Bibliami gentecunapa causaita cambiashca

Movimiento punk nishcapi purij shuj jaritaca ¿imata shuj gentecunamanda preocuparishpa, paicunaman juyaita ricuchichun ayudarca? México llactamanda shuj jovenga ¿imamandata paipa nali causaita saquishpa ali causai callarirca? Shinallata Japón llactamanda shuj famoso ciclistaca ¿imamandata campeonatocunapi participashpa gananataca saquirca? Imamanda cai cambiocunata rurashcata ricupashunchi.

“Ñucaca grosero grosero, jariyashca, pitapash macanllami cariani” (DENNIS O’BEIRNE paipa causaimanda parlan)

NACIRISHCA HUATA: 1958

LLACTA: INGLATERRA

PAIPA PUNDA CAUSAI: MOVIMIENTO PUNK NISHCA GENTECUNAHUAN LLEVARIMANDAMI PIHUANBASH NA LLEVARINGAPAJ MUNAN CARCA.

ÑUCAPA PUNDA CAUSAI: Irlanda gentecunapa religionda catishpami católico shina viñarcani. Ñuca taitami irlandés carca. Ñuca taitamamacunaca iglesiamanga casi siempremi ñucatalla cachahuan carca. Ñucalla rinataca na gushtanllu carcani. Shinapash Taita Diospa cosascunata ruranata gushtashcatami yarini. Chaimandami padrenuestro oraciondaca, camapi siririshpa cada tuta rezan cariani. Cai oraciondaca quimsa yuyaicunata rurashpami cada yuyai imata yachachingapaj munashcata ricushpa pensarin cariani.

Ña jovenlla tucujushpaca, movimiento rastafari nishcamandami ashtahuan yachajungapaj munarcani. Shinallata liga antinazi nishca politicacunapipashmi chapuri callarircani. Shinapash cai movimiento punk nishca gentecuna imashina comportarijta ricushpami paicunata alicachimanda paicunahuan tandanajui callarircani. Cada punllami drogacunata chupan carianchi. Ufiaitapash yapatami ufian cariani. Ñuca causaita na valichishpami imapash peligroso cosascunata ruranlla carcani. Shuj gentecunamandaca preocuparitallapash na preocuparinllu cariani. Shuj gentecunahuan parlanata, fotocunapi ñucata llujchichumbash gushtaitapacha na gushtanllu cariani. Chaimandami imapash minishtirishcapacha cajpilla pihuanbash parlan cariani. Chaicunata yarishpaca shuj gentecunahuanga grosero grosero, jariyashca, imatapash nishpa macanlla persona cashcatami yarini. Ñucapa amigocunahuanllami ali comportarin cariani.

20 huatacunata charishpami Bibliata gushtai callarircani. Drogata jatushpa trabajaj amigomi carcelpi Bibliataca lii callarishca cashcarca. Chaimandami shuj punllaca chai amigohuan religionmanda, iglesiacunamanda, Diablo cai mundota mandajushcamanda unaita parlarcanchi. Shuj Bibliata randishpami ashtahuan lii callarircani. Ñuca amigo, ñucapashmi Bibliataca por separado lii callarircanchi. Cutin chai amigohuan tandanajushpaca Bibliapi imata liishcata, imata yachajushcatami ishcandimanda parlarin carcanchi. Huaquin quillacunatami Bibliamanda imata yachajushcata parlarishpa yalircanchi.

Bibliata liishpaca tucurimui punllacunapi causanajushcata, Jesusta ali catijcuna Diospa Reinomanda villachina cashcata, politicacunapi na chapurina cashcata, causaipipash limpio causaiguta charina cashcatami yachajurcanchi. Bibliapi yachachishcacuna tucui ali, cabal cashcatami intindircanchi. Chaimandami maipica Bibliapa nishcacunata pactachij shuj ali religión tiangami yashpa pensarcanchi. Shinapash maijan religionshi Bibliapa nishcacunataca pactachinajun yarcanchimi. Ali religionda taringapaca asha ashami callaripica ashtahuan jatun religiongunatara visitai callarircanchi. Chaita rurashpaca chai religionguna politicapi chapurishpa, shuj gentecuna ricuchunlla fiestacunata rurajtami ricurcanchi. Chaimandami chai religiongunaca Jesuspa mandashcacunataca na pactachinajunllu yarcanchi. Chaicunata ricushpami cai jatun iglesiacunaca Diospa bendiciondaca na charinllu yashpa pensarcanchilla. Chaimandami ashtahuan uchilla religiongunata, na rijsishca religiongunata visitai callarircanchi.

Shinallata chai religiongunata catij huaquin gentecunahuanbashmi parlarcanchi. Paicunataca Bibliamanda huaquin tapuicunatami rurarcanchi. Bibliata liishca caimandami chai gentecuna ñucanchipa tapuicunamanda imata tigrachijpipash cabalta ninajujta o na cabalta ninajujta yachai ushanalla carcanchi. Cai religiongunata catij gentecunahuan cada parlashca jipami Taita Diostaca, cabal ali religión cajpica chai gentecunahuan cutin tandanajuna munaita ñuca shungupi cuhuai nishpa mañan carcani. Huaquin quillacunatami shina shuj shuj religiongunata visitashpa purircanchi. Shinapash shuj religión ñucanchipa tapuicunata Bibliahuan contestajtaca na tarircanchichu. Shinallata chai religiongunata catij gentecunahuan cutin tigrashpa parlana ganaspash na tiarcachu.

Shina mascashpa purinajushpallatami testigo de Jehovacunahuan tuparircanchi. Paicunahuan tuparishpaca shuj religionda catij gentecunata tapuchishcashnallatami tapuchircanchi. Chaipica paicunaca ñucanchipa tapuicunataca Bibliahuanmi contestarca. Paicunaca ñucanchi Bibliapi yachajushcashnallatami tucuita cabal tigrachirca. Chaimi paicunataca Bibliapica drogamanda, tabacomandaca imatata nin nishpapash tapurcanchi. Chai tapuicunatapash Bibliahuanllatami contestarca. Chaimi paicunapa tandanajuiman ringapaj quidarcanchi.

Paicunapa tandanajuiman rinaca ñucapaca shinllimi ricurirca. Gentecunahuan llevarinata, parlanataca nimamanda na gushtanllu carcani. Chaimi paicunapa tandanajuiman rijpi limpio limpio churajushcacuna ñucapaman shamushpa, cushi cushi saludajpica nalicachircani. Chaimandallami tandanajuicunaman cutin ringapaca ñana munarcani. Shinapash chai gentecuna ali religionda catinajushca cajpica, chai gentecunahuan Bibliata yachajushpa catingapaj ayudahuai nishpami Taita Diostaca mañarcani. Shina mañashca jipami testigo de Jehovacunahuan Bibliamanda yachajuna munai shamuhuarca.

BIBLIAMI ÑUCA CAUSAITA CAMBIASHCA: Drogacunata na chupana cashcata intindishpaca uchallami saquircani. Ñucapaca tabacota chupanata saquinami ashtahuan shinlli ricurirca. Ashtaca viajecunatami tabacota chupanata saquingapaj esforzarircani. Shinapash na usharcanichu. Shujcunaca tabacota cajandi japishpa shitashca jipaca ñana chupashpa catishcatami villahuan carca. Shinapash ñucaca tabacota chupanata saquitaca na ushajurcanichu. Chaimandami Jehová Diostaca ayudahuai nishpa mañarcani. Jehová Diosta mañaimandami tabacota chupanataca saqui usharcani. Chaipimi Jehová Diosta mañana minishtirishcapacha cashcata cuenta japircani.

Ñuca munashcashna churajushca y arreglarishca caimandami chaicunapipash cambiocunata ruranara carcani. Primera vez shuj salón del Reinoman yaicushpaca ajchatapash shayachishcami charircani. Ajchataca gallopa crestatashnami rutushca carcani. Ajchapa colorpash azul fuertehuan, tomate fuertehuan pintashcami carca. Shinallata ropapipash pantalón jeanda, chaqueta de cuerota churajushcami carcani. Testigo de Jehovacuna ñuca ropata cambiachun cutin cutin consejajpipash, ñucapa ropata cambianaca na minishtirinllu yarcanimi. Shinapash porfinmi 1 Juan 2:​15-​17​pi pensarircani. Chaipica: “Cai pachata, cai pachapi ima tiajtapash, na juyanachu canguichi. Pipash cai pachatara juyashpaca, Taita Diospaj juyaica na paipi causajunllu” nijurcami. Chaipimi ñucapa churajushcacunahuanga cai mundota juyajushcata cuenta japircani. Shinallata Taita Diosta juyashcata ricuchingapaca tucuipi cambiana cashcatami cuenta japircani. Chaimandami ñuca ropapipash cambianata decidircani.

Testigo de Jehovacunaca tandanajuiman richunmi siempre animahuan carca. Shinapash asha ashami Taita Diospacha ñuca tandanajuicunaman richun munashcata cuenta japircani. Chaitaca Hebreos 10:​24, 25​pimi ricui usharcani. Tandanajuicunaman rishpa, huauquipanicunata ashtahuan rijsi callarishpami Jehová Diosta sirvingapaj bautizarina munai shamujpi bautizarircani.

¿IMA BENDICIONGUNATATA CHASQUIPASHCANI?: Jehová Dios ñucanchicuna paihuan ali amigo tucuchun saquijta yachashpaca ninandami cushijuni. Jehová Dios shuj juyaj, llaquij Dios cashcata yachanami ñucapash shinallata cachun ayudahuashca. Chaimandami Jesuspa ejemplota catishpa causanatapash dicidipashcani. Jesuspa ejemplota catishpa causangapaca, shujcunapa ñaupajpi ali ricuringapalla imatapash na rurana cashcatami yachajupashcani (1 Pedro 2:21). Shujcunata ali tratangapaj, juyaita ricuchingapami esforzarishcani. Chaimandami ñuca huarmiguta, ñuca churigutapash Jesuspa ejemplota catishpa tratangapaj esforzaripani. Huauquipanicunamanda preocuparinatapashmi yachajushcani. Jesusta catinami ali cosascunata rurashpa ñucallata ali sintirichun ayudahuashca. Shuj gentecunatapash juyaihuan tratachunmi ayudahuashca.

“Respetohuanmi tratahuarca” (GUADALUPE VILLARREALMI PAIPA CAUSAIMANDA PARLAN)

NACIRISHCA HUATA: 1964

LLACTA: MÉXICO

PAIPA PUNDA CAUSAI: SHUJ NALI CAUSAITAMI CHARIRCA

ÑUCAPA PUNDA CAUSAI: Ñucaca México llactapa Hermosillo nishca pushtupimi ñucapa sucta huauquicunandi viñarcanchi. Chai pushtupica gentecunaca pobre pobrecunami carca. Ñuca taitaca ñuca uchilla cajpillatami huañurca. Chaimandami ñucanchitaca ñuca mamitalla viñachirca. Uchillagumandami huasipi micunagu tiachunga trabajashpa ayudai callarircani. Shinapash trabajocunamanga chaqui lluchumi rin carcani. Zapatota randingapaca culquiguca na pactanllu carca. Ashtaca familiacunami shinallata causanajurca. Causaitapash shuj quichiji quichiji huasigupimi causanajurcanchi.

Ñuca mamitaca trabajashpalla yalimandami huasipica na yalin carca. Chaimandami huasipica ñucanchitaca pipash cuidana illaj quedan carcanchi. Chaimi sucta huatacunata charijpica, shuj joven de 15 años ñucataca violahuarca. Ashtaca tiempotami chai jovenga shina violahuarca. Chaimandami ñucaca jarishna o huarmishna o imashina comportarinatapash na atinarcani. Shinallata jaricunata gushtashpa ricunaca normalmi can yarcanimi. Ñucaman shuj ali consejota cuchunmi doctorcunahuan, sacerdotecunahuan parlarcani. Shinapash paicunaca ima problematapash na charinguichu, canba pensamientocunaca normalmi can nihuarcami.

Chaimandami ña 14 huatacunata charishpaca homosexual tucurcani. Once huatacunatami shina causajurcani. Shuj shuj noviocunatapashmi chari callarircani. Ajchacunata rutunata yachajushpami shuj salón de bellezata churarcani. Ñucaca na cushilla causajurcanichu. Ñucapa noviocuna traicionajpimi llaquilla causajurcani. Ñucaca shuj nali causaita apajushcatami sintircani. Chaimandami ¿cai mundopica ali gentecunaca tianlla? nishpa tapurircani.

Chaipimi ñuca panipi pensarircani. Paica Bibliata yachajushpami bautizarishpa testigo de Jehová tucushcarca. Pai Bibliata yachajujushpaca imata yachajushcatami ñucamanga villan carca. Shinapash ñucaca imata nijpipash na uyangapaj munanllu carcani. Shinapash paipa causaica aligumi can yashpami ricun cariani. Paica cazadami carca. Paipa cusaguca paitaca juyaihuan respetohuanmi tratan carca. Paicunaca ishcandimandami ali ali llevarin carca. Asha tiempo jipaca Bibliataca shuj testigo paniguhuanmi estudiai callarircani. Callaripica Bibliataca estudiana cashcamandallami estudian carcani. Jipamanmi Bibliataca ashtahuan serio yachajui callarircani.

BIBLIAMI ÑUCA CAUSAITA CAMBIASHCA: Testigo de Jehovacunapa tandanajuiman rishpami chaipi gentecuna diferentepacha cashcata yachaj chayarcani. Shuj gentecunaca ñucata ricushpaca burlaritarami burlarin carca. Shinapash testigocunaca tandanajuiman rijpica na chaita rurarcachu. Paicunaca ñucataca cushilla saludashpami respetohuan tratahuarca. Shina tratajpica cushillami sintirircani.

Shuj jatun asambleaman rijpipashmi paicunaca cushi cushi, juyaihuan, respetohuan tratahuarca. Chaipimi ñuca panishna ashtaca ali gentecuna tiashcata cuenta japircani. Shinallata cashnami pensarircani: “Ashtaca tiempotami cashna ali gentecunata mascajushcani. ¿Caicunacha ñuca mascajushca gentecuna can? yarcanimi”. Testigocuna tucuicunahuan ali llevarijta, tucuicunaman juyaita ricuchijtami cuenta japircani. Shinallata ima tapuicunata contestangapapash siempremi Bibliata utilizan carca. Chaimandami testigocunataca Bibliaca ninandami ayudan yashpa pensarcani. Shinallata cai gentecunahuan tandanajungapaca ñuca causaipica ashtaca cambiocunatami rurana cani yarcanimi.

Ñuca causaipica ashtaca ashtaca cambiocunatami rurana tucurcani. Ñucaca shuj huarmishnami causajurcani. Chaimandami ñucapa parlopi, ñucapa comportamientocunapi, ñucapa ropapi cambiana tucurcani. Ajchatapashmi ali ruturina carcani. Ñucapa amigocunahuan llevarinatapashmi saquina carcani. Cai tucui cosascunapimi cambiocunata rurana carcani. Ñucapa amigocunaca: “¿Imapata Bibliata estudiajungui? Bibliata estudianataca saqui. ¿Imapata chaitaca rurajungui?” nihuanajurcami. Shinallata “¿imatata munangui? Tucuitami charingui” nishpapashmi nihuanajurca. Ñucapaca mapa, nali causaita saquinami ashtahuanbachaca shinlli ricurirca.

Bibliapa 1 Corintios 6:​9-11​manda textocunami shunguman chayahuarca. Chaipica: “Imatapash cashcatapacha na rurashpa causajcunaca, Taita Dios mandajuj llactapica, imatapash na japigringachu. ¿Chaitaca nachu yachanguichi? Na pandanachu canguichi. Huainayajcuna, yanga dioscunata mañajcuna, cazarashca jahua shujhuan causajcuna, huarmicunashna causaj runacuna, jari purallata huarmihuanshna puñujcuna [...] Taita Dios mandajuj llactapica, napacha imatapash japigringachu. Cangunapash pundaca, chashnallatami huaquingunaca causarcanguichi. Ashtahuangarin Apunchi Jesuspaj shutipi, ñucanchi Taita Diospaj Espiritumandapashmi, ña armashcacuna canguichi” nijunmi. Jehová Diosca pundacunapi shina causaita charishca gentecunatami, paicunapa causaipi cambiocunata rurachun ayudarca. Shinallatami ñucatapash ayudahuashca. Ashtaca huatacunapimi ninanda esforzarishpa ñuca causaipica cambiai usharcani. Testigo de Jehovacunapa juyaihuan consejashcacunapashmi ñucataca ninanda ayudahuarca.

IMA BENDICIONGUNATATA CHASQUIPASHCANI: Cunanbica cazadomi cani. Ñuca huarmiguhuanga ñuca churigutaca Jehovamanda yachachishpami viñachipashcanchi. Ñucapa punda causaitaca huashamanmi saquishcani. Cunanga ashtaca bendiciongunatami Jehová Diosmandaca chasquipashcani. Congregacionbica anciano shinami sirvini. Shinallata huaquin gentecunatami Jehová Diosmanda yachajuchun ayudashcani. Ñucapa causaipi cambiocunata ruranami ñuca mamitatapash ayudarca. Ñuca mamitaca Bibliata yachajunata decidishpami tiempohuanga Jehovata sirvingapaj bautizarirca. Ñucapa shuj panipashmi shuj nali causaita charirca. Paipashmi ñuca cambiocunata rurashcata ricushpaca, Bibliamanda yachajushpa paipash paipa causaipi cambiashpa testigo de Jehová tucurca.

Bibliata ama yachajuichu nishca gentecunapashmi cunanbica ñucapa causai mejorashcata ricushca. Jehová Diosmandami ñuca causaipica cambiai ushashcani. Jehová Diosta nara rijsishpaca ali estudiashca gentecunatami consejota mañangapaj rircani. Shinapash paicunaca na ayudai ushahuarcachu. Jehovami ñucataca ciertopacha ayudai ushahuarca. Paica ñuca na miricijpipashmi ñucataca juyaihuan, pacienciahuan ayudahuashca. Shuj juyaj Dios ñucamanda preocuparishpa shuj ali causaiguta cushcamandami ninanda cushijupani.

“Ñuca causaihuan na contento cashpami sololla sintirijurcani” (KAZUHIRO KUNIMOCHIMI PAIPA CAUSAIMANDA PARLAN)

NACIRISHCA HUATA: 1951

LLACTA: JAPÓN

PAIPA PUNDA CAUSAI: CICLISTA PROFESIONAL: AMBICIOSO AMBICIOSOMI CARCA

ÑUCAPA PUNDA CAUSAI: Ñucaca Japón llactapa Shizuoka nishca pushtupimi viñarcani. Ñucanchica familiapica ochopurami carcanchi. Ñuca taitaca bicicletacunata jatuj shuj almacendami charirca. Chaimandami ñuca taitaca uchilla cajpillata, bicicletahuan carreracunata rurashpa pugllaj gentecunata ricuchun pushan carca. Chaimi bicicletacunapi carrerata ruranataca gushtai callarircani. Ñuca taitaca cashna carreracunaman pushashpaca, ñucapash shinallata bicicletata alicachishpa carreracunapi participachunmi munarca. Chaimandami ñuca ña 14 huatacunata charijpica ñuca taitaca entrenachishpa callarirca. 16 y 18 huatacunata charishpacarin ña quimsa campeonatocunapi participashpami ganarcani. Chaimi shuj universidadpi estudiachun invitahuarca. Shinapash chai universidadman na rishpami, bicicletapi carreracunata rurashpa participangapaj ashtahuan entrenangapaj rircani. Ña 19 huatacunata charishpaca shuj ciclista profesionalmi tucurcani.

Chai tiempopica Japón llactamanda ashtahuan ali ciclista cangapami munarcani. Ashtaca culquita ganashpa, ñuca familiaman shuj tranquilo, ali causaiguta cungapami munarcani. Chaimi carreracunata ganangapaj ashtahuan ashtahuan entrenai callarircani. Entrenajushpa o carreracunapi participajushpa imapash nali llujshijpi desanimarishpaca, ñucaca caita rurangapami nacirishcani, caitami rurana cani nishpami pensarin carcani. Chaimandami ñana ushajushpaca cutin jatarishpa ñaupaman catin carcani. Shina entrenajushpallatami ña asha asha ashtahuan yachajushpa, shuj shuj campeonatocunapi ganai callarircani. Entrenashcamanda primer huatapica, tucui jovengunamandaca ñucami primer lugarpi quedarcani. Cati huatapica Japón llactapa campeonatocunapimi participarcani. Sucta viajetami segundo lugarpi quedarcani.

Ñucami carreracunapica ashtahuan ganan carcani. Chaimandami rijsishca rijsishca tucurcani. Ñucataca la Lo­comotora de Tokai nishpami apodahuarca. Tokaica Japón llactamanda shuj pushtumi can. Ambicioso ambiciosomi carcani. Chaimandami shuj ciclistacunaca ñucataca ninanda manllan carca. Carreracunata ganashpami ashtaca culquita chari callarircani. Chaimandami huasita, shuj gimnasiota, carrotapash randircani. Carroca casi huasi valij preciomi carca. Shinallata culquita ashtahuan mirachingapaj munaimandami shuj empresapi invertircani. Alpacunata shuj huasicunatapashmi randircani.

Cashna tucuita charishpapash na contento caimandami sololla, imapash illajshna sintirijurcani. Chai tiempopaca ñucaca ñami cazado carcani. Quimsa churicunatami charircani. Ñuca huarmiguhuan, ñuca huahuacunahuanbash casi seguidomi yangamanda culiran cariani. Chaimi ñucapa familiaca, ñuca ima hora culirashcata o ñuca ima hora ali cajta yachangapaca ñuca ñavita ricun carian.

Shuj punllaca ñuca huarmigumi Bibliataca testigo de Jehovacunahuan yachajui callarirca. Chaimandami ñucanchi causaipica cambiocunata rurai callarircanchi. Ñuca huarmigu testigo de Jehovacunapa tandanajuiman risha nijpica, shinaca tucuilla familia jacuchi nircanimi. Cunangamanmi congregacionmanda shuj anciano huauquigu ñuca huasiman Bibliamanda yachachingapaj shamushcata yarini. Chai punllapi yachajushcacunaca shungumanmi chayahuarca.

BIBLIAMI ÑUCA CAUSAITA CAMBIASHCA: Efesios 5:​5​pi nishcatami liircani. Chaipica: “Huainayashpa causajpash, mapatalla rurashpa causajpash, yanga dioscunata mañanshna charijyanatalla munashpa causajpash, Cristohuan, Taita Dioshuan mandajuj llactapica, imatapash na japigringachu. Chaitaca ñami yachanguichi” nijurcami. Cai shimicunaca shungumanmi chayahuarca. Chaipimi carreracunapica gentecunaca apostashpa, shinallata ashtahuan culquitalla charichun animan cashcata cuenta japircani. Chaimandami nali sintirishpa: Jehová Diospa ñaupajpi ali ricuringapaca campeonatocunapi participashpa, carreracunata gananataca saquinami cani yarcanimi. Ñucapaca chaica shinllimi ricurirca.

Shuj shuj carreracunata ganashpami tucuchishca carcani. Shinapash shuj shuj carreracunami ñalla callarigrijurca. Bibliata estudianaca ñuca tranquilo, cushilla sintirichunmi ayudahuan carca. Shinapash carreracunapica na shina sintirinllu carcani. Chaimandami Bibliata estudiai callarishcamandaca quimsa viaje más cai carreracunapica participarcani. Shinapash ñuca shungupica participashpa catingapaj munajurcanirami. Shinallata cai carrerata saquishpaca ñuca familiata mantiningapaca imatashi rurasha yajurcanimi. Ñuca taitamacunaca Bibliata testigocunahuan yachajui callarishcamandaca na contento carcachu. Chaimandami ñuca taitaca llaqui llaqui sintirijurca. Cai tucui cosascuna pasajujpimi yapata estresarijpi ñucataca cuerpopi shuj úlcera llujshihuarca.

Cashna llaquilla preocupado sintirijujpica, Bibliata yachajushpa catina, testigo de Jehovacunapa tandanajuicunaman rinami ninanda ayudahuarca. Asha ashami Jehová Diospica tucui shungu confiashpa catircani. Chaimandami Jehová Diostaca ayudahuai nishpa mañarcani. Jehová Diosca ñuca mañaicunataca uyarcami. Ñuca huarmigupash ñuca ama yapata preocuparichunga, ñucaca cushilla causangapaca na shuj jatun huasitaca minishtinichu nihuarcami. Chaipashmi ñucataca tranquilo sintirichun ayudahuarca. Chaimandami asha asha ñaupaman cati usharcani.

¿IMA BENDICIONGUNATATA CHASQUIPASHCANI?: Mateo 6:​33​pi nishca shimicuna ciertopacha cashcatami ñucapacha ricushcani. Chaipica: “Ashtahuangarin Taita Dios mandajuj llactagupi causanatara, imagutapash cashcatapacha rurashpa causanatarami, pundaca mascana canguichi. Shina causajpica, tucui chaicunata canguna munashcataca jahuan jahuan caramujungallami” nijunmi. Jesuspa nishca shimicunaca ciertomi cashca. Ñucanchi causaipica nunca imapash minishtirishca cosasgucunaca na faltashcachu. Aunque na pundashna culquita ganajushpapash ñucanchipa tucui minishtirishca cosasgucunapami charipashcanchi.

Jehová Diosta shuj huauquipanicunahuan igual sirvinami ñucataca ninanda cushichihuashca. Ñuca familiapipash ashtahuan cushillami causanajupanchi. Ñucapa quimsa churicunapashmi paicunapa huarmigucunahuanga Jehová Diostaca tucui shungu sirvinajupan.