Soske hin lačhes te phenel tira dake tire dadeske, so predžives? (Prí 23:26) O Jehovas oda avka kamel. Diňa len pro šero, kaj tutar te bajinen a kaj tut te ľidžan lačhe dromeha. (Ža 127:3, 4) Aľe te lenca na vakereha, so tut trapinel a ľikereha oda andre peste, ela lenge phares te achaľol, so predžives. E daj o dad nane sar žandara, hoj lenge musaj te phenel sa avri. On peske imar predžiďile vareso, vašoda tut šaj den goďi. Aľe kerehas bi namištes, te bi anglal lende garuvehas vareso nalačho. (Prí 3:32)

Sar šaj šukares vakeres tira daha tire dadeha? Vaker lenca akor, te ňiko nane choľamen, aňi zuňimen. Te hin tuke phares lenca te vakerel, šaj lenge pisines, sar tuke hin. A so te phučen tutar vareso, pal soste na kames te del duma? Ma bister, on tuke kamen ča lačhes, vašoda phučen. Hine tuha, na proci tute! Ma phand lenge tiro jilo. Vaker lenca. Te oda avka kereha, ela tut lačho dživipen akanastar pro furt! (Prí 4:10–12)

DIKH O VIDEJO SOM TERNO – DŽANAV ŠUKARES TE VAKEREL MRA DAHA MRE DADEHA? A PAĽIS VAKEREN JEKHETANE:

• So pal peste phende avri e Ester the o Partik?

• So šaj sikhľos le Ježišostar?

• So savoro predal tute keren e daj o dad?

• Save lava andal e Biblija tut den goďi, sar šukares te vakerel la daha le dadeha?