Dann tan lontan, pou soutien ladorasion Bondié, bann Zisraélit té doi done dis poursan dan sak zot té gingn dan lané, é sa té i apèl la dim a. Lé vré, Bondié lavé di azot : « I fo atoupri ou done dis poursan [ oubien « la dîme » dapré, La Bible. Traduction officielle liturgique] dan tout sak out plantasion i done, in lané apré lot » (Détéronom 14:22).

 Done la dim té fé parti bann komandman la Loi Moiz, sétadir bann loi Jéova lavé doné bann Zisraélit. Kom bann krétien lé pa oblijé suiv la loi Moiz, zot la pa bézoin done la Dim (Kolosien 2:13, 14). Mé, chakèn i done kan mèm inn ti moné « kom li la désidé dan son kèr, mé pa avèk rogré ou parské li san ali oblijé, parské Bondié i èm sak lé kontan doné » (2 Korintien 9:7).

•  La dim dan Lansien Tèstaman

•  La dim dan lo Nouvo Tèstaman

 Dan lo promié parti la Bib k’i apèl osi Lansien Tèstaman, i koz souvan su la dim. Surtou kan Moiz té fine done bann Zisraélit la loi (la Loi Moiz) ké Bondié lavé fé pou zot. Mé avan sa i koz osi ladsi.

Avan la Loi Moiz

 Lo promié moun dan la Bib ké la done la dim, sé Abram, ké té apèl osi Abraam (Jénèz 14:18-20 ; Ébré 7:4). Li la done sa lo roi prèt Salèm, é ondiré, li la fé sa rienk in foi mèm. La Bib i di pa si néna dot foi ousa Abraam èk son bann zanfan la done la dim.

 Lo dézièm moun dan la Bib la done la dim, sé Jakob, lo ti zanfan Abraam. Li la promèt Bondié done ali « dis poursan tout » sak li noré gingné, si Bondié té béni ali (Jénèz 28:20-22). Dapré désèrtin zèspésialis la Bib, surman Jakob la fé sakrifis zanimo pou done la dim la. Promès Jakob la fé té konsèrn rienk ali tousèl, sa té vé pa dir ké son famiy osi té oblijé done la dim.

Sou la Loi Moiz

 La Loi té oblij bann Zisraélit done la dim pou soutien ladorasion Bondié dann tan la.

•   Gras la dim, sak té okip ladorasion Bondié toultan é ké navé poin d’plantasion, sétadir bann Lévit, té gingn sak zot lavé bézoin pou viv. Désèrtin an parmi lété prèt (Nonm 18:20, 21). Lo pèp té done dis poursan dan tout sak zot navé, pou bann Lévit té pa prèt. Dan so dis poursan ké banna té i gingn, zot té doi done lo méyèr, sétadir « dis poursan » pou done sa lo bann Lévit ké té prèt (Nonm 18:26-29).

•   Ondiré mèm, ké chak lané té doi mèt in dézièm dim su koté pou bann Lévit, mé osi pou lo rès bann Zisraélit (Détéronom 14:22, 23). Lé vré, sa té util pou bann famiy Zisraélit kan navé bann fèt pou ador Jéova ; é désèrtin zané, dim la, lété pou èd sak té plis mizèr an parmi lo pèp (Détéronom 14:28, 29 ; 26:12).

 Koman té kalkul dim la. Chak lané bann Zisraélit té mèt su koté dis poursan sak zot té rékol dan zot plantasion (Lévitik 27:30). Sak té préfèr done larjan olèr k’zot rékol, zot té doi pa done 10% mé 12% dé sak zot té gingn dan lané (Lévitik 27:31). An plis ké sa té falé té done « dis poursan dan son bann zanimo » (Lévitik 27:32).

 Pou kalkul sa su zot bann troupo, bann Zisraélit té fé sort zanimo dann park, é tout lé dis, té mèt inn su koté pou la dim. Kisoi bon ou pa bon, la loi té di komsa, zot navé poin lo droi kontrol bann zanimo la, ni fé léchanj èk in not. Té falé pa non pli pèy sa èk larjan. Néna rienk lo dézièm dim, sak té sèrv pou bann fèt ladorasion Bondié chak lané, ké banna té gingn pèy èk larjan (Lévitik 27:32, 33). Franch vérité, sa té pli pratik pou désèrtin Zisraélit, parské zot té doi march loin pou alé bann fèt la oui (Détéronom 14:25, 26)!

 Tou lé konbien té falé bann Zisraélit té done la dim ? Bann Zisraèlit té done la dim tou lé zan (Détéronom 14:22). Par kont, tou lé sètan navé in lané Saba. Sété in lané ousa bann Zisraélit té lès la tèr ropozé (Lévitik 25:4, 5). Lané la, kan té ariv lo tan pou rékolté, té fé in léksèpsion é té pèy pa okin dim. La fin chak troizièm é chak sizièm lané, bann Zisraélit té done la dézièm dim pou sak té mizèr é bann lévit. Apré sa navé lo sétièm lané, lané saba, é chak foi té arkomans pou sèt zané (Détéronom 14:28, 29).

 Si in Zisraélit té pèy pa la dim kosa té i èspas ? Dapré la Loi té pa prévu puni in moun ké té done pa la dim. Zot té pèy sa, pa parskè zot lavé pèr chabouk, mé parské zot té koné zot té doi fé sa. I falé bann Zisraélit i déklar dovan Bondié zot lavé pèy la dim avan domand ali béni azot pousa (Détéronom 26:12-15). Pou Bondié si in moun té pèy pa la dim té komsi té vol ali (Malaki 3:8, 9).

 Èské pèy la dim té pèz domoun atèr ? Non. Bondié té promèt bann Zisraélit, si zot té pèy la dim, li noré dévid in takon bénédiksion d’su zot é i mankré pa zot rien (Malaki 3:10). Kan banna té pèy pa la dim, Bondié té i béni pa zot é zot navé problèm. Akoz sa, bann prèt é bann lévit té oblijé fé in travay a koté pou nouri zot famiy ; donk zot té i gingn pu èd la nasion pou ladorasion Bondié (Néémi 13:10 ; Malaki 3:7).

 Kan Jézu té su la tèr é juska tan k’li mor, bann zadoratèr Jéova té i doi toujour done la dim, aprésa té pu oblijé.

Lépok Jézu

 Dann parti la Bib k’i apèl Nouvo Tèstaman i di ké kan Jézu té su la tèr, bann Zisraélit té péy ankor la dim. Jézu la kondane bann chèf rolijié, paské zot té ‘mèt su koté sak té inportan dan la loi kom la justis, la mizérikord é la fidélité’, pou fé pas la dim an promié dan zot ladorasion (Matié 23:23). Parkont, Jézu la pa rovni su lobligasion péy la dim.

Aprè la mor Jézu

 In foi k’Jézu té mor, té pu oblijé pèy la dim. Sakrifis Jézu la aboli la Loi Moiz, é parlfèt, « lobligasion pèy la dim »(Ébré 7:5, 18 ; Éfézien 2:13-15 ; Kolosien 2:13, 14).