1, 2. Cunan tiempopi anciano huauquicunataca ¿imashpata apóstol Pablopa ejemploca ayudan?

  APÓSTOL Pabloca huauquipanicunataca ninandami juyarca, chaimandami paicunataca na shaijushpa ayudarca (Hech. 20:31). Chaimandami apóstol Pablotaca huauquipanicunaca ninanda juyarca. Por ejemplo, shuj punllaca Éfeso llactamanda anciano huauquicuna, apóstol Pablota cutinga ñana ricuna cashcata yachashpaca ‘tucuicunami ninanda huacashpa’ Pablotaca dispidirca (Hech. 20:37). Cunanbi anciano huauquicunapashmi apóstol Pabloshnallata, huauquipanicunataca ninanda juyashpa paicunata ayudangapaca ninanda esforzarin (Filip. 2:16, 17). Shinapash huaquinbica huaquin jarcaicunami ricurin. Chaicunata mishachunga ¿imata ayudaita ushan?

² Cunanbi anciano huauquicuna apóstol Pablopa ejemplota catishpaca alitami ruran (1 Cor. 11:1). Apóstol Pablopash ñucanchishnallata juchayuj, pandarijmi carca. Chaimandami huaquinbica alita rurangapaca ninanda esforzarina tucurca (Rom. 7:18-20). Apóstol Pabloca ashtaca llaquicunatami charirca, pero chai llaquicuna Jehová Diosta cushilla sirvinata jarcachunga na saquircachu. Anciano huauquicuna chai ejemplota catishpaca llaquicunata charishpapash Jehovata cushilla sirvishpa catita ushanchimi. Chaita imashina ruranata ricupashun.

3. Cai yachajuipica ¿imatata yachajugripanchi?

³ Cai yachajuipica anciano huauquicuna ima jarcaicunatalla charijtami parlagripanchi: 1) predicana, congregacionbi shuj responsabilidadcunatapash pactachingapaj tiempota aliguta ricuna, 2) huauquipanicunata juyaihuan cuidana, 3) paicunapa debilidadcunahuanllata chimbapurana, 4) huauquipanicunapa pandarishcacunata aguantashpa catina. Shinaca cashnapura llaquicunata charishpa apóstol Pablo imashna aguantashpa catishcata y chai ejemplota anciano huauquicuna imashna catina cashcatami yachajugripanchi.

4. Ancianocunapaca ¿imamandata siempre predicacionbi canaca huaquinbica difícil caita ushan?

⁴ Chaita ruranaca ¿imamandata shinlli ricurin? Anciano huauquicunaca predicacionbi shuj ali ejemplo cana cashpapash, congregacionbi tauca shuj responsabilidadcunatapashmi charin. Huaquinbica congregacionba entre semana tandanajuipica, anciano huauquigucunaca paicuna presidente cana asignacionda, shinallata Diospa Shimimanda Yachajungapaj yachachina parteta, discursocunata, o shuj asignaciongunatami pactachina can. Anciano huauquigucunaca, ashtaca tiempotami siervo ministerial huauquigucunata yachachishpa, congregacionmanda huauquipanicunata animashpa yalin (1 Ped. 5:2). Huaquin anciano huauquigucunacarin Jehovata sirvingapaj Salón del Reinopa construcciongunapi, shuj edificiocunapa construcciongunapipashmi ayudan. Shinapash tucui huauquipanicunapallatami villachinaca ashtahuan importante cana can (Mat. 28:19, 20).

5. Predicacionmanda parlashpaca apóstol Pabloca ¿ima ejemplotata saquirca?

⁵ Apóstol Pablopa ejemplo. Filipenses 1:10​pimi imamanda apóstol Pablopaca predicana importante cashcata ricuchin. Filipenses 1:10​pica: “Ima ashtahuan importante cajta, ashtahuan ricuchun” ninmi. Apóstol Pabloca chaitami rurarca. Apóstol Pablomanga Jehová Diosmanda villachichunmi mandarca. Chai mandashcacunaca apóstol Pablopa causaipica tucuita yali ashtahuan importantemi carca. Chaimandami apóstol Pabloca “tucuicunapa ñaupajpi”, shinallata huasin huasin rishpapash Diospa shimimandaca villachirca (Hech. 20:20). Apóstol Pabloca na shuj horariopilla o semanapi shuj viajetallaca Taita Diosmandaca villachinllu carca. Ashtahuangarin paica villachingapaca tucui tiempotami aprovecharca. Por ejemplo, shuj punllaca Apóstol Pabloca Atenas pueblopi Silasta, Timoteota shuyajushpami huaquin estudiashca importante gentecunaman predicarca. Shina predicajpimi huaquin gentecunaca Taita Diospi crij callarirca (Hech. 17:16, 17, 34). Apóstol Pabloca shuj huasipi vichai tucushca cashpapash tucui usharishca gentecunamanmi predicarca (Hech. 28:16-24; Filip. 1:13, 14).

6. Apóstol Pabloca huauquicunataca ¿imashinata yachachirca?

⁶ Apóstol Pabloca villachingapaca paipa tiempotaca aligutami utilizarca. Paica, paihuan predicachun shujcunata invitana costumbretapashmi charirca. Por ejemplo, apóstol Pablo primera vez shuj shuj llactacunapi predicai callarijushpaca Juan Marcostami pusharca. Cutin catipa rishpaca Timoteotami pusharca (Hech. 12:25; 16:1-4). Apóstol Pabloca Juan Marcosta, Timoteotaca congregacionda aliguta ñaupaman pushachun, huauquipanicunata ali cuidachun, ali yachachijcuna cachun yachachingapami esforzarirca (1 Cor. 4:17).

7. Efesios 6:14, 15​pi apóstol Pablopa consejotaca ¿imashinata anciano huauquicunaca catita ushan?

⁷ ¿Imatata yachajupanchi? Anciano huauquigucunaca huasin huasin predicangapaj, maipi cashpapash predicangapaca apóstol Pablopa ejemplotami catita ushan (Efesios 6:14, 15​ta liipangui). Por ejemplo, imatapash randingapaj rishpa, o  trabajo pushtupi cashpapash villachinallami can. O na cashpaca salón del Reinopa construccionbiman ayudajushpa chai construccionba materialcunata jatujcunaman o na cashpaca vecinocunamanbash predicanallami can. Shinallata anciano huauquicunaca apóstol Pablo rurashcashnallatami, predicacionbi cashpapash congregacionmanda siervo ministerial huauquicunata yachachingapaj tiempotaca aprovechaita ushan.

8. Huaquinbica ¿imatata anciano huauquicunaca rurana tucunga?

⁸ Anciano huauquicunaca congregacionba responsabilidadcunapi yapata ocuparimanda villachingapapash na tiempota llujchitaca na shinanachu can. Villachingapaj tiempoguta charita ushangapaca huaquinbica huaquin asignaciongunapi ayudaitaca na ushashachu ninami tucunga. Huaquinbica Jehová Diosta mañashpa pensarishca jipami congregacionba tucui asignaciongunata pactachijuimanda, tucui semana familiahuan Bibliata yachajungapaj, predicacionbi grupota apoyangapaj, ñucanchi huahuacunaman predicanata yachachingapajpash na tiempota charigrijushcata cuenta japi ushanchiman. Pero huaquingunapaca huaquin asignaciongunapica na ayudaita ushashachu ninaca shinllimi ricurita ushan. Pero Jehová Diosca ñucanchi tiempota tucuipa aliguta pactachingapaj munaimanda shina nijujtaca alimi intindin.

9. Ancianocuna ocupado cashcamandaca ¿imata ruranata paicunapaca shinlli ricurita ushan?

⁹ Chaita ruranaca ¿imamandata shinlli ricurin? Tucurimui punllacunapi causanajushcamandami, Jehovata sirvijcunaca ashtaca llaquicunata charipanchi. Chaimandami tucuicunallata apoyachun, animachun, consolachichun minishtipanchi. Huaquingunaca imapash nali ruraicunapi ama urmangapami ayudata minishtin (1 Tes. 5:14). Anciano huauquicuna huauquicunapa llaquicunata na tucuchi ushana cajpipash, Jehová Diosca ancianocuna huauquipanicunata cuidachun, animachunmi munan. Anciano huauquicuna ashtaca cosascunata ruranata charishpapash ¿imashinata shuj huauquipanicunata ayudangapaca tiempota llujchita ushan?

10. 1 Tesalonicenses 2:7​pi nishcashnaca apóstol Pabloca huauquipanicunataca ¿imashinata tratarca?

¹⁰ Apóstol Pablopa ejemplo. Apóstol Pabloca huauquipanicuna alita rurashcamandaca siempremi felicitashpa paicunataca animan carca. Ancianocunaca apóstol Pabloshna huauquipanicunata juyaihuan, llaquishpa tratashpaca alitami ruran (1 Tesalonicenses 2:7​ta liipangui). Apóstol Pabloca huauquipanicunamanga Jehová Diospash, paipash paicunata ninanda juyashcatami ricuchirca (2 Cor. 2:4; Efes. 2:4, 5). Apóstol Pabloca tucui huauquipanicunahuanmi amigo carca. Chaimandami paicunahuan tiempota yalin carca. Apóstol Pabloca huauquipanicunapi confiaimandami, pai imashina sintirishcata, paipa pandarishcacunatapash na pacashpa villarca (2 Cor. 7:5; 1 Tim. 1:15). Apóstol Pabloca paipa llaquicunapilla preocuparijunapa randica huauquipanicunata ayudanapimi ashtahuan preocuparirca.

11. Apóstol Pabloca huauquipanicunataca ¿imamandata consejan carca?

¹¹ Apóstol Pabloca huaquinbi huauquipanicunata consejashpaca pai culirashca caimandaca na consejarcachu. Ashtahuangarin paicunamanda preocuparishpa, paicunata ayudangapaj munaimanda, paicuna ama llaquicunapi urmachunmi  consejan carca. Apóstol Pabloca paipa consejocuna juyaihuan consejashca shimicuna cachun, huauquicuna chai consejota aliguman chasquichun munaitami charirca. Por ejemplo Corinto llactamanda huauquipanicunaman consejota shuj cartapi escribishpaca Titomanmi cacharca. Y chai consejota cai huauquipanicunaman cachashpallaca na saquircachu. Ashtahuangarin cai huauquipanicuna paipa consejota imashina chasquishcata yachangapapashmi munarca. Chaimandami Corinto llactamanda huauquipanicuna paipa consejota aliman chasquishcata uyashpaca ninanda cushijushcanga (2 Cor. 7:6, 7).

12. Anciano huauquicunaca huauquipanicunata animangapaca ¿imatata ruraita ushan?

¹² ¿Imatata yachajupanchi? Anciano huauquicunaca huauquipanicunaman tiempoguta llujchishpami apóstol Pablopa ejemplota catinajushcata ricuchin. Chaipaca anciano huauquicunaca tandanajuicunaman uchalla chayashpami huauquipanicunahuan parlashpa, paicunata animashpa, paicunata juyashcata ricuchita ushan (Rom. 1:12; Efes. 5:16). Anciano huauquicunaca apóstol Pablopa ejemplota catishpaca huauquipanicunata consejangapaca Bibliatami utilizan. Shinami paicunamanga Jehová Dios paicunata ninanda juyashcata ricuchin. Shinallata paicunata juyashcata ricuchingapaca paicunaman tiempoguta llujchishpa ali ruraicunamanda felicitashpami ricuchin. Anciano huauquicuna pitapash consejangapaca Bibliahuanmi consejana can. Consejocunata cazuchunga imata nalita rurajujta nishpapash juyaihuanmi nina can (Gál. 6:1).

13. Ancianocunaca paicunapa debilidadcunamandallata ¿imatata pensaita ushan?

¹³ Chaita ruranaca ¿imamandata shinlli ricurin? Ancianocunapash juchayu caimandami imagupipash siempre pandarita ushan (Rom. 3:23). Anciano huauquicunapaca huaquinbica paicunapa pandarishcacunamanda ama yapata preocuparingapami ninanda esforzarina tucun. Huaquinbica paicunapa pandarishcacunapi yapata pensarijuimandami paicunaca desanimarita ushan. Cutin huaquingunaca paicunapa pandarishcacunamandaca imapash importanciata na cushpami imapipash cambiangapaca na esforzarin.

14. Filipenses 4:13​pi nishcashnaca apóstol Pablotaca humilde canaca paipa debilidadcunapica ¿imashinata ayudarca?

¹⁴ Apóstol Pablopa ejemplo. Apóstol Pabloca humilde caimandami paipa debilidadcunata mishangapaca Taita Diospa ayudata minishtishcata cuenta japirca. Apóstol Pabloca Jesusta nara catij tucushpaca Jesusta catijcunataca catiriashpami llaquichirca. Shinapash tiempohuanga Jesusmanda yachajushpami paipa causaipi cambiashpa, nali cosascunata huashaman saquishpa alita rurangapaj esforzarirca (1 Tim. 1:12-16). Jehovapa ayudahuanmi huauquipanicunataca juyaihuan, llaquishpa tratarca. Paica humildemi carca. Apóstol Pabloca paipa pandarishcacunamanda llaquirishpapash, paica Jehová Dios ña perdonashcapi confiashpami pandarishcacunapilla ama yapata pensarijungapaj esforzarirca (Rom. 7:21-25). Apóstol Pabloca juchayu caimanda tucuipi na imatapash perfecto  rurai ushashcataca alimi yacharca. Chaimandami paipa cualidadcunapi mejorashpa, villachishpa catingapaca Jehová Diospa ayudata mascarca (1 Cor. 9:27; Filipenses 4:13​ta liipangui).

15. Anciano huauquicunaca paicunapa pandarishcacunataca ¿imashinata ricuna can?

¹⁵ ¿Imatata yachajupanchi? Anciano huauquicunaca paicunapa nombramientotaca perfectocuna cashcamandaca na chasquinllu. Shinapash Jehová Diosca paicuna imagupipash pandarishpaca, reconocishpa, mejorashpa catingapaj esforzarichunmi munan (Efes. 4:23, 24). Chaimandami Bibliata yachajushpaca paicunallata imapi mejorashpa catina cashcata paicunamandallata ricurina can. Shina rurajpica Jehová Diosca paicunapa responsabilidadtaca cushilla pactachichunmi ayudanga (Sant. 1:25).

16. Anciano huauquicuna huauquicunapa pandarishcacunatalla ricui callarijpica ¿imata pasanman?

¹⁶ Chaita ruranaca ¿imamandata shinlli ricurin? Huaquinbica anciano huauquicunaca shuj huauquipanicunahuan igual trabajashpami paicunapa pandarishcacunataca ashtahuan ricun. Chaicunapi na cuidadota charishpaca huauquipanicunataca shinlli rimashpa o paicunapa nali rurashcacunatalla ricushpami rimai callarita ushan. Apóstol Pabloca Satanasmi cashna yuyaicunata charichun munan nishpami Jesusta catijcunamanga nirca (2 Cor. 2:10, 11).

17. Huauquipanicunamandaca ¿imatata apóstol Pabloca ricun carca?

¹⁷ Apóstol Pablopa ejemplo. Apóstol Pabloca huauquipanicuna pandarijpipash ali yuyaihuanmi ricurca. Apóstol Pabloca huauquipanicunapa nali ruraicunata na intindishpa quidashcaimanga na carcachu. Huaquinbica huauquipanicunapa nali rurashcacunaca apóstol Pablotaca llaquichircami. Shinapash paica huauquipanicuna pandarijpica paicuna ¿nali gentecunapacha caimandachu rurashca? o na cashpaca ¿pandarimandallachu rurashca? imashi nishpami chaita ali yachangapaca aliguta pensarishpa ricun carca. Shinami huauquipanicunata juyaihuan ricushpa, paicunapa ali rurashcacunapi concentrari usharca. Alita rurana huauquipanicunapa shinlli ricurijujta ricushpaca paicunata mejorachun ayudajpi mejoranalla cashcataca seguromi sintirin carca.

18. Evodia, Síntique panigucunata apóstol Pablo imashina ayudashcamandaca ¿imatata yachajupanchi? (Filipenses 4:1-3).

¹⁸ Filipos congregacionmanda ishcai panigucunata imashina apóstol Pablo ayudashcata ricupashunchi (Filipenses 4:1-3​ta liipangui). Evodia, Síntique panigucunaca imamandacharimi asha problemata charishca yarin. Shinapash apóstol Pabloca cai panigucunataca na shinlli shimicunahuan nalicachishpaimanga tratarcachu. Ashtahuangarin paicuna imata ali rurashcapi, paicuna imashna tucuipi Jehová Diosta ali sirvishcapimi concentrarirca. Apóstol Pabloca Evodia, Síntique panicunata Jehová ninanda juyajtaca alimi yacharca. Apóstol Pabloca cai ishcai panigucunata aliman ricushpami, paicuna charishca problemacunata arreglachun animarca. Apóstol Pabloca huauquipanicunapa ali rurashcacunapi concentrarimandami congregacionbi cushilla caita, huauquipanicunahuan ali llevaritapash usharca.

19. a) Huauquipanicunataca ¿imashinata anciano huauquicunaca ricuna can? b) Shuj anciano huauquigu Salón del Reinota limpiajuj fotomandaca ¿imatata yachajui ushapanchi?

¹⁹ ¿Imatata yachajupanchi? Anciano huauquicunaca  huauquipanicunapa ali rurashcacunata ricungapami esforzarina capanguichi. Huauquipanicuna pandarishpapash, tucuicunallatami siempre imagupica ali ruraicunata charin (Filip. 2:3). Huaquinbica huauquipanicuna pandarijpi consejanami tucunga. Shinapash apóstol Pablo cuendami anciano huauquicunaca huauquicunapa pandarishcacunatalla ama ricujungapaj esforzarina can. Huauquicuna pandarishca cashpapash Jehová Diosta juyajta, Jehovata sirvishpa catishcata, paicuna mejorangapaj munashcatami ricungapaj esforzarina can. Anciano huauquicuna shina ali yuyaihuan huauquipanicunata ricujpimi, congregacionbica tucuicunallata juyaihuan ali llevarishpa catinga

20. Apóstol Pablopa ejemplomanda ashtahuan yachajushpa catingapaca anciano huauquicunaca ¿imatata rurana can?

²⁰ Anciano huauquicunataca apóstol Pablopa ejemplomanda yachajunaca ninandami ayudanga. Apóstol Pablopa ejemplomanda yachajungapaca “Testimonio cabal del Reino de Dios” nishca libropi, capítulo 12 página 99​pi o capítulo 21 página 166 y 167​tami ricui ushapangui. Cai libropi apóstol Pablopa ejemplota liijushpaca congregacionbi huauquipanicunata juyaihuan ayudashpa catingapaca ¿imashinata cai ejemploca ñucataca ayudahuan? nishpa tapuripaichi.

21. Anciano huauquicunaca ¿imatata seguro caita ushan?

²¹ Jehová Diosca ancianocunataca nimapi ama pandarichundaca na nijunllu. Ashtahuangarin Jehová Diosca paita tucuipi cazuchunllami munan (1 Cor. 4:2). Apóstol Pablo Jehovata juyaimanda imacunatalla rurashcataca Jehová Diosca ninandami valichirca. Hebreos 6:10​pica, ‘canguna imatalla ruranajushcataca na cunganllu. Paipaj shutita juyaimanda, Diospajlla causajcunaman cunangaman canguna chashna rurashpa catinajushcamandami na cungan’ nijunmi. Shinaca Jehovata sirvinamanda cada uno imatalla rurashcacunaca, Jehovapa ñaupajpi ninan valishca cajtaca seguromi cana capanchi.