1. Shinlli feta charimanda y Jehovapi tucui shunguhuan confiaimandaca ¿imatata Moisesca rurarca?

 HEBREOS libropica Jehová Diospi feta charishca gentecunamandami parlan. Por ejemplo, Moisés shinlli feta charishcatami parlan (Heb. 3:​2-5; 11:​23-25). Moisesca shinlli feta charimandami faraondapash, paipa soldadocunatapash na manllashpa israelitacunataca Egiptomanda llujchirca. Jehová Diospi tucui shunguhuan confiaimandami, Moisesca israelitacunata Mar Rojoman apashpa, chai jipaca desiertomanbash pusharca (Heb. 11:​27-29). Ashtaca israelitacunaca Jehová Dios paicunata cuidanataca na tucui shungu confiarcachu. Shinapash Moisesca Jehová Diospica tucui shungumi confiashpa catirca. Jehová Diospi confiashpaca Moisesca alitami rurarca. Porque Jehová Diosca israelitacuna desiertopi cajpica micunata, yacuta cushpami paicunataca cuidarca (Éx. 15:​22-25; Sal. 78:​23-25). a

2. ¿Imamandata Jehová Diosca ‘¿ñucaca maqui illachu quidashcani?’ nishpa Moisestaca tapurca? (Números 11:​21-23).

² Egiptomanda más o menos shuj huata llujshishca jipami Jehová Diosca israelitacunamanga aichata carasha nirca. Moisesca shinlli feta charishpapashmi, Jehová Diosmandaca dudajurca. Desiertopica maimandashi Jehová Diosca ashtaca millón gentecunaman micuchingapaca aichata llujchinga yashpami Moisesca dudajurca. Chaimi Jehová Diosca ‘¿Mandaj Dios ñucaca, maqui illachu quidashcani?’ nishpa Moisestaca tapurca (Números 11:​21-23​ta liipangui). Cai textopi “maqui” nishpaca Jehová Diosca paipa espíritu santomandami parlajurca. Shuj shimicunapi  nishpaca, Jehová Diosca Moisesmanga “ñuca imata rurasha nishcata rurangapaca ashtaca podertami charini” nijurcami.

3. Israelitacunata y Moisesta ima pasashcata yachajunaca ¿imamandata importante can?

³ Huaquinbica ñucanchicunapashmi Jehová Diosca ñucaman y ñucapa familiamanga minishtirishca cosasgucunata carangacha nishpa pensaripanchi. Cai temapica, Jehová Diospi confianata saquishca israelitacunamanda y Moisesmandami yachajugripanchi. Shinallata, Jehová Diospi tucui shungu confiachun ayudaj textocunamandapashmi yachajugripanchi.

ISRAELITACUNAMANDA Y MOISESMANDACA¿IMATATA YACHAJUPANCHI?

4. ¿Imamandata ashtaca israelitacunaca quejari callarirca?

⁴ ¿Imamandata ashtaca israelitacunaca Jehová Dios paicunata cuidai ushanataca dudai callarirca? Egipto llactamandaca ashtaca israelitacuna y shuj llactacunamanda gentecunapashmi llujshirca. Jehová Dios carasha nishca alpacunaman chayangapaca, ashtaca tiempotami paicunaca desiertopi purinajurca (Éx. 12:38; Deut. 8:15). Shuj llactamanda gentecunaca maná nishca micunaguta ñana micungapaj munaimandami quejarinajurca. Chaimi israelitacunapash paicunashna quejari callarirca (Núm. 11:​4-6). Paicunaca Egiptopi tiashca micunacunatami extrañanajurca. Chaimi Moisesca gentecuna ama quejarinajuchunga ñucami aichataca paicunaman cuna cani yarca (Núm. 11:​13, 14).

5, 6. Shuj llactamanda gentecunaca ¿imashinata israelitacunataca afectarca? Chaimandaca ¿imatata yachajupanchi?

⁵ Israelitacunaca shuj llactamanda gentecunashnami malagradecidocuna tucurca. Na cuidadota charishpaca ñucanchicunapashmi cai mundopi gentecunashna malagradecidocuna tucushun. Malagradecidocuna tucushpaca, Jehová Dios carashca cosasgucunahuanga na cushilla sintirishunllu. Punda charishca cosascunatami extrañai callarishun o shujcunatapashmi envidiashpa ricui callarishun. Pero ñucanchi charishca cosascunahuanlla contento cashpaca ashtahuan cushillami sintirishun.

⁶ Jehová Diosca ashtaca bendiciongunata carasha nishpami israelitacunamanga prometirca. Chai promesatami israelitacunaca yuyarina carca. Pero desiertopi cashpaca Jehová carasha nishca bendiciongunataca na chasquinachu carca. Sino Jehová Dios carasha nishca alpacunapi cashpami chasquina carca. Ñucanchicunapash, cai mundopi na chari ushashca cosascunapi pensarinapa randica, paraíso alpagupi cashpa charina bendiciongunapimi pensarina capanchi. Shinallata, Jehová Dios cuidanapi confiachun ayudaj textocunapimi pensarina capanchi.

7. Jehová Dios ayudangapaj poderta charishcataca ¿imamandata seguro caita ushapanchi?

⁷ Jehová Diosca ¿imamandashi Moisestaca ‘¿Mandaj Dios ñucaca, maqui illachu quidashcani?’ nishpa tapushcanga? Shina nishpaca ashtaca poderta charishcata y gentecuna maipi cajpipash paipa poderhuan ayudai ushashcatami Jehová Diosca Moisesmanga intindichingapaj munashcanga. Jehová Diosca israelitacuna desiertopi cajpipashmi paicunaman aichata carangapaca poderta charirca. Jehová Diosca paipa “poderta utilizashpami” ninan ushaita charishcataca ricuchirca (Éx. 6:6). Chaimandami ñucanchicunaca maipi cashpapash o ima pruebacunapi cashpapash, Jehová Dios paipa ninan poderhuan ayudai ushanataca seguro cana capanchi (Sal. 138:​6, 7).

8. Israelitacunashna ama pandaringapaca ¿imatata rurana capanchi? (Dibujota ricupangui).

⁸ Jehová Diosca ashtaca ashtaca codornizcunata cushpami paipa llactaman aichata carasha nishcataca pactachirca. Shinapash chai milagrota Jehová Dios rurashcamandaca israelitacunaca na agradicircachu. Ashtahuangarin, ansiarishpami tuta y punlla codornizcunataca tandachinajurca. Chaimandami Jehová Diosca  ‘na amishpa micuj gentecunahuanga’ ninanda culirashpa paicunataca huañuchirca (Núm. 11:​31-34). Shinaca ¿imatata yachajupanchi? Ama ansiosocuna tucungapaj cuidarina cashcatami yachajupanchi. Charij o pobre cashpapash ‘Taita Diospa ricuipi importante cosascunata ruranami’ ñucanchipaca ashtahuan importante cana can. Pero chaipaca Jehová Dioshuan y Jesushuan ashtahuan ali amigocuna cangapami esforzarina capanchi (Mat. 6:​19, 20; Luc. 16:9). Shina rurashpaca Jehová Dios ñucanchicuna minishtishca cosascunata caranataca seguromi capashun.

9. ¿Imatata seguro caita ushapanchi?

⁹ Cunan punllacunapipashmi Jehová Diosca paipa sirvijcunata ayudangapaca listo can. Shinapash culqui o micunaca nunca na faltahuangachu nishpaca na pensanachu capanchi. b Jehová Dios ñucanchicunata nunca na saquinata, ima llaquicuna ricurijpipash chai llaquicunata aguantachun fuerzata cunataca seguromi cana capanchi. ¿Ima situaciongunapita Jehová Dios ñucanchita cuidanataca seguro caita ushapanchi? 1) Culqui faltajlla cashpa, 2) mayoriashpa culquita na charinata preocuparijushpa.

CULQUI FALTAJLLA CASHPA

10. Último punllacuna ña tucurijushcamandaca ¿ima problemacunatallata talvez charipashun?

¹⁰ Tucurimui punllacunaca ñami tucurijun. Chaimandami culquimanda problemacunaca ashtahuan miranga. Gobiernocuna cambiajpi,  guerracuna o terremotocuna tiajpi, o shuj pandemiacuna tiajpimi talvez trabajo illa, huasi illa o ñucanchi charishca cosascunapash illa quidapashun. Chaimi talvez ñucanchi causajuj pushtupi shuj trabajota mascana tucushun. O ñucanchi minishtirishca cosasgucunata charingapami ñucanchi familiahuanga shuj ladocunaman trabajangapaj rina tucushun. Shinaca, Jehová Dios ayudanapi confiashpa decidichunga ¿imata ñucanchitaca ayudanga?

11. Culquimanda problemacuna tiajpica ¿imatata rurai ushapanchi? (Lucas 12:​29-31).

¹¹ Ali decisiongunata agllangapaca, Jehová Diosmanmi tucui ñucanchi preocupaciongunata villana capanchi (Prov. 16:3). Jehovataca ali decisiongunata japingapaj ali yuyaita cuhuai nishpami mañana capanchi. Y ‘ama yapata pinarijungapami’ tranquilo sintirichun ayudahuai nishpapash mañana capanchi (Lucas 12:​29-31​ta liipangui). Charishca cosascunahuanlla contento cachun ayudahuai nishpapashmi mañaita ushapanchi (1 Tim. 6:​7, 8). Shinallata culquimanda problemacuna tiajpi imata ruranata yachangapaca, ñucanchi publicaciongunapimi ashtahuan informacionda mascaita ushapanchi. Ashtaca huauquipanicunataca culquimanda parlaj temacunata, videocunata jw.org paginapi ricunami ayudashca.

12. Nara imatapash decidishpallata ¿ima tapuicunapita pensarita ushapanchi?

¹² Huaquingunaca paicunapa familiata saquishpami caru llactacunaman trabajangapaj rishca. Shinapash tiempohuanga chai decisión nali cashcatami cuenta japishca. Chaimi shuj trabajota nara agllashpallata culquipilla pensarinapa randica, espiritual cosascunapi imashina afectanata pensarina capanchi (Luc. 14:28). Nara decidishpallatami “chai trabajota aceptajpica ¿ñuca matrimonioca imashinashi afectaringa? ¿Tucui tandanajuicunaman rita, predicacionman llujshita, huauquipanicunahuan tandanajuitaca ushashacha?” nishpami pensarina capangui. Shinallata carupi trabajangapaj rishpaca ¿imashinashi huahuacunataca ‘Jehová Dios nishcashna consejashpa, yachachishpa viñachitaca’ ushasha? nishpapashmi pensarina capangui (Efes. 6:4). Shuj decisionda japigrijushpaca, Jehovata na sirvij familiacunapa, amigocunapa nishcata catinapa randica, Jehová Dios nishcatami catina capangui. c Asia llactamanda Tony huauquimanga caru llactacunapi trabajachunmi shuj shuj trabajocunata ofrecirca. Pero Tonyca Jehová Diosta mañashpa y paipa huarmiguhuan parlashpami chai trabajocunata rechazanata y ashatalla gashtanata decidirca. Chai trabajocunata rechazashcamandaca Tonyca cashnami nin: “Ashtaca gentecunatami Jehovata rijsichun ayudapashcani. Ñuca huahuacunatapashmi Jehovaman quimirichun ayudapashcani. Mateo 6:33​pi shimicunata pactachijpica, Jehová Dios ñucanchicunata cuidanatami yachajupashcanchi” ninmi.

MAYORIANAPI PREOCUPARIJUSHPA

13. ¿Imatata cunanbillata ruraita ushapanchi?

¹³ Mayoriana tiempomanda preocuparinaca normalmi can. Pero Jehovapi confiashcataca ricuchinami capanchi. Bibliapica, jipa punllacunapi minishtirishca cosasgucunata charingapaca shinllitami trabajana canguichi ninmi (Prov. 6:​6-11). Usharijpica jipa punllacunapa asha culquiguta ahorranaca alimi can. Shinapash, aunque asha culquita charina minishtirishca cajpipash, culquita charinapillaca na pensarinachu capanchi (Ecl. 7:12).

14. ¿Imashinata Hebreos 13:5​pi shimicunaca ama yapata preocuparichun ayudan?

¹⁴ Jesusca ashtaca cosascunata charinapilla preocuparijcunaca ‘Taita Diospa ñaupapica nimata na charijcunashnami’ can nircami (Luc. 12:​16-21). Caya punlla ñucanchihuan ima pasanataca na yachapanchichu (Prov. 23:​4, 5; Sant.  4:​13-15). Shinallata Jesusca paipa catijcunataca, cangunapa charishca tucui cosascunata saquingapami dispuesto cana canguichi nirca (Luc. 14:33). Judea llactamanda primer cristianocunaca, paicunapa cosascunata saquingapaca dispuestomi carca (Heb. 10:34). Cunan punllacunapica ashtaca huauquipanicunami politicata na apoyaimandaca, trabajo illa o paicunapa charishca cosascuna illa quidashca (Apoc. 13:​16, 17). Shinapash paicunaca Jehová Diospa promesapimi tucui shungu confiashca. Jehová Diosca “ñucaca nunca na candaca saquishachu, nunca na candaca jichushachu” nircami (Hebreos 13:5​ta liipangui). Mayoriashpa minishtirishca cosasgucunata charingapaj esforzarinaca alimi can. Pero ñucanchi yuyashcashna imagupash na llujshijpica Jehová Diospi confiashcataca ricuchinami capanchi.

15. Cristiano taitamamacunaca ¿paicunapa huahuacuna imashina viñachunda munan? (Fotota ricupangui).

¹⁵ Huaquin llactacunapi gentecunaca, mayoriajpi paicunaman culquita cuchun, paicunata cuidachunmi huahuacunataca charin. Pero Bibliapica taitamamacunami huahuacunapaca ahorrana can ninmi (2 Cor. 12:14). Taitamamacuna mayoriashpa culquiguhuan o imagupipash ayudachun minishtinajujpica, ashtaca huahuacunaca cushijushpami ayudan (1 Tim. 5:4). Pero cristiano taitamamacunaca huahuacuna paicunata cuidachun nishpaca paicunapa huahuacunataca  na viñachinllu. Sino Jehovata ashtahuan sirvina munaihuan viñachingapami esforzarin (3 Juan 4).

16. Taitamamacunaca ¿imashinata paicunapa huahuacunataca ayudaita ushan? (Efesios 4:28).

¹⁶ Huahuacunata paicunapa minishtirishca cosasgucunata charichun ayudanajushpaca, quiquingunapa ejemplohuanmi Jehová Diospi confiashcata ricuchina capanguichi. Uchillagumandapachami shinllita trabajana cashcata yachachina capanguichi (Prov. 29:21; Efesios 4:28​ta liipangui). Quiquingunapa huahuagucuna viñanajujpica, escuelapi, colegiopi yachajungapaj esforzarichunmi ayudana capanguichi. Shinallata estudiocunamandapash aliguta decidichunmi ñucanchi publicaciongunapi ali consejocunata mascashpa ayudaita ushapanguichi. Huahuacunataca paicunapa minishtirishca cosasgucunata charichun, predicacionman llujshingapaj tiempota charichun, usharijpicarin precursorcuna tucuchunmi ayudana capanguichi.

17. ¿Imatata seguro capanchi?

¹⁷ Jehová Diosta sirvijcunaca ñucanchi minishtishca cosasgucunata Jehová Dios carangapaj munashcata y carangapaj poderta charishcataca na dudapanchichu. Último punllacuna ña tucurijujpicarin Jehová Diospi confiashcataca ashtahuanmi ricuchina capanchi. Pero ima pasajpipash, Jehová Dios paipa poderta utilizashpa ñucanchi minishtishca cosasgucunata caranataca tucui shungumi confiana capanchi. Ñucanchicunata ayudangapaj Jehová Dios ashtaca poderta charishcata y ñucanchicuna maipi cajpipash Jehová Dios ayudanataca seguromi capanchi.