Furmezur ou la étudié bann zansègnman inportan ke néna dann brochur la, surman out lamour pou Jéova lé devnu plu for. Asteur, i fo prann soin se lamour la, pou ke li dur toultan (1 Pièr 2:2). Kontinué aproch a ou koté Bondieu par in létud son Parol. Sé rienk komsa ke ou poura éspèr viv pou toultan (Lir Jan 17:3 ; Jud 21).

 Plus ou va konèt Bondieu, plus out foi i sra plu for. Out foi va pèrmèt a ou de kontant a li (Ébreu 11:1, 6). Out foi va pous a ou regrèt out bann péché, é va èd a ou aport bann chanjman ki fo dan out vi, é sa va èd a ou viv mieu (Lir Akt 3:19).

 Nout tout, nou ièm partaj bann gayar nouvèl. Asteur, ou voudré koz avèk dot moun su bann zafèr ke ou la dékouvèr, é sa lé in nafèr normal. Si ou kontinué étudié la Bib, ou va gingn mieu utiliz a li pou ésplik lé zot out kroiyans an Jéova. É ou poura fé konèt a zot bann gayar nouvèl ke li néna pou nou (Lir Romin 10:13-15).

 Néna in bonpe i komans koz bann gayar nouvèl la, avèk zot kamarad é zot fami. I fo ke ou rès janti é ke ou mont out réspé anvèr zot. Olèrk di avèk out fami ke zot relijion lé fo, lé mieu ke ou komans par fé dékouv a zot bann promès ke Bondieu i fé. É oubli pa ke, souvandéfoi, le keur domoun lé plus touché par nout joli manièr, ke par nout bann parol (Lir 2 Timoté 2:24, 25).

 Out létud biblik va èd a ou mieu aplik bann zansègnman  la Bib. Avèk le tan, ou va avoir in relasion plu for avèk Jéova. Ou poura rant dan son fami ! (Lir 2 Korintien 6:18).

 Si ou kontinué étudié la Bib, ou va kontinué fé bann progré (Ébreu 5:13, 14). Demann in Témoin Jéova pou étudié la Bib avèk ou, é sa, avèk le liv Kosa la Bib i ansègn a nou ? Plus ou va étudié la Parol Bondieu, plus ou va viv ereu (Lir Psom 1:1-3 ; 73:27, 28).

 Bann gayar nouvèl ke néna dann brochur la, sé Jéova, le Bondieu ereu, ke la donn a nou. Ou pe raproch a ou koté li, si ou raproch a ou koté son bann sèrviteur (Ébreu 10:24, 25). Plus ou va kontinué fé bann zéfor pou kontant son keur, plus ou va aproch a ou vèr la vré vi, la vi pou toultan. Lé vré, aproch a ou koté Bondieu, sé le méyeur zafèr pou fé (Lir 1 Timoté 1:11 ; 6:19).