“Akaperepere au i to matou Are Uipaanga Patireia!” i na Nicole ei, e tuaine mapu i Colombia. “E reka ana au i te uipa kapiti ki toku ngutuare pae vaerua.” Te manako pera ainei koe?

 Takapini i teianei ao, te uipa kapiti nei te Au Kite o Iehova ki roto i te 63,000 Are Uipaanga Patireia. E au ngai akamorianga teia i te Atua. E mea ke atu tetai te akatupuia ra. Karanga tetai painia tamou ko David i Colombia e: “Te akangateitei nei to tatou Are Uipaanga Patireia i ta tatou apiianga. Poitirere te au manuiri me akara mai e kua akono meitakiia te reira.” E maata tei tupu. E angaanga pakari ana tatou i te tāmā e te akono i to tatou au Are Uipaanga Patireia. Akapeea teia angaanga me raveia?

 Te au putuputuanga te taangaanga nei i tetai Are Uipaanga Patireia, na ratou e akono ana e te tāmā i te reira. Ka tāma putuputu te au taeake e te au tuaine i to ratou Are Uipaanga Patireia. Ka akono e ka ripea katoa ratou i te au ngai tei kinokino.

 Ei tauturu i te au putuputuanga kia akono i to ratou Are Uipaanga Patireia, ka akanoo te Local Design/Construction Department (LDC) i te au taeake ma te apii kia riro mai ei aronga tereni i te au angaanga ka anoanoia. E ono ki te tai ngauru Are Uipaanga Patireia ta tetai taeake tereni ka akono. Ka akara aia i te reira e ka tereni i te au papuritia i roto i te au putuputuanga akapeea me akono i to ratou are uipaanga. I te au toru mataiti, ka akara tataki tai aia i te reira au are me e au ngai tetai te anoanoia ra te au taeake kia matakite e kia akono meitaki.

 Te āriki ra te au taeake e te au tuaine i te terenianga a te aronga tereni. Karanga tetai tuaine ko Indhumathi i Initia e: “Mako tikai te terenianga. Reka tikai au te apii akapeea me akono meitaki i to matou are uipaanga.” Karanga a Evans, e taeake i Kenya e: “Kua apii matou te akaiti mai i te moni ka pou na te akono anga i te au manamanata rikiriki i mua ake ka ngatā ei te reira.”

 E anere ua atu ki te tauatini ua atu moni, a ka pou i te au mataiti no te taangaanga e te akono i tetai Are Uipaanga Patireia, tei runga ua i te ngai, te roa, e te numero o te au putuputuanga te taangaanga ra i te reira. Akapeea teia me tutakiia?

 Te turuia ra te au angaanga o te au Are Uipaanga Patireia e te au moni tauturu. Akakite a Alexander, e taeake i Kazakhstan e: “Te taangaangaia ra tetai tuanga o te au moni tauturu no te Initaneti, te vai e te uira. Pera katoa te au pepa tāmaro rima, te au aao rima, te au mea tāmā, e te peni.” Ka orongaia tetai atu au moni tauturu ki te au angaanga i te ao katoa no te au angaanga mamaata e te oko maata te raveia ra i teianei ao.

 Me anoanoia tetai angaanga ki te Are Uipaanga Patireia e ka pou e rua ki te toru marama o te moni no te reira, ka uriuri te aronga pakari ki te taeake tereni o te LDC. Me akatika mai te LDC, ka tutakiia te reira e te au moni tauturu no te angaanga i te ao katoa. I te tuatau o te mataiti tavini anga 2023, e 8,793 angaanga tei raveia, e e $76.6 mirioni tei pou. Teia te nga angaanga e rua.

 I Angola, e maata te au ngai kinokino o tetai Are Uipaanga Patireia e 15 mataiti te vai ua anga. Kua taito te au uaea uira, kua ngaangaa te paruru, e kua akakite mai te tangata i te pae mai e te taʼe ua ra te vai ki to ratou kainga. Kua akaaere te LDC i te angaanga e kua ripea i te reira. E $9,285 tei pou. Kua rekareka te tangata i te pae mai, e kua umere i te angaanga tei raveia.

 I Poland, te tuturu ua ra te tauu are o tetai Are Uipaanga Patireia, e kua taito te moenga. Kua akatika mai te LDC i te angaanga no te ripea i te tauu are e kua rauka te moenga ou. Kua pou e $9,757. E kare tetai angaanga maata e anoano akaouia no teia Are Uipaanga Patireia no tetai au mataiti.

 Kua riro te angaanga akono e te tāmā ei akarava mai i te au moni tauturu e kua akapaapaa katoa ia Iehova. Karanga a Shaun, e taeake i Tonga e: “No ta tatou angaanga akono e te tāmā, ka rauka ia tatou i te akamori ia Iehova ki roto i tetai Are Uipaanga Patireia mā, te mako, e te manea, ma te akapaapaa i tona ingoa i teia ngai tangata. Ka ngakau parau tatou i te pati i te tangata ki to tatou Are Uipaanga Patireia.”

 Ka tauturu tatou na te tāmā anga e te akono anga i to tatou ngai akamorianga. Karanga a Marino, e taeake tereni i Autireria e: “Ka taokotai tatou i te akono e te tāmā i to tatou Are Uipaanga Patireia. Me rave tatou i teia, te akarava ra tatou i te au moni tauturu e kia taangaangaia te reira i te au ngai te anoano tikai ra i te tauturu.”

 E reka ana a Joel, e taeake i Initia, i te akono e te tāmā i to ratou Are Uipaanga Patireia. Karanga aia: “Me angaanga kapiti au ki te au taeake ka akamanako au mei teaa rai te tu i te ao ou.” Karanga a Nicole e: “Kua tauturu au i te tāmā i te taʼua, i te au taeake e ripea ra i te are meangiti. Noatu kare e naku i ripea i te manamanata, kua tauturu ra au kia kore tetai tumatetenga e tupu.”

 Me ka inangaro koe i te tauturu i te akono e te tāmā i toou Are Uipaanga Patireia, e tuatua ki te aronga pakari i toou ngai e noo ra. Ka tauturu taau au moni tauturu i toou Are Uipaanga Patireia e te au Are Uipaanga Patireia takapini i te ao katoa. E tuku i taau moni tauturu ki roto i te au pia tauturu i roto i toou are uipaanga me kore e tuku na roto i te donate.jw.org. Āriki rekareka tikai matou i to kotou rima aroa.