Bibliapica ninmi, Jehová Diosca paipa Churi Jesushuanmi ‘Diablo imata rurajujta tucuchishpa’ tucui llaquicunataca anchuchinga nishpa (1 Juan 3:8). Cunan punllacunapica charishpapash ashtahuan ansiarishcamanda, shujcunata millanayachishcamanda, nali ruraicunamandami ashtaca llaquicuna tian. Shinapash chaicunaca tucuringami. Jesusca ninmi: “Cai pachapajtalla rurachishpa mandajca, cunanmi shitai tucunga” nishpa (Juan 12:31). Diablo pitapash ñana pandachijpimi cai Alpapica tranquilo ali causai tianga (2 Pedro 3:13).

Cutin na cazungapaj munashpa nalita ruraj gentecunaca ¿imata pasanga? Bibliapica ninmi, alita rurajcunami cai Alpapica causanga. Cutin, ‘Diosta na manllajcunaca anchuchi tucungami, sapimanda llujchinshnami shitai tucunga’ nishpa (Proverbios 2:21, 22). Shinaca nalita yachachij gentecunaca shujllapash na tiangachu. Chashna ali Alpagupimi Taita Diosta cazuj gentecunaca cushilla causanga. Juchapash asha ashami paicunamandaca chingarishpa catinga (Romanos 6:17, 18; 8:21).

Paipa munaita pactachingapaca ¿imatata Taita Diosca ruranga? Robot máquina cuenda cachunllu ruranga? Na shinachu canga. Taita Diosca paipa mandashcacunata yachachishpami nali pensamientocunata, nali ruraicunata cungachun ayudanga.

Taita Diosca paipa Churi Jesustami Rey cachun churashca. Jesusca tucuilla ungushcacunatami jambinga (Mateo 14:14). Terremotocuna, jatun acapanacuna tiachunga na saquingachu (Marcos 4:35-41). Shinallata, ‘ima punlla ima tucunata na yachaimanda’ gentecuna llaquicunapi cachunga na saquingachu (Eclesiastés 9:12). Jesús mandajujpica ima llaquicunapash gentecunataca na llaquichingachu (Proverbios 1:33).

Cunangamanga ashtaca millón gentecunami llaquinaita huañushca. Jesusca paipa amigo Lazarota causachigrijushpaca nircami: “Ñucami causachijpash, causaita causagrinata carajpash cani” nishpa (Juan 11:25). Shinaca huañushcacunatapashmi Jesusca causachinga.

Ima llaquipash illaj, ali causangapaj munashpaca Bibliatami yachajuna capangui. Bibliapimi Taita Diosmanda, pai imata ruranatapash yachajui ushapangui. Yachajungapaj munajpica quiquinba llactamanda testigo de Jehovacunaca cushijushpami ayudanga. Bibliata yachajungapaj munashpaca testigo de Jehovacunahuan parlanallami capangui, na cashpaca cai revistata escribijcunamanbash escribinallami capangui.