LESON 22

Koman ou pe koz la bonn nouvèl èk lé zot ?

ÉKOUT AN

Plus ou va étudié bann vérité ke néna dan la Bib, riskab ou va di aou : « Tout domoun i devré konèt sa ! » Lé vré, tout domoun la bezoin konèt bann vérité la. Mé petèt, kan ou majinn aou koz èk domoun su sak ou aprann, i pe strès aou in pe. Alon voir koman ou pe surmont out strès é trouv kontantman pou prèch la bonn nouvèl.

1. Koman koz su sak ou aprann avèk domoun ou koné ?

Bann disip Jézu la di : « Nou pe pa arèt koz su bann zafèr ke nou la vu é ke nou la antann » (Akt 4:20). Zot té ièm tèlman la vérité, ke zot té ve koz de sa avèk tout domoun. Èske ou resan le mèm zafèr ? Si oui, trouv bann zokazion pou koz su sak ou aprann èk réspé, ansanm out fami é out bann kamarad (lir Kolosien 4:6).

Detroi zidé pou komansé

Avèk out fami, ou pe koz su in sujé biblik. Ou pe di komsa : « Ma la aprann in gayar zafèr semèn la. »
Lir in vèrsé ankourajan pou in kamarad ke lé malad oubien ke lé trakasé.
Avèk in kolèg travay ki demann aou, kosa ou la fé dan out ouikèn, koz èk li su sak ou la aprann dan out létud la Bib oubien dan in rénion.
Mont out bann kamarad le sit jw.org.
Invit dot moun asis out létud la Bib oubien amont azot koman demann in létud su jw.org.

2. Poukosa prèch èk lasanblé lé in bon lobjéktif ?

Bann disip Jézu té koz pa le gayar nouvèl, rienk èk domoun zot té koné. Jézu ‘la anvoiy banna prèch deu par deu dan tout bann vil’ (Luk 10:1). Se prédikasion organizé, la pèrmèt in bonpe d’moun antann la bonn nouvèl. Bann disip té trouv osi in bonpe kontantman, kan zot tout té prèch ansanm (Luk 10:17). Èske ou pouré fiks aou lobjéktif prèch èk lasanblé ?

ALON APRANN PLUS

Alon voir koman ou pe surmont out strès é pran plézir fé konèt le gayar nouvèl.

3. Jéova i sra avèk ou

Désèrtin la anvi préché, mé zot la peur kosa domoun va di é kosa domoun va fé.

Kan ou majinn koz su sak ou aprann, èske ou lé strésé ? Poukosa ?

Gard le VIDÉO é koz su le késtion ki vien apré.

VIDÉO : Ma la pri Jéova pou ke li donn amoin kouraj (4:05)

Koman bann jeun Témoin la, la sobat kont zot peur ?

Lir Izai 41:10 é koz su késtion la :

Si ou la peur préché, koman la priyèr i pe èd aou ?

Ou té koné sa ou ?

Avan komans koz la bonn nouvèl èk dot, in bonpe Témoin Jéova té kroi ke jamé zot noré gingn fé sa. Sé sak la ariv Sergey. Li té kroi ke li té vo pa rien é li té ariv pa koz èk lé zot. Li di : « Mèm si ma lavé peur, ma la komans koz su sak mi té aprann dan la Bib, èk domoun mi koné. Sak la étonn amoin, sé ke sa la redonn amoin konfians é sa la fortifié mon foi. »

4. Ou doi èt réspéktueu

Kan ou koz le gayar nouvèl, réfléchi su sak ou sa di mé osi su le fason ou sa di sa. Lir 2 Timoté 2:24 é 1 Pièr 3:15 é koz su bann késtion la :

Koman ou pouré mèt an pratik bann vèrsé la, kan ou koz su la Bib èk lé zot ?
Detroi dan out fami oubien out bann kamarad i sra petèt pa dakor èk ou. Kosa ou pouré fé ? Kosa ou devré pa fé ?
Poukosa lé mieu poz bann késtion avèk jantiyès, olèrk oblij lé zot aksèp out poin d’vu ?

5. Préché i rann ereu

Jéova la demann Jézu prèch le gayar nouvèl. Koman Jézu té konsidèr travay la ? Lir Jan 4:34 é koz su bann késtion la :

I fo manjé pou viv, é manj bann bon zafèr ki aranj la bouch i fé plézir anou. Poukosa fé la volonté Bondieu, kom prèch la bonn nouvèl, lété kom in manjé pou Jézu ?
Poukosa prèch la bonn nouvèl i pe rann aou ereu ?

Bann ti zafèr ke ou pe fé

Pandan la rénion la semèn, not bann zidé ke va èd aou komans bann diskusion.
Fé bann sujé dan la rénion la semèn. Gras bann sujé la, ou sra plus alèz pou koz èk lé zot su sak ou aprann.
Utiliz bann parti « Nadfoi domoun i di » é « Domoun i pouré demann aou » pou antrèn aou pou réponn bann késtion é bann remark ke ou antan souvan.

DOMOUN I POURÉ DEMANN AOU : « Kosa ou rakont ? »