1, 2. a) ¿Ima cazamiento tiajpita jahua cielopi causajcunaca ninanda cushijunajunga? b) ¿Ima tapuicunatata yachajugripanchi?

CAZAMIENTOPA seguraringapaca siempremi ashtaca tiempo minishtirin. Shinapash ñallami shuj jatun cazamiento tiagrin. Chai cazamientopaca casi 2 mil huatacunatami segurarinajushca. Ñallami jahua cielopi Reypa huasipi causajcunaca ninanda cushijushpa cashna candanajunga: ‘¡Mandaj Diosta alicachinguichi! ¡Tucui Ushaita Charij, ñucanchi Taita Diosmi tucuita mandajun! Ninandapacha cushijushpa paitaca ninanda alicachishunchi. Llamahuan cazarana bodami ña chayamushca. Paipa huarmipash ña’ segurarishcallami can nishpa (Apoc. 19:​6, 7).

² Jahua cielopi cazarajuj Llamaguca Jesusmi can (Juan 1:29). Shinapash Jesusca ¿ima ropatata churajuriajun? Paipa noviaca ¿pita can? Noviaca ¿imashinata cazarangapaca segurarijushca? ¿Ima horata cazaranga? Cielopi causajcuna cushijunajujpica ¿cai Alpapi unai unaicaman causana esperanzata charijcunapash cushijungachu? Cai tapuicunata yachajungapaca Salmo 45ta ricupashun.

3, 4. a) Noviopa ropaca ¿imashinata can? b) ¿Imamandata Novioca ninanda cushijun? c) ¿Picunatata jatun madajcunapa ushicuna, jatun mandaj huarmi nin?

³ (Salmo 45:​8, 9, liingui.) Novio caimandami Jesusca alipacha ropata churajushca can. Paipa ropaca punda tiempo Israel llactapi mishquilla ashnajuj mirra o casia nishca ashtahuan ali jambicunata o perfumecunata churashca cuendami can (Éx. 30:​23-25).

⁴ Reypa huasipi shuj juyailla musicaguta uyashpami Novioca pai cazarana horas ña chayamujta yachashpa ninanda cushijun. Jatun mandaj huarmi o jahua cielopi Jehovapa organizacionbash ninandami cushijun. Shinapash chai organizacionbica ¿picunallata can? Chai organizacionbica ‘jatun mandajcunapa ushicuna’ o angelcunami can. Jahua cielopica ninanda cushijushpami paicunaca cashna candanajun: ‘Ninandapacha cushijushpa paitaca ninanda alicachishunchi. Llamahuan cazarana bodaca ñami chayamushca’ nishpa.

5. Noviaca ¿pita can?

⁵ Imashinami ña yachajupashcanchi Novioca Jesusmi can. Shinapash noviaca ¿pita can? Noviaca na shujllachu can. Jesús ricuriajuj congregacionmanda 144 mil ungidocunami can (Efesios 5:​23, 24, liingui). Paicunami Jesushuan jahua cielopi mandanga (Luc. 12:32). Cai 144 mil ungidocunaca ‘llama maita rijpipash paita catishpami purin’ (Apoc. 14:​1-4). ‘Llamahuan cazarashpami’ jahua cieloman paihuan causangapaj rin (Apoc. 21:9; Juan 14:​2, 3).

6. a) Ungidocunataca ¿imamandata jatun mandaj reypa ushi nin? b) Paicunataca ¿imamandata canba llactata cungailla nin?

⁶ (Salmo 45:​10, liingui.) Cazaragrijuj noviaca jatun mandaj reypa ushi cuendami arreglarishca can (Sal. 45:13). Shinapash jatun mandaj reyca ¿pita can? Reyca Jehová Diosmi can. Jehová Diosmi ungidocunataca paipa huahuacunata cuenda chasquin (Rom. 8:​15-17). Ungidocuna jahua cielopi novia tucuna cajpimi paicunataca nin: ‘Canba llactapuracunata, canba taitapa huasi ucupuratapash cungailla’ nishpa. Paicunaca ‘cai pachapi ima tiajtapash na yarishpami jahua pachapi tiajtalla yarishpa causana can’ (Col. 3:​1-4).

7. a) Jesusca ¿imashinata paipa noviataca ashtaca ashtaca tiempota segurachijushca? b) Noviopa ñavipi ali ricurishpaca ¿imatata noviaca ruran?

⁷ (Salmo 45:​11, liingui.) Jesusca ashtaca ashtaca huatacunatami jahua cielopi paihuan cazarachunga paipa noviata aliguta segurachijushca. Apóstol Pabloca nircami, paipa catijcunata juyashpami ‘Cristoca paillata japi tucushpa huañurca. Diospa Shimihuanbash yacuhuanbash armachishpa cuendami, Diospalla causanajuchun, mapa illajta rurashpa’ Cristoca paita catijcunamanda huañurca. ‘Ama mapayashpa, llambu llambu, ima nalipash illaj, paipalla causashpa juyaillagu paipa ñaupajpi ricurichunmi chashna huañurca’ nishpa (Efes. 5:​25-27). Punda tiempopi Corinto llactamanda ungido huauquicunataca apóstol Pabloca nircami: ‘Taita Diosca cangunata ninandapacha juyashpami paipalla causachun munan. Shinallatami ñucapash paipalla causachun munani. Jarihuan nara tacarishca cuitsata, shujlla cusahuan cazarachinshnami cangunataca, Cristoman pushangapaj munani’ nishpa (2 Cor. 11:2). Rey Jesusca paipa novia Taita Diosta aliguta catijujpimi paitaca juyaillaguta ricun. Noviapash Jesús paipa cusa tucuna cajpimi ‘jatun mandajpa’ ñaupajpishna ‘cumurin’.

8. ¿Imamandata nin, noviaca punchapambata churajushcami ricurin nishpa?

⁸ (Salmo 45:​13, 14, liingui.) Noviaca rey  Jesushuan cazaragrijushcamandami ‘punchapambata’ churajun. Apocalipsis 21:2​pica ninmi, noviaca Mushuj Jerusalenshnami can. ‘Cusata cazarangapaj juyaillaguta’ arreglarishcami can nishpa. Cai Mushuj Jerusalén llactaca “Taita Dios punchapambagu cajpimi” ‘ninan juyailla rumishna, jaspe nishca rumishna, punchapamba espejoshna’ brillajunga (Apoc. 21:​10, 11). Mushuj Jerusalén juyaillagu cashcataca Apocalipsis libropimi intindichijun (Apoc. 21:​18-21). Jahua cielopi cazarana cashpami noviaca punchapambagupacha ricurin.

9. a) Noviataca ¿pita chasquin? b) Noviaca ¿imashina churajushcata can?

⁹ Diospa Reinopi mandana Rey Jesusmi noviataca chasquin. Rey Jesusca ‘Diospa Shimihuanbash, yacuhuanbash armachishpa cuendami, Diospalla causanajuchun, mapa illajta rurashpa noviataca segurachijushca (Efes. 5:26, 27). Rey cazaragrijushcamandami noviaca ‘oro puchahuan ahuashca, bordashca churajunahuan’ can. Ashtahuangarin ‘Diospalla causajcuna [alita] rurashpa causajushcamandami juyailla linota rurashca, punchapamba yuraj churajunahuan can’ nin (Apoc. 19:8).

10. Rey Jesuspa cazarana bodaca ¿ima horata canga?

¹⁰ (Apocalipsis 19:​7, liingui.) Noviaca ¿ima horata noviohuan cazaranga? Cazarangapaj novia segurarijushca cajpipash Apocalipsis 19:​11-21 textocunapica na cazamientomandachu parlan. Jatun Manllanai Llaqui Punllacuna tucurijujpi ima pasanatami parlan. Shinapash Apocalipsis libropica cati cati ima pasashpa rinataca na villajunllu. Salmo 45pi nishca shinaca, Rey Jesús espadata cinturaspi huatarishpa mishashca jipami cazarana horasca chayanga (Sal. 45:​3, 4).

11. Rey Jesusca ¿imashinata contracunata mishanga?

¹¹ Shinapash ¿imashinata Rey Jesusca contracunata mishanga? Primeroca ‘huainayaj huarmita’ o Babilonia shuti Jatun Pueblo nishca tucui panda religiongunatami tucuchinga (Apoc. 17:​1, 5, 16, 17; 19:​1, 2). Chai jipaca ‘Tucui Ushaita Charij Taita Dios ninanda llaquichimui punllapi’ o Armagedonbimi Jesusca Diablopa tucuilla nali mundota tucuchinga (Apoc. 16:​14-16; 19:​19-21). Ultimopica Diablotapash paipa demoniocunatapash tucui poderta quichushpami manllanai ucu ucu utujuman shitanga. Chaipica Diablopash demoniocunapash huañushcashnami canga (Apoc. 20:​1-3).

12, 13. a) Jesuspa ‘cazarana bodaca’ ima horata canga? b) Novio cazarajpica ¿picunata jahua cielopica cushijunga?

¹² Jesusta ali catij ungidocuna huañushpaca tucurimui punllacunapimi jahua cielopi causangapaj causaringa. Jesusca Babilonia shuti Jatun Pueblo tucuchi tucushca jipami 144 mil ungidocunataca tucuillata jahua cielopi paihuan mandachun tandachinga (1 Tes. 4:​16, 17). Ungidocunaca Armagedón nara callarijpillatami jahua cielopi canga. Armagedón tucurishca jipami Noviohuan cazarana bodaca chayamunga. Apocalipsis 19:9​pi nishca shinaca, “Llamahuan cazarai bodapi micungapaj cayashcacunaca, ninandami cushijunga”. Tucuilla 144 mil ungidocuna paihuan cajpica Novioca ninandami cushijunga (Luc. 22:​18, 28-30). Shinapash ¿Noviohuan noviahuanllachu cushijunga?

¹³ Imashinami ña yachajurcanchi, jahua cielopica ashtaca angelcunami tucuilla tandanajushpa cashna candanajunga: ‘Ninandapacha cushijushpa, paitaca ninanda alicachishunchi. Llamahuan cazarana bodaca ñami chayamushca. Paipa huarmipash’ ña arreglarishcami can nishpa (Apoc. 19:​6, 7). Cutin cai Alpapi causana esperanzata charijcunaca  ¿imata tucunga? ¿Paicunapash cushijungachu?

14. Salmo 45​pi ‘jarihuan nara tacarishca cuitsagucunaca’ ¿picunata can?

¹⁴ (Salmo 45:​12, 14, 15, liingui). Profeta Zacariasca nircami, tucurimui punllacunapica tucui llactacunamanda gentecunami ninanda agradicishpa Taita Diospa Israelhuan tandanajunga nishpa. Zacarías 8:23​pica ninmi: ‘Chai punllacunapica cashnami tucunga: Shuj llactacunamanda shuj shuj rimaita rimaj chunga runacunami, Judá llactamanda runapa jahualla churajushcapi charirishpa, cashna ninajunga: “Ñucanchipashmi cangunahuan ringapaj munapanchi. Taita Diosca cangunahuan cajtami yachapanchi”’ nishpa. Salmo 45:12​pica chai chunga runacunatami ‘Tiro shuti pueblopi causajcuna’, ‘ninan charij gentecuna’ nin. Paicunaca Taita Diospa ñaupajpi ali ricuringapaj munashpami puchushca ungidocunapamanga regalocunata apashca cuenda chayanajun. 1935 huatamandami ashtaca millón gentecunaca puchushca ungidocunapa ayudata chasquishpa alita ruranata yachajunajushca (Dan. 12:3). Ungidocunapa cumbacuna o noviata cumbajcunaca Taita Diosta cazushpa, limpio aliguta causashpami Taita Diospa ñaupajpica jarihuan nara tacarishca cuitsagucuna cuenda can. Noviata o ungidocunata cumbanajuj cuitsagucunaca Jehovaman mingarishpami Novio Jesustaca tucuipi cazunajushca.

15. ‘Jarihuan nara tacarishca cuitsagucunaca’ ¿imashinata puchushca ungidocunataca ayudanajushca?

¹⁵ Puchushca ungidocunaca ‘jarihuan nara tacarishca cuitsagucuna’ ‘ali villaicunata’ tucui  llactacunapi villachishpa ayudanajujpimi ninanda cushijun (Mat. 24:14). Taita Diospa espiritupash, Jesuspa noviapash, uyajcunapashmi ‘shamupaichilla’ nishpa invitanajushca (Apoc. 22:17). Shinaca ungidocuna ‘shamupaichi’ nishpa invitanajujpimi ‘shuj llamagucuna’ nishca huauquipanicunapash shuj gentecunataca ‘shamuichi’ nishpa invitanajushca (Juan 10:16).

16. Jehová Diosca ¿ima jatun bendiciondata shuj llamagucuna nishcacunamanga cushca?

¹⁶ Puchushca ungidocunaca ‘shuj llamagucuna’ nishca huauquipanicunataca ninandami juyan. Paicunatapashmi Noviopa Taita Jehová Diosca cazamientopi cushijuchun invitashca. Chaita yachashpaca puchushca ungidocunaca cushijushcacunami can. Noviata cumbajcuna o jarihuan nara tacarishca cuitsagucunaca jatun mandaj reypa huasiman o Taita Diosta aliguta adorana arreglomanmi yaicunga. Shinami noviata cumbajcuna o unai unaicaman cai Alpapi causana esperanzata charijcunaca, Novio jahua cielopi cazaraj horasca cielopi causajujcunahuan cushijunga. Apocalipsis libropica “ashtaca gente” nishcacunataca tronopi ‘tiajujpa ñaupajpi, Llamapa ñaupajpimi shayaringa nin. Paicunaca Jehová Diosta aliguta sirvishpami Taita Diospa huasi patiopi shayaringa nin. Taita Diospa huasi patioca Alpapimi can (Apoc. 7:​9, 15).

17, 18. a) Noviopa cazarai boda tiashcamandaca ¿imatata Novioca ruranga? b) Huaranga huatacunata mandashpaca Jesusca ¿picunapa Taitata tucunga?

¹⁷ (Salmo 45:​16, liingui.) Noviata cumbajcunaca Noviopa cazarana boda jahua cielopi tiajpimi ashtaca bendiciongunata ricunga. Primeroca, Novio o Rey Jesusca ñaupa tiempo ‘taitacunata’ causachishpami paicunataca cai Alpapi ‘churicuna’ cachun chasquinga (Juan 5:​25-29; Heb. 11:35). Chai punllacunapica chai causarishcacunapuramanda agllashpami cai Alpata cuidashpa mandajcunata churanga. Cunan punllacunapi Jehová Diosta cazuj ancianocunapuramandapashmi chai punllacunapi cai Alpata cuidashpa mandachun churanga (Is. 32:1).

¹⁸ Jesusca huaranga huatacunata mandashpami shujcunapapash Taita tucunga. Chai punllacunapimi Jesús paipa causaita cushcapi feta churajcunaca unai unaicaman causana bendicionda chasquinga (Juan 3:16). Gentecunaman unai unaicaman causaita cui ushashcamandami Jesusca ima horapash na tucurina ñucanchi Taita tucunga (Is. 9:​6, 7, NM).

19, 20. ¿Imamandata Jesusta catijcunaca tucuicunallata Salmo 45manda yachajuna capanchi?

¹⁹ (Salmo 45:​1, 17, liingui.) Imashinami ricupanchi, Jesusta catijcunaca tucuillacunami Salmo 45manda yachajuna capashcanchi. Cai Alpapi puchushca ungidocunaca paipa huauquicunahuan, shinallata Noviohuan jahua cielopi tandanajungapami cushijushpa shuyanajun. Cutin ‘shuj llamagucuna’ nishca huauquipanicunaca Rey Jesusta cazushpami cai Alpapi puchushca ungidocunatapash cushijushpa ayudanajun. Jahua cielopi cazamiento tiashca jipaca Jesuspash paipa cumba reycunapash cai Alpapi causanajuj gentecunamanga ashtaca ashtaca bendiciongunatami caramunga (Apoc. 7:17; 21:​1-4).

²⁰ Profeciacunapi nishca shinaca, Rey Jesús imata ruranata yachajushpami paipa shutita shujcunaman villachingapaj munanchi. Shinaca Rey Jesustaca unai unaicaman alicachishunchi.