1. Huaquinbica ¿imatata tucuicunallata cuenta japishcanchi?

¿NACHU huaquinbica tucuicunallata imatapash chingachishpara ninanda faltachishcanchi? Charij taitamamacunahuan viñashca huahuacunapash cosascuna mashna valishcataca na cuenta japinllu. Cutin jovengunaca chaira causai callarijuimandami ima cosascuna ashtahuan importante cashcataca na ali yachan.

2, 3. a) Jovengunaca ¿imata rurangapata ninanda esforzarina capanguichi? b) Ñucanchiman saquishca ninan valishca herenciatashna alicachingapaca ¿imatata rurana capanchi?

² Chairalla viñajushpa o ña 20 huatacunata charishpaca pensaripai, ñucapaca ¿imata ashtahuan importante can? nishpa. Cai mundopi gentecunapaca culquita, jatun huasita charina, mushuj aparatocunata randinami ashtahuan importante can. Taita Diospa ñaupajpi ali ricurinaca na importantechu can. Ashtaca gentecunacarin Taita Diostaca yaritallapash na yarinllu. Chaimandami taitamamacuna yachachijpi Bibliata yachajushpa viñashca cashpaca chai yachajushcacunata shuj ninan valishca herenciatashna * alicachingapaj  esforzarina cangui (Mat. 5:3). Na tucui shunguhuan alicachishpaca canllatami jipamanga ashtaca llaquicunapi urmai ushangui.

³ Shinaca cangunaman saquishca ninan valishca herenciata alicachishpa ama llaqui apangapaca ¿imatata rurana cangui? Joven cashpa o mayorlla cashpapash ñucanchiman saquishca ninan valishca herenciatashna alicachingapaca Bibliapi huaquin ejemplocunatami yachajuna canchi. Shinaca Bibliapi huaquin ejemplocunata ricupashun.

4. Profeta Samuelpa churicunamanda parlashpaca ¿imatata 1 Samuel 8:1-5​pica nin?

⁴ Bibliapica ninmi, huaquin gentecunaca ninan valishca herenciatashna chasquishpapash na alicachircachu nishpa. Profeta Samuelpa churicuna ima pasashcata ricupashun. Profeta Samuelca uchilamandapachami Jehová Diosta sirvishpa viñarca. Tucuipimi Jehová Diostaca cazurca (1 Sam. 12:1-5). Shinapash profeta Samuelpa churicuna Joel, Abiasca paicunapa taitapa ali ejemplotaca na catircachu. Bibliapi nishca shinaca, paicunapa taita Samuel ali ali cajpipash churicunaca nalitalla rurashpami gentecunataca llaquichin carca (1 Samuel 8:1-5, liingui).

5, 6. Josiaspa churicunahuanbash nietohuanbash ¿imata pasarca?

⁵ Cunanga rey Josiaspa familia ima pasashcata ricupashun. Diospa mandashcacunata escribichishca librota shujcuna tarishpa, liishpa uyachijpica chai ratomi rey Josiasca maquihuan rurashca dioscunataca faquishpa tucuchirca. Brujeriata ruranacunatapash chai llactamanda anchuchishpami gentecunataca Taita Diosta cazuchun animarca (2 Rey. 22:8; 23:2, 3, 12-15, 24, 25). Shina rurashpami rey Josiasca shuj ninan valishca herenciatashna paipa huahuacunamanga saquirca. Paipa quimsa churicuna, shuj nietopash reycuna tucushpapash Josiaspa ali ejemplota alicachishcataca na ricuchircachu.

⁶ Josiaspa churi Jehoacazmi (Joacaz) Josiaspa jipaca mandai callarirca. Shinapash paica Mandaj Diospa ñaupajpi nali ricurishcatallami rurarca. Paica quimsa quillacunatallami mandarca. Ashtahuangarin Egiptomanda faraón preso japijpimi preso cashpallata huañurca (2 Rey. 23:31-34). Paipa jipaca Josiaspa chaishuj churi Jehoiaquimmi (Joacim) 11 huatacunata mandarca. Paipash rey Josías yachachishcataca na alicachircachu. Chaimandami profeta Jeremiasca nirca, Jehoiaquimdaca ‘burro huañushcata shitana utujupimi pambanajunga’ nishpa (Jer. 22:17-19). Chai jipaca Josiaspa churi Sedequías, Josiaspa nieto Joaquinmi mandanajurca. Paicunapashmi nali reycuna carca. Josiaspa ali ejemplotaca na catinajurcachu (2 Rey. 24:8, 9, 18, 19).

7, 8. a) Salomonga ¿imashinata rey Davidpa ejemplota na catishcata ricuchirca? b) Huaquingunaca ninan valishca herenciatashna chasquishpapash na alicachircachu. Paicunapa nali ejemplomandaca ¿imatata yachajupanchi?

⁷ Rey Salomón ima pasashcatapash ricupashun. Salomonba taita Davidca Jehová Diostaca tucui shunguhuanmi juyan carca. Chai ali ejemplota shuj ninan valishca herenciatashna chasquishpapash rey Salomonga taitapa ejemplotaca na catircachu. Bibliapica ninmi: ‘Salomón ña rucu cajpica [paipa] huarmicunami shuj dioscunata catichun paipa shungutaca pandachirca. Paipa taita David tucui shunguhuan Taita Diosta cazushcashnaca na cazurcachu’ nishpa (1 Rey. 11:4). Chaimandami Salomonga Jehová Diospa ñaupajpica ñana ali ricurirca.

⁸ Samuelpa churicunapash, Josiaspa churicunapash, nietopash, Davidpa churi Salomonbash Jehová Diosta juyana, cazuna oportunidadtami charirca. Shinapash paicunaca na aprovecharcachu. Paicuna ninan valishca herenciatashna chasquishpa na alicachijpipash,  Bibliapica ali jovengunapa ejemplotapashmi parlan. Paicunaca cunanbi ashtaca jovengunashmi ninan valishca herenciatashna chasquishcamandaca ninanda alicachishca. Shinaca cunan punllacunapi jovengunapash paicunapa ejemplota catichunga huaquin ali ejemplota ricupashun.

9. Noepa churicunaca ¿imashinata shuj ali ejemplota saquishca? (Callari dibujota ricupangui.)

⁹ Noepa churicunaca shuj ali ejemplotami saquirca. Jehová Diosca Noemanga arcata rurapangui nishpami mandarca. Chaimandami Noepa churicunaca Jehová Diosta cazunami cashcanchi nishpa Noetaca arcata rurashpa ayudarca. Shina rurashpami Jatun Manllanai Tamia shamujpica arca ucuman yaicurca (Gén. 7:1, 7). Génesis 7:3​pi nishca shinacarin, ‘ima animalcuna cajpipash paipuralla mirashpa cai pachapi causanajuchunmi’ arca ucuman churarca. Ashtahuangarin Noepa ali ejemplota ninan valishca herenciatashna chasquimandami, Noepa churicunaca gentecuna cai Alpamanda ama chingarichun ayudana bendicionda charirca. Shinallata paicunaca Jehová Diosta cutin cai Alpapi ali adorachunmi ayudarca (Gén. 8:20; 9:18, 19).

10. Chuscu hebreo huambragucunaca ¿imashinata taitamamacunapa yachachishcacunata shuj valishca herenciatashna chasquishcata ricuchirca?

¹⁰ Ashtaca huatacuna jipaca Hananías, Misael, Azarías, Daniel shuti hebreo huambragucunami shuj ali ejemplota saquirca. Paicunataca Jesús shamungapaj 617 huatacuna faltajuj punllacunapimi Babiloniaman preso aparca. Paicunaca ali ñavi, ali pensanata yachajcunami carca. Munashpaca Babiloniapa costumbrecunatapash catinallami carca. Shinapash paicunaca, taitamamacunapa yachachishcacunata shuj valishca herenciatashna chasquimandami Babiloniapa costumbrecunataca na catirca. Chaita ricushpami Jehová Diospash paicunata bendiciarca (Daniel 1:8, 11-15, 20, liingui).

11. Jehová Diospa yachachishcacunata shuj ninan valishca herenciatashna Jesús chasquishpaca ¿imashinata shuj gentecunatapash ayudarca?

¹¹ Jesuspash shuj ali ejemplotami saquirca. Paica ashtaca cosascunatami Jehová Diosmanda yachajurca. Chai yachajushcacunataca shuj ninan valishca herenciatashnami ricurca. Chaimandami Jesusca nirca. “Ñuca Taita yachachishca shimicunatallami villajuni” nishpa (Juan 8:28). Jesusca pai yachajushcacunata shujcunapash yachajushpa ali causachun munashpami nirca: ‘Taita Dios mandajujmanda ali villaitaca, shuj pueblocunapipash villanapachami cani. Shina villachunmi ñucataca cachamuhuarca’ nishpa (Luc. 4:18, 43). Ashtahuangarin Taita Diospa yachachishcacunata gentecuna na alicachijpimi Jesusca paita uyaj gentecunamanga ‘na cai pachapajta rurashpa causanata’ yachachirca (Juan 15:19).

12. a) ¿Imashinata ashtaca jovengunaca ñaupa punllacunapi Timoteoshna can? b) Jesusta catij jovengunaca ¿maijan tapuicunapita pensarina capanguichi?

¹² Jovenguna, cangunapa taitamacuna Jehová Diosmanda yachachishpa viñachishcajpica shuj ninan valishca herenciatashnami chasquishcanguichi. Cangunaca Bibliapi parlajuj Timoteoshnami canguichi (2 Timoteo 3:14-17, liipangui). Taitamamacunami Jehová Diosmandapash paita imashina cushichinatapash yachachirianga. Ashtahuangarin, taitamamacunami ‘Cristo Jesusta crishcamanda quishpiringapaj, alipacha yachaitapash charichun’, Taita Diosta sirvingapaj ‘alipacha alichirishca cachunbash’ ayudarianga. Shinaca pensaripai: “¿Ñucaca taitamamacunapa yachachishcacunataca shuj valishca herenciatashnachu ricujuni?” nishpa. Ashtahuangarin pensaripai: “Ñaupa punllacunapi Jehová Diosta sirvijcunashna cashcamandaca  ¿imashinata sintirini? Testigo de Jehová cashcamandaca ¿alichu sintirini? Bibliapa yachachishcata ali intindi ushashcamandaca ¿cushijushcachu cani? nishpa”.

13, 14. a) Huaquin jovengunaca ¿ima tentaciondata charin? b) ¿Imamandata jovengunaca mundota alicachina tentaciondaca mishai ushan? Shuj ejemplota nipai.

¹³ Huaquin jovengunaca Jehová Diosmanda yachajushpa viñashca cashpapash Jehová Diospa organizacionbi cana alipacha cashcataca na cuenta japi ushanllu. Chaimandami paicunaca mundopa ruraicunata alicachishpa ricun. Shinapash pensaripai. Shuj jatun carro apurado shamujpica ¿carro huactashpaca ciertopachacha nanachin, o ciertopachacha huañuchin nishpa carro ñaupajpi shayaringuimanllu? Na shina ruranguimanllu. Imashinami carro ñaupajpi shayarinaca na ali canman, shinallatami cai mundopi ruraicuna ñucanchita llaquichijta yachangapaca na cai mundopi chapurina canchi (2 Ped. 2:20).

¹⁴ Asia llactamanda Gener shuti huambraguca Testigo taitamamacunahuanmi viñarca. Paica 12 huatacunata charishpallatami bautizarirca. Shinapash ashaguta viñarishpaca cai mundopi ruraicunatami alicachi callarirca. 15 huatacunata charishpacarin congregación ucupi alita rurajshnalla cashpapash canllamanga nali cumbacunapa chaquita catishpami nali shimicunata parlashpa, ufiashpa puri callarirca. Ashtahuangarin computadorapi nali pugllaicunata pugllashpa, billarcunata pugllangapaj rishpami huasimanga tutapipacha chayan carian. Paica ninmi: “Ñuca munashcata rurashpapash na cushilla sintirircanichu. Imapash faltajuj cuendami sintirircani” nishpa. Paipaca congregacionman tigrashpapash mundopi cosascunata ladoman saquinaca shinllipachami carca. Shinapash Jehová Diospa bendiciongunapi pensarijunami mundota alicachina tentacionda mishachun ayudarca.

15. Taitamamacuna na Testigo cajpipash ¿ima bendiciongunapita jovengunaca pensarina can?

¹⁵ Jovenguna, cangunapa taitamamacuna na Testigo cajpipash Jehová Diosta rijsina, paita sirvina bendiciondami charinguichi. Pensaripaichi. Cai mundopi ashtaca millón gentecuna tiajpipash cangunatami Jehová Diosca paipa organizacionman apamushca, Bibliatapash aliguta intindichishca (Juan 6:44, 45). Chai bendiciongunapi pensarinaca ¿nachu ñucanchitaca cushijushca cachun ayudan? (1 Corintios 2:12, liingui.) Gener shuti huauquiguca ninbashmi: “Jehová Dios tucuita ruraj Dios cashpapash ñucata llaquishpa ricujta yarishpaca ninandami  cushijuni” nishpa (Sal. 8:4). Asia llactamandallata panigupash ninmi: “Shuj profesor ñucanchi shutita yarijpillatami imapash importante cashcashna sintirinchi. Jehová Dios ñucanchi shutita yarijpicarin imapash ashtahuan importantepacha cashcashnami sintirinchi” nishpa.

16. Jovengunaca ¿imatata rurana capanguichi?

¹⁶ Jovenguna, ashaguta pensaripaichi, cangunaca shuj ninan valishca herenciatashnami chasquishcanguichi. Chaimandami Jehová Diosta sirvinata pensana capanguichi. Mundopi jovengunashna paicunapa causaita na aprovechashpa causanapa randica, ñaupa punllacunapi Jehová Diosta ali sirvijcunapa ejemplota catingapami munana capangui (2 Cor. 4:3, 4).

17-19. Shinlli cajpipash na cai mundopi gentecunashna cangapaca ¿imatata jovengunaca rurana capanguichi?

¹⁷ Shinlli cajpipash cai mundopi gentecunashnaca na canachu capanguichi. ¿Imamandata shina ninchi? Shuj ejemplota ricupashun. Juegos Olímpicos nishcapi participajcunaca na paicunapa cumbacunashnachu can. Chaimandami shinlli cajpipash shuj cosascunamanda tiempota llujchishpa aliguta entrenashpa Juegos Olímpicos nishcapi participai ushan.

¹⁸ Ashtaca gentecunaca ima llaquicuna tianata na pensarishpami nalicunata ruranlla. Shinapash Jehovata sirvij jovengunaca ima pasanataca aligutami pensarina canguichi. Shinallata na cai mundopi gentecunashnachu cana canguichi. Ashtahuangarin, Jehová Diospa ñaupajpi ali ricurishpa catingapaj munashpaca juchamanda caruyanami canguichi. Cai cosascunata pactachishpallami ‘causaita causanataca japinguichi’ (1 Tim. 6:19). Párrafo 15​pi paniguca ninmi: “Ñucanchi crishcacunamanda aliguta parlashpami ali sintirinchi, na cai mundopi gentecunashna cangapajpash fuerzata charinchi. Alita rurajpica Jehová Dios ñucata alicachishpa ricujujtami sintini. Tucui chaicunapi pensarishpami shuj gentecunapa chaquita catina nali cashcata cuenta japishcani”.

¹⁹ Cunan punllacunapi ashtahuan charinapilla ocuparijunapa randica aligutami tiempotaca aprovechana cangui (Ecl. 9:2, 10). Gentecunata Taita Dios imapa rurashcata intindina, shamuj punllacunapi Taita Dios ali causaita caranata intindinami ali decisiongunata rurachun, shuj gentecunashna ama ‘causachunbash’ ayudanga. Jehová Diosta sirvinata agllashpaca pai munashcashnami causai ushangui (Efes. 4:17; Mal. 3:18).

20, 21. a) Ali decisiongunata ruranaca ¿imashinata ayudan? b) Joven cashpa o mayorllacuna cashpapash ¿imatata tucuicunallata rurana capanchi?

²⁰ Ali decisiongunata rurashpaca, cunanbillata ali causashpami shamuj punllacunapipash paraíso Alpagupi na huañushpa causai ushashun. Chai punllacunapica ashtaca ashtaca bendiciongunatami charishun (Mat. 5:5; 19:29; 25:34). Shinapash chai bendiciongunata charingapaca Jehová Diostami cazuna canchi (1 Juan 5:3, 4, liingui). Cunanmandallata Jehová Diosta cazungapaj esforzarinaca alipachami can.

²¹ Aliguta pensarishpaca, tucuicunami Diospa Shimita yachajushpa Taita Diosta ali rijsi ushashcanchi, paipa munaitapash alimi yachanchi. Testigo de Jehovacuna caimandacarin, paipa shutita apana bendiciondami charinchi. Ashtahuangarin, Jehová Diosca nishcami, cangunataca ayudashami nishpa (Sal. 118:7). Shinaca, jovenguna cashpa o mayorllacuna cashpapash tucuicunallatami ninan valishca herenciatashna chasquishcataca alicachina canchi. Ashtahuangarin, Jehová Diostaca ‘causaita causaimanmi ninanda alicachina’ canchi (Rom. 11:33-36; Sal. 33:12).