1. ¿Imata rurashpata cushilla causaita ushapangui?

 TAITAMAMACUNAPA nali ruraicuna o ali ruraicunaca huahuacunamanga llaquilla o cushilla causaitami apamuita ushan. Pero huahuacuna viñarishpaca paicunallatami imata ruranata agllana can. Shinapash Jehovata sirvinata agllanami ninanda cushichin (Sal. 73:28).

 2. Josepash, Mariapash, Jesuspash ¿imata ruranatata agllarca?

² Josepash, Mariapash paicunapa churicuna Jehovata sirvichunmi munarca. Paicunapa decisiongunahuanmi Jehovata sirvina ashtahuan importante cashcata paipa huahuacunamanga ricuchirca (Luc. 2:40, 41, 52). Jesuspash ali decisiongunata agllaimandami Jehovapa munaita aliguta pactachirca (Mat. 4:1-10). Jesús joven tucushpaca tucui shunguhuan juyaj, ali ali churimi carca. Jehovata juyaj taitamamacunapaca shina churita charinaca shuj jatun cushijuimi can.

 3. ¿Ima tapuicunatata yachajugripanchi?

³ Caipica cai tapuicunamandami yachajupashun. Jesuspa causai ali cachunga ¿imatata Jehová Diosca agllana tucurca? Testigo taitamamacunaca ¿imatata Josemanda, Mariamandapash yachajuita ushapanguichi? Joven Testigocunaca ¿imatata Jesusmandaca yachajuita ushapanguichi?

 4. Jehová Diosca ¿imatata agllana tucurca?

⁴ Jehová Diosca alipacha taitamamacunatami Jesuspaca cai alpapi agllarca (Mat. 1:18-23; Luc. 1:26-38). María huarmigupa nishcacunata Bibliapi liishpami Jehovata, paipa Shimimanda yachajunatapash tucui shunguhuan juyashcata ricupanchi  (Luc. 1:46-55). Josepash Jehová Dios nishcata cazushpaca Jehovata tucui shunguhuan juyashcatami ricuchirca (Mat. 1:24).

5, 6. ¿Jehová Diosca paipa churi ima llaquicunata charichunda saquirca?

⁵ Imashinami ricupanchi, Jesusta viñachichunga Jehová Diosca charij taitamamacunataca na agllarcachu. ¿Imamandata chaitaca yachapanchi? Jesús nacirishca jipaca Josepash, Mariapash Jehová Diosman sacrificiota cugrinajushpaca palomagucunatami curca. Shinami pobrellagucuna cashcata ricupanchi (Luc. 2:24). Nazaretpica Joseca shuj carpinteriatami paipa huasi ladopi charirca. Paicunaca 7 huahuacunata charishpapash minishtirishca cosascunahuanllami causanajurca (Mat. 13:55, 56).

⁶ Jehová Diosca paipa churita cuidashpapash huaquin llaquicunata charichunmi saquirca (Mat. 2:13-15). Jesuspa propio familiallatami pai Mesías cashcataca na cringapaj munarca. Chaicunata ricushpami Jesusca llaquillapacha sintirishcanga (Mar. 3:21; Juan 7:5). Shinallata paipa taita José huañujpica ninandami llaquirishcanga. Jesús rucu churi caimandaca carpinteriapi trabajanataca paimi ricuna tucushcanga (Mar. 6:3). Jesusca familiata mantiningapaj, paicunata cuidangapami shinllita trabajana tucurca. Paica punlla entero trabajashpa yalimandami shaijushca sintirin carianga.

 7. a) Cusahuarmicuna huahuacunata charingapaj munashpaca ¿imatata tapurina can? b) Proverbios 2:1-6​pi nishca shinaca taitamamacunaca ¿imatata huahuacunamanga yachachina can?

⁷ Cusahuarmicuna huahuacunata charingapaj munashpaca cashna tapuripaichi: “Shuj huahuaguta cuidangapaca ¿humildecuna cashcata, Jehovata cazuj cashcatachu ricuchinchi?” (Sal. 127:3, 4). Cutin ña shuj huahuaguta charishpaca cashna tapuripaichi: “¿Familiata mantiningapaj shinllita trabajana minishtirishca cashcatachu ñucanchi huahuacunamanga yachachipanchi?” (Ecl. 3:12, 13). “¿Cai nali mundopa cosascunamanda ñuca huahuacunata cuidangapachu esforzarini?” (Prov. 22:3). Huahuacunata tucuimanda cuidaitaca na ushanchichu. Pero problemacunata charijpi imata ruranatami yachachita ushapanchi. ¿Imashinata yachachita ushapanchi? Siempre Biblia imata nijtami taitacunaca yachachina can (Proverbios 2:1-6, liingui). Por  ejemplo, familia ucumanda maijanbash Jehovata sirvinata saquijpica imamanda Jehovata tucui shunguhuan sirvina minishtirishca cashcatami huahuacunamanga Bibliahuan yachachina capanguichi (Sal. 31:23). O shuj juyashca familia o amigo huañujpica ama yapata llaquirichunmi Bibliamanda textocunahuan tranquilo sintirichun ayudai ushapanguichi (2 Cor. 1:3, 4; 2 Tim. 3:16).

 8. Deuteronomio 6:6, 7​pi mandashcataca ¿imashinata Josepash, Mariapash pactachirca?

⁸ Josepash, Mariapash ¿imashinata Jesús Jehovapa ñaupajpi ali ricurichunga ayudarca? Taitamamacunaman Jehová Dios cushca mandashcacunatami paicunaca siempremi cazurca (Deuteronomio 6:6, 7, liingui). Josepash, Mariapash tucui shunguhuanmi Jehovataca juyan carca. Chai juyaitallata charichunmi paicunapa huahuacunamanga yachachirca.

 9. Jehovata tucui shunguhuan sirvingapaca Josepash, Mariapash ¿imatata ruran carca?

⁹ Jehovata tucui shunguhuan sirvingapaca Josepash, Mariapash ¿imatata ruran carca? Paicunaca Nazaretpi tiashca sinagogaman cada semanami yachajungapaj rin carca. Shinallata cada huatami pascua punllata yaringapaj Jerusalenman rin carca (Luc. 2:41; 4:16). Josepash, Mariapash Jerusalenman rinajushpami Jesustapash, paipa huauquipanicunatapash Jehovamanda yachachingapaj aprovechan carianga. Shinallata chai ñangunata rinajushpami Bibliapi parlashca pushtucunata visitan cashcanga. Ashtaca huahuacunata charimandami Josepa, Mariapapash Jehovamanda yachachinaca difícil cashcanga. Shina cashpapash, Jehovamanda yachachinata pundapi churaimandaca paicunapa familia ucupica tucuicunami Jehovata sirvinata yachajurca.

10. Jehovata sirvij taitamamacunaca ¿imatata Josemanda, Mariamandapash yachajuita ushan?

¹⁰ Jehovata sirvij taitamamacunaca ¿imatata Josemanda, Mariamandapash yachajuita ushapanguichi? Huahuacunamanga parlocunahuan, ruraicunahuanmi Jehovata tucui shunguhuan juyashcata ricuchina capanguichi. Quiquinba huahuacunaman chaita yachachinami ashtahuan minishtirishca can. Shinallata quiquinba huahuacunamanga Bibliamanda yachajunata, Jehovata mañanata,  tandanajuicunaman na faltashpa rinata, Jehovamanda villachinatapashmi yachachina capanguichi (1 Tim. 6:6). Quiquinba huahuacunamanga paicuna minishtirishca cosascunatapash cuna capanguichi (1 Tim. 5:8). Shinapash quiquinba huahuacuna Armagedonbi salvarichunga Jehovahuan ali amigocuna canami ayudanga. Chaitaca na cunganachu capanguichi (Ezeq. 7:19; 1 Tim. 4:8). b

11. a) Taitamamacuna ali deciongunata agllachunga ¿imashinata 1 Timoteo 6:17-19​pi nishca shimicunaca ayudan? b) Jehovata ashtahuan sirvingapaca familiaca ¿imatata rurai ushan? c) ¿Ima bendiciongunatata charita ushan? (“ Testigo taitamamacunaca ¿imatata rurai ushan?” nishca recuadrota ricupangui).

¹¹ Jehovata sirvij taitamamacuna paicunapa familiapi pensarishpa ali desiciongunata agllajpica ninandami cushijupanchi. Familia enteromi tandanajuicunaman, jatun tandanajuicunaman, villachinamanbash na faltashpa rin. Huaquin familiacunaca huaquinbilla villachij territoriocunapi villachishpa ayudangapami rin. Cutin shuj familiacunaca Betelta rijsingapaj o tandanajui huasicunata huasichishpa ayudangapami rin. Shina ayudangapaj munaj familiacunaca paicunapa propio culquiguhuan arreglocunata rurashpami rin. Chaimi huaquinbica paicunapaca na fácil can. Na fácil cajpipash ayudangapaj esforzarishcamandami Jehová Diosca ninanda bendician (1 Timoteo 6:17-19, liingui). Shina familia ucupi viñashcamandami chai huauquipanicunaca chai costumbretallata catishca. Chaimi paicunaca paicunapa taitamamacunataca ninanda agradicin (Prov. 10:22). c

12. Jesús viñarishpaca ¿imatata paillata decidina tucurca?

¹² Jesuspa taita Jehová Diosca siempremi ali decidishca. Shinallatami Josepash, Mariapash rurarca. Shinapash Jesús viñarishpaca paillatami decidina tucurca (Gál. 6:5). Ñucanchishnallatami Jesusca imata ruranata imata na ruranatapash agllana tucurca. Shinapash Jesusca paipa munaita ruraita ushanallami carca. Pero paica siempremi Jehová Dioshuan ali canata agllarca (Juan 8:29). Jesuspa ejemplomi cunanbi joven Testigocunataca ayudaita ushan.

13. Jesusca ¿imatata joven cashpaca rurarca?

¹³ Jesusca Joseta, Mariatapash siempremi cazun carca. Paica ñucami paicunata yali yachani nishpapash na pensanllu carca. Chaipa randica Jesusca paipa taitamamacunataca “aliguta cazushpami causajurca” (Luc. 2:51). Jesusca rucu churi cashcamanda familiata cuidana, mantinina responsabilidadta charishcataca alimi yacharca. Jesusca paipa taita José carpinteriata  yachachishcataca alimi yachajurca. Chaimi familiataca mantinita usharca.

14. ¿Imamandata Jesusca Diospa Shimimanda alipacha yacharca ni ushapanchi?

¹⁴ Jesuspa taitamamacunaca pai imashina nacirishcata, angelcuna imata nishcatapashmi paimanga parlarianga (Luc. 2:8-19, 25-38). Jesusca chai parlashcahuanllaca na quidarcachu. Chaipa randica paillatami Diospa Shimipi imata nijujta yachajurca. Jesús Diospa Shimimanda alipacha yachashcataca ¿imashinata yachapanchi? Jesusca chaira viñaj cashpallata Jerusalenbi yachachijcuna tapujpica “aligutapacha yarishpa tigrachijpimi, tucuicuna manllarishpa uyanajurca” (Luc. 2:46, 47). Jesusca 12 huataguta charishpallatami Jehová Dios paipa taita cajtaca ali yacharca (Luc. 2:42, 43, 49).

15. Jehovatalla sirvina munaita charishcataca ¿imashinata Jesusca ricuchirca?

¹⁵ Jesusca Jehovapa munaita pactachingapaj imata rurana cashcata intindishpami pactachingapaj decidirca (Juan 6:38). Ashtaca gentecuna paita na ricunayachinata yachashpapash Jehovata cazunatami paica decidirca. Jesusca huata 29​pi bautizarishpami Jehovatalla tucui shunguhuan sirvi callarirca (Heb. 10:5-7). Ña huañugrijushpapash Jesusca Jehovatalla sirvingapaj munashcatami ricuchirca (Juan 19:30).

16. Jesusmandaca ¿imatata huahuacunaca yachajuita ushan?

¹⁶ Taitamamacunata cazupangui. Jesuspa taita José, Mariapash juchayucunami carca. Shinallatami quiquinba taitamamacunapash juchayucuna can. Shinapash Jehová Diosca taitamamacunamanmi huahuacunata cuidachun, yachachichun mingashca. Chaimi taitamamacunataca cazuna capanchi. Shina ‘cazushpaca unai unaicamanmi causangui’ (Efes. 6:1-4).

17. Josué 24:15​pi nishca shinaca jovengunaca ¿imatata paicunallata agllana can?

¹⁷ ¿Pitata sirvigripangui? Jehová Dios pi cajta, paipa munai ima cajta, paipa munaita imashina pactachinatapash quiquinllatami ali ricuna capangui (Rom. 12:2). Shinallami quiquinba causaipica Jehovatalla sirvina munaita charipangui (Josué 24:15, liingui; Ecl. 12:1). Bibliata cada punlla liishpaca Jehovatami ashtahuan juyapangui. Shinallata paipi tucui shunguhuanmi cripangui.

18. Jovengunaca ¿imatata ashtahuan agllana can?

 ¹⁸ Quiquinba causaipica Jehovapa munaita pactachipangui. Diabloca jovenguna imata rurai ushashcata ricushpami paicunapa munashcata rurashpa cushilla causaita ushan nishpami crichingapaj munan. Pero maijanbash paicunapa causaipi charijyangapaj o ashtaca cosascunata charingapaj munashpaca ‘ninan llaquicunatami’ charita ushan (1 Tim. 6:9, 10). Pero Jehovata cazushpa, paipa munaita pundapi pactachinata agllashpaca ‘tucui imatalla rurashcapash alimi Ilujshinga’ (Jos. 1:8).

19. Taitamamacunaca ¿imatata siempre yarina can?

¹⁹ Jehovata sirvij taitamamacuna quiquingunapa huahuacuna Jehovata sirvina munaita charichun ayudapaichi. Jehová Dios ayudanapi tucui shunguhuan confiajpica paillatami quiquinguna ali decisiongunata agllachun ayudanga (Prov. 3:5, 6). Taitamamacunami ejemplota cuna capanguichi. Shinami huahuacunaca quiquinguna nishcata catinapa randica rurashcata ricushpa cazungapaj munanga. Shinaca taitamamacuna Jehovapa ñaupajpi ali canata ricupaichi. Shinallami huahuacunapash chaitallata rurangapaj munanga.

20. Jehovata sirvinata agllashpaca ¿ima bendiciongunatata jovengunaca chasquinga?

²⁰ Jovenguna quiquingunapa taitamamacunami ali decisiongunata agllachun ayudaita ushan. Shinapash Jehovapa ñaupajpi ali ricuringapaca cada unomi esforzarina canguichi. Shinaca Jesuspa ejemplota catishpa Jehovata sirvinata agllapaichi. Shina rurashpaca quiquinllatami cushilla, tranquilo causapangui (1 Tim. 4:16). Jipa punllacunapicarin para siempremi cushilla causaita charita ushapangui.