Madianitacuna Joseta Egipto llactaman apashca jipa, Jacob runagupash paipa familiapash Canaanmanda Egiptoman causangapaj rishcatami Bibliapica ricuchin. Paicunaca río Nilo ladopi Gosén pushtupimi causangapaj rirca (Gén. 47:1, 6). Israelitacunaca ‘miranajushpami alipacha shinllicuna tucunajurca’. Chaimandami Egipto llactamanda gentecunaca manllaimanda israelitacunataca esclavocuna tucuchun obligarca (Éx. 1:7-14).

Cunan punllacunamanda huaquin estudiashca gentecunaca burlarishpami, chaica yanga parlocunallami can nishcami. Shinapash semita * gentecuna Egipto llactapi esclavocuna cashcata ricuchingapami huaquin pruebacuna tian.

Arqueólogo nishca gentecunaca alpapi allanajushpami punda tiempomanda huaquin cosascunata Egipto llactapa shuj pushtupi tarirca. Bibliata estudiaj John Bimson jarica: “Chai pushtupica 20 ladocunapi semita gentecuna punda tiempopi causanajushcatami tarishca” ninmi. Egipciocunata estudiaj James Hoffmeier jarica ninmi: “Jesús cai alpaman nara shamujpi huata 1800manda, más o menos huata 1540​camanmi Asia occidental llactacunamanda semita gentecunaca Egiptopi causangapaj rishca” nishpa. Shinallata “Semita gentecuna shina causashca huatacunapillatami Abrahán, Isaac, Jacob runagupash causarca. Chai tiempocunamandallatami Génesis libropipash parlajun” ninbashmi.

Egiptopica shuj pushtupipashmi ashtahuan cosascunata tarishca. Por ejemplo punda tiempomanda shuj papiro papeltami tarishca. Cai papiro papelca Jesús cai Alpaman nara shamujpi más o menos huata 2000manda 1600​caman ima pasashcatami ricuchin. Chaipica shuj huasipi sirvishpa causaj esclavocunapa shuticunami escribishca tiajurca. Chai shuticunamandaca, 40 yali shuticunaca semita gentecunapa shuticunami carca. Chai semita gentecunaca yanushpa, ahuashpa, peón shinami trabajan carca. Hoffmeier jarica: “Egiptomanda Tebaida pushtupica 40 yali semita gentecunami tiarca. Shinaca Egipto llactapimi ashtaca ashtaca semita gentecunaca tiashcanga. Ashtahuanbachaca río Nilo ladocunapimi tiashcanga” ninmi.

Arqueólogo David Rohl jaripashmi nirca: “Chai papelpi escribishca huaquin esclavocunapa shuticunaca Bibliamanda shuticunata llujchishcashnami yarin” nishpa. Por ejemplo, chai papelpi escribishca shuticunaca Isacar, Aser, Sifrá shuticunahuan ricujpica casi igualmi can (Éx. 1:3, 4, 15). Rohl jarica caitapashmi nirca: “Chai shuticunata ricushpami israelitacuna Egiptopi esclavocuna cashcataca seguro caita ushapanchi” nishpa.

Bimson jarica ninmi: “Bibliapica israelitacuna Egipto llactapi esclavocuna cashcata, paicuna Egiptomanda llujshishcatapashmi villan. Chai ciertopacha pasashcataca seguromi caita ushapanchi” nishpa.