1-3. Jesusca ¿imashinata ashtaca ashtaca gentecunaman micuchirca? (Callari dibujota ricupangui.)

CAI textocunapi pensaripashunchi (Mateo 14:​14-21, liingui). Huata 32 ña tucujujpica casi 5.000 jaricuna, huarmicuna, huahuagucunami Jesustapash paipa catijcunatapash Betsaida nishca ladolla pushtugucaman catiria rirca. Chay llactaca mar de Galilea ladogullapimi carca.

² Chai tucuilla gentegucunata ricushpaca, Jesusca ninanda llaquirishpami paicunamanga Diospa Reinomanda yachachirca, jambircapash. Ña chishiyajujpimi Jesuspa catijcunaca nirca, ladolla llactacunaman rishpa imagutapash randishpa micugrichun gentecunataca cachayari nishpa. Shina nijpimi Jesusca, ‘canguna micunataca carapaichi’ nirca. Shinapash picha tandaguta, ishcai pescadogucunatalla charimandaca paicunaca manllaririangami.

³ Gentecuna yarjachijujta ricushpami Jesusca shuj jatun milagrota rurarca. Bibliapa chuscu librocunami chai milagromanda parlan (Mar. 6:​35-44; Luc. 9:​10-17; Juan 6:​1-13). Jesusca paipa catijcunataca mandarcami, gentecunataca 50purata, 100purata tandachishpa tiaripaichi nishpa. Chai jipaca Taita Diosta mañashpami tandagucunatapash pescadogucunatapash pedaziai callarirca. Paillata carai callarinapa randica, Jesusca paipa catijcunamanmi micunaguta gentecunaman carapaichi nishpa curca. Tucuilla gentecunami na ushangacaman micunajurca. Imashinami ricupanchi, Jesusca huaquin catijcunahuanllami ashtaca ashtaca gentecunaman micuchirca. *

4. a) Jesusca ¿imatata ashtahuan rurangapaj munarca? ¿Imamanda? b) ¿Imatata cai temapipash caishuj temapipash yachajupashun?

  ⁴ Diospa Shimita yachajujcunalla unai unaicaman causana cashcata yachashpami Jesusca Diosmanda ashtahuan yachachingapaj munarca (Juan 6:​26, 27; 17:3). Imashinami yarjachijuj gentecunata llaquishpa micunaguta cararca, shinallatami Jesusca paipa catijcunata llaquishpa ashtaca horascunata yachachirca (Mar. 6:34). Shinapash Jesusca huaquin punllacunatalla cai Alpapi causashpami jahua cieloman tigrana carca (Mat. 16:21; Juan 14:12). Jahua cielopi cashpaca ¿imashinashi Jesusca yachachishpa catinman carca? Jesusca ashacunatalla agllashpami ashtacacunaman yachachina carca. Chai ashallacunaca ¿picunashi can? Shinaca, ashacunahuanlla ashtacacunaman apostolcunapa punllacunapi imashina yachachijtami cai temapica yachajupashun. Cutin shamuj temapica cunan punllacunapi picuna chai ashallacuna cashcatami yachajupashun.

5, 6. a) Huañungapaj ishcai huatacunalla faltajujpica ¿imatata Jesusca rurarca? b) Pai huañushca jipapash aliguta yachachishpa catichunga ¿imatata Jesusca rurarca?

⁵ Jesusca shuj ali taita cuendami can. Pai huañushca jipa huahuacuna yarjai pasachunga na munarcachu. Chaimandami Jesusca congregacionda ñaupaman pushana cashcata yachashpa shinallata huañuna cashcata yachashpaca paipa tucui catijcuna Diosmanda aliguta yachajuchun munarca (Efes. 1:22). Jesusca huañungapaj ña ishcai huatacunalla faltajujpimi ashtacacunaman yachachingapaca huaquingunata agllai callarirca. Shinaca imashina agllashcata ricupashun.

⁶ Jesusca tuta entero Diosta mañashca jipami paipa catijcunata tandachishpa 12 apostolcunata agllarca (Luc. 6:​12-16). Shinami cati ishcai huatacunapica paipa ejemplohuan, paipa shimicunahuan chai apostolcunamanga aligutapacha yachachirca. Paicuna ashtacata yachajuna cajpimi paicunataca ñuca yachajujcuna nin carca (Mat. 11:1; 20:17). Jesusca pai huañushca jipa jahua cieloman tigrajpipash aliguta yachachishpa catichunmi paicunataca aliguta consejashpa, imashina villachinatapash yachachirca (Mat. 10:​1-42; 20:​20-23; Luc. 8:1; 9:​52-55).

7. Apostolcuna imata ashtahuan rurana cashcata yachachunga ¿imatata Jesusca nirca?

⁷ Apostolcunaca ¿ima responsabilidadtata charina carca? Pentecostés huata 33 tucujujtaca yachanallami carca, apostolcunaca superintendentecuna cuenda congregacionda ricuna cashcata (Hech. 1:20). Shinapash, imata ashtahuan rurana cashcata aliguta intindichunmi Jesús causarishpaca, shuj apostolcuna uyajta Pedrotaca nirca: “Ñuca llamagucunata michipangui” nishpa (Juan 21:​1, 2, 15-17, liingui). Cai shimicunata nishpami Jesusca intindichijurca ñuca apostolcunami ashacunalla cashpapash ashtacacunaman yachachinga nishpa. Shinami Jesusca paipa “llamagucunata” ninanda llaquishcata ricuchirca. *

8. Mushuj yachajujcunaca ¿imashinata apostolcunahuan Jesús yachachijushcata ricuchirca?

⁸ Jesús causarishpaca Pentecostés huata 33mandami paipa apostolcunata agllashpa shuj ungidocunamanbash yachachirca (Hechos 2:​41, 42, liingui). Apostolcuna Diosmanda yachachijujta ali yachashpami judío ungidocunapash na judío ungidocunapash ‘[apostolcunapa] yachachijushcataca na saquishpa, aliguta catinajurca’. Mushuj yachajujcunaca ninanda yarjachinshnami Taita Diosmandaca yachajungapaj munanajurca. Apostolcuna Diosmanda cabalta yachachijujtapash alimi yacharca. Chaimandami, Jesús imata nishcata  imata rurashcata yachachijpica ali uyanajurca. Jesusmanda Diospa Shimihuan intindichijpipash cushijushpami uyanajurca (Hech. 2:​22-36). *

9. Apostolcunaca ¿imashinata Jesuspa llamagucunata ali cuidangapaj munashcata ricuchirca?

⁹ Apostolcunaca tucui horasmi Jesuspa llamagucunataca ali cuidangapaj munarca. Chai punllacunapica micunagumandami shuj problema congregacionbica ricurirca. Hebreo shimita parlaj viudacunamanga cada punllami micunaguta caranajurca. Cutin griego shimita parlaj viudagucunamanga na micunaguta caranajurcachu. Chaimandami 12 apostolcunaca 7 ali yachajushca huauquicunata agllarca tucui viudagucunaman igual carachun nishpa. Apostolcunaca taucacunami Jesús milagrota rurashpa micunaguta gentecunaman carajuj horasca chaipi carca. Chaita yarishpami huauquicunaman micunaguta caranapi ashtahuan preocuparinapa randica, ‘Diospa Shimita villachishpa catinapi’ ashtahuanga preocuparirca (Hech. 6:​1- 6).

10. Jesusca ¿imashinata Jerusalenbi apostolcunahuan, ancianocunahuan ashtacacunaman yachachirca?

¹⁰ Huata 49pica, chai punllacunapi causanajuj apostolcunahuanmi shuj ancianocunapash tandanajurca (Hechos 15:​1, 2, liingui). “Villachun cachashcacunahuan [o apostolcunahuan], crijcunata mandaj rucucunahuan [o ancianocunahuan]” tandanajushpami shuj junta directiva o congregaciongunata ñaupaman pushaj cuerpo gobernante tiai callarirca. Jesusca cai ashalla huauquicunahuanmi Bibliamandaca cabalta yachachirca. Shinallata congregacionguna imashina villachijushcata, imashina yachachina cashcata ricuchunbash cai ashalla huauquicunamanmi mingarca (Hech. 15:​6 -29; 21:​17-19; Col. 1:18).

11, 12. a) Apostolcunapa tiempopi Jehová Dios paipa Churita bendiciashcataca ¿imashinata yachanchi? b) Cuerpo gobernanteta churashpa Jesús yachachijushcataca ¿imashinata ricunalla carca?

¹¹ Ashalla huauquicunata agllashpa gentecunaman Jesús yachachijujpica Taita Diosca ninanda cushijushpami bendiciarca. Hechos libropica ninmi, apostolcunandi, ancianocunandi Jerusalenbi tandanajushpami Jesusta catijcuna imatalla ruranatapash parlanajurca. Chai parlashcata cazuchunmi, Pabloca shuj apostolcunahuanbash chai pueblocunapi villashpandi rinajurca. Shina villajpimi Jesusta catijcunaca ali crishpa aliguta catinajurca. Punllandimi, ashtahuan tauca gentecuna crishpa miranajurca nin (Hech. 16:​4, 5).  Chai punllapi congregaciongunaca Jerusalenbi Diospa congregaciongunata ñaupaman pushaj uchilla grupota cazuimandami ninanda miranajurca. Imashinami ricupanchi, huaquin huauquicunatalla agllashpa congregaciongunata Jesús yachachijujpica Jehová Diosca paicunata bendiciarcami. Shinaca ama cungapashunchichu, Jehová Dios bendiciajpillami Diosta sirvijcunaca tranquilo sintirishpa ashtahuan miran (Prov. 10:22; 1 Cor. 3:​6, 7).

 ¹² Imashinami yachajunajupashcanchi, ñaupa tiempocunamandallatami Jesusca ashacunatalla agllashpa ashtacacunaman yachachijushca. Jesusca apostolcunata agllashpami cuerpo gobernante tiai callarichun munarca. Cai huauquicunata Dios ayudajushcataca ricunallami carca. Hechos 5:12​pica ninmi: ‘[Apostolcunaca] ashtaca ricuchinacunatapash, jatun manllarinacunatapashmi ruranajurca’ nishpa. * Chaita ricushpami, Jesusta mushuj catijcunapash intindirca cuerpo gobernanteta churashpa tucuicunata Jesús ali yachachijujta. Shinapash apostolcuna huañushca jipaca shuj jatun llaquimi tiarca.

13, 14. a) Paipa catijcunamanda parlashpaca ¿imatata Jesusca nirca? ¿Ima horata chai shimicunaca pactarirca? b) Jesuspa catijcunataca ¿picunata llaquichirca? (Tucuri notacunapa recuadropi nota 5ta ricupangui.)

¹³ Jesusca nircami, ñuca catijcunataca llaquichingami nishpa. Yaripashun, Jesusca nircami, trigota tarpushca jipaca nali jihuatami tarpunga nishpa. Trigoca Jesusta catij ungidocunami can. Cutin, nali jihuaca Jesusta catinchi nij tucushcacunami can. Shinallata tarpuj runaca nircami, cozechana tiempo chayangacamanga ishcanditallata viñachun saquipaichilla nishpa. Cozechana tiempoca cai mundopa cosascuna tucuri punllacunapimi chayana can (Mat. 13:​24 -30, 36- 43). Jesús nishca punllamanda asha tiempo jipallami chai shimicunaca pactarirca. *

¹⁴ Apostolcuna causajuj punllacunapillatami panda yachachishcacunaca ricuri callarirca. Shina cajpipash panda yachachishcacuna mirachunga apostolcunaca na saquircachu, ‘jarcarcami’ (2 Tes. 2:​3, 6, 7). Shinapash último apóstol huañujpica panda yachachishcacunaca sapiyashpa mirai cuendami tiai callarirca. Ashtaca ashtaca huatacunapica ashtahuan ashtahuanmi panda yachachishcacunaca viñashpa catirca. Chai tucui huatacunapica trigoca ashallami carca. Cutin nali jihuaca ashtacatami mirarca. Chai punllacunapica Diosmanda aliguta yachachishpa catingapaj shuj cuerpo gobernantepash na tiarcachu. Jipamanmi cutin ricurirca. Ima hora cutin ricurishcata ricupashunchi.

15, 16. Bibliamanda Yachajujcuna Bibliata aliguta estudiajpica ¿imata pasarca? Chaimanda ¿imatata tapurinchi?

¹⁵ Nali jihua viñana punllacuna ña tucurimujujpica Bibliamanda cabalta yachajungapaj munaj gentecunami ricuri callarirca. 1870 huatacunapica Bibliamanda cabalta yachajungapaj munashpami shuj uchilla grupogu tandanajui callarirca. Paicunaca ali shungutami charirca. Shinallata, Jesusta catinchi nij tucushca iglesiacunapa yuyaicunatapash huashaman saquishpami, Bibliamanda Yachajujcunaca Biblia imatapacha nijta yachangapaj munashpa aliguta estudiai callarirca (Mat. 11:25).

¹⁶ Bibliata aliguta estudiashcamandaca ¿imata pasarca? Bibliamanda tucui shunguhuan Yachajujcunaca maijan panda crishcacuna tiashcatami gentecunamanga ricuchirca. Ashtahuangarin, Bibliamanda cabalta yachachingapaj munashpami librocunata, folletocunata llujchi callarirca. Shinami yarjachinshna  Diosmanda yachajungapaj munaj gentecunataca ninanda ayudarca. Shinapash tapuripashunchi ¿chai punllacunapi Bibliamanda Yachajujcunahuanllu Jesusca paipa llamagucunata yachachijurca? Chai huatacunapica Bibliamanda Yachajujcunaca nara listochu carca. Jesuspa llamagucunata yachachingapaca prepararinarami carca. Shinallata nali jihuashna Jesusta catinchi nij tucushcacunata ali trigoshna Jesusta ali catijcunamanda separana tiempopash nara chayarcachu.

17. Huata 1914pica ¿imallata tucurca?

¹⁷ Imashinami ñaupa temapi yachajuparcanchi, cozechana tiempoca huata 1914pimi callarirca. Chai huatapimi Jesusca jahua cielopi Rey tucurca. Shinallata chai huatapimi tucuri punllacunapash callarirca (Apoc. 11:15). Huata 1914manda huata 1919pa callari quillacunacamanmi Jesusca paipa Taitandin picuna Diosta ali adoranajushcata ricui callarirca (Mal. 3:​1-4). * Ashtahuangarin 1919 callarimandami trigotaca tandachi callarina carca. Chai tiempopimi Jesuspa llamagucunata ali yachachina tiempoca chayarca.

18. Tucuri punllacunapica Jesusca ¿imata pasanga nirca? ¿Imatata chaishuj temapica yachajupashun?

¹⁸ Tucuri punllacunamanda parlashpaca Jesusca nircami, micuna horaspi ñuca llamagucunata micuchingapaca huaquingunata agllashami nishpa (Mat. 24:​45-47). Jesusca ñaupa tiempopishnallatami ashagucunatalla agllashpa cunanbipash ashtacunaman yachachina carca. Shinaca chai ashallacunaca ¿picunata carca? Chaitaca shamuj temapimi, shuj profeciacunatapash aliguta intindishpa yachajupashun.