1. Pita causaita cui tucuranchi.

JEHOVAGA “causac Dios man” (Jeremias 10:10). Paimi ñucanchita rasha causaita cura. Bibliaga Jehovamanda nin: “Can tucuita rashcanguimi, chiguna can munashcamanda tucushcauna” (Apocalipsis 4:11). Jehova munacpimi causanchi. Diosca ñucanchita llaquisha causaita cura (Hechos 17:​24, 25 leipai).

2. Alita causangahua imata rana anchi.

² Causangahua Jehovaga micunata, yacuta cui tucunchi (Hechos 17:28). Astahuanbas ñucanchi cushi causachun munan (Hechos 14:​15-17). Alita causangahua Diosta casuna manchi (Isaias 48:​17, 18).

3. Cain Abelta huanchicpi Jehova imata rara.

³ Bibliaga tucui runagunahua causai Jehovaraicu balishca man nin. Adan y Evahua punda churi Cainmanda yachashun. Cainga paiba huauqui Abelmanda yapa piñarira. Chiraicu Jehovaga, Cainda mana yapa piñarina changui nira. Chasna nicpihuas Cainga mana uyana munarachu. Yapacta piñarisha “paiba huauqui Abelta macasha huanchira” (Genesis 4:​3-8). Jehovaga Cain Abelta huanchishcamanda castigara (Genesis 4:​9-13). Caimanda imata yachanchi. Shuccunahuan yapa piñarishaga macac, iridsa runa tucuna ushanchi. Chasna piñaric runagunaga mana huiñai causangaunachu (1 Juan 3:15 leipai).  Jehovahua ñaupacpi ali ricuringahuaga tucui runagunata llaquina manchi (1 Juan 3:​11, 12).

4. 10 mandamientomanda imata yachanchi.

⁴ Ashca huaranga huata huasha Jehovaga Moisesta 10 mandamientogunata cura. Cai mandashcamanda shuc: “Mana huanchina changui” nin (Deuteronomio 5:17). Runata yangalla huanchishaga paihuas huañuna mara. Jehovaraicu causai balishca acta intindinchi.

5. Huicsayasha huahuata ichunata Jehova munanzhu.

⁵ Huicsayasha huahuata ichunata Jehova mana munanzhu. Jehovaraicu huicsa ucuibi tiyac huahua balishca man. Jehovaga israelitagunata nirami: huicsayuc huarmita macasha huahuata huanchishaga macac runa huañuna man nisha (Exodo 21:​22, 23 leipai; Salmo 127:​3). Chiraicu, abortana o huicsayasha huahuata ichuna Jehovaraicu mana ali acta yachashcanchi (nota 28​ta ricui).

6, 7. Imasata causaita balichishcata ricuchinchi.

⁶ Imasata causaita balichishcata ricuchinchi. Ñucanchi causaita, shuccunahua causaita respetashaga manzhanaitagunata mana rashunzhu. Chiraicu huanducta mana upinchichu, drogata mana chupanchichu. Caita rashaga causaita huaglichisha huañuna ushanchi.

⁷ Dios ñucanchita rasha causaita cushcamanda, pai munashca shina causana anchi. Chiraicu ñucanchi aichata cuirarina anchi. Mana cuiraricpiga, Diosca mana ali runata shina ricui tucushun (Romanos 6:19; 12:​1; 2 Corintios 7:​1). Causaita mana respetashaga Diosta mana adorana ushashunzhu. Mana ali rana viciogunata saquina sinzhi acpihuas, causaita balichisha alita racpiga Jehova yanapai tucushunmi.

8. Ñucanchi causaita, shuccunahua causaitas imasata balichishun.

 ⁸ Causaita Dios llaquisha cushcata yachashcanchi. Jehova Diosca ñucanchi causaita, shuccunahua causaitas cuirachun munan. Chiraicumi, autuhuan, motohuan, imaibi puriushahuas alita cuirarisha manejanchi. Chasnallata, mana manzhanaitata rasha pugllanchichu (Salmo 11:​5). Chimandas, ñucanchi huasi manzhanaita acpi alichinchi. Israelitaguna huasita rausha, huasi pata ahuata liyu quinzhachun Jehova mandara. Imaraicuta chasna nira: “Maican camba huasimanda urmasha mana culpachun” nisha sa nira (Deuteronomio 22:​8).

9. Imasata animalgunata tratana anchi.

⁹ Jehovaga animalgunata alita cuirachun munan. Diosca, micungahua churaringahua animalgunata huanchichun saquinllami. Chasnallata animal ñucanchita atacacpi huanchinata ushanchimi (Genesis 3:21; 9:​3; Exodo 21:28). Chasna acpihuas animalgunata macasha, animalgunapura mana macanacuchina chanchi. Chimandas animalgunata piñarishalla mana huanchina chanchi (Proverbios 12:10).

10. Imaraicuta rahuai causai acta yachanchi.

¹⁰ Jehovaraicu rahuaiga causai man. Chiraicumi rahuaita balichin. Chasna acpimi, Jehovaga Cain Abelta huanchicpi paita nira: “Camba huauquihua rahuai allpamanda caparihuaun” (Genesis 4:10). Abelba rahuai causai mara. Chiraicu, Jehovaga Cainda castigara. Ashca huata pasashcaibi, intiru Allpata catac tamia o Diluvio huasha, Jehovaga rahuai causai acta intindichira. Jehovaga Noe paiba ailluhuan animalgunata  micunauchun saquirallami. Paiga nirami: “Tucui verde quihuagunata micushca shinami, tucui causac animalta micuna ushanguichi. Tucuitami cangunata cuni”. Chasna ashahuas, Jehovaga caita ama ranguichichu nira: “Aichaibi tiyac rahuaita ama micunguichichu. Rahuaiga causai man” (Genesis 1:29; 9:​3, 4).

11. Jehovata sirviccunaga rahuaita imata rana anaura.

¹¹ Noeta rahuaita mana micuna changui nisha 800 huata huasha, Jehova paita sirvic llactata nira: “Maican Israel runagunamanda asha, shuc llactamanda shamushca runaguna ashas animalta micungahua apisha, pishcuta apishahuas, paiguna rahuaita talisha allpahuan tapana man”. Chasnallata nira: “Rahuaita ama micunguichichu” (Levitico 17:​13, 14). Jehovaga paita sirvic runaguna rahuaita respetachun munara. Aichata micusha rahuaita mana micuna chanaura. Animalta micungahua huanchishaga, rahuaita ichusha micuna manaura.

12. Jesusta caticcunaga rahuaita balichinaunzhu.

¹² Jesus huañushcamanda ansa huata pasashcai, apostolguna, Jerusalenmanda cuirac ancianogunas maican leyta israelitaguna casuna ashcata ricungahua tandarinaura (Hechos 15:​28, 29 leipai; 21:25). Jehovaraicu rahuai balishca acta intindichira. Chasnallata, paita sirviccuna rahuaita balichichun munan. Jesusta punda caticcunaga mana rahuaita micusha, mana upina chanaura. Chimandahuas, rahuaita mana surcushca animaltas mana micuna chanaura. Rahuaita micunaga yanga diosta adorana shina, shuccunahuan irusta rasha uchana shina mara. Chimandami, Jesusta  sirtu caticcunaga rahuaita mana micunaunzhu, mana upinaunzhu. Jehovaga rahuaita balichisha respetachun munan.

13. Jesusta caticcunaga imahuata rahuaita mana churarina munanaun.

¹³ Caita yachashaga Jesusta caticcuna rahuaita aichaibi churarina chanaun. Mana. Jehovaga rahuaita mana micuna, mana upina changui nin. Caita pinsai: Doctor tragota mana upina changui nicpi, tragota suerota shina churaringuimachu. Mana. Chasnallatami, rahuaita mana micuna, mana upina nisha Dios mandashcata casungahua, rahuaita aichaibi mana churarina chanchi (nota 29​ta ricui).

14, 15. Jesusta caticcuna causaita balichishahuas, imahuata causasha catingahua mana rahuaita churarinchi.

¹⁴ Doctor rahuaita mana churarisha huañunguimi nicpiga. Caran shucmi Diospa leyta casunata o mana casunata anllana anaun. Jesusta caticcunaga rahuaita Dios cushca man nisha balichinchi. Chiraicu, causasha catingahua, shuc tratamientogunata rashami, rahuaita mana churarinchi.

¹⁵ Mana ungungahua cuirarinchimi. Diosraicu rahuai balishca causai acpi, aichaibi rahuaita mana churarina munanchi. Jehovata casusha causanata munanchi. Jesus nirami: “Pihuas cai mundui paihua causaita yalicta llaquishaga Diospacpi tucuita chingarisha illac tucungami” (Lucas 17:33). Jehovata llaquishami casunata munanchi. Chimandahuas, Jehovami ñucanchiraicu ima ali acta yachan. Pai shinami causaita balichinchi (Hebreos 11:​6).

16. Jesusta caticcunaga imahuata Diosta casunchi.

¹⁶ Jesusta sirtu caticcunaga Dios mandashcata  shungumanda casuna munanchi. Chiraicu, rahuaita mana micushunzhu, mana upishunzhu, tratamientota rangahuas mana churarishunzhu. * Chasna ashahuas, causasha catingahua shuc tratamientogunata ranchi. Diosmi causaita, rahuaita rara. Chimandami, ñucanchiraicu ima ali acta Dioslla yachan. Canga caita quiringuichu.

17. Jehovaga Israel llactaibi rahuaihuan imata ranata alita ricura.

¹⁷ Moisesta cushca leybiga, Jehova israelitagunata nira: “Causaiga rahuaibi maun. Ñucallata altarbi rahuaita churashcani paigunahua uchata anchuchinga­hua. Rahuaimi runahua uchata anchuchin” (Levitico 17:11). Israelitagunaga, Jehova paiguna uchata perdonachun temploma animalta apac anaura, sacerdoteguna huanchisha rahuaita altarbi talingahua. Chi timpuibi, Jehovaga Israel llactaibi rahuaita casna rashcatami alita ricura.

18. Jesus huañushcamanda imata charina ushanchi.

¹⁸ Jesus Allpama shamushcaibi, runagunata uchamanda quishpichingahua paiba causaita o rahuaita cura. Chihuasha, uchamanda quishpingahua animalta huanchina ley tucurira (Mateo 20:28; Hebreos 10:​1). Jesuspa causaiga balishca mara. Pai causaita cushcamandami, Jehovaga tucui runagunata huiñai causanata cungaraun (Juan 3:16; Hebreos 9:​11, 12; 1 Pedro 1:​18, 19).

19. Runagunata llaquisha imatata ranchi.

 ¹⁹ Jehova ñucanchita causaita cushcamanda pagrachunchi. Chiraicumi, Jesuspi shungumanda quirishaga runaguna huiñai causaita charingauna ninchi. Chimandas, runagunata llaquishami huiñai causaita charinauchun nisha imata rana ashcata yachachinchi (Ezequiel 3:​17-21). Chasna rasha apostol Pablo shina nina ushanchi: “Dios mandashca shimita tucuita yachachiranimi mana imatahuas pacasha. Chiraicumi cunanga pihuas mana quiricpiga mana ñucaga culpayuc chani” (Hechos 20:​26, 27). Jehovamanda cuintasha, causai balishca acta runagunata yachachishaga causaita, rahuaita balichishcata ricuchinchi.