Te Manako o te Pipiria

Tei te au Ngai Ravarai Ainei te Atua?

MANGANUI te tangata e irinaki ana e tei te au ngai ravarai te Atua, te aiteanga tei te au ngai katoatoa tikai aia e tei roto i te au apinga ravarai. Kua pure te ariki kite pakari ko Solomona kia Iehova i te pati e: “Ei reira koe e akarongo mai ei i runga i te rangi i te ngai taau e noo ra.” (1 Ariki 8:30, 39) Kia tau ki ta te Pipiria i reira, e ngai nooanga to te Atua ko Iehova. Kua taiku a Solomona i taua ngai ra e ko “te rangi.” Eaa ra te aiteanga o te reira?

I tetai taime e taangaanga ana te Pipiria i te au tuatua “rangi” e te ‘au rangi’ no te ao angaia takapini i teianei ao. (Genese 2:1, 4) Tera ra, no te mea e na te Atua i anga i te au mea pouroa, kua vai takere ana tona ngai nooanga i mua ake ka anga ai aia i te ao katoa e pini ua ake. No reira, kua vai ana te Atua i roto i tetai ao kare i kotingaia e te au apinga angaia. Me tuatua i reira te Pipiria i te rangi e ko te ngai nooanga o te Atua ko Iehova, kare te reira e taiku ana ki te ngai i runga i te rangi me kore i vao i te mareva, mari ra ki tetai ao vaerua.

Orama Umere Tikai

Te oronga maira te Pipiria i tetai akaraanga manea umere tikai no te ngai nooanga o Iehova na roto i tetai orama tei orongaia ki te apotetoro ko Ioane. I roto i taua orama ra, kua kite atu a Ioane i tetai ngutupa e ngaa ua ra ki te rangi e kua akarongo atu aia i tetai reo tei karanga mai kiaia e: “Ka aere mai na ki runga nei.”​—Apokalupo 4:1.

Aru mai, kua orongaia kia Ioane tetai orama umere tikai no te Atua ko Iehova. I tetai tuanga, kua kite atu aia i teia: “E terono tei akatuia ki runga i te rangi . . . E ko tei noo i rungao i taua terono ra, mei te toka iasepe ra e te sarido ra, te tu: e i takakoia taua terono ra i te anuanua, mei te emeradino ra te tu. . . . Kua koropa maira te uira no roto i taua terono ra, e te mangungu, e te au reo oki . . . E tei mua i taua terono ra tetai tai io mei te toka areare te tu.”​—Apokalupo 4:2-6.

E akatakaanga marama meitaki teia no te tu manea rava o Iehova e te mekameka aite koreia. E te kite ra koe i te au ngai takapini i te terono o Iehova. Te akakite maira te anuanua i te tu ponuiaau e te au. Te akaketaketa ra te uira, te au reo, e te mangungu i te mana o te Atua. Te tou atura te tai io ki te turanga ma o te aronga pouroa i mua i te aroaro o te Atua.

Noatu te tutu i orongaia mai i konei e e akatutu anga, te akakite maata maira kia tatou no runga i te ngai nooanga o te Atua. E tu apa kore to Iehova i runga i te rangi. Kare tona ngai nooanga e marikonga kore ana.

Roto i te Ngai Pouroa e i te Taime Pouroa?

Te tika e e ngai nooanga to Iehova te taiku maira e kare aia i te au ngai pouroa e i te au taime pouroa. Akapeea i reira aia i te kite e eaa te tupu ra? (2 Paraleipomeno 6:39) Tetai mataara na roto i tona vaerua tapu, me kore mana ririnui. Kua tata te tata taramo e: “E aere tika au nei kiea e ngaro ei i to vaerua? e rere tika au kiea e ngaro atu ei i to mata? Kia kake au ki runga i te au rangi ra, tei reira koe! kia totoa oki au i toku roi i ade, i na, tei reira koe.”​—Salamo 139:7-10.

Kia marama i te tu atea maata o te mana o te vaerua tapu o te Atua, akamanako ana i te ra. Tei ko te reira i tetai ngai akanooia inara te totoa ra i tona ririnui ki te au ngai atea o te enua. Mei te reira rai, e ngai nooanga to te Atua ko Iehova. Inara ka rauka iaia te rave i tei tau ki tona anoano i tetai ua atu ngai i roto i te ao katoa e pini ua ake. Tetai atu, ka rauka ia Iehova te taangaanga i tona vaerua tapu kia kite e eaa te tupu ra i tetai ua atu ngai e i tetai ua atu taime. No reira, kua akakite a 2 Paraleipomeno 16:9 e: “Te akara  nei nga mata o Iehova e pini ua ake te ao katoa nei, kia oronga mai aia i te maroiroi ki te aronga i tika te ngakau iaia.”

Te akaaere katoa ra te Atua i tetai akaaerenga o te au vaerua ora tei kapikiia e e au angera. Te taiku ra te Pipiria e ko taua au vaerua ora ra e au anere ua atu te au mirioni​—penei e au pirioni me kore e maata atu. * (Daniela 7:10) Maata ua atu te au rekoti Pipiria no te au atianga e riro ana te au angera ei au komono no te Atua, e kua aere mai ki te enua nei, kua tuatua ki te au tangata, e kua ripoti atu ki te Atua. Ei akaraanga, i te tuatau o Aberahama, kua kimikimi te au angera i te akaapaanga no runga ia Sodoma e Gomora. Kua iki te Atua i te takore i taua nga oire ra, i muri ake i tetai ripoti mei te au angera.​—Genese 18:20, 21, 33; 19:1, 13.

Te akakite maira i reira te Pipiria e kare e anoanoia te Atua ko Iehova kia aere ki te au ngai ravarai. Na roto i te angaanga a tona vaerua tapu e na roto i te mana o tana au angera, te kite pu tikai ra aia e eaa te tupu ra no runga i tana au mea angaia.

Taka ua e, ka rauka i te Pipiria i te tauturu ia tatou kia piri meitaki atu ki Tei Anga mai ia tatou. I roto i te reira ka kite mai tatou e te noo ra te Atua i roto i tona ngai nooanga i te rangi, e ao vaerua i vao ake i te au rangi tika tikai. I te pae iaia, e mano tini ua atu te au mea vaerua ririnui e noo katoa ra i roto i te ao vaerua. E kua akatakaia tona ngai nooanga e te tu ponuiaau, mana, e te ma. Te akapapu maira te Pipiria ia tatou e te vaira te taime ka mataora katoa te tangata i runga nei i te enua i te au turanga ponuiaau, mei te tupu ra i runga i te rangi.​—Mataio 6:10.

[Tataanga Rikiriki i Raro]

I MANAKO ANA AINEI KOE?

● Tei te au ngai ravarai ainei te Atua?​—1 Ariki 8:30, 39.

● Mei teaa ra te mamao ta te vaerua o te Atua ka itae atu? ​—Salamo 139:7-10.

[Tataanga i te kapi 22]

E ngai tinamou to te ra, inara e totoa ana tona ririnui ki te ngai atea maata. Mei te reira rai, e ngai nooanga to te Atua, inara ka kitea mai tona vaerua tapu i te au ngai ravarai i roto i te ao katoa e pini ua ake tana e iki ra