No te au anere e te au tauatini ua atu tangata e papetitoia nei i te au mataiti ravarai, kua anoanoia kia pātuia te au are ou no te akamori ia Iehova. No teia tumu, kua parani te tuanga o te Local Design/Construction o teianei ao no te pātu e te akaou e tere atu i te 2,700 au are akamorianga i te mataiti tavini anga 2020. a

 Inara, kua tamanataia teia au parani e te maki kino COVID-19. Kia paruru i te au taeake e te au tuaine e kia aru katoa i te ture o te enua, kua tāpū te Kumiti Neneianga o te Pupu Akaaere i tetai o teia angaanga pātu anga i teianei ao. Noatu rai, i te tuatau o te mataiti tavini anga 2020, tere atu i te 1,700 are akamorianga tei pātuia e tei akaouia i mua ake ka tupu ei te maki kino. Tetai katoa, kua oti tere atu i te 100 pātu anga opati Betela mamaata. Akara ana akapeea to tatou au taeake i puapinga ai mei teia angaanga pātu anga.

 Opati Betela i Cameroon. Te opati Betela i Douala i mua ana, e meangiti roa te reira e kua anoanoia kia akaouia. Kua manako te Kumiti Neneianga kia akaou i te opati Betela, inara e maata te moni ka pou no te rave i te reira. Kua kimikimi atu ratou i tetai ngai ou me kore te oko i tetai are e te akaou i te reira, inara kua puapinga kore te reira.

 Kite mai te au taeake i te tua tokerau o Douala, kua parani te kavamani i te maani i tetai mataara te ka aere na te pae i tetai o to tatou Are Akaputuputuanga. Ka riro teia mataara ei apai mai i te uira e te vai ki te reira ngai. Kua tano meitaki teia no te opati Betela. No reira kua akatika te Pupu Akaaere kia akatuia te opati Betela ou ki runga i tetai potonga enua o te Are Akaputuputuanga.

 Kua angaanga kapiti te aronga angaanga no vao mai e te Au Kite e kua riro teia ravenga ei akameangiti mai i te moni e te taime ka pou no te pātu anga. E meangiti atu te moni tei pou no teia pātu anga, tere atu i te rua mirioni tara Marike! Kua neke atu te ngutuare Betela ki roto i te au are ou i mua ake ka tupu ei te maki COVID-19.

 Kua puapingaia te ngutuare Betela i Cameroon mei te au turanga meitaki i te oraanga e te angaanga, e kua manako ratou e e apinga aroa te reira mei ko mai ia Iehova. Karanga tetai nga tokorua e, “Inangaro tikai maua i te angaanga pakari no teia apinga aroa tei orongaia mai.”

 Tojolabal Remote Translation Office (RTO), Mexico. Kua roa te tuatau te angaanga anga te pupu uri reo Tojolabal i ko i te opati Betela i Central America, i te pae ia Mexico City. Inara, kua tuatuaia te reo Tojolabal i Altamirano e Las Margaritas—mei te 1,000 kiromita (620 maire) te mamao mei te opati Betela! Tei tupu, e ngata i te aronga uri reo i te aruaru i to ratou reo Tojolabal. E e ngata i te opati Betela i te kimi mai i te au taeake e te au tuaine no te tauturu i te uri e te rekoti i te reo Tojolabal.

 No reira te Kumiti Tataanga o te Pupu Akaaere i inangaro ei i te apai i te pupu uri reo ki te ngai te tuatuaia ra te reo Tojolabal. E rauka ai teia, kua manako te opati Betela i te oko e te akaou i tetai are. E māmā ake i te rave i te reira i te akatu me kore te tutaki i tetai au opati.

 Akamārama tetai taeake uri reo akapeea aia i puapingaia ai: “I te tai ngauru mataiti i toku uri reo anga i ko i te opati Betela, kare rava au i aravei ana i tetai tangata tei tuatua i toku reo. I teianei tei roto tikai to matou opati i te ngai te tuatuaia ra te reo Tojolabal. Ka tuatua au ki te tangata i te reo Tojolabal i te au rā. Kua meitaki mai taku au putunga tuatua i teianei e kua meitaki katoa taku angaanga.”

 I te mataiti tavini anga 2021, te vaira te au parani no te pātu anga e 75 RTO e te au are apii i te Pipiria. Ka raveia te angaanga pātu anga i ko i te au opati Betela mamaata e varu, kapiti mai te pātu anga ou, o te opati maata o teianei ao i Ramapo, New York, pera katoa te neke anga i te nga opati Betela o Argentina e Itaria. Te anoanoia ra tere atu i te 1,000 Are Uipaanga Patireia, tere atu i te 6,000 are uipaanga kare e meitaki ana e ka maani akaouia, e e 4,000 Are Uipaanga Patireia ka akaouia.

 Akapeea teia pātu anga e te akaou anga katoatoa me tutakiia? Na te Taeake ko Lázaro González, e mema o te Kumiti Opati Betela o Central America, i pau i teia uianga iaia e uriuri ra i te pātu anga o te Tojolabal Remote Translation Office. “I teia tuanga ngai o te opati Betela, kare e maata ana te moni. Naringa kare te tauturu a te au taeake i te ao katoa, ka ngata rai te pātu i te au opati uri reo no te au taeake reo tupuna. Na roto i te au moni tauturu a te au taeake takapini i te ao i rauka ai te apai i te aronga uri reo ki te au ngai te tuatuaia ra to ratou reo. Te akameitaki nei matou i te au taeake i te ao katoa no ta ratou moni tauturu oronga ua.” Ae, ka rauka teia au angaanga pātu anga i te raveia no te au moni tauturu e aere maira no te au angaanga i te ao katoa, te orongaia ra te reira na roto i te donate.jw.org.