Tetai Mea Puapinga Roa Atu i to Maua Oraanga i Teianei

Akakiteia e Murat Ibatullin

I te mataiti 1987 kua tukuia au e te Tipatimani Paruru Maki o Rutia ki Ukanata, i Aperika. Kua koreromotu au i te angaanga taote rapakau i reira no te a mataiti. Te tika, kare roa au i inangaro ana i te oki mai ki Rutia, inara toku manakonakoanga kia kite maata atu au ei tauturu iaku i te angaanga i roto i tetai enua mei ia Autireria, Kanata, me kore Marike. Tera ra i te 1991 kua taui taku au parani, e kua oki atu au ki Rutia. Ka akamarama atu au i te tumu.

KUA anauia au i te 1953 i roto i te oire o Kazan’, te oire maata o te Repapuriki o Tatarstan i Rutia Rotopu. E nga metua Tatar toku, e e Mutirimi te maataanga o te tangata i Tatar. Toku tamariki anga, maara iaku toku kite anga i toku papa ruau e te mama ruau i te tuturi anga e te pure kia Allah. Ka akakite mai ta raua tamariki, kapiti mai toku nga metua kia matou e, auraka e tamanamanata ia raua e kia akaruke ua ia raua. Ka kamo mai toku nga metua kia matou e ka akara anga akama, no te mea kua ariki raua i te tutaraanga Komuniti e i taua taime ra karanga e kare e irinaki ana i te Atua.

I toku a mataiti anga, kua tuia au e te maki polio i roto i te Soviet Union. I toku tamariki anga e maara ana iaku te au tere ki te aremaki e te aremaki akangaroi anga kia akaraia e te taote. Maara iaku toku papa ruau i te pure anga kia meitaki au. Inangaro au kia maroiroi mei tetai au tamariki, no reira noatu te pirikoki i tetai oku vaevae, e tueporo tarape ana au, pa poro rakau, e tetai atu tipoti ke.

Iaku e maata maira, kua inangaro au kia riro mai ei taote. Kare aku akonoanga, e irinaki ana au e e Atua tetai. Kare rava au e manako atu ana no runga i te Atua. Taua taime ra, e akaapa ana au i te au irinakianga Komuniti e e taumaro putuputu ana ki toku papa e toku angakara. I apii ana toku angakara i te au irinakianga a te tangata i ko i te univetiti, e e angaanga ana toku papa na te Kumiti Paruru o te Kavamani, tei karangaia e ko te KGB. I te oti anga taku apii taote, ko toku au akakoroanga kia riro mai ei neurosurgeon karape e kia aere atu ki tetai enua ke.

 Kimi Anga i te Oraanga Meitaki

I te 1984, kua oti taku apii taote teitei mai, no runga i te maki akatupu i roto i te roro. I reira, i te 1987, kua tukuia au ki Ukanata ki tetai aremaki i Mulago. Kua neke atu au ki teia enua manea e taku vaine ko Dilbar, e ta maua nga tamariki ko Rustem e itu mataiti, e Alisa e a mataiti i taua taime ra. Pakari tikai te angaanga i ko i taua ngai rapakau ra e te kapitiia maira te vavai i te aronga maki tei tuia e te vuru HIV. E aere putuputu ana au ki tetai atu au ngai rapakau maki i roto i te enua, no te mea e rua rai neurosurgeon e angaanga ra i Ukanata i te reira taime.

Tetai ra, i ko i tetai ngai oko puka i Ukanata, kua kite maua ko Dilbar i tetai Pipiria Rutia no te taime mua. Kua oko maua i tetai au kopi ei tuku atu ki te au oa i te Soviet Union, no te mea i taua taime ra e ngata i te oko i te au Pipiria i reira. Kua tatau maua i tetai au pene mei te Pipiria tera ra e ngata ia maua te marama i te reira, e kua akamutu.

Inara, e toru mataiti, kua aere atu maua ki te au pure tuketuke i Ukanata e kua tauta kia marama e eaa ra te oronga ra kia ratou i te aiteanga o to ratou oraanga. Kua apii katoa au i te Koran i roto i te reo mua. Te tika, kua piri atu maua ko Rustem ki te apii reo Arapia. Muri ake i nga mea marama ua, kua kite maua i te tuatua Arapia o te au ra ua.

Mei te reira taime aere, kua aravei maua i te nga mitinari puapii Pipiria ko Heinz e Marianne Wertholz, no Tiamani e Auteria. I to matou pukapuka anga mua, kare roa matou i tuatua ana no te akonoanga. Aite rai matou mei tetai au tangata no Europa tei aravei i Aperika. Kua ui maua i te tumu i aere mai ei raua ki Ukanata e kua kite mai e e nga mitinari raua no te Au Kite o Iehova i roto i teia enua i te tauturu i te tangata kia apii i te Pipiria.

Maara i reira iaku e i roto i tetai apii irinakianga a te tangata i te univetiti taku i tae atu i Rutia, kua akakiteia mai kia matou e e pupu te Au Kite e e akaatinga ana i te tamariki e e inu ana i to ratou toto. Kua akakite atu au kia Heinz e Marianne i teia, no te mea kare au e irinaki ana e ka mareka raua i taua tu angaanga ra. Kua ariki maua ko Dilbar i tetai kopi o te puka Ka Rauka ia Koe te Ora Mutukore i Paradaiso i te Enua Nei, e kua tatau maua i te maataanga o te reira i roto ua i nga mea ora. Toku akamutu anga i te tatau e kua ui atu kia Dilbar i tona manako, kua akakite mai aia e kua mataora tikai aia i tana i tatau e kua ii tona pakiri! Akakite atu au kiaia e aiteite to maua manako.

Muri ake i te reira, inangaro tikai maua i te pukapuka akaou atu kia Heinz e Marianne. Me aravei maua ia raua, e uriuri ana matou i te au tumu manako e manganui. Kua akakeu maataia to maua ngakau e ta maua i apii mei te Pipiria. Kua akakeuia maua kia akakite i ta maua e apii ra ki te au oa e te au taeake apii. Kapiti mai teia i te komono o Rutia, te au opita kavamani o Rutia e tetai atu enua, e i tetai komono o te Vatican. Poitirere maua iaia no tei karanga e e “au tua maani ua pouroa” te Koreromotu Taito.

Oki Atu ki to Maua Enua Anau

E tai marama i mua ake ka oki ei maua ki Rutia i te 1991, kua iki maua ko Dilbar kia riro mai ei nga Kite no Iehova. Manako maua e me oki atu maua ki Kazan’, ka aere ua atu rai maua ki te au uipaanga. Ma te poitirere ra, kare maua i kite ana i tetai Are Uipaanga Patireia e kare katoa i aravei ana i tetai aronga irinaki, no tetai toru marama! No reira kua iki maua i te aere atu mei tera ngutupa ki tera ngutupa, mei ta te Au Kite o Iehova rai i matau i te rave takapini i teianei ao, noatu e ka rave maua i te reira ko maua anake ua. Tei tupu mai, kua akamata maua i  tetai au apii Pipiria, kapiti mai tetai vaine tei riro mai ei Kite i muri mai.

Muri ake i teia, kua atoro mai tetai Kite pakarikari ia maua, tei kite i to maua ngai nooanga mei te Au Kite i Ukanata. Kua akamata maua i reira i te uipa ki tetai pupu e 15, tei rave i te au uipaanga i roto i tetai apatimani okotai pia meangiti. Kua komunikeiti ua mai a Heinz e Marianne kia maua e kua aere mai ki Kazan’ i te atoro ia maua. Muri mai, kua atoro atu maua ia raua i Purukaria, te enua tei tukuia raua e te tavini maira rai i reira ei nga mitinari i teia ra.

Uua Toku Enua Anau i te ua Meitaki

I te au atianga ravarai, e akakite ana au i te tuatua mou o te Pipiria ki toku au taeake angaanga i roto i te au aremaki, te ngai e angaanga ana au i Rutia. I te au taime i aereia, manganui tei ariu mai e kua riro ei Au Kite no Iehova, kapiti mai e maata toku au taeake rapakau maki. I te 1992, te mataiti i muri ake i to maua tae mai anga, kua maata mai te pupu o te Au Kite i Kazan’ ki te 45; e i te mataiti i muri mai ki te 100 tuma. I teia ra i Kazan’, e itu putuputuanga o te Au Kite—e rima reo Rutia, e tai reo Tatar, e te reo akairo katoa. E au pupu reo Amenia e te reo Papaa katoa tetai.

I te 1993, kua aere atu au ki tetai uipaanga no te rapakau maki i New York City, e kua rauka toku atianga i te turoto atu i te opati maata o te Au Kite o Iehova o teianei ao i Brooklyn. Kua aravei au ia Lloyd Barry, tei tauturu i te akaaere i te angaanga tutu anga a te Au Kite o Iehova i te ao katoa. Noatu te maata i tana angaanga, kua akapou aia i tetai taime i te tuatua mai kiaku.

Kua uriuri maua e ka inangaroia te au puka Pipiria i roto i te reo Tatar. Tetai au mataiti i muri mai, kua akaaereia tetai pupu uri reo Tatar i Rutia e kua rauka mai tetai au puka reo Tatar. Mataora tikai maua i te au taime i aereia, i te akamata anga Te Punanga Tiaki i te tae putuputu mai, e makatini tei neneiia no te apii Pipiria! Kare i roa ana, kua akamataia te putuputuanga reo Tatar mua.

Taangaanga i te au Ravenga Taporoporo Toto

E akono ana au i te au ture pouroa a te Atua no te tu akono tau, tei kapiti mai i te ture i roto ia Angaanga 15:20 e akaue ra i te au tavini o te Atua e “auraka e kai . . . i te toto.” Te irava 29 te na ko ra ki te au tavini o te Atua e “auraka kotou e kai i te manga i apaiia na te au idolo ra, e te toto, e te mea kukumi uaia ra, auraka oki e akaturi.”

No reira me kimi te Au Kite o Iehova i te tauturu no te rapakau, e pati ana ratou ki te au taote kia akangateitei i to ratou manako no te au rapakau anga kare e toto. No tetai taime, i angaanga ana au e te Kumiti Are Maki o te Au Kite i Kazan’. * I te 1997, i te inangaroia anga kia vai vivikiia a Pavel, e tai ona mataiti no te oire o Novosibirsk, kua aravei mai tona mama ia matou no te tauturu. I taua taime ra, kare e maata ana te au taote tukatau i Rutia i te vavai kare e taangaanga i te toto. Kua akatika matou i te kimi i tetai taote te ka taangaanga i tetai atu rapakau anga ke.

Kare i roa kua kite mai matou i tetai ngai vavai anga pukuatu i Kazan’ tei akatika te au taote i te vai i te tamaiti meangiti, ko Pavel. I te ra 31 o Mati, 1997, kua puapinga maata te vai anga a te au taote ma te kore e taangaanga i te toto, i te akatikatika i te maki pukuatu tei kapikiia e e tetralogy of Fallot. I te ra 3 o Aperira, kua ripoti mai te nuti pepa Vechernyaya Kazan e: “Kua meitaki ua te tamaiti meangiti e kare e anoano akaou i te vairakau pukuatu . . . Ko te mama o Pavlik [e ingoa kapiki no Pavel] kua meitaki mai tona manako no te taime mua i te  11 marama.” I roto ua i te taime poto, kua meitaki te vai o Pavel e kua akamata i te aere i roto i te are maki.

Meitaki ua a Pavel i te pae kopapa i teianei e te noo ra i tetai oraanga noa. E reka ana aia i te pai tai, tupaorooro aiti, e te tueporo tarape. E pupu varu tona i te apii, e te akamori ra aia e tona mama ei tuanga no te putuputuanga o te Au Kite o Iehova i roto i te oire o Novosibirsk. Muri ake i teia tupuanga, kua vai akaou te au taote i ko i taua ngai rapakau anga rai, ma te kore e taangaanga i te toto i te aronga maki pukuatu, e Au Kite no Iehova. Te meitaki aere ua maira te rapakau anga maki i Tatarstan, e e mea matauia te vavai ma te kore e taangaanga i te toto.

Taku Angaanga i Teia Ra

E angaanga ana maua ko taku vaine, pera tetai Au Kite i roto i te ngai rapakau anga e oronga maira i te rapakau taangaanga maata i te komupiuta, ki te aronga maki uaua e te aronga maki pukuatu. E rave ana matou i te au tu vavaianga tukeke, ki te aronga maki tikai e taangaanga ra i te ravenga taporoporo i te toto. E angaanga ana au ei neuroradiologist e e tauta ana i te rave i toku kite neurosurgery kare e taangaanga i te toto. Ei poropeta i roto i te Department of Neurology and Neurosurgery i Kazan’ State Medical University, e apii ana au i te aronga apiipii taote e te au taote e e tauta ana i te tauturu ia ratou kia kite i te au tu meitaki o te vairakau kare e toto. *

E angaanga ana taku vaine ki ko iaku i roto i te ngai rapakau ei taote nenei ia roto i te kopapa tangata. E mataora ana maua i ta maua angaanga no te mea te rauka ra ia maua i te tauturu i te tangata. Tera ra e merengo tikai ana maua i te kite e akapeea te au tuatua mou Pipiria i te akaora anga i te tangata i te pae vaerua. E mataora ana to maua ngakau i te akakite atu ki te tangata i te taputou a te Atua e kare e roa atu ana i runga nei i te enua “kare oki to reira e karanga e, Kua maki au.”​—Isaia 33:24.

[Au Tataanga Rikiriki i Raro]

[Tutu i te kapi 26]

Te angaanga ra ei taote rapakau i Aperika

[Tutu i te kapi 27]

Te akamataanga maua ko taku vaine i te apii i te Pipiria e te Au Kite o Iehova, 1990

[Tutu i te kapi 28]

Aravei ia Lloyd Barry i tetai tere ki Brooklyn, i New York, 1993

[Tutu i te kapi 29]

Pavel e tona mama i teia ra

[Tutu i te kapi 29]

Roto i te angaanga orometua e taku vaine, ko Dilbar