Dujto Korinťanenge 1:1-24
1 Me, o Pavol, saves o Del kidňa avri, kaj te avav apoštolos le Ježišoskero Kristoskero the amaro phral o Timotej, bičhavas ada ľil le Devleskere zboroske, savo hino andro foros Korint. Tiš savore svatonenge* andre calo Achaja.
2 Mi del tumen o Del amaro Dad the o Raj o Ježiš Kristus baro lačhipen a mi el tumen o smirom.
3 Mi el ašardo o Del the Dad amare Rajeskero le Ježišoskero Kristoskero. O Dad, saveske nane jekh so predživas, o Del, savo del zor, kana ča amenge kampel.
4 O Del kerel, kaj amenge kaleha te el mištes pro jilo andre savore amare pharipena, kaj the amen te džanas te podhazdel avren. Avka, kaj lenge te el mištes pro jilo, the te zadživena chočsavo pharipen.
5 Vaš oda, hoj sam le Kristoskere učeňika, ta but cerpinas. Aľe prekal leste the chudaha but zor.
6 Sar zadživas o trapišagos, hin oda vaš oda, kaj tumen oda te podhazdel a kaj te aven zachraňimen. A te amen ada podhazdel, tiš tumen ada šaj podhazdel. Bo paľis šaj džanen te ľikerel avri oda isto trapišagos, so zadživas amen.
7 Zorales andre tumende paťas. Bo džanas, hoj te zadživen oda trapišagos so the amen, ta tiš avena the podhazdle avka sar amen.
8 Phralale, kamas, kaj te džanen, so amenge zadžiďiľam andre Azija.* Oda, so zadžiďiľam, sas predal amende igen pharo. Ada na ľikerďamas avri amara zoraha. Imar aňi na paťahas, hoj predživaha.
9 Samas amenge ista, hoj meraha. Aľe ada amenge sikaďa, kaj pes te na zmukhas pre peste, aľe pro Del, savo uštavel andal o meriben.
10 Zachraňinďa amen olestar, hoj šaj muľamas. A paťas, hoj kada kerela the dureder.
11 The tumen amenge šaj pomožinen avka, hoj tumen vaš amenge jilestar modľinena. Bo te pes vaš amenge modľinena butdžene, o Del oda šunel avri a pomožinel amenge. Vaš kada butdžene paľikerena.
12 Pre kada sam barikane: Hin amen žužo* svedomje. Bo maškar o manuša andro svetos a hlavňe maškar tumende dživahas kavka sar o Del kamel. Na zmukhahas amen pre manušikaňi goďi, aľe pre le Devleskero baro lačhipen.
13 Pisinav tumenge ča pal oda, so pes lokes genel a del pes oleske lokes te achaľol. A paťav, hoj kale savoreske the achaľona.
14 Varesave tumendar imar achaľile, hoj tumen amenca šaj ašaren. Avka sar the amen pes tumenca ašaraha andro ďives amare Rajeskero le Ježišoskero.
15 Vaš oda, hoj mange kaleha som isto, kamľom peršo te avel ke tumende a te dikhel tumen dujtovar, kaj pale te radisaľon.
16 Kamľom te džal ke tumende, sar geľomas andre Macedonija. Andal e Macedonija bi avľomas pale ke tumende a paľis bi manca avľanas varesavo kotor le dromeha andre Judeja.
17 Mišľinen tumenge, hoj ada phenďom ča avka? Abo te vareso kamav te kerel, ta kerav oda sar o manuša a phenav „ha“ a paľis „na“?
18 Avka sar tumen šaj zmukhen pro Del, avka tumen šaj zmukhen the pre amende, hoj sar phenas „ha“, na mišľinas „na“.
19 Bo le Devleskero Čhavo o Ježiš Kristus, pal savo tumenge me, o Silvan* the o Timotej vakerahas, na phenelas „ha“ a mišľinelas „na“, aľe te phenel „ha“, ta hin oda the „ha“.
20 Džanas, hoj savore Devleskere sľubi pes ačhile „ha“ prekal o Ježiš. A vaš oda the andre leskero menos, sar amen modľinas ko Del, phenas „amen“, kaj kaleha te ašaras le Devles.
21 Aľe koda, ko čačes šaj phenel, hoj tumen the amen patrinas le Kristoske a ko amen kidňa avri peskere svatone duchoha, hino o Del.
22 Ov pre amende diňa peskeri pečať a diňa amen o svato duchos. Oda hino sar te bi o sľubos andre amare jile, saveha amenge šaj avas ista, hoj chudaha oda, so majinel te avel.
23 Anglo Del dav prisaha pre miro dživipen, hoj andro Korint mek na avľom vaš oda, bo na kamľom, kaj tumen te ciťinen mek goreder.
24 Nane oda avka, hoj bi kamahas te en sar te bi raja upral tumaro paťaviben. Jekhetane keras buťi predal o Raj, kaj tumen te aven bachtale. Sem tumen imar hin zoralo paťaviben.
Poznamki tele čijarkica
^ Dikh tuke buter adaj andro Slovňikos.
^ Mišľinel pes varesavo kotor andal e Rimsko riša.
^ Abo čisto.
^ Vičinenas les the Silas.
