1.  Atun Babilonia pitan

2.  Cristo o Mesias ima urasta ricurina ara

3.  Quiquin rahuaita apishca tratamientoguna

4.  Ichunacuna

5.  Istaguna

6.  Chimbac ungüiguna

7.  Negocioguna, juezgunahua ñaupacpi alichina

 1. Atun Babilonia pitan

Imahuata “Atun Babilonia” mana sirtu religionguna man ninchi (Apocalipsis 17:​5). Quimsa yuyaigunata ricushun:

• Mundu intiruibi maun. Bibliaga nin, “Atun Babilonia” “ashca runaguna”, “tucui llactaguna” ahuaibimi tiaun. Chasnallata, “paiga cai pachaibi tiac atun mandac amugunata mandaunmi” (Apocalipsis 17:​15, 18).

• Ashca ushaita charic politicoguna, randichic runaguna mana anzhu. Biblia nishca shina, “Atun Babilonia” tucurishca huasha, “cai pachaibi tiac atun mandac amuguna” y “randichic runaguna” causasha catingauna (Apocalipsis 18:​9, 15).

• Diosta pingachinaun. Cullquita charingahua, paita yanapangahua, runa gobiernogunahuan alita apanacuc ashcamanda, “prostituta” shina ricsishca man (Apocalipsis 17:​1, 2). Mundu intirumanda runagunata llullasha pandachiun. Ashca runaguna huañushcamanda culpayuc man (Apocalipsis 18:​23, 24).

13 yachana parti, 6 yuyaima tigrangahua

 2. Cristo o Mesias ima urasta ricurina ara

Biblia nishca shina, Cristo o Mesias chara mana shamugllaita, 69 semanaguna pasana ara (Daniel 9:25​ta leipai).

• 69 semanaguna ima urasta callarira. 455 a. e. c. (antes de nuestra era) huataibimi callarira. Chi huataibi, Nehemias Jerusalen llactata alichisha shayachingahua pactara (Daniel 9:25; Nehemias 2:​1, 5-8).

• 69 semanaguna masna timputa unayara. Bibliaibi rimashca maican profeciagunaga, shuc punzha shuc huata man nin (Numeros 14:34; Ezequiel 4:​6). Chasna asha, cai profeciaibi rimashca shuc semanaga 7 huataguna man. Chiraicu, 69 semanaguna 483 huataguna man (69 x 7).

• 69 semanaguna ima urasta tucurira. 455 a. e. c. (antes de nuestra era) huatamanda, 483 huatagunata yupacpiga, 29 e. c. huatama pactarin. a Chi huataibimi, Jesus bautisarisha Cristo o Mesias tucura (Lucas 3:​1, 2, 21, 22).

15 yachana parti, 5 yuyaima tigrangahua

 3. Quiquin rahuaita apishca tratamientoguna

Quiquin rahuaita apishca tratamientoguna tian. Pero Diosta sirviccunaga mana huin tratamientogunatachu apina anaun. Por ejemplo, ñucanchi rahuaita shuccunata mana cunchichu. Chasnallata, doctorguna huasha ñucanchita operangahua, ñucanchi quiquin rahuaita huacaichinauchun mana saquinchichu (Deuteronomio 15:23).

Chasna acpihuas, shuc tratamientogunata apinata ushanchi imami. Por ejemplo, analisis de sangre, hemodialisis, hemodilucion nishcata apinata ushanchichari. Chasnallata, doctorguna operaushcaibi, shuc maquinahuan rahuai talirishcata aisasha, pichasha, cuti aichama churanaun. O bomba de circulacion extracorporea (o bomba de derivación cardiopulmonar) nishca yanapaihuan operanaun. Doctorguna chi sami maquinagunahuan ñucanchita operanauchun saquinchimachari. Caran Diosta sirviccunami, shuc operacionda, shuc examenda o shuc tratamientota raushcai, imasa paiba quiquin rahuaita apina saquishcata alita ricuna anaun. Caitaga caran doctorgunami paiguna yachashca shina chicanda ranaun. Chiraicu, shuc operacionda, shuc examenda o shuc tratamientota chara mana rashallata, Diosta sirviccunaga doctorgunata tapuna manaun, imasata ñuca rahuaita apingaraungui nisha. Caigunata tapuri:

• Shuc tratamientoibi, ñuca aichamanda rahuaita surcusha, shuc tiempota rahuaita huacaichicpi, ñucaga imatata rasha. Chi rahuaiga chara ñuca parti man nisha yuyanata ushanichu. O chi rahuaitaga “allpaibi talingaraucta shinachu ricuna ani” (Deuteronomio 12:​23, 24).

• Ñuca aichamanda rahuaita surcusha, chi rahuaita alichisha, ñuca aichamallata tigrachicpiga, o chi rahuaita rimidiu cuinta churacpiga, imatata yuyana ani. Bibliamanda yachachishca ñuca concienciaga alita sintichihuangachu.

39 yachana parti, 3 yuyaima tigrangahua

 4. Ichunacuna

Diospa Shimiga ichunacunata mana ali chan ninmi. Mana pariulla causac cazarashcagunaga shuccunahuan cazarangahua mana lugar chanaun (1 Corintios 7:​10, 11). Imasaibi maican Diosta sirviccunaga mana tunu causai tiacpi mana pariulla causanata yuyashcauna.

• Cari ailluta mana cuirana munacpi: Cari paihua ailluta mana carasha cuiranata munacpi, minishtishcata huasiraicu mana cucpi, mana pariulla causanata ushanaun (1 Timoteo 5:8).

•   Manacailla macacpi: Maicangunaga huarmita o carita manacailla macanaun. Cari o huarmi paiba causai peligroibi aucpi, mana pariulla causanata ushanaun (Galatas 5:​19-21).

• Jehovata sirvinata yapacta mana saquicpi: Cari o huarmi Jehovata adorachun o pai mandashcata casuchun mana saquicpi, mana pariulla causanata ushanaun (Hechos 5:29).

42 yachana parti, 3 yuyaima tigrangahua

 5. Istaguna

Diosta sirviccuna Jehova mana gustashca istagunama mana rinchichu. Pero carangunami, Biblia yachachishca shina, shuc istaibi mana participangahua, imata ranata o imata mana ranata alita riparasha ricuna anchi. Cai ejemplogunata ricui.

• “Feliz Navidad” o “Feliz Año Nuevo” nicpi. Shuc runa chita nicpiga, “pagrachu” nina ushangui. Cai runa masta yachana munacpi, chi istata imahua mana rashcata intindichina ushangui.

• Camba mana Jehovata sirvic cari o huarmi, shuc istaibi ailluhuan micungahua jacu nicpi. Camba yuyai conciencia chi istama rinata o mana rinata yanapaitucungui. Chara mana rishallata, chi ista mana sirtu religiongunahuan, brujuguna rashcagunahuan chapurishca acpi, mana participashachu nisha, camba carita o huarmita intindichina angui.

• Camba patron shuc istaibi masta paganata munacpi. Chi cullquita apinalla changui. Chara mana apishallata, caita tapuri: Camba patron chi istamanda chi cullquitachu cumbiranata munan o can ali tarbashcamanda pagrachungahua chi cullquitachu cumbiranata munan.

• Maican runa shuc istaibi regalota cumbiracpi. Chi runa canda ninga imachari: “Can cai istaibi mana ringuichu yachani, pero caita cumbiranata munani”. Ali shungu runa ashcamanda chita cumbiranata munan. Pero caita tapuri: Paiga can chi istaibi chapurichun munanzhu o can Bibliamanda yachachishcata saquichun munanzhu. Chita alita riparasha yuyashca huasha, chi cumbiranata apinata o mana apinata canllata ricuna angui. Imatas rashahuas, ñucanchi conciencia alita sintichingahua, Jehovata casungahua alita rashun (Hechos 23:1).

44 yachana parti, 1 yuyaima tigrangahua

 6. Chimbac ungüiguna

Runagunata llaquishcamanda, ima ungüigunatas shuccunama mana chimbachinata munanchichu. Ñucanchi chimbac ungüita charishcata yachasha, o shuc runa chimbac ungüita ñucanchita pasachishcata yuyashaga, chi ungüita shuccunama mana chimbachingahua cuirarinchi. Biblia mandashcata casusha, caita ranchi: “Amullata llaquishcacuinta shuccunatas llaquina mangui” (Romanos 13:​8-10).

Chimbac ungüita charic runaga, imashinata shuccunata llaquishcata ricuchin. Muctisha, quipirisha, maquihuan mana saludana chan. Chasnallata, maican runa, paihua ailluta cuirangahua, chi ungushca runata paihua huasima manachari invitanmachu. Chasna pasacpiga, ungushca runa mana llaquirina chan. Chara mana bautisarishallata, coordinador del cuerpo de ancianos huauquita, chimbac ungüita charishcata cuintana an. Chasna rashami, shuccunata chi ungüita mana pasachisha bautisarinata ushan. Chimbac ungüita charic runagunahuan apanacushca ashaga, cazarangahua shuc huauquita o panita mana ricsishallata, rahuaimanda examenda rarina an. Caigunata rasha, ʻñucanchi quiquin munaillata mana yuyarisha causanchichu, randi shuccunatas llaquisha yanapasha causanchiʼ (Filipenses 2:​4).

56 yachana parti, 2 yuyaima tigrangahua

 7. Negocioguna, juezgunahua ñaupacpi alichina

Ima negociota rasha o cullquita mañachisha, imasa pagana ashcata, shuc papelbi quillcasha churana anchi. Huauquigunapurahuanbas, problemaguna mana tiachun nisha, chasnallatami rana anchi (Jeremias 32:​9-12). Chasna ashahuas, maican Diosta sirviccuna cullquimanda o ima negociomandahuas imasaibi problemagunata charingauna. Chasna tucushaga, huaira shina chi problemata alichina anchi. Ishcandilla, cungailla cuintanacuna anchi.

Pero maican runa, cullquita shuhuacpi, o shuccunamanda mana alita rimasha llullacpiga, imashinata chi problemata alichina anchi (Mateo 18:​15-17​ta leipai). Jesusca, cai quimsa rashcagunata pactachichi nira:

1. Problemagunata charic runagunapuralla alichinacuna manaun (Versiculo 15​ta ricui).

2. Mana alichina ushashaga, chi problemata alichingahua, congregacionmanda sinzhita quiric shuc o ishcai huauquigunata yanapaita tapuna anaun (Versiculo 16​ta ricui).

3. Caigunata rashca huasha, chi problemata mana alichina ushashallami, ancianogunahuan cuintanacuna anaun (Versiculo 17​ta ricui).

Ima problema tiacpihuas, ñucanchi huauquipanigunata, juezgunahua ñaupacpi juiciota rangahua mana apana chanchi. Chasna rashaga, Jehovahua shutita mana alita saquichishun, shuc runagunahuas congregacionmanda mana alita rimangauna (1 Corintios 6:​1-8). Pero divorciaringahua, huahuaguna yayahuan o mamahuan saquirinata yachangahua, shuc yaya paiba huahuaraicu cullquita pasachingahua, imaibi susirishcamanda segurohuan pagachingahua, bancoibi cullqui illac saquirishcata rimangahua o testamentogunata rangahua juezgunama rina ushanchi. Shuc huauqui o pani, juezgunahua ñaupacpi chi problemata cungailla alichinata munacpiga, Biblia nishcata mana pactachinzhu nisha mana rimana chanchi.

Chasnallata, shuc runa violashcamanda, huahuagunata abusashcamanda, macashcamanda, yapa shuhuashcamanda o huanchishcamanda denunciangahua shuc huauqui o pani juezgunama rina ushan. Pai chasna racpiga, Biblia nishcata mana pactachinzhu nisha mana rimana chanchi.

56 yachana parti, 3 yuyaima tigrangahua