Peršo Peter 3:1-22
3 Avka the tumen romňale. Šunen tumare romen, kaj ola, save na dživen pal o Devleskero lav chuden te paťal bije oda, hoj lenge vareso vakerena, aľe angle* oda, sar tumen chovinen,
2 te dikhena sar tumen igen lačhes* chovinen a hoj lenge presikaven bari paťiv.
3 Tumaro šukariben te na el andre oda, so dičhol avral, andre oda sar tumenge khuven o bala, hoj pre peste thoven o somnakaj* a uren rajikano uraviben.
4 Tumaro šukariben mi dičhol andre oda, save san andro jilo. Šukaľaren tumen sar te bi aleha, hoj presikavena o smirom a džanena te ačhel pokojna, bo ada hino vareso igen baro andre Devleskere jakha. A kajso šukariben na našľola.
5 Avka pes varekana šukaľarenas the o verna* romňija, save paťanas andro Del. Šunenas peskere romen
6 avka sar the e Sara, savi šunelas le Abraham a phenelas leske rajeja miro. The tumen san sar e Sara, te keren lačhipen a ňič tumen te na daravel avri.
7 Avka istones the tumen roma. Sikaven tumare romňijenge, hoj lenge achaľon. Presikaven lenge e paťiv, bo o džuvľija hine slabeder avka sar e nadoba, savi šaj sig phaďol. The len o Del jilestar dela o dživipen sar daros avka sar the tumen. Aľe te bi ajse na enas, ta o Del na šunela avri tumare modľitbi.
8 A mek ada. Savore aven zajekh andre oda sar rozmišľinen. Kamen te achaľol jekh avres, igen rado dikhen le phralen the le pheňen, mi el tumenge jilestar pharo jekh pal aver a aven pokorna.
9 Te tumenge aver keren vareso nalačho, ma den lenge pale avka, hoj tiš lenge kerena vareso nalačho. Te tumenge rakinen, ma den lenge oda pale. Aľe vakeren lenca šukare lavenca, bo pre ada sanas kidle avri.* Paľis chudena le Devlestar lačhipen.
10 Sem „ko kamel, kaj les te el lačho the bachtalo dživipen, mušinel peske te del pozoris pre oda, so phenel, kaj te na phenel ňič nalačho a pre peskero muj, kaj te na klaminel.
11 Mi preačhel te kerel o nalačhipen a mi kerel oda, so hino lačho. Mi kerel sa predal ada, kaj avrenca te dživel andro smirom a kaj les te uľikerel.
12 Bo o Jehovas* dikhel pre ola, so keren oda, so hino lačho andre leskere jakha* a šunel, te pes ke leste jilestar mangen. Aľe o Jehovas* hino proťi ajse manuša, save keren o nalačhipen.“
13 A ko tumenge so kerela, te calone jileha kerena oda, so hino lačho?
14 Aľe choč* cerpinďanas vaš oda, hoj keren oda, so hino lačho, avena bachtale. Ma daran olestar, sostar daran on aňi ma izdran daratar.
15 Presikaven andro jilo bari paťiv le Kristoske sar tumare Rajeske. Furt aven pripravimen te zaačhel vaš oda, andre soste paťan anglo dojekh, ko tumendar pal kada phučela. Aľe sar lenca vakerena, keren oda avka, hoj džanena te ačhel pokojna a hoj lenge presikavena bari paťiv.
16 Keren avka, kaj tumen te el žužo* svedomje, kaj ola, so proťi tumende furt vakeren a hin jekh so, kaj len te anen andre ladž oleha, hoj tumen sar kresťana lačhes chovinena.
17 Bo hino feder te cerpinel vaš oda, so hino lačho, te oda o Del domukhela, sar te cerpinel vaš oda, so hino nalačho.
18 Sem the o Kristus muľa jekhvar pro furt vaš o bini, o lačho manuš vaš o nalačhe, kaj te aven pale lačhe la Devleha. Sas murdardo sar manuš, aľe uštado andal o meriben andre ajso ťelos, savo hin olen, so dživen andro ňebos.*
19 Paľis geľa te vakerel le aňjelenge,* save sas andre harešta.*
20 Olenge, save varekana preačhile te šunel le Devles. Akor, sar dživelas o Noe, o Del trpezlivones užarelas, medik* pes budinela o korabos. Andre leste pes zachraňinde ča 8 džene a on predžiďile kada baro paňi.
21 Oda, so pes akor ačhiľa, sikavel pro boľipen, savo tumen akana zachraňinel (na džal pal oda, hoj bi oda boľipen pal tumende morelas* e mel, aľe kaleha mangen le Devles, kaj tumen te el žužo svedomje) a oda šaj el vaš oda, hoj o Ježiš Kristus sas uštado andal o meriben.
22 Ov geľa andro ňebos a bešel paš e Devleskeri pravo sera. O Del les diňa zor upral o aňjela, vladi the zora.
Poznamki tele čijarkica
^ Abo vaš, bijal, aščal, predal.
^ Abo hoj san žuže andro jilo the andre goďi.
^ Abo zlatos.
^ Doslovňe: svata.
^ Doslovňe: vičinde.
^ Dikh o dodatkos A5.
^ Doslovňe: spravodliva. Dikh tuke buter adaj andro Slovňikos.
^ Dikh o dodatkos A5.
^ Abo hoc.
^ Abo čisto.
^ Doslovňe: uštado andro duchos.
^ Mišľinel pes pro demona.
^ Abo bertena.
^ Abo pokim.
^ Abo thovelas avri.
