LA VÉRITÉ su koi ? Su désèrtin kèstion inportan ke domoun i poz a zot depui lontan. Sadla par égzanp :

• Èske Bondieu i fé vréman in kont èk nou ?

• Èske bann gèr èk soufrans va arèté in jour ?

• Kosa nou devien kan nou mor ?

• Èske domoun lé mor i pe reviv in jour ?

• Koman mi doi prié pou ke Bondieu i ékout a moin ?

• Koman mi pe trouv le boneur ?

Ousa ou va rod répons bann kèstion la ? Si ou sava dann bibliotèk èk boutik i vann liv, ou pe trouv kantité d’liv ki soi disan i donn la répons. Souvan dé foi, inn i di in manièr é lot i di in not manièr. Dot lé bon in lépok, aprésa i revien dsu é i trouv lé pu bon.

Par kont, néna in liv i donn bann répons ke ou pe fé konfians. Tout sèk néna dann liv la lé vré. Dann in prièr pou Bondieu, Jézu la di : « Out parol lé vérité » (Jan 17:17). Se Parol la, sé la Sint Bib. Kontinu lir sa, ou nora bann répons klèr é vré ke la Bib i donn.

AKOZ KÈSTION LA ? Nou viv dan in monn kruèl é néna linjustis. In bonpe relijion i di ke Bondieu i lès zépreuv ariv a nou pou voir si nou gard la foi ou pa.

SAK LA BIB I AMONT : Bondieu lé jamé loteur le mal. Lé ékri dann Job 34:10 : « Lé inposib pou le vré Bondieu fé sak lé méchan, é pou le Toupuisan fé sak lé injus ! ». Bondieu néna in gayar lintansion pou bann zumin. Sé pousa, Jézu la aprann a nou se prièr : « Not Pèr dann sièl, ke [...] out Roiyom i vien. Ke out volonté i réaliz, kom dann sièl, osi su la tèr » (Matieu 6:9, 10). Bondieu i ièm a nou tèlman, ke li la fé tout sak i fo pou réaliz se gayar lintansion (Jan 3:16).

Ou pe lir osi Jenèz 1:26-28 ; Jak 1:13 èk 1 Pièr 5:6, 7.

AKOZ KÈSTION LA ? La gèr i arèt pa tué in bonpe d’moun. La soufrans i touch nout tout.

SAK LA BIB I AMONT : Bondieu la anons in lépok ousa li va mèt la pé su la tèr. Gras son gouvèrnman dann sièl, li va dirij la tèr é domoun i « aprandra pu fé la gèr ». A la plas, zot « va transform zot bann lépé an zouti pou travay la tèr » (Izai 2:4). Bondieu va arèt tout linjustis èk tout la soufrans. La Bib i promèt : « [Bondieu] va tir bann larm dan zot zieu, é nora pu la mor ; ni okin deuiy, ni okin plint, ni okin douleur. Bann zafèr té égzis depui avan [linjustis èk soufrans ke nou subi koméla] la finn disparèt » (Révélasion 21:3, 4).

Ou pe lir osi Psom 37:10, 11 ; 46:9 èk Mika 4:1-4.

AKOZ KÈSTION LA ? In bonpe relijion i amont kan nou mor néna rienk le kor i mor, é nana in nafèr i rès vivan. Désèrtin i prétan ke le mor i tourmant bann vivan. Dot i di osi ke Bondieu i puni bann méchan pou toultan dan in lanfèr d’fe.

SAK LA BIB I AMONT : Kan domoun i mor, zot i arèt viv. Éklézias 9:5 i déklar : « Bann mor i koné pu rien ». Sé pousa, zot i gaingn pa tourmant bann vivan, ni èd a zot (Psom 146:3, 4).

Ou pe lir osi Jenèz 3:19 èk Éklézias 9:6, 10.

AKOZ KÈSTION LA ? Nou ve viv é profit la vi èk domoun ke nou ièm. Nou sré kontan artrouv a zot an vi.

SAK LA BIB I AMONT : In bonpe d’moun lé mor i sra résusité. Jézu la promèt : « Sak lé dann bann tonb souvnir va antann son voi é va sort deor » (Jan 5:28, 29). Kom lété le premié lintansion Bondieu pou domoun, sak i sra résusité, va viv dann paradi su la tèr (Luk 23:43). Bondieu i promèt, domoun i ékout a li nora in santé parfé é zot va viv pou toultan. La Bib i déklar : « Bann domoun droit va posèd la tèr, é su li zot va abit pou toultan » (Psom 37:29).

Ou pe lir osi Job 14:14, 15 ; Luk 7:11-17 èk Akt 24:15.

AKOZ KÈSTION LA ? Dann tout relijion néna domoun i pri. Pourtan, désèrtin lé pa sur ke zot prièr lé ékouté.

SAK LA BIB I AMONT : Jézu la amont anou ke la pa bezoin résit par keur nout prièr. Li la di : « Kan zot i pri, redi pa toujour le mèm zafèr » (Matieu 6:7). Si nou ve Bondieu i ékout nout prièr, nou doi pri ali la manièr ke li ve. Pousa, nou doi aprann son volonté pou èt sur ke li ékout a nou. Nou lir dan 1 Jan 5:14 : « Koike se soi, ke nou demann selon son volonté [sèk Bondieu], li antan a nou ».

Ou pe lir osi Psom 65:2 ; Jan 14:6, 14 èk 1 Jan 3:22.

AKOZ KÈSTION LA ? In paké domoun i kroi ke larjan, in gayar situasion ou zot boté i pe rann azot ereu. Mèm kan zot i rod tousa, malereuzman zot i koné pa le boneur.

SAK LA BIB I AMONT : Nou pe èt ereu si nou fé sèk Jézu la di : « Ereu sèk i koné ke zot la bezoin Bondieu » (Matieu 5:3). Néna in seul manièr konèt le vré boneur. Bondieu la mèt in bezoin an chakèn d’nou : Konèt la vérité su li é son lintansion pou nou. Se vérité la, lé dan la Bib. Konèt sa, va pèrmèt anou fé lo tri dann sak lé inportan ou pa. Nou nora in vi droit é ereu si nou lès la Bib gid a nou (Luk 11:28).

Ou pe lir osi Provèrb 3:5, 6, 13-18 èk 1 Timoté 6:9, 10.

 Nou la jus jèt in zieu desu bann répons la bib pou 6 kèstion. Èske ou ièmré konèt plus ? Surman, « si ou koné ke ou la bezoin Bondieu ». Petèt néna dot choz i intérès a ou, kom : « Si Bondieu i ve èd a nou, akoz néna tousa soufrans èk bann maleur ? Koman mi pe rann la vi mon fami plumèyeur ? » Pou bann kèstion la é dot ankor, la Bib i donn a nou bann répons ke lé sur.

Malereuzman, néna bonpe lé ant de keur pou regard dan la Bib. Zot i pans ke lé in liv tro difisil pou konprann. Pou bann kèstion ke ou poz a ou, ou ièmré i èd a ou trouv répons dan la Bib ? Bann Témoin Jéova i pe èd a ou 2 fason.

An premié, néna le liv Qu’enseigne réellement la Bible ? Li lé fé pou domoun na poin tro le tan é ki rod bann répons klèr ke la Bib i donn. An dezièm, néna létud la Bib, èspésialman pou ou. In Témoin Jéova va vni voi a ou out kaz ou in not landroi, leur é le jour ou ve. Inkièt pa lé gratuit. Su la tèr, in bonpe domoun i profit se fason d’fèr pou étudié la Bib. Néna in paké d’moun la di : « Moin la trouv la vérité ! »

Ala in gran trézor ! La vérité dan la Bib i libèr a nou : bann zistoir manteur, bann zafèr i anbrouiy lèspri èk la peur inutil. La vérité i rann ereu, i donn in bu dan la vi é in lèspérans sur. Jézu la fé se promès : « Zot va konèt la vérité, é la vérité va libèr azot » (Jan 8:32).