1, 2. Hechos 8:27-31, 35, 36, 38​pi nishca shinaca ¿imamandata Etiopía llactamanda jariguca bautizarirca?

¿QUIQUINBASHCHU bautizarishpa Jesuspa ali catij tucungapaj munapangui? Taita Diosta juyaimandami ashtaca gentecunaca bautizarishca. Shinami paita agradicishcata ricuchishca. Cunanga Etiopía llactamanda reinapa huasipi ayudaj runagumanda yachajupashunchi.

² Etiopiamanda reinapa huasipi ayudaj jariguca Diospa Shimimanda yachajushpami bautizarina cashcata ali intindirca (Hechos 8:27-31, 35, 36, 38, liingui). Taita Diospa Shimita ninanda alicachimandami paica Isaías librota liishpa rijurca. Felipe runagu Jesús paimandapash huañushcata villajpimi Jesushuan agradecido sintirirca. Shinapash cai jariguca Jehová Diostaca ñami juyarca. Jehová Diosta juyaimandami paica Jerusalén llactapi paita sirvishpa tigramujurca. Paica paipa punda religiondaca ña saquishcami carca. Chaimi Jehová Diostalla sirvijcunahuan ña tandanajujurca. Jehová Diosta juyaimandami paica bautizaringapaj, Jesuspa ali catij tucungapapash munarca (Mat. 28:19).

3. Bautizarichunga ¿imata jarcaita ushan? (“ Quiquinba shunguca ¿imashinata can?” nishca recuadrotapash ricupangui).

³ Jehová Diosta juyaimandami bautizaringapaj munapangui. Shinapash ¿imamandata na bautizaripanguiman? Quiquinba familiata o na testigo amigocunata na saquingapaj munaimandami talvez na bautizaringapaj munapanguiman (Mat. 10:37). Shinallata imapash costumbrecunata, Taita Dios nalicachishca cosascunata na saquingapaj munaimandami talvez na bautizaringapaj munapanguiman (Sal. 97:10). Talvez  panda religiongunapi fiestacunata rurashpami cushilla yalin cariangui. Chaicunata yarishpami Jehová Dios na gushtashca fiestacunata ruranataca napacha saquita ushapangui (1 Cor. 10:20; 10:21, NM ). Shinapash ¿pitata ashtahuanbachaca juyana capangui?

4. ¿Imamandata bautizarina capangui?

⁴ Quiquinga ashtaca cosascunatami alicachipangui, chaica alimi can. Testigo de Jehovacunahuan nara Bibliamanda yachajushpallatami talvez Bibliataca alicachishpa ricun capashcangui. Shinallata Jesustapash ñachari juyaparcangui. Cunanga Testigocunata rijsimandami paicunahuan llevarinatapash alicachipangui. Shinapash bautizarina munaita charingapapachaca ¿imatata rurana capangui? Taita Diostami juyana capangui. Quiquin Jehová Diosta ashtahuan juyashpaca, imapash o pipash paita sirvinata jarcachunga na saquipanguichu. Shinallata Jehová Diosta juyaimandami bautizaripangui. Chaimi bautizarishca jipapash paita sirvishpa catita ushapangui.

5. Cai temapica ¿imatata yachajugripanchi?

⁵ Jehová Diostaca tucui shunguhuan, tucui causaihuan, yuyaihuan, tucui fuerzahuanmi juyana canguichi nishpami Jesusca mandarca (Mar. 12:30). Jesús mandashcashna, Jehová Diosta juyangapaj, respetangapaca Jehová Dios ñucanchita juyashcapimi pensarina capanchi (1 Juan 4:19). Cai temapica Jehová Diosta juyangapaj, bautizarina munaita charingapapash imata rurana cashcatami yachajupashun.

6. Romanos 1:20​pi nishca shinaca ¿imashinata Jehová Diosmandaca yachajui ushapanchi?

⁶ Jehová Diospa rurashcacunata ricushpami paimandaca yachajuita ushapanchi (Romanos 1:20, liingui; Apoc. 4:11). Plantacunata, animalcunata, ñucanchi cuerpotapash imashina rurashcata ricushpami Jehová Dios alipacha yachaj cashcata cuenta japipanchi (Sal. 139:14). Indita imashina rurashcata ricushpami Jehová Dios ashtaca poderta charishcata ricuita ushapanchi. Ashtaca ashtaca estrellacunata Jehová Dios rurashcamandaca, indica shuj uchilla uchillagullami can. Shina uchillagu cashpapash sumajtami cunujyachin (Is. 40:26). * Chai rurashcacunata ricushpami Jehová Diostaca ashtahuan respetapangui. Jehová Dios tucuita rurashcata yachashpaca pai ali yachaj, tucui poderta charijta ricushpami paipa ali amigo cangapaj munapangui. Shinaca Jehová Diosta ashtahuan juyangapaca paimandami ashtahuan yachajuna capangui.

7. Jehová Diosta tucui shunguhuan juyangapaca ¿imatata seguro cana capangui?

⁷ Jehová Dios quiquinda juyashcataca seguromi cana capangui. Cielota, cai Alpata ruraj Taita Dios ¿quiquinda juyashcataca cripanguichu? Bibliapica ninmi, Jehová Diosca “ñucanchimandaca na carupi canllu” nishpa (Hech. 17:26-28). Rey Davidca paipa churi Salomonmanga cashnami nirca: “Diosca, tucuicunapaj shungutami callarishpa ricujun” nishpa. Shinaca Taita Diosta ñucanchicuna mascajpica, paica paita rijsichun saquingami (1 Crón. 28:9). Juan 6:44​pi nishca shinaca Jehová Dios paimanda yachajuchun saquijpimi, quiquinga Bibliamanda yachajujupangui. Jehová Dios quiquinmanda imatalla rurashcata yachajushpaca, Jehovataca ashtahuanmi juyapangui.

8. Jehová Diosta juyashcataca ¿imashinata ricuchi ushapangui?

 ⁸ Jehová Diosta juyashcataca ¿imashinata ricuchi ushapangui? Paita mañashpa. Quiquinba problemacunata Jehovaman parlashpa, quiquinda ayudajushcamanda paita agradicishpami Jehová Diostaca ashtahuan juyapangui. Quiquinba mañashcacunata Jehová Dios uyashcata yachashpami paihuanga alipacha amigo tucuita ushapangui (Sal. 116:1). Chaimi Jehová Dios quiquinda intindishcataca seguro capangui. Jehová Diosman quimiringapaca pai imashina pensajtami yachajuna capangui. Shinallata quiquin imata rurachun munashcatapashmi yachajuita ushapangui. Chaipaca Bibliamandami yachajuna capangui.

9. Bibliata liinata gushtashcataca ¿imashinata ricuchi ushapangui?

⁹ Bibliamanda yachajunaca minishtirishcami can. Bibliapillami Jehová Diosmandaca cabalta yachajupangui. Shinallata shamuj punllacunapi Jehová Dios ali causaiguta quiquinman cunatapashmi Bibliapica yachachin. Bibliata liinata gushtashcataca cada punlla Bibliata liishpa, Bibliamanda yachajungapaj ali prepararishpa, imata yachajushcata quiquinba causaipi pactachishpami ricuchi ushapangui (Sal. 119:97, 99; Juan 17:17). Bibliata cada punlla liingapaca ¿shuj horariota charipanguichu? ¿Chaitaca pactachijupanguichu?

10. Bibliapica ¿pimandata ashtahuan parlajun?

¹⁰ Jesús cai Alpapi cajpi, gentecuna paita ricushcatami Bibliapica cabalta ricuchijun. Jesús quiquinmanda huañushcataca Bibliapillami cabalta yachachijun. Jesús imata nishcata, imata rurashcata yachajushpaca paita ashtahuan rijsingapami munapangui.

11. Jehová Diosta ashtahuan juyachunga ¿imata ayudanga?

¹¹ Jesusta juyanata yachajupai. Shinami Jehová Diostaca ashtahuan juyapangui. Jehová Dios imashina cashcataca Jesusmi alipacha ricuchin (Juan 14:9). Jehová Diosta ashtahuan juyangapaj, pai imashina cashcata yachangapaca Jesusmandami ashtahuan yachajuna capangui. Caipi pensaripai. Jesuspa tiempopica pobrecunata, irquicunata, shuj gentecunatapash nimapa na sirvijtashnami huaquin gentecunaca ricun  carca. Cutin Jesusca na shina ricunllu carca. Jesusca juyaihuanmi tratan carca. Shinallata Bibliapi Jesús ali consejocunata quiquinman cushcatapash yaripangui. Paipa nishcacunata cazushpaca quiquinga cushillami causai ushapangui (Mat. 5:1-11; 7:24-27).

12. Jesusmanda yachajushpaca ¿imata rurangapata munapashun?

¹² Ñucanchi juchacunamanda quishpichingapami Jesusca huañurca. Chaita yarinami Jesusta juyashpa catichun ayudanga (Mat. 20:28). Jesús ñucanchimanda huañushcata yachajushpaca, ñucanchi juchacunamanda arripintiringapaj, Jehová Diospa perdonda mascangapami munapashun (Hech. 3:19, 20; 1 Juan 1:9). Jehová Diosta, Jesustapash juyashpaca Jehovata sirvijcunahuanmi cangapaj munapashun.

13. Quiquinda cuidangapaca ¿imatata Jehová Diosca cushca?

¹³ Jehová Diosta sirvijcunahuan tandanajupai. Quiquinba familia, na Testigo amigocunaca quiquin Jehová Diosta sirvingapaj munashcataca talvez na intindingachu. Chaimandami talvez quiquindaca ricuitapash na ricunayachinga. Shinapash Jehová Diosca congregacionbica shuj familiatashnami quiquinmanga cushca. Paicunahuan yalijpica, paicunaca juyaihuanmi quiquindaca tratanga. Siempremi ayudashpa catinga (Mar. 10:29, 30; Heb. 10:24, 25). Talvez shuj punllaca quiquinba familiapashmi Jehovata sirvishpa, paipa mandashcacunata cazushpa causangapaj munanga (1 Ped. 2:12).

14. Jehovapa mandashcacunamandaca ¿imatata 1 Juan 5:3​pica nijun?

¹⁴ Jehová Diospa mandashcacunata cazushpa causapai. Jehová Diosta nara rijsishpaca talvez quiquinba munashcashnami causapariangui. Pero cunanga Jehová Diospa mandashcacuna ashtahuan ali cashcatami cuenta japipashcangui (Sal. 1:1-3; 1 Juan 5:3, liingui). Bibliapimi cusacunaman, huarmicunaman, taitacunaman, huahuacunamanbash shuj alipacha consejocunata Jehová Diosca cushca (Efes. 5:22–6:1-3; 6:4, NM ). ¿Nachu cai consejocunaca quiquinda, quiquinba familiatapash ayudapashca? Cai consejocunata catishpaca ¿nachu ali amigocunatapash agllapashcangui? ¿Nachu cunanga ashtahuan cushilla causapangui? (Prov. 13:20; 1 Cor. 15:33, NM ).

15. Jehovapa yachachishcacunata quiquinba causaipi pactachingapaca ¿imatata rurana capangui?

¹⁵ Quiquinba causaipi Jehovapa yachachishcacunata imashina pactachinataca talvez na yachapanguichu. Chaimi Jehová Diosca paipa organizacionda utilizashpa Bibliamanda parlashca publicaciongunata llujchishpa ima ali cashcata, ima nali cashcata cuenta japichun ayudashca (Heb. 5:13, 14). Cai publicaciongunata liishpa, ali ali yachajushpaca quiquinba causaipi ayudajtami cuenta japipangui. Shinami Jehovapa organizacionbi cangapaj munapangui.

16. Jehová Diospa organizacionga ¿imashinata can?

¹⁶ Jehová Diospa organizacionda apoyapai. Jehová Diosca cai Alpapi ashtaca ashtaca congregacionguna tiachunmi saquishca. Cai congregaciongunatami Jesusca mandajun (Efes. 1:22; 5:23). Shinallata Jesusca huaquin ungido huauquicunatami agllashca. Paicunami Jesuspa munaita pactachinajun. Paicunatami Jesusca ‘aliguta cazushpa aliguta yarishpa sirvij’ esclavo nin. Cai esclavomi quiquin Jehovamanda yachajushpa catichun, paiman quimirichunbash ayudan (Mat. 24:45-47). ‘Aliguta cazushpa aliguta yarishpa sirvij’ esclavoca quiquinda cuidachunmi congregacionbi ancianocunata churashca (Is. 32:1, 2; Heb. 13:17; 1 Ped. 5:2, 3). Ancianocunaca tucui shunguhuan quiquinda consolangapaj, ayudangapami munan. Jehová  Diosman quimirichunbashmi quiquindaca ayudanga. Ashtahuanbachaca shuj gentecunaman Jehovamanda yachachichunmi ancianocunaca quiquindaca ayudanga (Efes. 4:11-13).

17. Romanos 10:10, 13, 14​pi nishca shinaca ¿imamandata shujcunamanga Jehovamanda yachachinchi?

¹⁷ Gentecunaman Jehová Diosmanda yachachipai. Jesusca paipa catijcunataca Taita Diosmanda yachachigrichi nishpami mandarca (Mat. 28:19, 20). Cai mandashcataca cazunapachami capangui. Shinapash quiquin Jehovata juyashpaca apóstol Pedroshna, Juanshnami nita ushapangui. Paicunaca nircami: “Ñucanchi ricushcata, uyashcata villanataca, napacha saqui ushanachu canchi” nishpa (Hech. 4:20). Quiquin pimanbash Jehovamanda yachachijpi Jehovata juyajta ricushpaca ninandami cushijupangui. Chai cushijuica imahuanbash na igualanllu. Etiopía llactamanda jarigu Diospa Shimimanda yachajushpa, bautizarijta ricushpaca Felipeca ninandami cushijurianga. Felipe runagushna Jesús mandashcata cazushpa, villachishpaca testigo de Jehová tucungapaj munashcatami quiquinga ricuchipangui (Romanos 10:10, 13, 14, liingui). Chaimi etíope runagushna quiquinbash: “¿Ñuca bautizaringapaca, imapash jarcahuangachu?” nishpa tapurita ushapangui (Hech. 8:36).

18. ¿Imatata cati temapica yachajupashun?

¹⁸ Quiquin bautizaringapaj decidishpaca shuj alipacha decisiondami japipashcangui. Bautizarinaca na shuj huatapa o ishcai huatapallachu can. Chaimandami bautizaringapaj decidishpaca bautizarina ima cashcataca ali yachana capangui. Shinallata nara bautizarishpallata, bautizarishca jipapash imata rurana cashcatami yachana capangui. Caicunamandami cati temapica yachajupashun.