Estelaca * siempremi paipa huahuagucunandi paipa Iglesiaman rin carian. Paipa pastortaca nishcarcami, Bibliata aliguta intindingapaj ayudahuai nishpa. Shinapash na ayudajpimi Estelaca cultoman rinata saquirca. Chaimandami paipa pastorcunaca shuj cartapi nirca, cultoman na shamui ushashpapash culquitaca cachamunallami cangui nishpa. Chaita ricushpami Estelaca nin: “Paicunaca ñuca culquitallami munashcarca” nishpa.

Angelinaca siempremi Taita Diosta aliguta catingapaj munarca. Paica ninmi: “Ñuca iglesiapica cada misapimi limosnata churai nishpa shuj platota quimsa viaje yalichin carca. Culquitalla mañanajujpimi yarcani, paicunaca na Taita Diosta aligutapacha catinajunllu” nishpa.

Cunanga quiquin rijsishca religiongunapi pensaripashunchi. Chai religiongunapica ¿culquita cui nishpachu ima modopash atichinajun? ¿Chaitachu Bibliapica yachachin?

Jesusca nircami: “Imashinami na culquita mañarcani, shinallatami cangunapash na culquita mañana canguichi” nishpa (Mateo 10:​8, NM). Chaimandami, Bibliata yachachishcamandaca na culquita mañajuna can.

Shinaca ñaupa tiempopi Jesusta catijcunaca ¿imashinata congregacionbi gastocunataca pagan carca?

Congregacionbi gastocunata pagangapaca tucuicunallatami paicunapa shungu nunashcata caran carca. Paicunaca cushijushpa cujta Taita Dios juyan yashpami imagutapash na llaquishpa caran carca (2 Corintios 9:7). Apóstol Pabloca carpacunata rurashca culquihuan Taita Diosmanda villachishpa purishpami nirca: ‘Tutapash punllapash imagutapash rurashpami tiarcanchi. Imatapash mañashpa cangunata fiñachingapaca na munarcanichu’ nishpa (1 Tesalonicenses 2:9; Hechos 18:2, 3).

Testigo de Jehovacunapa Tandanajui Huasicunaca na jatun punchapamba huasicunachu can. Tandanajuicunapipash limosnata churai nishpaca na platocunata yalichinajunllu. Tandanajuicunapi yachachishcamanda agradicingapaj munashpaca caja de contribución nishcagucunapimi mashna usharishcaguta churanalla can. Mashnata churajushcataca pipash na ricujunllu.

Cai revistata o shuj librocunata rurangapajpash culqui minishtirinmi. Shinapash cai revistapica na nijunllu culquita minishtinchimi, culquita cunami canguichi nishpa. Cai revistacunaca Bibliamandallami yachachin.

Shinaca ¿maijan religionda Mateo 10:8​pi nishcata o Jesuspa punta catijcunapa ejemplota pactachijun?