LESON 34

Koman nou pe mont ke nou ièm Jéova ?

ÉKOUT AN

Èske ou néna le santiman èt plu proch koté Bondieu depui ke ou étudié la Bib ? Èske ou ve kontinué rann plu for out lamitié avèk li ? Alor, rapèl aou ke plus Jéova va voir out lamour grandi pou li, plus li va èm aou é plus li va okup de ou. Koman ou pe mont ali ke ou ièm ali ?

1. Koman mont Jéova ke nou ièm ali ?

Nou mont Jéova ke nou ièm ali kan nou fé sak li di (lir 1 Jan 5:3). Jéova i fors pa pèrsonn obéi ali. Li lès chakèn choizi. An vré, pou fé plézir ali, i fo nou « obéi ali èk le keur » (Romin 6:17). Jéova i ve pa ke ou obéi ali jus parske ou san aou oblijé, mé parske ou ièm ali. Bann parti 3 é 4 dann liv la va èd aou mont Jéova ke ou ièm ali, kan ou fé sak li ièm é kan ou rejèt sak li détès.

2. Poukosa i pe èt difisil mont Jéova ke nou ièm ali ?

« Le jus néna in bonpe zépreuv » (Psom 34:19). Nout tout, nou sobat kont nout bann zinpèrféksion. Nou néna osi bann problèm larjan, problèm travay. Nou koné bann zinjustis oubien nou néna dot difikulté ankor. Akoz bann problèm la, i pe èt difisil fé sak Jéova i demann anou. É i pe èt mèm plu fasil dézobéi ali. Mé si malgré tousala, ou obéi Jéova, ou va mont ali ke ou ièm ali plus ke tout. É ou va prouv ke ou lé fidèl. De son koté, Jéova i sra fidèl anvèr ou. Li va jamé abandonn aou (lir Psom 4:3).

ALON APRANN PLUS

Alon voir poukosa nout lobéisans lé inportan pou Jéova é alon koz su sak i pe èd anou rès ali fidèl.

3. In késtion ki konsèrn aou

Le liv Job i aprann anou ke Satan la pa akuz rienk Job, mé osi tout sak i ve sèrv Jéova. Lir Job 1:1, 6 – 2:10 é koz su bann késtion la :

Dapré Satan, poukosa Job té obéi Jéova ? (gard Job 1:9-11).
Kèl lakuzasion Satan la di kont tout bann zumin, aou osi ansanm ? (gard Job 2:4).

Lir Job 27:5b é koz su késtion la :

Koman Job la prouvé ke li té ièm vréman Jéova ?

Job la prouvé ke li té ièm Jéova : li la rès fidèl Jéova.

Nou va prouv ke nou ièm Jéova kan nou rès ali fidèl.

4. Kontant le keur Jéova

Lir Provèrb 27:11 é koz su bann késtion la :

Kosa Jéova i resan kan ou aji èk sajès é ke ou obéi ali ? Poukosa ?

5. Ou pe èt fidèl Jéova

Lamour pou Jéova i pous anou koz de li èk lé zot. La fidélité i pous anou fé sa mèm kan lé pa fasil. Gard le VIDÉO é koz su bann késtion ki vien apré.

VIDÉO : Défann out foi malgré lopozision (5:09)

Èske défoi ou trouv difisil koz de Jéova avèk lé zot ?
Kosa la èd Grayson surmont son peur ?

Lé plu fasil èt fidèl Jéova, si nou ièm sak li ièm é si nou détès sak li détès. Lir Psom 97:10 é koz su bann késtion la :

Èske ou pe sit detroi zafèr ke Jéova i ièm ? Èske ou pe sit detroi zafèr ke Jéova i détès ?
Koman ou pe aprann èm le bien é détès le mal ?

6. Nou na bann bienfé kan nou obéi Jéova

Obéi Jéova lé toujour le méyeur zafèr ke nou pe fé. Lir Izai 48:17, 18 é koz su bann késtion la :

Èske nou pe èt sur ke Jéova i koné toultan sak i fo vréman pou nou ? Poukosa ?
Depui ke ou étudié la Bib é ke ou aprann konèt le vré Bondieu, Jéova, kèl bienfé ou la ganié ?

NADFOI DOMOUN I DI : « Bondieu i fé pa in kont èk sak mi fé. »