O Ježiš phenďa, hoj o kresťana musaj te el bolde. (Pregen Matúš 28:19, 20) Aľe so hin o boľipen? A so mušinel te kerel dženo, kaj te el boldo?

1) So hin boľipen?

Greciko lav „te bolel“ hin „te džal tel o paňi“. O Ježiš sas boldo andro paňi Jordan u paľis avľa avri „andral o paňi.“ (Marek 1:9, 10 NZ) Avka hine bolde the o čačikane kresťana. Džan tel o paňi u avka len bolen.

2) Soske pes vareko del te bolel?

O boľipen sikavel, hoj manuš diňa le Devleske o dživipen. Sar šaj das o dživipen le Jehovaske? Sigeder, sar pes vareko dela te bolel, andre modľitba dela vera, hoj imar pro furt dživela ča avka, sar kamel o Jehovas a tiš, hoj na džala pal ňisavo aver del. Le Jehovas dela pro peršo than andro dživipen. Aleha sikavela, hoj imar „na dživel pal peskero ... [aľe] džal pal“ o Ježiš, čiže imar dživel avka, sar o Ježiš sikhľarelas. (Matúš 16:24) Vašoda, hoj dela adi vera a dela pes te bolel, avela mek pašeder ko Jehovas a dochudela pes andre Devleskeri fameľija.

3) So kampel te kerel anglo boľipen?

Kampel te sikhľol pal o Jehovas a te zoraľarel o paťaviben andre leste. (Pregen Hebrejom 11:6) Te le Devles buter sprindžareha, buter leske paťaha a tiš les buter rado dikheha. Paľis kameha pal leste te vakerel the avrenge a tiš kameha te dživel pal oda, so sikhľos. (2. Timotejovi 4:2; 1. Jána 5:3) Te čačes džives avka, „sar kamel o Jehovas,“ šaj des vera le Jehovaske andre modľitba a šaj tut des te bolel. (Kolosanom 1:9, 10) a

 DODŽAN TUT BUTER

4) Le Ježišoskero boľipen – so lestar sikhľuvas?

Pregen Matúš 3:13–17 a vakeren jekhetane, so šaj sikhľuvas le Ježišoskere boľipnastar:

• Sas o Ježiš boldo minďar (takoj), sar uľiľa?

• Sar sas boldo? Čhorde leske avri pro šero ča čepocis (sikrica) paňi?

Sar sas o Ježiš boldo, chudňa te kerel buťi, pre savi les o Del bičhaďa pre phuv. Pregen Lukáš 3:21–23 the Ján 6:38 a paľis vakeren jekhetane:

• Sar pes o Ježiš diňa te bolel, savi buťi sas andro leskero dživipen pro peršo than?

5) Ma dara tut te del te bolel!

Šaj el, hoj tuke varekana avľa pre goďi: „Man nane pre oda, kaj te dav miro dživipen le Jehovaske a kaj man te bolen.“ Aľe ma dara! Te tut na vzdeha, korkoro aveha pre oda, hoj imar kames te del tiro dživipen le Jehovaske a te del pes te bolel. Dikh, so predal oda kerde varesave manuša. Mukh o VIDEJO.

Pregen Ján 17:3 the Jakub 1:5 a paľis vakeren jekhetane:

• So pomožinel le manušeske, kaj te džal ko boľipen?

1. Amaro dživipen daha le Jehovaske avka, hoj leske andre modľitba das vera, hoj pro furt služinaha ča leske

2. Amare boľipnaha sikavas le manušenge, hoj diňam vera le Jehovaske

 6) Te tut deha te bolel, aveha andre Jehovaskeri fameľija

Te pes das te bolel, avas andre odi nekfeder fajta pro calo svetos. The te sam andal but krajini, bariľam čorikanes abo rajikanes, aľe the avka vakeras ola ista čačipena andal e Biblija a dživas pal lende. Pregen Žalm 25:14 the 1. Petra 2:17 a paľis vakeren jekhetane:

• Sar tuke pomožinela o boľipen, kaj te barol tiro kamiben kijo Jehovas the kijo phrala pheňa?

 SO SIKHĽIĽAM

O Ježiš phenďa, hoj o kresťana musaj te el bolde. Sigeder, sar pes vareko dela te bolel, kampel, kaj te zoraľarel peskero paťaviben andro Jehovas a te dživel pal oda, so sikhľol. Paľis andre modľitba dela vera le Jehovaske, hoj dživela ča predal leste.

So bi phenehas

• So hin o boľipen u soske les avka kampel?

• Soske kampel soduj: te del vera le Jehovaske andre modľitba a tiš te del pes te bolel?

• So kampel te kerel sigeder, sar des vera le Jehovaske u des tut te bolel?