1. Jehovata sirvijcunaca ¿ima llaquicunatata chimbapurana tucunchi?

 ¿LLAQUICUNAHUAN, problemacunahuanllu capanchi? Huaquinbica congregacionmanda shuj huauqui o shuj panimi ñucanchitaca llaquichishcanga (Sant. 3:2). O talvez Jehovata sirvijushcamandami trabajopi, escuelapi compañerocuna ñucanchimanda burlarinajun (1 Ped. 4:3, 4). Na cashpaca ñucanchi familiallatami tandanajuicunaman ama richun, Jehová Diosmanda ama villachichun imapash jarcaicunata churanajunga (Mat. 10:35, 36). Talvez cashna llaquicunahuan cashpami Jehová Diostaca ñana sirvishpa catingapaj munanajupashun. Shinapash ima llaquicunahuan cajpipash shinlli tucushpa ñaupaman catichun, imata ruranata ali yachachunbashmi Jehová Diosca ayudanga.

 2. Romanos 15:4​pi nishcashnaca Bibliata liinaca ¿imashinata ñucanchitaca ayudaita ushan?

² Bibliapica Jehovata sirvijcuna llaquicunata charishpa imata rurashcatami ricuchin. Chaicunamanda ñucanchicunapash yachajuchunmi Bibliapica escribichishpa saquishca. Apóstol Pabloca chaitami Romanos 15:4​pica nirca (chai textota liipangui). Diosta sirvijcunapa causaimanda liinami ñucanchitaca ninanda ayudaita ushan. Pero ñucanchi causaipi ayudachunga na liitallaca liinachu capanchi. Cai liishcacuna ñucanchi shunguman chayashpa, ñucanchi yuyaicunata cambiachunmi saquina capanchi. Shinaca imapash problemahuan cashpa imata ruranata na atinajushpaca caita rurapashunchi: Callaripica, Jehovata mañapashunchi. Catipica, Bibliata liijushpaca punda tiempopi cashcashna pensaripashunchi. Quimsapica, chai liishcacunapi  aliguta pensaripashunchi. Ultimopica, caicunata imashina pactachinata pensaripashunchi. Shinaca cada unota imashina pactachinata yachajupashunchi. b Jipamanga Davidpa causaimanda, apóstol Pablopa causaimanda yachajushpami cai yuyaicunata imashina pactachinata ricupashun.

 3. Bibliata nara liishpallata ¿imatata rurana capanchi?

³ Callaripica, Jehová Diosta mañana. Bibliata nara liishpallatami Bibliapi liishcacuna ñucanchita ayudachun Jehovata mañana capanchi. Shuj problemata charishpaca chai problemata arreglangapaj, ali consejocunata taringapaj ayudahuai nishpami mañanalla capanchi (Filip. 4:6, 7; Sant. 1:5).

 4. Bibliata liinajushpa ali intindingapaca ¿imatata rurana capanchi?

⁴ Catipica, punda tiempopi cashcashna pensarina. Imatapash liishpa punda tiempocunapi cashcashna pensarina yuyaitaca Jehová Diosmi carashca. Bibliapi liishcacunata ali intindingapaca, liijushpaca punda tiempopi causajushcashna pensaripashunchi.

 5. Bibliata liishcapi pensaringapaca ¿imata ayudaita ushan?

⁵ Quimsapica, liishcapi pensarina. Bibliata liishpa imata liijushcapi aliguta pensarinami imata liijushcata aliguta intindichun ayudan. Liishcapi aliguta pensaringapaca cai tapuicunami ñucanchitaca ayudaita ushan: Bibliapi imagutapash liishca jipaca, chai problemata arreglangapaca ¿imatata rurarca? Jehová Diosca ¿imashinata ayudarca? Caicunaca ñucapa problemacunata aguantashpa catichunga ¿imashinata ayudaita ushan? nishpa.

 6. Bibliapi yachajushcacunataca ¿imamandata ñucanchi causaipica pactachina capanchi?

⁶ Ultimopica, Bibliapi liishcacunata ñucanchi causaipi pactachina. Jesusca Bibliapi nishcacunata na pactachijcunaca arena jahuapi shuj huasita huasichishcashnami can nircami. Arena jahuapi huasichishca huasica shinlli huairahuan tamiajpica huasica urmangallami. Chaica yangallatami canga (Mat. 7:24-27). Shina cuendami Bibliata liingapaj Jehovata mañashpa, punda tiempopi cashcashna pensarishpa Bibliata liingapaj esforzarishpa, liishcacunapi ali pensarishpapash, ñucanchi causaipi cai liishcacunata na pactachishpaca yangallatami canga. Llaquicuna shamujpica ñana Jehovapi tucui shunguhuan crishpa catita ushashunllu. Pero Bibliapi yachajushcacunata ñucanchi causaipi pactachishpaca ali decisiongunata japishpami tranquilo, cushilla causashun. Jehová Diospipashmi tucui shunguhuan crishpa catishun (Is. 48:17, 18). Cunanga Davidpa causaimanda liipashunchi. Liijushpaca chairalla yachajushca chuscu yuyaicunata pactachipashunchi.

 7. Caipica ¿picunamandata yachajugripanchi?

⁷ Shuj familia o shuj amigochu ¿ñucanchitaca llaquichishca? Shina cajpica rey Davidpa churi Absalonmanda yachajupashunchi. Absalonga pai rey cangapaj munaimandami, paipa propio taitataca ama rey cachun munashpa ninanda llaquichirca (2 Sam. 15:5-14, 31; 18:6-14).

 8. Jehová Diostaca ¿imatata mañaita ushapanchi?

⁸ Callaripica, Jehová Diosta mañana. Davidpa, Absalonba causaimanda yachajushca jipaca, pipash ñucanchita llaquichijpi imashina sintirishcata Jehová Diosman parlapashunchi (Sal. 6:6-9). Chai jipaca, imata ruranata ali yachangapaj ayudahuai nishpa Jehovata mañapashunchi.

 9. Davidhuan Absalonhuanga ¿imata pasarca?

⁹ Catipica, punda tiempopi cashcashna pensarina. Rey Davidpa tiempopi causajushcashna, llaquicunahuan cashpa David imashina  sintirishcapi pensaripashunchi. Absalonga rey tucungapaj munaimandami ashtaca huatacunata gentecunapa ñaupapi ali quidangapaj imacunatapash rurajurca (2 Sam. 15:7). Shinajushpallatami gentecuna paita ña rey shina chasquinatashna sintishpaca, ñami rey tucushca nishpa villagrichun huaquin jaricunata Israel llacta enterota cacharca. Davidpa amigo Ahitofeltapashmi paipa lado tucuchun convincirca. Absalonga paipa munai rey tucushpami paipa taita Davidtaca huañuchingapaj munarca. Chai tiempopica Davidca talvezpashmi ungushca cashcanga (Sal. 41:1-9). David paipa churi Absalón paita huañuchinata yachashpami Jerusalenmandaca pacajushpa rirca. Jipamangarin Davidpa soldadocunahuanmi Absalonba soldadocunaca macanajurca. Shinapash Davidpa soldadocuna mishashpami Absalondaca huañuchirca.

10. Rey Davidca ¿imacunatata rurai ushanman carca?

¹⁰ Cunanga cashna llaquicunahuan cashpa David imashina sintirishcata ricupashunchi. Davidca paipa churi Absalondaca ninandami juyan carca. Paipa amigo Ahitofelpipashmi ninanda confian carca. Shinapash ishcandimi Davidtaca ninanda llaquichishpa, huañuchingapapash munarca. Chaimi Davidca, paipa chaishuj amigocunapash Absalonhuanmi tandanajushcanga nishpa pensaita ushanman carca. Shinallata paipilla pensarishpami shuj llactaman pacajushpa rinata o desanimarishpa quidaita ushanman carca. Shinapash paica shinlli tucushpami ñaupaman catirca. Shinaca ¿imashinata aguantashpa ñaupaman catirca?

11. Davidca llaquicunahuan cashpapash ¿imatata rurarca?

¹¹ Quimsapica, liishcapi pensarina. Davidmanda, Absalonmandaca ¿imatata yachajui ushapanchi? Tapuripashunchi: “Davidca paillata ali sintiringapaca ¿imatata rurarca?”. Davidca manllarishca cashcamandami nali decisiongunatapash japita ushanman carca. Shinapash Jehová Diostami ayudahuai nishpa mañarca. Shinallata paipa amigocunatapashmi ayudata mañarca. Imata decidishpapash chaicunata pactachingapami esforzarirca. Llaquilla cashpapash Jehová Diospi tucui shunguhuan confiashpa, shujcunatapash ali tratashpa, shujcunapipash confiashpami catirca.

12. Jehová Diosca Davidtaca ¿imashinata ayudarca?

¹² ¿Imashinata Jehová Diosca ayudarca? Jehová Diosca rey David cai llaquicunata aguantashpa catichunmi fuerzata cushpa ayudarca (Sal. 3:1-8; callaringapaj shimicunata ricupangui). Shinallata David imata decidijpipash Jehová Dios apoyashcata, Davidpa soldadocuna Davidta cuidachun Jehová Dios ayudashcatami ricupanchi.

13. Pipash ñucanchita llaquichijpica ¿imashinata Davidpa ejemplota cati ushapanchi? (Mateo 18:15-17).

¹³ Tucuripica, Bibliapi liishcata pactachina. Cashna tapuripashunchi: “Davidpa ejemplotaca ¿imashinata catita ushapani?” nishpa. Pipash llaquichishcamanda nali sintirijushpaca uchallami imatapash rurana capanchi. Ima problemata charishpapash Mateo capítulo 18​pi nishca shimicunatami catita ushapanchi (Mateo 18:15​manda 17​caman liipangui). Shinapash llaquilla o culira cashcamandallaca na imatapash decidinachu capanchi. Pipash llaquichishcamanda tranquilo sintiringapaca ali yuyashpa imatapash rurangapami, Jehová Diostaca ayudahuai nishpa mañana capanchi. Shinallata ñucanchi amigocunapipash confiashpami paicuna ayudachun saquinalla capanchi (Prov. 17:17). Ashtahuanbachaca Bibliapi consejocunatami pactachingapaj esforzarina capanchi (Prov. 3:5, 6).

14. Caipi textocunaca ¿ima pasajujpita ñucanchitaca animaita ushan?

¹⁴ ¿Ñucanchipa familiachu Jehová Diosta ama sirvichun jarcaicunata churan? O ¿villachinata prohibishca llactapichu causapanchi? Shina  cashpaca 2 Timoteo 1:12-16; 4:6-11, 17-22 versocunata liinami ninanda animanga. c Caicunataca prezu cashpami Pabloca escribirca.

15. Jehová Diostaca ¿imatata mañaita ushapanchi?

¹⁵ Callaripica, Jehová Diosta mañana. Cai textocunata nara liishpallatami llaquicunahuan cashcamanda imashina sintirishcata Jehová Diosman villana capanchi. Jipaca chai llaquihuan imata ruranata ali yachangapaj ayudahuai nishpa mañapashunchi.

16. Apóstol Pablotaca ¿imata pasajun?

¹⁶ Catipica, punda tiempopi cashcashna pensarina. Apóstol Pablopa tiempopi causajushcashna pensaripashunchi. Apóstol Pabloca Roma llactapica huaquin viajecunatami prezu churai tucushca. Cutin cai viajeca ña paita huañuchingapami prezu charinajun. Paipa amigocunapashmi paitaca saquishpa rishca. Paipash ña shaijushcami sintirijun (2 Tim. 1:15).

17. Apóstol Pabloca ¿imatata rurai ushanman carca?

¹⁷ Apóstol Pabloca, “Jesusta catimandami prezu churai tucushcani. Jesusta na catishpaca na shina pasajuimanllu carcani” nishpapash pensarita ushanmanmi carca. Asiamanda huauquicunahuanbashmi paita saquishpa rishcamandaca culiraita ushanman carca. Shinallata paipa chaishuj amigocunapipashmi ñana confiaita ushanman carca. Shinapash chaicunata na rurashpami Jehová Diospi, shinallata paipa amigocunapipash confiashpa catirca.

18. Apóstol Pabloca llaquicunahuan cashpaca ¿imatata rurarca?

¹⁸ Quimsapica, liishcapi pensarina. Cashna tapuripashunchi: “Apóstol Pabloca paillata ali sintiringapaca ¿imatata rurarca?”. Apóstol Pabloca huañuna cashcata yachashpapash paipaca Jehová Diosta alabanami ashtahuan importante carca. Shinallata Jehová Diosta tucui shunguhuan mañashpami shuj huauquipanicunatapash animangapaj esforzarirca (2 Tim. 1:3). Apóstol Pabloca paipa amigocuna paita saquishcamandaca na yapata llaquirijurcachu. Ashtahuangarin paipa chaishuj amigocuna paita ayudashcamandami agradicishcata ricuchirca. Bibliamandapashmi yachajushpa catirca (2 Tim. 3:16, 17; 4:13). Ashtahuanbachaca Jehová Dios, Jesuspash paita juyashcata, paitalla na saquinata, bendicianatapash seguromi carca.

19. Jehová Diosca ¿imashinata Pablotaca ayudarca?

¹⁹ Apóstol Pablo Jesusta catij cashcamanda catiriashpa llaquichi tucuna cashcataca Jehová Diosca ñami villashcarca (Hech. 21:11-13). Apóstol Pablotaca Jehová Diosca ¿imashinata ayudarca? Jehová Diosca paipa mañaicunata uyashpa, shinllichishpami ayudarca (2 Tim. 4:17). Jehová Diosca apóstol Pablota bendicianatapashmi villarca. Pablopa amigocunatapashmi Jehová Diosca Pablota ama saquichun imagupipash ayudashpa catichun animarca.

20. Ñucanchicunapash ¿imashinata Romanos 8:38, 39​pi shimicunataca pactachi ushapanchi?

²⁰ Tucuripica, Bibliapi liishcata pactachina. Cashna tapuripashunchi: “Apóstol Pablopa ejemplotaca ¿imashinata catita ushani?” nishpa. Apóstol Pablotashnallata ñucanchicunatapash catiriashpa llaquichinataca alimi yachapanchi (Mar. 10:29, 30). Catiriashpa llaquichijpi Jehová Diosta ama saquingapaca cunanmandami Jehová Diosta tucui shunguhuan mañangapaj, Bibliatapash ali yachajungapaj esforzarina capanchi. Ñucanchipaca tucuimanda yalica Jehová Diosta alabanami ashtahuan importante can. Jehová Diosca ñucanchitaca nunca na saquingachu. Pai ñucanchita juyachunbash pipash na jarcai ushangachu (Romanos 8:38, 39​ta liipangui; Heb. 13:5, 6).

21. Shuj precursora paniguta, shuj joven huauquigutapash ¿picunapa causaimanda yachajunata ayudarca?

²¹ Ñucanchi causaipi ima problemacunata charijpipash Bibliaca ninandami ayudaita  ushan. Japonmanda shuj precursora panigutaca Jonaspa causaimanda liinami predicación publicapi ama manllashpa villachichun ayudashca. Cutin Indonesia llactamanda shuj joven huauquigutaca Rutpa causaimanda liinami, paipa taitacuna na Testigo cajpipash Jehová Diosmanda ashtahuan yachajushpa, paita sirvina munaita charichun ayudashca.

22. Audiocuna, videocuna, “Ñaupa tiempopi Jehovata sirvijcunapa ejemplo” nishcacunapash ¿imashinata ñucanchitaca ayudan?

²² Jehová Diospi tucui shunguhuan crishpa catingapaca ¿maipita ali ejemplocunata tarita ushapanchi? Videocunapi, grabashca audiocunapi, shinallata Internetpi “Jehovata ali sirvijcunapa ejemplo” nishcapimi ali ejemplocunata tarita ushapanchi. d Caipi grabashca audiocunata, videocunata nara ricushpallatami caicuna ñucanchi causaipi ayudachun Jehová Diostaca mañana capanchi. Shinallata chai tiempopi causajushcashna pensaringapaj esforzaripashunchi. Jehovata sirvijcuna llaquicunahuan cajpi paicuna ñaupaman catichun Jehová Dios imashina ayudashcapi pensaripashunchi. Chai jipaca, imata yachajushcata ñucanchi causaipi pactachingapaj esforzaripashunchi. Tucuripica Jehová Dios ñucanchita ayudashcamanda agradicipashunchi. Jehová Diosta agradicishcataca shuj huauquipanicunata ayudashpami ricuchipanchi.

23. Isaías 41:10, 13​pica ¿imatata Jehová Diosca ñucanchitaca nijun?

²³ Diablo cai mundota mandajushcamandami ñucanchipa causaica shinlli can. Chaimi huaquinbica llaquicunahuan cashpaca imata ruranatapash na atinashun (2 Tim. 3:1). Shinapash na yapata preocuparinachu capanchi. Jehová Diosca cada uno imashina causajujtaca alimi yachan. Chaimi ñucanchicunata ayudangapaca listo can (Isaías 41:10, 13​ta liipangui). Shinaca Jehová Dios ayudanapica tucui shunguhuan confiapashunchi. Ima llaquicunahuan cashpapash Bibliapa consejocuna ñucanchita ayudanataca seguro capashunchi.