ENOCCA 365 huatacunatami charirca. Chai tiempopica 365 huatacunata charishpapash nara mayor carcachu. 5 mil huatacuna huashamanga gentecunaca ashtaca ashtaca huatacunatami causan carca. Por ejemplo, punda jari Adán 600 huatacunata charijpimi Enocca nacirirca. Chai jipapash Adanga 300 huatacunata causarcarami. Adanba huaquin miraicunaca, paita yalimi causarca. Chaimandami Enocca 365 huatacunata charishpapash shinlli caimanda ashtaca huatacunata causanara carca. Shinapash na unaita causagrijurcachu.

Enocpa causaica peligropimi carca. Enoc runaguca Taita Dios mandashcatami chai tiempopi nali gentecunaman villashcarca. Chaimandami chai gentecunaca manllanaita culirashca carca. Chaimi Enoc runaguca chai gentecuna imatashi ruranga nishpa cutin cutin pensarijushcanga. Chai gentecunaca Enocta na ricunayachishpami, pai villashcatapash yangapi churashpa, Diosmandapash aburririnajurca. Jehovata na llaquichita ushashpami, paita sirvij Enocta llaquichingapaj munanajurca. Chaimandami Enocca cashna pensarijushcanga ñuca huarmita, ushicunata, ñuca churi Matusalenda, ñuca nieto Lamecta ¿cutin ricushacha? nishpa (Génesis 5:21-23, 25). ¿Chaicamanllacha Enocca causagrijurca?

Enocpa causaimanda ashtaca cosascunataca na yachai usharinllu. Bibliapica quimsa viajetallami paimandaca parlan (Génesis 5:21-24; Hebreos 11:5; Judas 14, 15). Huaquin textocunapilla Enocmanda parlajpipash pai imashina cashcata, shinlli feta charishcatapashmi yachai ushanchi. Enocpa ejemplomi familiata cuidana cajpi, quiquinba crishcata difindina cajpipash Diospi feta charichun ayudanga.

Enocpa punllacunapica nali gentecunaca ashtahuanmi miranajurca. Chai punllacunapi gentecunaca Adanba jipa sujta mirai caimandami Adán y Eva jucha illaj causaita chingachishca cajpipash, ashtahuan huatacunata causan carca. Shinapash espiritual cosascuna, paicunapa ruraicunaca nimapa na valircachu. Adanba cati mirai Caín, paipa huauqui Abel runaguta huañuchishca tiempomandami gentecunaca ashtahuan huaglishpa catirca. Ashtahuanbash Cainba familia puramanda shuj runaca Cainda yali millai millaimi cani nishpami jariyan carca. Shinami Adanba jipa ishcai cati miraicunapica ashtahuan millai nali gentecuna ricurirca. ‘Chai punllacunamandapachami runacunaca [“Jehovapa” shutipi, MN] mañai callarirca’. Diospa shutipi mañanajushpapash Diostaca na adoranajurcachu, respetotapash na ricuchinajurcachu (Génesis 4:8, 23-26).

Chai tiempopica shina panda religiongunaca ashtacami tiarca. Chaimandami Enoc viñashpaca chai gentecunashna canata o Tucuita Ruraj Jehová Diosta sirvinata agllana tucurca. Enocca, Abel runagu Jehová Dios munashcashna paita adoranamanda huañushcataca yacharcami. Chaimandami Enocca Abelpa ali ejemplota catishpa ali decisionda agllarca. Génesis 5:22​pica ninmi: ‘Enoc runaguca, Taita Dioshuan alimi purirca’ nishpa. Cai shimicunaca, gentecuna Diosmanda caruyashca cajpipash, Enocca Diosta tucui shunguhuan yarishpa causashcatami ricuchin. Bibliapica Enoctami pundapi, Taita Dioshuan alimi purirca nin.

Chai textopillatami ricuchin Enoc, Matusalenda charishca jipapash Jehová Dioshuan ali purishcata.  Casi 65 huatacunata charishpami Enocca taita tucurca. Bibliaca, Enocpa huarmi ima shuti cashcata, mashna huahuacunata charishcataca na imatapash ninllu. Shinapash Enoc cazarashcata “ushicunata, churicunata” charishcataca yachanchimi. Enocca Taita Dioshuan alimi purirca nichunga, Taita Dios munashcashnami paipa familiataca cuidajushcanga. Cusahuarmi imashina causachun Jehová munashcatapash Enocca alimi yachashcanga (Génesis 2:24). Shinallata paipa huahuacunapash Jehová Diosta tucui shunguhuan juyachunmi yachachishcanga. Shina rurashcamandaca ¿imata tucurca?

Enocpa churi Matusalenba femandaca Bibliapica na imatapash ninllu. Paica Bibliapi parlashca gentecunamandaca ashtahuan huatacunatami causarca. Shinallata Jatun Manllanai Tamia tiashca huatapillatami huañurca. Shinapash Bibliapi ricushpaca Enocpa nieto Lamec shinlli feta charishcatami yachanchi. Lamec runaguca Matusalenba churimi carca. Lamec 100 huatacunata causajujpica, Enocpash causajurcarami. Jehová Diosca Lamec runagutaca paipa churi Noemanda shuj profeciata villachunmi mandarca. Chai profeciaca Jatun Manllanai Tamia tiashca jipami pactarirca. Noeca paipa bisabuelo Enoc shinami Taita Dioshuan alimi purirca. Enocca paipa familiamanga shuj ali ejemplotami saquirca. Noé, Enocta na rijsishca cajpipash, pipash familiapuramandami Enoc imashina cashcataca parlashcanga. Tal vez paipa taita Lamec o paipa abuelo Matusalén, na cashpaca Enocpa taita Jaredmi parlashcanga. Jared shuti runaguca Noé 366 huatacunata charijpimi huañurca (Génesis 5:25-29; 6:9; 9:1).

Enocta, Adanhuan chimbapurajpica imapipash na igual carcachu. Adanga jucha illaj cashpapash Jehovata na cazuimanda juchayu tucushpami, paipa huahuacuna cai millai mundopi, llaquinaita causachun saquirca. Cutin Enocca juchayu cashpapash, Taita Dioshuan alimi purirca. Shinami paipa huahuacunamanga feta charinamanda shuj ali ejemplota saquirca. Adanga, Enoc 308 huatacunata charijpimi huañurca. Adanga paipa munaitallami ruran carca. ¿Shina cashcamandaca Adán huañujpica paipa familiaca llaquirircacha? na yacharinllu. Ima tucushca cajpipash, ‘Enocca Taita Dioshuan alimi purirca’ (Génesis 5:24).

Quiquin familiata cuidana cajpica, Enocpa feta catinami ayudanga. Ciertomi can, familia ima minishtishcata cuna cashpapash, ashtahuanbachaca espiritualmente ayudanami minishtirishcapacha can (1 Timoteo 5:8). Espiritualmente familiata ayudangapaca na shimillaca ninachu can, ruraicunahuanmi ayudana cangui. Enoc shina quiquinbash Taita Dioshuan ali purinata agllashpa, Diospa consejocunata cazushpaca, quiquinba familiapash shuj ali ejemplota catichunmi ayudangui.

Enocca pailla Taita Diosta sirvij cashcamandami, chai tiempopi gentecuna Diosmanda caruyashca cajpi, pailla sintirishcanga. Shinapash Taita Diosca Enoc runaguhuan ima pasajujtaca alimi yacharca. Chaimandami Jehová Diosca Enoctaca chai tiempopi gentecunahuan ima tucugrijushcata villachun mandarca. Shinami Jehová Diosca Enoctaca profeta shina sirvichun agllarca. Paipa profeciami Bibliapica pundapi escribishca tiajun. Chaitaca ¿imashinata yachai ushanchi? Ashtaca huatacuna jipami Dios yarichijpi  Jesuspa huauqui Judasca, Enoc villashca profeciamanda shimicunata escribirca. a

Enocca ¿ima profeciatata escribirca? Paica nircami: “Ricuichi, paipajlla causaj huaranga huaranga angelcunahuan, Mandaj Dios shamujujtami ricurcani, paica tucuicunata llaquichingapajmi shamurca. Diosta na manllaj runacuna, Diosta na manllashpa tucui nalita ruranajujta ricuchingapajmi shamurca. Juchata rurashpa causaj, Diosta na manllaj gentecuna shimi cacharishcata, paita fiñashpa rimanajushcata ricuchingapajmi shamunga” nishpa (Judas 14, 15). Imashinami ricupanchi Enoc cai shimicunata nishpaca, Jehová Dios chai profeciata ña pactachishcata shinami parlajurca. Ashtaca profetacunami, imapash nara pactarijpillata ña pactarishcatashna escribin carca. Shina escribishpami tucui escribishca profeciacuna pactarinapacha cashcata ricuchinajurca (Isaías 46:10).

Enocca paicunahuan ima tucunatami tucuicunaman villachishcanga. Na facil cajpipash, Enocca chai profecía pactarinata crishpami na manllashpa villachishcanga. Enoc villashca shimicunapica cutin cutinmi, “Diosta na manllaj” nishca shimicuna ricurin. Diosta na manllaj nishpaca paicunapa causaipi nalicunatalla rurashpa, Diosta na respetaj gentecunatami shina nin. Cai profecía nishca shinaca jardín de Edenbi na cazushca horasmandapachami cashna nali causaica tiai callarirca. Chaimandami llaquinayaita chai gentecunaca tucuchi tucuna carca. Jehová Diosca paipa ‘huaranga huaranga angelcunahuanmi’ tucuchigrijurca. Chai angelcunaca macanajungapaj alipacha prepararishcacunami can. Enocca na manllashpami pailla villachirca. Chaimandami ni ushanchi, paipa nieto Lamecca paipa abuelotaca respetohuan, ninandami alicachin cashcanga nishpa.

Enoc feta charishcapi pensarishpa tapurishunchi ¿Dios ricushca cuendachu cai mundopa ruraicunataca ricujuni? nishpa. Enoc villachishca shimicunaca, chai punllacunapa, cunanbapash alimi can. Enocpa profeciaca Jatun Manllanai Tamiahuan Noepa punllacunapi nali gentecunata Jehová tucuchijpimi pactarirca. Shinami, cunan punllacunapi nali gentecunata ñalla imashina tucuchinata ricuchijurca (Mateo 24:38, 39; 2 Pedro 2:4-6). Cunanbipash Taita Diosca paipa huaranga huaranga angelcunahuanmi cai nali mundota tucuchingapaj ña prepararishcalla can. Chaimandami Enoc villachishca shimicunataca, ñucanchipash uchalla shuj gentecunaman villachina canchi. Huaquinbica ñucanchi familia o amigocuna na apoyajpimi ñucanchilla sintirinchi. Shinapash Enoctaca Jehová Diosca nunca na saquircachu. Shinallata Jehovata tucui shunguhuan sirvijcunataca na saquingachu.

¿Enocca imashinata huañurca? Enoc imashina causashcata, imashina huañushcataca na cabalta yachai ushanchichu. Génesis libropica ninmi: “Enoc runaca, Taita Dioshuanga aligutami purijurca. Chaimandami paitaca, Taita Dios apajpi, cutinga na ricurirca” nishpa (Génesis 5:24). ¿Dios aparca nishpaca imatata ningapaj munan? Bibliapa huaquin traducciongunaca, Hebreos 11:5​pica Enoc runagutaca cieloman Dios apashca nishpami churashca. Shinapash Bibliapica ricuchinmi, pundapica Jesusmi jahua cielopi causangapaj causarirca nishpa (Juan 3:13).

Cutin shuj traducciongunapica Hebreos 11:5​pica ninmi, Enoctaca Diosmi chaicamanlla causaita charichun saquirca nishpa. ¿Imamandashi Taita Diosca shina rurarca? Enoc runaguta paipa contracuna llaquinaita ama huañuchichunmi Diosca shina rurarca.  Shinapash nara huañushpallatami Enocca Diospa ñavipi ali ricurishcata yachaj chayashcanga. ¿Imamandata shina ninchi? Taita Diosmi Enoc runagumanga muscuipi shina cai Alpa ña shuj paraíso tucushcata ricuchun saquishcanga. Enocca Jehovapa ñaupajpi ali ricurishcata yachashca jipami huañurca. Apóstol Pabloca Jehovata tucui shunguhuan sirvijcunamanda parlashpaca cashnami escribirca: “Crishpallami, Dios carashapachami nishcacunatapash, nara japishpallata huañunajurca” nishpa (Hebreos 11:13). Enoc huañushca jipaca paipa cuerpotami contracunaca mascanajushcanga. Shinapash Jehovami Enoc runagupa cuerpota na tarichun saquishcanga. Shinami Enoc runagupa cuerpota imapash yanga costumbre ruraicunapi utilizachun na saquirca. b

Caicunata ña yachashpaca Enoc huañujujpi ima tucushcata pensaripashunchi. Shinapacha tucushcataca na ninajunchichu. Ricupashun, Enoctaca ashtaca ashtaca contracunami pai villachishcata uyashpa ninanda culirashpa catinajun. Chaimandami Enocca pacajungapaj rijushpa ña fuerza illaj sintirin. Shinapash pacajuna pushtuguta tarishpami chaipi samajun. Enocca contracuna paita tarishpa llaquinayaita huañuchinataca alimi yachan. Shina pacajushca cashpami Enocca Taita Diosta mañan. Chai jipallami tranquilo ali sintirin, shuj muscuipi cuendami shuj caru pushtupi cashcata shina sintin.

Chai pushtuca pai causashca punllacunapi imashina cashcata ricujpica shujpacha cashcatami ricun. Jardín de Edén cuenda juyailla cashcata, chai jardinman gentecuna ama yaicuchun angelcuna cuidajujtaca na ricunllu. Chaipica jaricunapash, huarmicunapash shinlli, sanocunami can. Gulpi gentecunami ali llevarin. Taita Diosta Enoc sirvishcamanda catiriashpa llaquichij, shujcunata na ricunayachij gentecunapash ñana ricurinllu. Shuj muscuipi shina Enoc chaicunata ricushcamandami, Jehová Dios paita alicachishcata, ninanda juyashcatapash yachan. Shinami paica chai juyailla pushtugupi causana cashcata ali yachan. Chai jipami paipa shungupi tranquilo sintirishpa, último samaita cacharishpa huañurca.

Chai punllamandapachami Enocca huañujta puñujuj cuenda samajun. Pero Jehová Diosca Enoctaca nunca na cungangachu. Paipa yuyaipimi charin. Jesusca ñami nishca carca, huañushpa pambai tucushcacunaca, tucuillami ñuca rimajta uyanga nishpa. Chai huañushcacunaca cai Alpa shuj juyailla paraíso cajpimi chaipi causangapaj causaringa (Juan 5:28, 29).

¿Quiquinbash chai juyailla Alpagupi cangapaj munanguimanllu? Chaipi Enocta rijsishpaca ninandami cushijushun. Yuyapai paimandaca ashtaca cosascunatami yachajuita ushashun. Chaipimi pai huañujujpi imapacha tucushcataca cabalta yachai ushashun. Chaipaca uchallami ñucanchicunapash Enoc shina cangapaj yachajushpa catina canchi. Apóstol Pabloca Enocmanda parlashca jipaca cashnami nirca: ‘Crishpallami [o feta charishpallami] Taita Diostaca cushichita’ usharin nishpa (Hebreos 11:6). Chaimandami Enocpa feta catina ñucanchitapash ayudanga