Imar tuke vareko phenďa vareso, so ňikaske avreske na phenďa? — * E Biblija thiš phenel pal o tajomstvo, pal o Devleskero garudo čačipen. Ada čačipen garuďa o Del anglo manuša. The o aňjela kamenas te džanel buter pal ada. Kames te džanel, savo čačipen o Del garuďa? —

Anglo igen, igen but berša, o Del stvorinďa perše romes the romňa. Le Adam the la Eva. O Del len diňa šukar zahrada, savi pes vičinelas Eden, kaj ode te bešen. Te o Adam la Evaha šundahas le Devles, ta peskere čhavenca šaj kerde cale svetostar rajos ajso šukar sar e zahrada, kaj bešenas. A džiďilahas andro rajos pro furt. Ale džanes, so kerďa o Adam the e Eva? —

O Adam the e Eva na šunde le Devles. Vašoda adaďives na dživas andro rajos. O Del phenďa, hoj jekhvar kerela cale svetostar šukar than a savore manušen dela šukar dživipen a on ňigda na merena. But berša o manuša na džanenas ňič pal oda, sar ada kerela. Ada sas angle lende garudo.

Sar avľa o Ježiš pre phuv, phenďa le manušenge buter pal ada čačipen, so o Del angle lende garuďa. Ov phenďa avri, hoj avela le Devleskero kraľišagos. O Ježiš sikavelas le manušen, sar pes te modľinen pal ada kraľišagos, so prekerela e phuv pro šukar rajos.

Radisaľol tiro jilo, hoj prindžares ada čačipen? — Ma bister, hoj ča ola, so šunen le Jehovas, dživena andro rajos. Andre Biblija hin but pribehi pal o manuša, so šunenas le Jehovas. Kames tut te dodžanel buter pal lende? — Andre kadi brožura pes dodžanaha pal varesave lendar. Phenaha peske, andre soste hine ala manuša lačho priklados prekal amende.