E maata te tangata, e te aronga te karanga ra e Kerititiano ratou, te manako ra e kare te au turanga Pipiria no te ainga e te akaipoipo e tano ana ki to tatou tuatau. Kua taui tetai au akonoanga i ta ratou e apii ra no te mea tika e te mea tarevake. Puapinga ainei te au turanga Pipiria no te tika e te tarevake? Ae. Ka akamārama atu teia atikara.

 Kua angaia te tangata kia irinaki i Tei Anga no te aratakianga. Karanga te Pipiria: “Kare tei te tangata e aere nei, i te akono i tona uaorai takainga tapuae.” (Ieremia 10:23) Noatu e kua anga te Atua ko Iehova a ia tatou kia rave i te au ikianga, kare aia i akaue mai kia akataka tatou i te mea tika e te tarevake. Inangaro aia kia irinaki ua rai tatou iaia.—Maseli 3:5.

 Ka kite tatou i ta te Atua aratakianga i roto i te Pipiria. Akamanako ana e rua tumu i puapinga ai teia au turanga.

•   Na te Atua i anga ia tatou. (Salamo 100:3) Kua kite te Atua ko Iehova, Tei Anga ia tatou, eaa ta tatou e anoano ra kia ora e kia mataora te kopapa, te manako e te ngakau. Kua kite katoa aia i te au mea ka tupu me kare tatou e aru i tana aratakianga tau. (Galatia 6:7) Inangaro katoa a Iehova kia rauka ia tatou te oraanga meitaki. No teia tumu, te akataka ra te Pipiria i te Atua “ko tei akakite ia koe i te mea e puapingaʼi koe na; ko tei arataki ia koe na te arataa e tau ei kia aere koe ra.”—Isaia 48:17.

•   Ka akavare to tatou anoano ia tatou. E maata te tangata te manako ra e ka rauka ia ratou i te kimi eaa te tika me kore te tarevake na te aru anga i to ratou ngakau—to ratou anoano e te inangaro. Karanga te Pipiria e “pikikaa maata to te ngakau i te au mea katoa nei, e kua kino takiri.” (Ieremia 17:9) Me kare to tatou ngakau i aratakiia e te pakari o te Atua, ka akatupu te reira ia tatou kia tataraapa a muri ake.—Maseli 28:26; Koheleta 10:2.

 Kare! Tei roto i te Pipiria te tika no runga i te Atua e tana e inangaro ra kia aru tatou. (1 Korinetia 6:9-11; Galatia 5:19-23) Inangaro aia kia kite te tangata i teia au tika. (1 Timoteo 2:3, 4) No reira ka apii te au Kerititiano i ta te Pipiria e akakite maira.—Tito 1:7-9.

 E maata te tangata kare e akarongo ana ki te au turanga tau a te Pipiria, te akara nei ratou ki te au arataki akonoanga te ka ‘akanavenave i to ratou taringa kia tau ki to ratou uaorai inangaro.’ (2 Timoteo 4:3) Te akamatakite maira te Tuatua a te Atua: “E ae oki ia ratou, to tei tuatua i te kino ra e meitaki, e te meitaki ra e kino.” (Isaia 5:20) Ka akautunga te Atua i te au arataki akonoanga tei kore i apii meitaki i te tangata i ta te Atua e karanga ra e tika e te tarevake.

 Kare. Te aronga te inangaro ra kia akamareka i te Atua, ka aru ratou i te akaraanga e te apiianga a Iesu Karaiti. Kua apii aia i tana au pipi auraka e akava i tetai mari ra kia aroa e kia akangateitei i te katoatoa.—Mataio 5:43, 44; 7:1.

 Te aronga tei aru ia Iesu ka akono ratou i ta te Atua au turanga tau i roto i to ratou oraanga. Ka āriki ratou e penei ka iki tetai au tangata i te aru i tetai irinakianga ke. (Mataio 10:14) Kare a Iesu i akaue ana i tana au pipi kia taangaanga i te angaanga poritiki e tetai mea ke kia māro i te tangata kia āriki i to te Atua manako.—Ioane 17:14, 16; 18:36.

 Te aronga tei aru i ta te Atua au turanga tika e te tarevake ka mataora ratou i te au akameitakianga i teianei e te tuatau ki mua. (Salamo 19:8, 11) Kapiti mai te:

•   Rekareka maata.—Maseli 29:6.

•   Pirianga oa ki te Atua.—Maseli 3:32

•   Tauturu a te Atua i te tuatau ngata.—Maseli 11:8.

•   Ora mutu kore i te enua nei.—Salamo 37:29.