, sam prekal lende opora. Ola, so predžiďile katastrofa, kamen te šunel lačhe lava, kaj lengero jilo te na pukinel žaľatar. Akor pes buter mukhas pro Jehovas. O Del pomožinel, te amenge hin igen phares pro jilo! (2. Korinťanom 1:3, 4) Amen das duma pal o biblicka sľubi, hoj le Devleskero kraľišagos odčhivela e dukh the e žaľa, so akana predživas. (Zjavenie 21:4)

• Sar Jehovaskere svedki džanen sig te zorganizinel pomoca?

• Sar das zor andal e Biblija olenge, so predžiďile e katastrofa?