Taucacunami cai planetatapash y cai alpapi causaitapash gentecunallatami huaglichinajun nishpa ninanda preocuparishca can. Cai temacunamanda huaquin estudiashcacunaca gentecunapa ruraicunaca cai planetapi tiashca animalcunata y plantacunatapash tucuchitapachami tucuchinajun ninmi.

 ¿Cai planetataca ciertopachachu tucuchigrinajunchi? ¿O imahorapash cai planetata aliguta cuidashpa causaita usharingacha?

 Estudiashca gentecunaca cai planetata aliguta cuidashpa causaitaca usharinmi ninmi. Cutin huaquin investigadorcunaca cai situación mejorachun munashpaca, shuj shuj cosascunapi y chai ratopillatami tucuilla cambiocunata rurana can nishca. Shinaca ¿ima cambiocunatallashi rurana can?

•   Alpata, bosquecunata, lagunacunata y oceanocunatapash ñana mapayachinachu can.

•   Diferente formacunapi tarpuna y michata charingapapash shuj formacunata utilizana.

•   Micunata ama yangata gashtangapaj y ama yangata desperdiciangapapashmi huaquin cambiocunata rurana can. Por ejemplo, gentecuna solo pescadotalla o aichatalla micunapa randica ashtahuan verduracunata micuchunmi cambiocunata rurana.

•   Ali causangapaj ashtaca cosascunata charina na minishtirishcata intindina.

 ¿Imatata pensapangui? ¿Gobiernocuna, empresacuna y shuj gentecunapash cai planetata salvangapaj igual trabajashpa ayudarita ushangacha? ¿O gentecuna ambiciosocuna caimanda, paicunapilla pensarishpa causaimanda y jipa punllacunapi ima pasanatapash na preocuparimandaca, igual trabajaitaca na ushangachu nishpachu pensapangui? (2 Timoteo 3:1-5).

 Bibliapica ñucanchi planetaca na tucuchi tucungachu nijunmi. Gentecuna cai planetata salvangapaj esforzarishpapash imamanda na ayudaita ushashcatami intindichin. Shinallata cai planetata salvangapaj ima cambiocunatalla ruranatapashmi Bibliapica nijun. Y chai cambiocuna imashina pactarinatapashmi nijun.

 Gentecuna cai planetata salvangapaj esforzarishpapash ¿imamandata na ayudaita ushashca? Jehová a Diosmi cai planetataca rurarca y gentecunamanmi cuidachun mingarca (Génesis 1:28; 2:15). Taita Diospa mandashcacunata catishpa y cazushpallami chai mingashcata aliguta pactachi ushana carca (Proverbios 20:24). Pero shina ruranapa randica, gentecunaca Jehová Diosta rechazashpami paicunapa munashcata rurarca (Eclesiastés 7:29). Chaimi cai planetata cuidangapaj ninanda esforzarijpipash gentecunapa rurashcacunaca ratopalla ayudan (Proverbios 21:30; Jeremías 10:23).

 ¿Imata cambiana can? Taita Diosca cai alpata gentecuna tucuchishpa catichunga na saquingachu (Apocalipsis 11:18). Taita Diosca cai alpapi gobiernocunata y cai alpata huaglichinajuj gentecunatapash tucuchingami (Apocalipsis 21:1). Chaimandami Jehová Diosca Bibliapica cashna nin: “Ricui, tucuitami mushujta rurajuni” (Apocalipsis 21:5).

 Chai cambiocunaca ¿imashinata pactaringa? Jehová Diosca cai alpapi gobiernocunapa randica shuj mushuj gobiernotami churanga. Chai gobiernoca jahua cielopi Taita Diospa Gobiernomi can. Chai Gobiernopica Jesucristomi mandajun. Y paica cai planeta enterotami mandanga (Daniel 2:44; Mateo 6:10).

 Taita Diospa Gobiernoca, Taita Dios munashcashna gentecuna causachunmi paipa mandashcacunata yachachinga. Taita Diospa autoridadta reconocishpa y paipa mandashcacunata cazushpallami cai alpata aliguta cuidashpa causaita ushanga (Isaías 11:9). Bibliapica Taita Diospa Gobierno cai alpata mandajujpica, gentecunaca ali causaigutami charinga. Pero shinapash cai planetapi tiashcacunataca ñana tucuchingachu nijunmi. Taita Diospa Gobiernopica caicunami pactaringa:

•   Tucuicunapami micunaca tianga (Salmo 72:16).

•   Gulpi planetatami arreglanga (Isaías 35:1, 2, 6, 7).

•   Gentecunapash, animalcunapashmi igual y en paz causanga (Isaías 11:6-8; Oseas 2:18).

•   Terremotocuna, acapanacuna, tsunamicuna y climapa culpamanda shuj llaquicunapash ñana tiangachu (Marcos 4:37-41).

 Chai tucui cosascunata Taita Diospa Gobierno ñalla pactachinataca seguromi caita ushapanchi. Cai yuyaimanda ashtahuan yachangapaj munashpaca “Taita Diospa Gobiernoca ¿imahorata cai alpataca mandanga?” nishca temata liipangui.