I te au marama, e reka ana tatou te akara i te au porokaramu e te au vitio pae vaerua i runga i te JW Broadcasting. Inara, kare te reira e tae ana ki te maata anga o te au taeake i Aperika no te mea kare e initaneti. Eaa ka kore ei?

 E maata te au ngai i Aperika kare e Initaneti. E me e Initaneti tetai, e marie te reira e te oko maata. Ei akaraanga, kua kopi mai tetai akaaere kotinga i Madagascar i te JW Broadcasting o tetai marama i ko i te Internet café. Kua piraia aia e $16, e maata atu i ta tetai aronga e rauka ana i te epetoma! a

 Noatu te manamanata, e mirioni ua atu i Aperika, ka mataora i teianei te akara i te JW Broadcasting noatu kare e Initaneti. Akapeea ra?

 Mei te 2017 mai, kua tae te JW Broadcasting ki te au taeake o te Sahara i Aperika na runga i te satellite-television channel. E channel oronga ua teia kare e tutaki, e 24 ora i te rā, e 7 rā i te epetoma, roto i te 16 reo.

 Kua contract te Au Kite o Iehova i tetai television broadcast no te tuku i te au akakiteanga na runga i te satellite. Ka apai teia satellite i teia akakiteanga ki te 35 enua o te Sahara i Aperika. Ka pou e $12,000 tuma no te tutaki i teia contract i te marama. I tetai taime, ka tutakiia tetai akaou moni no te broadcast i te au angaanga e tupu ra i te reira taime na runga i tetai channel ke. Ka rauka i te tauatini ua atu au taeake i te akara i te au uruoaanga me kore te au porokaramu takake no te tutaka a te au mata o te opati Betela.

 E maata te tangata, e te aronga kare i te Au Kite o Iehova, te akara ra i te JW satellite channel i runga i te tivi i te kainga. Inara, e maata te au taeake kare e peke ta ratou, no te akara i teia satellite channel. Ei tauturu ia ratou, e 3,670 tuma Are Uipaanga Patireia kua tamouia tetai satellite kia rauka i te au taeake e te au tuaine i te akara i te JW Broadcasting. E $70 te oko i teia au apinga, e te apai ki reira, me e tivi e te projector tetai i roto i te Are Uipaanga Patireia. Me kare ra, e $530 tuma ka anoanoia no teia au apinga.

 Rekareka tikai te au taeake e te au tuaine i teia channel. Karanga tetai tangata pakari i Cameroon e: “Mei te kai maana rai i te metepara, na toku pamiri.” Karanga te taeake ko Odebode i Nigeria e: “Ei pamiri, e akara ana matou i te channel e toru taime i te epetoma. E reka ana taku tamariki i teia au taime. Ka pati mai ratou kia pata matou ki runga i te JW channel i tetai au taime ke.” Karanga a Rose i Nigeria rai e: “Rekareka au i te karanga atu e kua taui toku inangaro i te akara i te nuti, ki te JW satellite channel. Me akara au i te nuti, ka riri viviki ua au i taku e akara ra e ka kino toku toto kake. Inara e akamaroiroianga tikai te JW Broadcasting! Ko taku channel reka te reira. E akameitakianga tikai no ko mai ia Iehova.

 Kua ripoti tetai akaaere kotinga i Mozambique e kua akapapaia te au Are Uipaanga Patireia i tana kotinga, kia rauka te satellite channel. Ka tae te au taeake o teia au putuputuanga e tai ora me kore e maata atu, i mua ake ka akamata ai te uipaanga no te akara i te JW Broadcasting na runga i te satellite.

 No te uruoaanga pa enua 2019 i Johannesburg, Aperika Apatonga, kua taangaangaia te channel no te au ako puapinga, pera te au ako a tetai mata o te Pupu Akaaere, ki te iva au ngai ke ke. Karanga a Sphumelele, o te Broadcasting Department i te opati Betela i Aperika Apatonga e: “I mua atu ana kua oronga matou i te ako na runga i te Initaneti. Inara ka anoanoia te Initaneti meitaki e e aka moni te tutaki i te data. E meitaki atu te JW satellite channel e te māmā, e ka angaanga te reira.”

 Meitaki maata no ta kotou moni tauturu no te angaanga i te ao katoa, ka rauka i te maata anga o te au taeake e te au tuaine i Aperika i te akara i te JW Broadcasting na runga i te satellite. Āriki rekareka matou i ta kotou moni tauturu tei tae mai na roto i te donate.jw.org.