Ashtaca gentecuna, Jesusta catijcunami canchi nij tucuj gentecunapashmi, jarihuan huarmihuan canamanda, matrimoniomanda Bibliapi parlajuj Taita Diospa mandashcacunaca cunan tiempopica ñana sirvinllu ninmi. Cunan tiempopi gentecunahuan ali cangapaj munashpami, huaquin iglesiacunaca ima ali cashcata, ima nali cashcata cambiashpa yachachin. Shinapash, ¿Bibliapi Taita Diospa mandashcacunaca cunan tiempocunapipash sirvinrachu? Ari, sirvinrami. Imamanda cunangaman sirvishcata ricupashunchi.

 Gentecunaca Taita Diospa ayudata mascana munaihuan rurashcacunami capanchi. Chaimandami Bibliapica nin: “Runapaj causaica na paipajchu. Pipash quiquin causaitaca, na mandai ushanllu” nishpa (Jeremías 10:23). Jehová a Diosca, gentecunallata imata ruranata agllachunmi saquirca. Shinapash ima ali cashcata, ima nali cashcataca na ñucanchichu decidinchi. Chaimandami Jehová Diosca ñucanchicuna paipi confiachun munan (Proverbios 3:5).

 Bibliapimi Taita Diospa mandashcacunataca ricuita ushapanchi. Taita Diospa mandashcacuna imamanda alipacha cashcata yachangapaj, ishcai yuyaiguta ricupashunchi.

•   Diosmi ñucanchitaca rurarca. (Salmo 100:3) Ñucanchita rurashcamandami, ñucanchicuna cushilla cachun, cuerpopi, yuyaipi sano cachun imatapacha minishtishcata Jehová Diosca ali yachan. Shinallata paipa mandashcacunata na cazujpi ima pasanatapashmi ali yachan (Gálatas 6:7). Ashtahuanbash ñucanchicuna cushilla, ali cachunmi munan. Chaimandami Bibliapica nin: “Ñucami, cangunapaj ali cachun cangunata yachachini. Canguna maijan ñanda rinatapash, ñucami ricuchishpa pushani” nishpa (Isaías 48:17).

•   Ñucanchi munaicunami pandachita ushan. Ashtaca gentecunaca yuyanmi, paicunapa shungu ima nishcata catishpami ima ali cashcata, ima nali cashcata agllai usharin nishpa. Shungu nishpaca paicunapa yuyaicunata, munaicunata catinatami ningapaj munan. Shinapash Bibliaca “runapaj shunguca, tucui imatapash yali umachijlla, jatun nalimi” can ninmi (Jeremías 17:9). Taita Diospa yachachishcacunata na yaipi charij shunguta charishpaca, nali cosascunata rurashpami, jipamanra ninanda llaquirinajushun (Proverbios 28:26; Eclesiastés 10:2).

 Ari, yaipimi charina can. Bibliallami Taita Diosmanda cabalguta yachachin. Shinallata ñucanchicuna imashina comportarinatapashmi yachachin (1 Corintios 6:9-11; Gálatas 5:19-23). Gentecuna paimanda cabalguta yachajuchunmi Taita Diosca munan (1 Timoteo 2:3, 4). Chaimandami Taita Diosmanda yachachijcunaca, Bibliapi yachachishcatapacha shujcunaman yachachina can (Tito 1:7-9).

 Taita Diospa mandashcacunata na rijsingapaj munaj gentecunaca, paicuna uyangapaj munashcata nichunmi religionda ñaupaman pushajcunata mascan (2 Timoteo 4:3) Shinapash Bibliapica, “nalitara alimi nishpa, alitara nalichu nijcunaca, ¡aij imachari tucunga!” ninmi (Isaías 5:20). Caipica intindichinmi, religionda ñaupaman pushajcuna Taita Dios yachachishca shina ima ali cashcata, ima nali cashcata na yachachijcunataca Taita Diosca castigangami.

 Na, na chaita yachachinllu. Taita Diospa ñaupapi ali ricuringapaj munaj gentecunaca Jesuspa ejemplota, Jesuspa yachachishcacunatami catin. Jesusca paipa catijcunataca shujcunata na juzganata, shinallata tucuicunata juyanata, respetanatami yachachirca (Mateo 5:43, 44; 7:1).

 Jesusca paipa catijcunataca, paicunapa causaipi Taita Diospa mandashcacunata pactachishpa causachunmi yachachirca. Shinapash shuj gentecuna shuj cosascunapi crijpipash shujcunata respetanatami Jesusca yachachirca (Mateo 10:14). Jesusca paipa catijcunataca, politicata o imatapash utilizashpa tucuicuna Taita Dios yuyashcashna yuyachun obliganami canguichi nishpaca na mandarcachu (Juan 17:14, 16; 18:36).

 Ima ali cashcata, ima nali cashcata yachangapaj Taita Diospa mandashcacunata catishpa causajcunaca cunanbillata, jipa punllacunapipash alipacha bendiciongunatami chasquishun (Salmo 19:8, 11). ¿Ima bendiciongunatata chasquishun?

•   Ashtahuan cushilla causaita (Proverbios 29:6).

•   Taita Dioshuan ali canata (Proverbios 3:32).

•   Llaqui tiempocunapi Taita Diospa ayudata (Proverbios 11:8).

•   Na huañushpa para siempre cai alpapi causanata (Salmo 37:29).