“Kua iki te Pupu Akaaere e me kare te ture arai anga a te au kavamani, te akamaroiroi atu nei matou i te au putuputuanga ravarai kia taokotai mai te katoatoa ki te au uipaanga i te epetoma o Aperira 1.” Mataora tikai te Au Kite o Iehova i te ao katoa no taua akakiteanga, tei tukunaia ki runga i te jw.org i te akamataanga o Mati 2022. Inara kare te maki COVID-19 i akamutu ana. a Eaa te au akatanotano anga, te au apinga tāmā, te au apinga ka anoanoia ei paruru i te katoatoa te ka taokotai mai ki te uipaanga kia kore e tuia e te maki? E rua mataiti i teianei kare te katoatoa i taokotai mai ana, no reira kua papa ainei te au mea no to tatou Are Uipaanga Patireia?

 Inara, kua akamata takere ana to tatou au taeake no tetai au marama i te akateateamamao i te au mea no te akamata akaou i te uipaanga i ko i te Are Uipaanga Patireia.

 E tai ua marama i muri ake te akamutu anga te au uipaanga i te mataiti 2020, kua akamata te Worldwide Design/Construction Department (WDC), i Warwick, New York, i te akara i ta te maki COVID-19 ka akatupu me aere tatou ki te Are Uipaanga Patireia e eaa te au mea kia raveia kia akapapa meitaki i to tatou au ngai uipaanga.

 Tuke te anoano o tetai enua ki tetai. Kua akamārama mai a Matthew De Sanctis, tei angaanga ma te WDC, e: “I roto i tetai au enua, kare o ratou ngai no te orei rima. Me kare e vai i ko i te Are Uipaanga Patireia, ka okoia mai te vai, me kore ka tikinaia atu i ko i te kauvai me kare te rua vai. I tetai au enua, kua akakite mai te au kavamani i ta ratou au ture no te au apinga taanuanu, te au apinga taau reva, e te au tataanga no runga i te oraanga kopapa e te tu mā.”

 Eaa ta to tatou au taeake ka rave no runga i teia au manamanata? Kua kite mai ratou e ko te maataanga o te au Are Uipaanga Patireia, “kua riro mai te au ravenga māmā ua atu ko te mea meitaki ïa,” i na Matthew ei. I Papua New Guinea, ei akaraanga, kua rave mai ratou i te au pakete e 20 rita na te tamou anga i te ngai akatae anga ki runga i te pakete no te orei i te rima. No reira kua rauka i to tatou au taeake i te akapapa i teia i ko i te Are Uipaanga Patireia e $40 (U.S.). Ko te au Are Uipaanga Patireia i Aperika, kua oko mai ratou e 6,000 tuma au apinga orei rima tau meitaki tikai no ko mai i te aronga okooko i Asia.

 Ko tetai atu au akatanotano anga i raveia, ko te akaou anga i te au matini tairiiri matangi ei akaanuanu i te reva i roto i te Are Uipaanga Patireia. E maata te au putuputuanga tei oko mai i te pou roroa no te au microphone kia kore e pati aereia mei tetai ki tetai. Kua tauta katoa ratou i te akaiti e te tāmā putuputu i te au ngai ka amiriia, mei te au mouranga o te ngutupa e to te akatae anga vai, te ka akatotoa i te maki. Kua tamou tetai au putuputuanga ki roto i te are meangiti te au paipa vai te ka tae ua mai te vai. I Chile, ko te moni i pou i te rave i te au taui anga e $1,400 (U.S.) no te Are Uipaanga Patireia tataki tai.

 Na te akapapa anga i te au Are Uipaanga Patireia ei ngai meitaki, kua tauta katoa to tatou au taeake i te akaravarava i te au moni i orongaia mai. I tetai au enua, ei akaraanga, kua rauka mai te au mea no te orei rima e te au pou roroa no te au microphone na roto i te tauturu a te kavamani no te tutaki anga tero. Kua angaanga taokotai te au opati Betela i te taangaanga meitaki i te moni na te oko maata mai anga i te au apinga ka anoanoia. Kua akanoo putuputu rai te au opati Betela e te Global Purchasing Department i te oko mai i te au apinga no ko mai i te ngai i maaniia te reira, kia māmā mai te tutaki e te tuku viviki katoa mai anga i te reira.

 Kua riro te akapapa anga i te au Are Uipaanga Patireia ei ngai meitaki ei paruru anga e ei akamaroiroi anga ki te katoatoa tei aere mai ki te au uipaanga. Kua akakite mai a Dulcine, tetai tuaine i Peru, e “manga mataku” rai aia i tona kite anga e ka oki akaou tatou ki te Are Uipaanga Patireia. “Kua tuia au e te maki COVID-19 i muri poto ua ake i te akamata anga te maki totoa,” i karanga aia. “No reira kua emiemi rai au i te aere ki te Are Uipaanga Patireia, i te manako anga e ka tupu akaou mai te maki kiaku. Inara te tae anga au ki te Are Uipaanga Patireia, kua kite mai au e kua akanoo te aronga pakari i te au ravenga paruru anga meitaki, mei te ngai orei anga rima e te au pou roroa no te au microphone, pera katoa te tāmā meitaki anga i te are uipaanga i mua e i muri ake i te au uipaanga. Kua akatupu teia i te manako maru kiaku taku e inangaro ra.” b

 E tuke te manamanata tei tupu kia Sara, e tuaine no Zambia mai. Kua akamārama mai aia: “I tetai au marama i mua ana, kua takake taku tane no te maki COVID-19. Kua taitaia au no te ka tupu kiaku me aere au ki te uipaanga ka tai nei taime kare aia i te pae mai iaku.” Eaa tei tupu? Kua karanga mai aia: “Kua riro te aere anga ki te au uipaanga ei akapapu anga mai kiaku e tei te pae a Iehova ia tatou i teia tuatau openga. Kua rauka mai iaku i teianei, i to mua ana te akamaroiroi anga, te akapumaana anga, e te tauturu taku e anoano ra mei ko mai i te aronga pakari e toku au taeake e te au tuaine.”

 Te āriki rekareka nei to tatou au taeake akamori i te ao katoa i te tikaanga manea no te oki akaou anga ki to ratou au Are Uipaanga Patireia. Te akameitaki atu nei matou ia kotou no ta kotou moni oronga ua, te maata anga na roto i te donate.jw.org. Kua tauturu mai teia au moni ia matou i te akapapa kia riro te au ngai akamori anga ei ngai noo anga tau e te meitaki no te taokotai mai i te katoatoa.