Kua tupu ainei tetai maki kino kia koe? Kua kite i reira koe i te tu taitaia ta te maki ka akatupu—i te pae o te manako, te ngakau, e te moni. Eaa te ka tauturu ia koe? Akapeea koe me tauturu i toou kopu tangata me kore toou oa te akakoromaki ra i tetai maki? Kare te Pipiria i te puka rapakau maki, inara e maata te au kaveinga te ka tauturu ia koe i roto i teia turanga ngatā.

•   Kimi i tetai rapakauanga 

   Akakite te Pipiria: “Kare no te aronga ora te taunga, no te aronga maki ra.”—Mataio 9:12.

   Te aiteanga: Kimi i te tauturu a te au taote me anoanoia te reira.

   Tamata i teia: Kimi i te rapakauanga meitaki te ka rauka mai i toou ngai. I tetai taime, e mea meitaki i te kimi i te manako o tetai akaou taote me kore tangata rapakau maki. (Maseli 14:15) Akakite meitaki i toou manako ki te au taote e kia akapapu e kua mārama koe i ta ratou i akakite mai no runga i toou turanga maki. (Maseli 15:22) E apii no runga i toou maki e te au ravenga no te rapakau atu i te reira. Me mārama koe eaa te au mea e ō maira, ka papa meitaki i reira koe no te akono i toou maki e te paruru i toou turanga i te pae manako.

•   Akono i toou oraanga kopapa

   Akakite te Pipiria: “Ko te akamātau i te kopapa nei, e puapinga . . . to te reira.”—1 Timoteo 4:8.

   Te aiteanga: Ka puapingaia koe me akanoo i te tuatau no te akono i toou turanga pae kopapa.

   Tamata i teia: Akanoo i tetai tuatau no te akaetaeta uaua, kai i te au kai meitaki, e kia rava meitaki taau moe. Noatu te akatanotano ra koe ki toou turanga maki, akakite mai te aronga kite e ka puapingaia koe me rave putuputu i teia au mea. Inara e akapapu e kare taau au ikianga e tamanata atu i toou turanga maki me kore te ravenga rapakauanga.

•   Kimi i te tauturu a tetai ke 

   Akakite te Pipiria: “E aroa mairai te taunga i te au tuatau katoa ra, i anau maira te taeake no te tuatau e tumatetengaʼi ra.”—Maseli 17:17.

   Te aiteanga: Ka rauka i toou au oa i te tauturu ia koe i te au tuatau ngatā.

   Tamata i teia: E tuatua ki tetai oa piri mou te ka rauka ia koe te akakite i toou au manako. Na teia e tauturu ia koe kia tamaru mai i toou ngakau taitaia ta te turanga maki i akatupu. Penei ka inangaro katoa toou ngutuare tangata e te au oa i te tauturu inara, kare ratou i kite akapeea me rave i te reira. No reira, e akakite kia ratou i te tauturu taau ka anoano. E kia mareka ua i te tauturu ta ratou ka oronga mai. Pera katoa, penei ka anoanoia koe kia akakotinga i te tuatau ka atoro mai ratou ia koe kia kore te reira e akaroiroi ia koe.

•   Akaari i te tu maoraora

   Akakite te Pipiria: “E meitaki to te ngakau rekareka mei te vairakau ra: e marō ra te ivi i te ngakau taitaia.”—Maseli 17:22.

   Te aiteanga: Na te tu maoraora e tauturu ia koe kia kore e taitaia maata i toou au manamanata.

   Tamata i teia: Ia koe e akatanotano ra ki toou turanga ou, e akamou ki runga i te au mea ka rauka ia koe i te rave, kare ki runga i te au mea kare e rauka i te rave. Auraka e akaaite ia koe uaorai ki tetai ke, me kore ki toou turanga i mua ake ka maki ei koe. (Galatia 6:4) Akanoo i te au akakoroanga te ka rauka ia koe i te itae—ka tauturu teia ia koe kia manako papu no te tuatau ki mua. (Maseli 24:10) Me ka rauka, e tauturu i tetai ke. Ka tupu te mataora me oronga ua koe ki tetai ke, e na teia e akakore i toou au manako taitaia.—Angaanga 20:35.

 Taputou mai te Pipiria e ka tauturu a Iehova a i tetai tangata maki. Kare tatou e tapapa iaia kia rapakau i to tatou maki na roto i tetai temeio, inara ka tauturu aia i tona au tavini na teia au mataara:

 Te ’au. Ka oronga mai a Iehova i te “au o te Atua, ko tei maata ua atu i te kite tangata.” (Philipi 4:6, 7) Ka tauturu teia ’au i tetai tangata kia kore e taitaia maata. Ka oronga mai te Atua i teia ’au ki te aronga tei pure kiaia ma te akakite i to ratou au manamanata kiaia.—1 Petero 5:7.

 Pakari. Ka oronga mai a Iehova i te pakari kia rave koe i te ikianga meitaki. (Iakobo 1:5) Ka rauka mai teia tu pakari me apii e me taangaanga tetai tangata i te au kaveinga i roto i te Pipiria.

 Te manakonakoanga mou no te tuatau ki mua. Kua taputou mai a Iehova i tetai ao “kare oki to reira e karanga e, Kua maki au.” (Isaia 33:24) Kua tauturu teia manakonakoanga i tetai tangata kia mataora ua noatu e maki kino tikai tona.—Ieremia 29:11, 12.