LECCIÓN 6
¿Imaćh pasan’a wañucucunäwan?
1. ¿Imaćh alcayan wañucucunäta?
Juc tiempućhu, Jesús cay allpäćhu cayaptinmi amigün Läzaru wañucuña. Pay’a yaćhala Betania malcaćhumi, Jerusalen cercanćhu. Jesús Betaniacta ćhaluptinmi tawa muyunña pampäśha cayäñä. Chaymi Jesús Martawan Maria quimsan lipäcula panteuncäta pampalaśhancaman, ćhalaliptinmi achca nunacuna licalilalimun, chayćhumi Jesús Lazaructa śhalcachila. Maynuy maynućha Martawan Maria tulinta cawsachiptin cushicälälila. Ashicuy Juan 11:21-24, 38-44.
Cay allin willacuycäta Bibliäćhumi yaćhanchic llapa familianchiccuna śhalcamunanta. Martapis yaćhañäñam Jehová prometishanta llapa wañücuna śhalcamunanta cay allpäćhu yaćhapäcunanpa. Ashicuy Job 14:14, 15.
2. ¿Imanuyćha cayalcan wañücunaca?
Jehová, Adanta nïcula: ‘Allpapimi cayanqui, allpallamantacmi cutinquipis’. (GÉNESIS 3:19).
Lluy nunacunaca allpapi lulaśham cayanchic (Génesis 2:7; 3:19). Manam espiritunuchu nunacunaman uśhtunchic. Ya’anchic’a aychayu tulluyumä canchic. Wañucuptinchic’a manañamä espíritunchicpis cawsanchu, cerebrunchicpis manamá pensanchu, nï yalpanchu, nï imactapis sentinchu. Chaymi Läzarupis wañucuśhanpi cawsamul imactapis willaculachu. Ashicuy Eclesiastés 9:5, 6, 10.
Waquin nunacuna nipäcunmi, Diosninchic juyu nunacunäta wañuluptin infiernućhumi cañayan. Chay’a, manam rasumpachu. Wañucuptinchic’a manañamä tantiayninchic canchu, nï nanaytapis sentinchicñachu. Chay infiernuca nunacunap creincianmi pantäsham cayalcan, Diosninchictapis piñachipäcunmi chay limaycunäwan. Ashicuy Jeremías 7:31.
Licay cay videuta: ¿Cuál es el estado de los muertos?
3. ¿Limanquimanchućh wañucucunäwan?
Wañücunacá manam limanchu, nï uyalinchu (Salmo 115:17). Cayanmi juyu anjilcuna, nunacunawan limayta muna, chay juyu anjilcami; wañucücami cayä nilcul creichipäcun nunacunäta (Judas 6). Chaymi Jehová manam munanchu wañucücunäwan limanacunanchicta. Ashicuy Deuteronomio 18:10, 11.
4. ¿Mayancunaćh cawsapacamun’a?
Walanga walanganpam wañuśha nunacuna talcapäcamun’a cay allpäćhu yaćhapäcunampa. Manaläpis Jehovata lisil juchapacücunapis śhalcapäcamun’am. Ashicuy Salmos 37:29 ñatac Hechos 24:15.
Wañuśhanpi cawsamü nunacunacá, Diospa rasunnintam yaćhapäcun’a. Jesusman chalapaculmä casucuśhanta licachiculcan’a (Apocalipsis 20:11-13). Chayta lulal’a sumä cushishamä wiñay wiñaypa cay allpäćhu cawsaculcan’a. Ashicuy Juan 5:28, 29.
5. ¿Imactaćh yaćhachimanchic wañucucunäta Jehová cawsachimuśhampi?
Canan, Jehová alli cuyayninwanmi wañuśhacunäta śhalcachin’a. Chaymi Pay’a cuyay chulinta caćhamula juchanchicpita wañunanpa. Chaypimi Jehovata allicta agradecicuśhun. Am’a ¿piwanmi tincuyta munanquiman wañucuśhampi śhalcämuptin? Ashicuy Juan 3:16 ñatac Romanos 6:23.
