Filipanenge 2:1-30
2 Te tumen sar kresťana džanen te podhazdel, le kamibnaha keren, kaj tumenge te el feder pro jilo, pomožinen jekhe avreske, jilestar tumen rado dikhen, hin tumenge pharo jekh pal aver,
2 mi el the tumaro jilo the goďi zajekh. Ľikeren peha andre savoreste jekhetane a avka miro jilo radisaľola mek buter.
3 Ma keren tumendar, hoj san feder sar aver a hoj pre tumende nane. Aľe pokoraha dikhen pre avrende, hoj hine bareder sar tumen.
4 Ma dikhen ča pre oda, so kampel tumenge, aľe the pre oda, so kampel avrenge.
5 Rozmišľinen avka sar o Ježiš Kristus.
6 O Del les kerďa, kaj te dživel andro ňebos.* Aľe aňi leske pre goďi na avľa, hoj ov kamel te el o Del.
7 Ov omukhľa rajikano dživipen andro ňebos a avľa tele pre phuv, kaj pes lestar te ačhel manuš a te služinel avrenge.
8 Sar manuš pes poňižinďa a šunelas andre savoreste. A oda až avka, hoj muľa a primarde les pro drukos.*
9 Vaš oda chudľa le Devlestar ajsi bari zor the menos, savo ňikas nane, ča les.
10 O Del ada kerďa, kaj le Ježišoske te presikaven e paťiv sako, ko hino andro ňebos, ko hino pre phuv the ola, ko hine tel e phuv.
11 Kerďa ada, kaj dojekh manuš te udžanel,* hoj o Ježiš Kristus hino Raj a kaj avka te el ašardo o Del, amaro Dad.
12 Phralale mire, avka sar furt šunenas le Devles, sar somas tumenca avka dureder keren, choč* tumenca akana na som. Keren sa predal oda, kaj te aven zachraňimen a keren oda bara paťivaha anglo Del the la daraha, kaj te na keren vareso so pes le Devleske na pačinel.
13 O Del andre tumende kerel, hoj birinen a kamen te kerel oda, so pes leske pačinel.
14 Savoro keren avka, kaj te na dudrinen a kaj tumen te na vesekedinen.*
15 Avka avena anglo Del žuže* andro jile, bije chiba the sar te bi le Devleskere čhave bijo binos. A sikavena, hoj san sar švetlos andro svetos maškar o nalačhe manuša, save keren baro džungaľipen.
16 Dureder tumen ľikeren le Devleskere lavestar, savo ľidžal ko dživipen. Paľis, sar avela le Kristoskero ďives, radisaľuvava, bo džanava, hoj oda savoro, so kerďom predal tumende, na sas jevavalom.*
17 Me som akana sar te bi odi obeť, savi čhorďol avri pro oltaris,* kaj tumen te anen obeťi predal e služba, ke savi tumen cirdelas o paťaviben a me olestar igen radisaľuvav.
18 The tumen manca radisaľon.
19 Te oda kamela o Raj o Ježiš, paťav, hoj so neksigeder ke tumende bičhavava le Timotej. A kada man dela zor, bo džanava sar dživen.
20 Nane man ňiko ajso sar ov, ko bi pes pal tumende avka jilestar starinelas.
21 Savore dikhen buter pre oda, so lenge kampel a na pre oda, so kamel o Ježiš Kristus.
22 Aľe pal o Timotej džanen, savo baro priklados diňa, sar manca phirelas sar čhavoro le dadeha, kaj pes te vakerel e lačhi sprava.
23 Paťav, hoj les ke tumende bičhavava so neksigeder sar pes dela. Kerava oda takoj sar man dodžanava, so manca ela.
24 A te oda kamela o Raj, paťav, hoj the me ke tumende avava so neksigeder.
25 Aľe akana dikhav, hoj kampel, kaj tumenge te bičhavav mire phrales le Epafroditos. Ov manca služinel a tiš igen zaačhel vaš o paťaviben. Les bičhaďan, kaj mange te pomožinel andre savoreste.
26 O Epafroditos tumen pale kamel te dikhel. Hin leske phares pro jilo, bo tumenge pal leste keren pharo šero, kaj nasvaľiľa.
27 Sas ajso nasvalo, ajci hoj na muľa. Aľe o Del leske presikaďa o jilo. A na ča leske, aľe the mange, kaj man te na dukhal mek buter o jilo.
28 Vaš oda les so neksigeder bičhavav, kaj te radisaľon, hoj les pale šaj dikhen a kaj the miro jilo te el pro than.
29 Jilestar les vičinen ke tumende andro kher avka sar pes oda kerel maškar ola, so služinen le Rajeske. Ajse muršenge presikaven paťiv.
30 Tumen našťi avľan adaj, kaj mange te pomožinen. Aľe ov the avka avľa, choč džanľa, hoj šaj merel, bo služinel le Kristoske the angle* ma.
Poznamki tele čijarkica
^ Abo sas les ajso isto ťelos sar le Devles.
^ Dikh tuke buter adaj andro Slovňikos.
^ Abo uznajinel.
^ Abo hoc.
^ Abo na dokeren, na halasinen, na hadinen.
^ Abo čista.
^ Abo hijaba.
^ O Pavol kaleha kamelas te phenel, hoj hino ochotno te del the pes korkores vaš o phrala the pheňa andro zboros.
^ Abo vaš, bijal, aščal, predal.
