1) So dojekh manuš mušinel sako ďives te kerel?

 SAKO ĎIVES mušinas peske vareso te kidel avri. Varekana oda hine ča cikne veci sar o chaben abo kana džaha te sovel. Aľe varekana nane loko peske te kidel avri, so keraha. Bo džal pal amaro sasťipen, pal oda, či avaha bachtale, pal ola, so len rado dikhas a tiš pal o Jehovas. Kamas peske te kidel avri avka, kaj amenge the amare fameľijenge te el mištes. Aľe the avka hin predal amende nekdvoležiteder oda, hoj keraha radišagos le Jehovaske. (Rim. 12:1, 2)

2) So tuke pomožinela lačhes peske te kidel avri, so kereha?

² Kaj amen te džanas, so peske te kidel avri, pomožinen amenge kala trin veci: 1) Te dodžanel pes so nekbuter. 2) Te rozmišľinel sar pre koda dikhel o Jehovas. 3) Te rozmišľinel, so hin feder te kerel. Andre kada člankos dikhaha sar kala trin veci te kerel a so amenge pomožinel te rozprindžarel, so hin lačho a so na. (Hebr. 5:14)

DODŽAN TUT SO NEKBUTER

3) Soske kampel te avel pre oda, pal soste džal a sar oda hin? Phen priklados.

³ Te kamas peske mištes te kidel avri, so keraha, peršo hin pes te dodžanel so nekbuter. Soske? Šaj peske phenas avka. Te o manuš hino nasvalo a džal ko dochtoris, o dochtoris peršo lestar phučel, so leste hin, so les dukhal a kerel  leske višetreňe. Avka džanela leske lačhes te pomožinel. A avka isto the amen. Sigeder sar peske phenaha, so keraha, kampel te rozmišľinel pal oda, so pes dodžanľam. Sar oda te kerel?

4) So hin mištes te kerel sigeder sar peske pheneha, so kereha? (Prislovja 18:13) (Dikh the obrazkos.)

⁴ Vareko tut vičinďa pro kheľiben. Tu ole manušes lačhes na prindžares a aňi na džanes, so pes odoj kerela. Avka na džanes či te džal abo na. So kereha? Phučeha, kaj tut te dodžanes so nekbuter. Kana the kaj oda ela? Keci džene odoj avena? Ko odoj dodikhela? Save manuša odoj hine vičimen? So pes odoj kerela? A pijela pes odoj the e paľenka? Kajse otazki tuke pomožinena te phenel, či hin mištes odoj te džal abo na. (Pregen Prislovja 18:13.) a

5) Imar džanes sar oda ela. So kampel te kerel?

⁵ Imar achaľos sar odoj asi ela. Džanes, hoj odoj avena the ajse manuša, save na doľikeren oda, so hin andre Biblija. Ňiko odoj na dodikhela, keci pes pijel. A avka na džanes, či odoj na ela e zabava bije ladž. (1. Peter 4:3) A so te koda kheľiben hin akor, sar tut hin zhromažďeňe? Abo e služba? Te imar kada savoro džanes, paľis predal tute ela lokeder lačhes peske te kidel avri, so  kereha. Aľe mek vareso kampel. Tu imar džanes, so kames te kerel, aľe sar pre kada dikhel o Jehovas? (Prisl. 2:6)

LE THE KODA SAR PRE KADA DIKHEL O JEHOVAS

6) So majinas le Jehovastar te mangel? (Jakub 1:5)

⁶ Mang le Jehovas, kaj te achaľos oleske sar ov. O Jehovas sľubinďa, hoj amen džanaha te kerel avka sar hin leske pre dzeka. Kaj ada te džanas, del amenge goďi, bo ov „hino ke sakoneste šťiro a ňikaske oda na čhivkerel pro jakha“. (Pregen Jakub 1:5.)

7) Sar šaj chudas te rozmišľinel avka sar o Jehovas? Phen priklados.

⁷ Te sam varekhaj a našavas pes, ta paľis phučas. Aľe stačinel ča te phučel? Na. Mušinas ole manušes lačhes te šunel. A avka isto te le Jehovas mangas vaš e goďi, kamas les lačhes te šunel. Aľe sar? Avka, hoj rodaha andre leskero Lav o zakoni the goďaver lava. Šaj peske phenas pal koda kheľiben. So e Biblija vakerel pal e nalačhi spoločnosť, pal e zabava bije ladž? Abo pal oda, so hin peršo? O kraľišagos abo oda, so kamav me? (Mat. 6:33; Rim. 13:13; 1. Kor. 15:33)

8) So šaj keres, te na džanes te arakhel oda, so rodes? (Dikh the obrazkos.)

⁸ Varekana na džanas te arakhel andre Biblija oda, so amenge kampel. Hin mištes te džas pal varesavo duchovno phral the  pheň, kaj amenge te sikaven, so pre kada phenel e Biblija. Aľe feder ela, te amen korkore peske kada rodaha. Sar? Hin amen but pomocki. Šaj oda rodas andro Zoznamos, savo pomožinel te rodel andro publikaciji le Jehovaskere svedkengere abo andre publikacija Biblické verše pre každodenný život. Kada amenge pomožinela te kidel peske avri avka, hoj keraha le Jehovaske radišagos.

9) So kampel te kerel, kaj te avas peske ista, hoj keraha radišagos le Jehovaske? (Efezanenge 5:17)

⁹ Te kamas te kerel le Jehovaske radišagos, mušinas les lačhes te džanel. E Biblija phenel: „Te prindžareha oles, so hin Neksvateder, džaneha, so hin lačho a so na.“ (Prisl. 9:10) Mušinas lačhes te sprindžarel, savo hino o Jehovas, so kamel te kerel, so rado dikhel a so nanavidzinel. Vaš oda sigeder sar peske pheneha so te kerel, phuč: pal oda, sar prindžarav le Jehovas, radisaľola olestar, so mange kidňom avri? (Pregen Efezanenge 5:17.)

10) Sar amenge o goďaver lava andal e Biblija sikaven, so kampel te kerel?

¹⁰ Šaj pes ačhel, hoj te kamaha te kerel le Jehovaske radišagos, amari fameľija ela amendar sklamimen. Dojekh daj the dad kamen la čhake lačhe romes. Šaj peske mišľinen, hoj lačho rom hino ajso, so anel andre fameľija bare love. Hin lačhes, te la ela andro kher savoro so kampel, aľe dvoležiteder hin či koda terno la džanela lačhes duchovňe te ľidžal. Našťi bisteras, so pal ada vakerel o Jehovas. Matuš 6:33 phenel, hoj amen o kresťana das „pro peršo than le Devleskero kraľišagos“ a na o love. Rado dikhas la da le dades. Tiš presikavas paťiv olenge, so khatar amende bešen. Aľe nekbuter kamas te kerel radišagos le Jehovaske.

ROZMIŠĽIN, SO HIN FEDER TE KEREL

11) So amenge pomožinel lačhes peske te kidel avri olestar, so šaj keras? (Hebrejenge 5:14)

¹¹ Imar džanas sar pre kada dikhel o Jehovas. Aľe varekana šaj keras vareso avka the avka, a so akana? So hin feder te kerel? (Pregen Hebrejenge 5:14.) Pomožinela amenge, te džanaha te rozprindžarel, so hin lačho a so na. A oda pes del ča akor, te rozmišľinaha, ke soste ľidžala oda, so kamas te kerel. A avka avaha pre oda so te kerel. Varekana oda hin loko, aľe varekana pharo. Aľe te džanas te rozprindžarel sar vareso doperela, oda amenge pomožinela lačhes peske te kidel avri, so keraha.

12, 13) Sar tuke oda, hoj džanes te rozprindžarel, so hin lačho a so na, pomožinel lačhes peske te kidel avri e buťi?

¹² Predstavin tuke. Rodes tuke e buťi, kaj pes te džanes te postarinel pal e fameľija. Hin tuke pre dzeka duj. Soduj buťa pes keren 8 ori. A tiš nane tutar dur. Nane oda o buťa, save e Biblija zakazinel. Aľe ča jekh buťi hin tuke pre dzeka a tiš pes odoj zarodel buter. Aľe sigeder sar peske pheneha, savi buťi peske kideha avri, kampel pal varesoste aver te rozmišľinel.

¹³ Domukhel tuke kadi buťi, kaj te phires pre savore zhromažďeňa? Abo na lela tuke kadi buťi o časos, savo kampel te del la fameľijake, kaj lake te pomožines duchovňe te barol, te el bachtaľi a te ciťinel o smirom? Te peske deha kajse otazki, oda tuke pomožinela „te rozprindžarel oda, so hino čačes  dvoležito“. (Fil. 1:10) A avka džaneha te del pro peršo than le Jehovas the oda, so kampel tira fameľijake. Avka peske kideha ajsi buťi, savi tuke o Jehovas požehňinela.

14) So tuke pomožinel ňikaske te na podmarel o pindre?

¹⁴ E Biblija phenel: „Ňikaske na podmarena o pindre.“ (Fil. 1:10) Hin mištes, te amen džanas te rozprindžarel sar oda, so keras, len averdžene. Tuke pes šaj pačinel tiro uraviben abo oda sar tut uchanes. Aľe mištes hin tiš te rozmišľinel sar oda len o phrala the pheňa andro zboros a tiš ola, so paš tute bešen. Te džanes sar oda len, paľis džanes so te kerel. A te len kames, na ela tuke jekh, so ciťinen. Ureha tut slušnones a rodeha, so hin lačho „predal o aver“. (1. Kor. 10:23, 24, 32; 1. Tim. 2:9, 10) Oleha, hoj peske  lačhes kidas avri, so keraha, presikavas avrenge o kamiben the e paťiv.

15) So kampel te kerel sigeder, sar džas vareso baro te kerel?

¹⁵ Te džas vareso baro te kerel, kampel anglal te rozmišľinel, so kampel te kerel, kaj kada te avel avri. O Ježiš phenďa, hoj manuš, savo džal vareso te kerel, peršo „zgenela, či les hin dos love“. (Luk. 14:28) Vaš oda ela mištes, hoj sigeder sar vareso keraha, rozmišľinaha, so savoro kampel, kaj oda te džanas te dokerel. Šaj avas pre oda, hoj kampel vareso te zmeňinel abo uplňe te prekerel. Tiš ela šukar, te pal kada povakeraha la roďinkaha, kaj savore te achaľon, so pes lendar užarela. A te len šuneha a leha, so on vakeren, paľis tuke kamena korkore te pomožinel, kaj tuke oda te avel avri. (Prisl. 15:22)

KER AVKA, KAJ TUKE ODA TE AVEL AVRI

16) So te kerel, kaj amenge te avel avri oda, so peske phenďam, hoj keraha? (Dikh the o ramčekos „ Sar peske lačhes te kidel avri, so kereha“.)

¹⁶ Oda, hoj kereha avka sar hin pisimen andre kada člankos tuke pomožinel lačhes peske te kidel avri, so kereha. Te džanes pal soste džal, dodžanľal tut so nekbuter a achaľos sar pre ada dikhel o Jehovas, paľis džaneha te kerel avka sar hin le Jehovaske pre dzeka. Akana kampel te mangel le Jehovas, kaj oda, so peske phenďal, hoj kereha, tuke te avel avri.

17) So amenge kampel, kaj te džanas lačhes te kidel avri, so keraha?

¹⁷ So amenge pomožinel lačhes peske te kidel avri, so keraha? Nane oda amari goďi abo oda, so zadžiďiľam, aľe hin oda goďi le Jehovastar. Bo ča ov amenge šaj del, kaj te achaľuvas, kaj te džanas a kaj te rozprindžaras. Bo te kada amen ela, ta paľis džanaha te kerel goďaha. (Prisl. 2:1–5) Te mukhaha, kaj amen o Jehovas te ľidžal a lačhes peske kidaha avri avka, kaj te keras leske radišagos, paľis avaha bachtale. (Žalm 23:2, 3)