Alipacha rijsicunaca siempremi telefonopi cayashpa, Internetpi mensajeta cachashpa o cartata escribishpa parlanajun. Shinallata, Taita Diospa alipacha rijsi cangapaca cutin cutinmi paihuan parlana canchi. Shinapash ¿imashinata parlashun?

Oracionda rurashpami Taita Dioshuan parlanchi. Shinapash Taita Dioshuan parlanchi nishpaca na gentecunahuanshnachu parlana canchi. Taita Diosca Tucuita Ruraj Diosmi can. Chaimandami respetohuan parlana canchi. Shinapash Taita Dios uyachunga ¿imatata rurana canchi? Quimsa yuyaicunata ricupashun.

Pundapica Jehová Diostami mañana canchi. Jesusta o imapash santocunataca na mañanachu canchi (Éxodo 20:4, 5). Bibliapica ninmi: ‘Ima illajpipash na llaquilla causanachu canguichi. Ashtahuangarin Taita Diosmanmi imatapash villashpa, pagui nishpa mañana’ canguichi nishpa (Filipenses 4:6). Shinallata, Taita Diosta mañajushpaca paipa churi Jesuspa shutipimi mañana canchi. Chaimandami Jesusca nirca: ‘Ñuca Taitapaman ñuca na pushajpica, pipash na paillata chayai ushanmanllu’ nishpa (Juan 14:6). Ashtahuangarin Taita Diosta mañashpaca pai munashcashnami mañana canchi. Bibliapica ninmi: ‘Pai munashcashna mañajpica Diosca uyanllami. Chaita yachashpami paita crishpa cushijunchi’ nishpa (1 Juan 5:14). *

Imashinami pihuanbash ali llevarishpa catingapaca ishcandillata parlana, uyan can, shinallatami Taita Diospa rijsi cashpa catingapaca pai parlajtaca uyana canchi. Shinapash ¿imashinata Taita Diosca ñucanchihuan parlan?

Ñucanchihuan parlangapaca Bibliatami Taita Diosca cushca (2 Timoteo 3:16, 17). Chaita intindingapaca pensaripashun. Shuj ali amigo cartata cachamujpica ¿nachu chai cartata liishpaca chai ali amigota uyajuj cuenda canman? Shinallata, Bibliata liishpami Taita Diosta uyajuj cuenda canchi. Chaimandami página 2​pi parlashca Ginaca nin: “Taita Diospa rijsi cangapaj munashpaca pai escribichishca Bibliatami liina cani. Bibliata cada punlla liishpami Taita Diosman ashtahuan quimirini” nishpa. ¿Quiquinbash Bibliataca cada punllachu liipangui? Bibliata cada punlla liishpaca Jehová Dios imata nijta uyashpami paiman ashtahuan quimiringui.