1, 2. Jehová Diosca ¿imamandata llamagucunata michijcunahuan chimbapurarin?

JEHOVÁ DIOSCA paita aliguta rijsichun munashpami nirca, ñucaca llamagucunata michij cuendami cani nishpa (Ezeq. 34:​11-14). Michijcunaca llamagucunata juyashpami, ama imapash pasachun ricurianajun. Verdella jihua tiaj pushtucunaman, yacu tiaj pushtucunamanmi apan (Sal. 23:​1, 2); tutapash punllapash cuidanajunllami (Luc. 2:8); lobocuna ama micuchunbash cuidarianajunmi (1 Sam. 17:​34, 35); huahua llamagucunatapash marcashpami apanajun (Is. 40:11). Ashtahuangarin, chingashca llamagucunataca mascangapajmi rin, chugrishca llamagucunatapash jambichinmi (Ezeq. 34:16).

² Israelitacunaca tarpushpa, llamacunata michishpa causaimandami Jehovapa chimbapuraitaca aliguta intindirca. Llamagucunaca cuidachun, ricuriachunmi minishtin. Espiritualmente parlashpaca gentecunapash llamagucuna cuendami can (Mar. 6:34). Nali cuidajpi, na yachachijpica ‘michij illaj llamagucunashna’ llaquilla sintirishpami caruyai callarin (1 Rey. 22:17). Shinapash Jehová Diosca paipa sirvijcunataca llaquishpami cuidariajun.

3. Cai temapica ¿ima tapuicunatata yachajupashun?

³ Llamagucunata michijcuna cuendami cani nijpimi Jehová Diostaca cunan punllacunapipash aliguta rijsi ushanchi. Ñucanchicunapash llamagucuna cuendami canchi. Chaimandami Jehová Diosca ñucanchitapash cuidariajun. Shinaca ¿imashinata Jehová Diosca maijan ñanda rinata ricuchijun? ¿Imashinata ñucanchicuna minishtishcacunata caramujun? Jehová Dios llaquishpa cuidashcamandaca ¿imatata rurana canchi? Cai tapuicunataca cai temapimi yachajupashun.

4. Jesusca ¿imashinata Jehová Diospa llamagucunataca cuidan?

⁴ Jehová Diosca Jesustami congregaciongunata umashna mandachun churashca (Efes. 1:​22, 23). Jesusca paipa Taitashnallatami ‘aliguta michij’ can. Llamagucunataca juyashpa, llaquishpami cuidariajun. Ashtahuangarin ‘aliguta michij cashpami’ Jesusca paipa ‘llamagucunamanda huañurca’ (Juan 10:​11, 15). Jesús huañushcamandami ashtaca bendiciongunata charinchi (Mat. 20:28). Jehová Diosca tucuicuna Jesuspi ‘crishpa na chingaita chingagrichun causaita causagrichunmi’ munan (Juan 3:16).

5, 6. a) Llamagucunata cuidachunga ¿pitata Jesusca churashca? b) Jesús churashca michijcuna aliguta cuidachunga ¿imatata huauquipanicunaca rurana can? c) ¿Imamandata ancianocunataca cazunapacha capanchi?

⁵ Diosta sirvijcunaca ¿imashinata Jesús paicunata michijushcata ricuchin? Jesusca nircami: “Ñucapa llamagucunaca ñuca rimajta uyanmi. Ñucapash paicunata rijsinimi” nishpa (Juan 10:27). Aliguta michij Jesuspa shimita uyashpaca tucuipi cazushpami pai churashca michijcunataca apoyana can. Jesusca nircami, paipa catijcuna, apostolcunaca paipa chaquita catishpami paipa ‘llamagucunataca’ yachachinga, ricurianga nishpa (Mat. 28:20; Juan 21:​15-17, liingui). Ali villaicunata ashtahuan villachijpica Jesusta catijcunapash mirarcami. Chaimandami Jesusca congregacionda ñaupajman pushaj huauquicunata churarca (Efes. 4:​11, 12).

⁶ Éfeso congregacionda ñaupajman pushaj huauquicunataca apóstol Pabloca nircami: ‘Tandanajushca llamagucunata michinshna cuidachunmi, Diospa jucha illaj espirituca cangunata churashca’ nishpa (Hech. 20:28). Cunan punllacunapipash Bibliapi requisitocunata pactachijpimi congregacionda ñaupajman pushachunga ancianocunata churashca. Paicunata cazushpami Jehovatapash Jesustapash respetashcata ricuchinchi. Paicunami Ashtahuan Jatun Michijcuna can (Luc. 10:16). Shinaca Jehovata Jesusta respetangapaj munashcamandami ancianocunataca cazunapacha cashcanchi. Shinapash na chaimandallachu cazuna canchi. Huaquin yuyaicunatapash ricupashunchi.

7. Ancianocunaca ¿imashinata quiquindaca Jehová Diospa ñaupajpi ali ricurishpa catichun ayudan?

⁷ Ancianocunaca Bibliapi consejocunahuanmi huauquipanicunataca ali ñanda agllachun ayudan. Paicunaca cashna, chashnami rurana canguichi nishpaca na mandanajunllu (2 Cor. 1:24). Ashtahuangarin huauquipanicuna ali decisionda agllashpa congregacionbi tucuicuna tranquilo, ali causachunmi Bibliahuan ayudanajun (1 Cor. 14:​33, 40, NM). Ancianocunaca tucuilla huauquipanicuna Jehová Diospa ñaupajpi ali ricurishpa catichun munashpami paicunamandaca ‘na puñunshna causanajun’. Chaimandami maijanbash huauqui o pani pandarijujpi o ‘nalita rurajujpica’ paicunata ayudangapaj listo can (Gál. 6:​1, 2; Jud. 22). ¿Nachu ñucanchicunata shina cuidanajushcamandaca ancianocunata ‘cazushpa causana’ cashcanchi? (Hebreos 13:​17, liingui.)

8. Ancianocunaca ¿imashinata Jehová Diospa llamagucunataca ricurianajun?

⁸ Apóstol Pablopash llamagucunata michijcuna cuenda cashpami Colosas llactamanda huauquicunamanga cashna nishpa escribirca: ‘Pipash cangunata pactarallapash aliguta yachajunami nij tucushpara, yanga parlocunatalla parlashpa pandachinman. Paicunaca Cristomanda na yachachishpami, runacuna yachachishpa saquishcata, cai pachapajtalla cutin cutin yachashcata yachachinajun’ nishpa (Col. 2:8). Imashinami cai textopi ricupanchi, ñucanchita pipash  ama pandachichunmi ancianocunaca ñucanchita difindishpa ricurianajun. Chaimandami ancianocuna Bibliahuan consejajpica paicunata cazuna canchi. Apóstol Pedropash advirtircami, “llullashpa villajcuna”, “llullashpa yachachijcunami” espiritualmente ungushcacunataca pandachingapaj munanajunga nishpa (2 Ped. 2:​1, 14). Cunan punllacunapi ancianocunapash minishtirijpica huauquipanicunata advirtinami can. Paicunaca experienciata charij huauquicunami can. Ashtahuangarin, Bibliata aliguta intindijta ricushpa, cabalta yachachijta ricushpami ancianocunamanga nombramientota cushca (1 Tim. 3:2; Tito 1:9). Paicunaca espiritualmente fucurishca, Bibliapi yachachishcashna causanajushpami huauquipanicunataca aliguta ñaupajman pushan.

9. Cunan punllapi congregaciongunaca ¿imashinata ñaupajman catinajun?

⁹ Jehová Diosca paipa organizacionhuanmi mundo enteropi huauquipanicunamanga yachachijun. Ñucanchi publicaciongunaca Bibliamanda ashtaca ali consejocunatami charin. Huaquinbica cartacunata cachashpa o superintendentecunahuanmi Jehovapa organizacionga ancianocunaman instrucciongunata cun. Shinami congregacionga ñaupajman catinajun.

10. Congregacionmanda caruyashcacunataca ¿imashinata ancianocunaca ayudana can?

¹⁰ Ancianocunaca congregacionbi huauquipanicuna espiritualmente chiriyashpa o juchata rurashpa ungushcashna cajpimi paicunata ashtahuanga ricuriashpa cuidana can  (Santiago 5:​14, 15, liingui). Huaquingunaca congregacionmanda caruyashca o Jehovata sirvinata saquishcami. Shinaca ¿nachu llamagucunata juyaj ancianoca cada unota mascashpa congregacionman tigrachimuchun animana can? Ari. Jesusca nircami: ‘Jahua pachapi tiajuj cangunapa Taitaca cai uchillagupuramanda shujllapash chingarichunga na munanllu’ nishpa (Mat. 18:​12-14).

11. ¿Imamandata huaquingunaca ancianocunata na cazungapaj munan?

¹¹ Jehová Diospash Jesuspash jucha illaj michijcunami can. Shinapash congregacionbi huauquipanicunata ricurianajuj ancianocunaca juchayucunami can. Ancianocuna juchayucuna cajta ricushpami huaquingunaca paicunata na cazungapaj munashpa nin, paicunapash ñuca cuenda juchayumi can, ima ñavihuanda paira ñucataca rimajuhuan nishpa. Imashinami ña ricupashcanchi, ancianocunaca juchayucunami can. Shinapash na chaita yaria causanachu canchi.

12, 13. a) Ñaupa tiempocunapica ¿imashinata Jehovata sirvijcunaca pandarirca? b) ¿Imamandata Jehová Diosca paita sirvijcunapa pandarishcacunata Bibliapi escribichirca?

¹² Bibliapica punda tiempocunapi Jehová churashca ñaupajman pushaj jaricuna imapi pandariscataca na pacanllu. Huaquin ejemplocunata ricupashunchi. Rey Davidtaca Jehová Diosmi Israel llactapa rey cachun agllarca. Shinapash shuj cazada huarmihuanmi faltapi urmarca, paipa cusatapash huañuchirca (2 Sam. 12:​7-9). Apóstol Pedropash congregacionda ñaupajman pushangapaca ashtaca responsabilidadcunatami chasquirca. Shinapash cutin cutinmi pandarirca (Mat. 16:​18, 19; Juan 13:38; 18:27; Gál. 2:​11-14). Adán y Evamanda callarishpa tucuicunami juchayucuna canchi. Jesusllami jucha illaj carca.

¹³ Jehová Diosca ¿imamandata paita sirvijcunapa pandarishcacunata Bibliapi escribichirca? Paica juchayu gentecunatapash paipa llamagucunata cuidachun churashcata yachachunmi shina escribichirca. Shinaca ancianocunaca juchayucunami cashca nishpaca na ancianocunamanda quejarijunachu canchi. Shinallata paicunapa autoridadta na valichishpaca na parlanachu canchi. Jehová Diosca ancianocunata respetachun, cazuchunmi munan (Éxodo 16:​2, 8, liingui).

14, 15. Punda tiempocunapi Jehová Dios paita sirvijcunaman instrucciongunata cushcamandaca ¿imatata yachajupanchi?

¹⁴ Cunan punllacunapica ancianocunata cazunaca minishtirishcapachami can. Ñaupa punllacunapi ima tucushcata ricupashunchi. Israelitacunata Egipto llactamanda llujchingapaca Moisesta, Aarondami Jehová Diosca agllarca israelitacunaman instrucciongunata cuchun. Ashtahuangarin 10 plagamanda salvaringapaca shuj ali micunagutami rurana carca. Shinallata shuj llamagupa cungata cuchushpami yahuartaca huasi pungu pilarpi churana carca. Chai instrucciongunataca Israelmanda ancianocunami israelitacunaman villarca. Cutin Israelmanda ancianocunaca Moisesman Jehová Dios cushca instrucciongunatami catinajurca (Éx. 12:​1-7, 21-23, 29). Chai punllacunapica ancianocuna, Moisesmi Jehovapa mandashcacunata villajcuna carca. Cunan punllacunapi ancianocunapash Jehovapa mandashcacunata villajcunami can.

¹⁵ Bibliapica tauca textocunapimi nijun, Jehová Diosca angelcunata o gentecunatami agllarca paipa sirvijcunaman instrucciongunata cuchun nishpa. Instrucciongunata catishpami Jehovapa sirvijcunaca salvarita usharca. Instrucciongunata cupangui nishpa mandashpaca paicunamanbashmi Jehová Diosca paipa asha autoridadta curca. Jehovapa agllashcacunaca Jehovapa shutipimi parlan  carian, salvaringapaj imata ruranatapashmi villan carian. Shinaca ¿nachu Armagedón chayamujpica shinallata ñucanchitapash Jehová Diosca cuidanga? Shinapash ancianocunaca Jehovapa shutipi parlanajushcamanda o Jehovapa organizacionbi responsabilidadcunata charishcamandaca na imacunatapash nishpa, jariyashpa mandajunachu can.

16. ¿Ima ‘rimashcacunatata’ aliguta uyana capanchi?

¹⁶ Jehovata sirvijcunaca tucuillacunami shujlla corralmanda cuenda canchi. Jesusmi ñucanchitaca shujlla michij cuenda ricuriajun (Juan 10:16). Jesusca nircami: ‘Ñucami cai pacha tucuri punllacaman tucui punllacuna cangunahuan casha’ nishpa (Mat. 28:20). Shinapash ¿imashinata Jesusca cai shimicunata pactachijun? Jesusca ñami jahua cielopi Rey can. Chaimandami Diablopa nali mundo nara tucurijpillata Jesusca imata rurana cashcatapash ruranga. Jehovapa llamagucunahuan shujlla corralpishna tandanajushpa ali sintiringapaca ñucanchiman ‘rimashcacunataca uyanami’ canchi. “Rimashcacuna” nishpaca Diospa espirituhuan Bibliapi escribichishcacunamandami parlajun. Shinallata “rimashcacuna” nishpaca ancianocunata utilizashpa Jehová Dios, Jesús ima nishcatami “rimashcacuna” nin (Isaías 30:21; Apocalipsis 3:​22, liingui).

17, 18. a) Jehovapa sirvijcunaca ¿imamandata shuj jatun llaquipi can? b) Shinapash ¿imatata yaria causana capanchi? c) Shamuj temapica ¿imatata yachajupashun?

¹⁷ Apóstol Pedroca nircami: ‘Diabloca león huacashpa pitapash micungapaj mascajunshnami muyuriajun’ nishpa (1 Ped. 5:8). Diabloca ninanda yarjachijuj animal cuendami espiritualmente ungushcacunata o congregacionmanda caruyashcacunataca japingapaj chapariajun. Chaimandami congregacionbi huauquipanicunapa ladoman, ‘Michishpa Charijuj’ Jehovaman quimirina canchi (1 Ped. 2:25). Apocalipsis 7:17​pica ninmi, Jatun Manllanai punllacunamanda salvarijcunataca Jesús o ‘Llamami paicunataca michijunga. Paillatami causaita caraj yacu tugyajuj pugyucunapi ufiachunbash pushanga. Paicunapa ñavi viquitapash Taita Diosmi tucuillata fichanga’ nishpa.

¹⁸ Imashinami ricupanchi, ancianocunami congregacionbi huauquipanicunataca espiritualmente michinajun. Shinapash ¿imashinata ancianocunaca Jesuspa llamagucunata aliguta tratana can? Chaitaca shamuj temapimi ricupashun.