1. ¿Imamandata 3 Juan 3, 4​pi nishca shinaca cushijupanchi?

APÓSTOL JUANGA tauca huauquipanicunatami Jehovamanda yachajuchun ayudarca. Paicuna Jehovata sirvishpa catinajujta ricushpami ninanda cushijushcanga. Juanga chai huauquipanicunataca paipa huahuacunatashnami ricun carca. Chai huauquipanicuna problemacunata charijta yachaj chayashpaca, paicuna Jehovapi tucui shunguhuan crichunmi apóstol Juanga ayudarca. Ñucanchicunapashmi ñucanchi propio huahuacuna o shuj gentecunapash Jehovamanda yachajushpa, Jehovata sirvinajujta ricushpaca ninanda cushijupanchi (3 Juan 3, 4, liingui).

2. Apóstol Juan escribishca librocunaca ¿imapita ayudarca?

² Apóstol Juanga Patmos shuti islapimi prezo carca. Chaimanda libre llujshishpami huata 98​pica, Éfeso llactapi causajushca yarin. Chai tiempopimi Jehová Diosca paipa espirituhuan Juandaca quimsa librocunata escribichun yarichirca. Cai quimsa librocunami huauquipanicuna Jesuspi crishpa catichun, Jehovamandapash cabalguta yachajushpa catichun ayudarca.

3. ¿Imatata yachajugripanchi?

³ Chai tiempopica, tucui apostolcunamandaca apóstol Juanllami causajurca. Chai punllacunapica tucui congregaciongunapimi Jesusta catinchi nij tucushcacunaca pandacunata yachachi callarinajurca (1 Juan 2:18, 19, 26). * Paicunaca Jehovamanda yachachinajunchi nishpapash, paipa mandashcacunataca na pactachinajurcachu. Chaimandami Juan ima consejocunatalla cushcata yachajugripanchi. Shinallata cai quimsa tapuicunamandapashmi yachajupashun: Jehovamanda cabalguta yachajuna nishpaca ¿imatata ningapaj munan? Jehovamanda cabalguta yachajuchunga ¿imacunata jarcaita ushanman? ¿Imashinata tucuicunallata Jehovamanda  cabalguta yachajungapaj ayudarina capanchi?

4. Jehovamanda cabalguta yachajungapaca ¿imatata 1 Juan 2:3-6; 2 Juan 4, 6​pipash nishca shinaca rurana capanchi?

⁴ Jehovamanda cabalguta yachajungapaca Bibliamandami yachajushpa catina capanchi. Shinallata Jehovapa tucui mandashcacunatami cazuna capanchi (1 Juan 2:3-6; 2 Juan 4, 6, liingui). Jesusca tucuipimi Jehovata cazurca. Shinaca Jehovata tucuipi cazungapaca Jesuspa chaquita catingapami esforzarina capanchi (Juan 8:29; 1 Ped. 2:21).

5. ¿Imacunamandallata seguro cana capanchi?

⁵ Jehovamanda cabalta yachajungapaca, Jehová Dios na llullaj Dios cashcata, Bibliapi tucui nishcacuna cierto cashcatapash seguromi cana capanchi. Shinallata Jesús, Jehová Dios agllashca Mesías cashcatapash seguromi cana capanchi. Cunanbica taucacunaca Jehová Dios paipa Reinopi rey cachun Jesusta agllashcataca na crinllu. Apóstol Juanga Jehová Diospi, Jesuspipash na tucui shunguhuan crijcunataca ‘llullashpa yachachijcunami’ pandachinga nircami (2 Juan 7-11). Shinallata Juanga “¿Maijanda llullaj canga? ‘Jesusca na Quishpichij Cristochu’ nijcunamari llullacuna” can nircami (1 Juan 2:22, MTQI ). Ñucanchicunata ama umachichunga Bibliamandami cabalguta yachajushpa catina capanchi. Shinallami Jehová Diosmanda, Jesusmandapash cabalguta yachajui ushapashun (Juan 17:3). Ñucanchicuna chaicunapi seguro cajpica pipash na umachi ushangachu.

6. Joven huauquipanicunaca ¿ima jarcaicunatata charin?

⁶ Tucuicunallatami gentecunapa yuyaicunata ama catingapaj ninanda esforzarina capanchi (1 Juan 2:26). Ashtahuanbachaca joven huauquipanicunami chai yuyaicunamandaca cuidarina can. Francia llactamanda Alexia * paniguca 25 huatacunatami charin. Paica ninmi: “Colegiopica evolucionmanda, gentecunapa yuyaicunamandapashmi yachachin carca. Chaicunata yachajuimandami Jehovapica ñana crijurcani. Ñucaca colegiopi yachachishcacunatarami alicachin carcani. Shinapash profesorcunapa nishcacunata ama cringapami ñucallata Bibliamanda ashtahuan yachajungapaj esforzarircani” nin. Alexia paniguca La vida... ¿cómo se presentó aquí? ¿Por evolución, o por creación? librotami yachajui callarirca.  Cai libromanda yachajushca jipallami Jehovapica cutin cri callarirca. Alexia paniguca ninmi: “Bibliapi tucui nishcacuna cabalpacha cashcataca ñucallata yachajuimandami seguro carcani. Shinallata Jehovapa mandashcacunata cazushpalla cushilla, tranquilo causai usharishcatapashmi yachajurcani”.

7. ¿Imata rurangapata tucuicunallata esforzarina capanchi?

⁷ Joven o mayor cashpapash cai mundopa nali ruraicunapi ama chapuringapami esforzarina capanchi. Jehovata sirvishpa causana, shinallata cai mundopa ruraicunatapash rurashpa causanaca nali cashcatami Juanga nirca (1 Juan 1:6). Jehovata cushichingapaj munashpaca ali gentecuna cangapami esforzarina capanchi. Shujcuna ñucanchi imata rurashcata na ricujpipash Jehová Diosca tucuitami ricujun. Chaimi pacalla, nali cosascunataca na ruranachu capanchi (Heb. 4:13).

8. ¿Canllamanda gentecunashnachu pensana capanchi?

⁸ Gentecunaca nali ruraicunataca ruranllami. Shinapash ñucanchica paicunashnaca na ruranachu capanchi. Apóstol Juanga “jucha illajmi canchi ninajushpaca, ñucanchillata pandarishpami” causanajunchi nircami (1 Juan 1:8, MTQI ). Apóstol Juanba punllacunapica Jesusta catinchi nij tucushcacunaca, pipash juchata rurashpapash, Taita Diospa ñaupajpica ali ricurishpami catin ninmi carca. Cunanbipashmi ashtaca gentecunaca shinallata yuyan. Ashtacacunaca Taita Diospi crinchi nishpapash, na cazarashpallatami igual causan. Jaripura huarmipura canataca ali cajtashnami ricun. Shinapash Jehovapaca chaicunaca juchami can.

9. Tentaciongunata vencichunga ¿imatata Testigo jovengunataca ayudanga?

⁹ Colegiopi, escuelapi, trabajopi cumbacunaca shuj jarihuan, shuj huarmihuan igual puñunata Testigo jovenguna normaltashna ricuchunmi munan. Chaimi Testigo jovengunaca ama shina yuyangapaj esforzarina can. Cunanga Aleksandar shuti huauquimanda yachajupashunchi. Paica ninmi: “Colegiomanda huaquin cumbacunaca paicunahuan igual puñuchunmi cutin cutin  nihuan carca. Canga noviatapash na charinguica, jaricunatami gushtangui yarin nishpami burlarin carca” nishpa. Talvez quiquindapashmi shinallata ninajunga. Chai tentaciongunata vencichunga ¿imata ayudanga? Bibliamanda yachajushcacunata yarinami ayudanga. Shinami quiquinda shujcuna respetanga, quiquinba saludpash ali canga, quiquinllatapash tranquilo sintiripangui. Ashtahuanbachaca Jehová Dioshuan ashtahuan ali cachunmi Bibliamanda yachajushcacunaca ayudanga. Quiquin joven chai tentaciongunata ladoman saquishpaca, imapash shuj tentacionguna ricurijpica na fácil urmanguichu. Caitapash yaripangui, Diablomi shuj jarihuan shuj huarmihuan igual puñunataca normaltashna ricuchun munan. Shinaca quiquin chai munaicunata na rurashpaca Diablopa trampapica na urmanguichu (1 Juan 2:14).

10. Jehovata ali sirvichunga ¿imashinata 1 Juan 1:9​pi shimicunaca ayudan?

¹⁰ Jehovami ima ali cashcata, ima nali cashcatapash nina derechota charin. Chaimi ñucanchicunaca Jehová Dios mandashcashna imagutapash ali rurangapaj, ama juchata rurangapaj esforzarinchi. Shinapash imatapash rurashpaca tucui shunguhuan arripintirishpami Jehovataca mañanchi (1 Juan 1:9, liingui). Shinapash juchapi urmashca cashpaca ancianocunahuanmi parlana capanchi. Jehová Diosca ancianocunatami ñucanchicunata cuidachunga agllashca (Sant. 5:14-16). Shinapash punda juchapi urmashcacunata yarijunaca na valinllu. Chaipa randica ¿imatata yarina capanchi? ñucanchi juchacunata perdonangapaj Jehová Dios paipa Churita ñucanchimanda huañuchun cachamushcatami yarina capanchi. Jehová Diosca ñucanchitaca ninandami juyan. Jehová Dios ñucanchi juchacunata perdonasha nishpaca perdonanbachami. Chaimi ñucanchicunaca Jehovataca tucui shunguhuan sirvita ushapanchi (1 Juan 2:1, 2, 12; 3:19, 20).

11. ¿Imacunatata napacha uyana capanchi?

¹¹ Jehovamanda llullacunata yachachijcunataca napacha uyanachu capanchi. Apostolcunapa punllacunamandapachami Diabloca  Jehovata ama sirvichun imapash llullacunahuan congregaciongunataca pandachijushca. Chaimi ñucanchicunaca ama pandachi tucungapaj Bibliata ali ali yachajuna capanchi. * Cunanbica Internetpi redes sociales nishcacunapimi Jehovamanda llullacunata yachachijcunaca ñucanchicuna Jehovata ama sirvichun, ñucanchi huauquipanicunamandapash caruyachun imapash llullacunata churan. Diablomi chai llullacunahuanga ñucanchita pandachingapaj munan (1 Juan 4:1, 6; Apoc. 12:9).

12. Bibliapa yachachishcacunapica ¿imamandata tucui shunguhuan crishpa catina capanchi?

¹² Diablo ñucanchita ama pandachichunga Jesuspimi tucui shunguhuan crina capanchi. Shinallata Jehová Dios Jesusta paipa Reinopi rey cachun agllashcatapashmi crina capanchi. Jehovapa organizacionbi aliguta cazushpa aliguta yarishpa sirvij esclavota, Jehová Dios utilizajushcatapashmi crina capanchi (Mat. 24:45-47). Chaipaca Bibliamandami cada punlla yachajuna capanchi. Bibliamanda yachajunami Jehovapi crichun ayudanga. Shina rurashpaca shuj quiru sapiyashca cuendami caita ushashun. Apóstol Pabloca colosensescunamanga “Jesucristota imashna chasquishcashnallata paihuanlla causana canguichi. Alipacha sapiyashca shinllipacha shayachishcashnami Jesucristotaca, aliguta crishpa catina canguichi” nishpami escribirca (Col. 2:6, 7). Jehovapi crishpaca Diablo imahuanbash pandachichunga na saquishunllu (2 Juan 8, 9).

13. Jehovata sirvijcunaca ¿imatata ali yachapanchi? ¿Imamandata chaitaca ali yachapanchi?

¹³ Jehovata sirvinajujpica gentecuna ñucanchita ricuitapacha na ricunayachinataca alimi yachapanchi (1 Juan 3:13). Juanga “cai pachapajtalla rurashpa causajcunataca, Diablomi tucuicunata mandajun” nircami (1 Juan 5:19). Diablo paipa punllacuna tucurijujta yachashpami ninanda culirashca can (Apoc. 12:12). Cunanbica ¿ima tentaciongunahuanda Diabloca gentecunata umachijun? Huainayana juchacunahuan, Jehovamanda llullacunata yachachijcunahuan, shuj ruraicunahuanbashmi Diabloca gentecunata umachijun. Diabloca ñalla tucuchi tucunata yachaimandami ñucanchicuna ama villachishpa catichun, Jehovapi ama tucui shunguhuan crichunbash imapash jarcaicunata churajun. Chaimi huaquin llactacunapica ñucanchi huauquipanicuna tandanajuchun, villachichunbash na saquin. Shina llaquicunahuan Jehovamanda caruyachingapaj munajpipash ñucanchica Jehovata sirvishpami catina capanchi.

14. Huauquipanicunataca ¿imashinata ayudaita ushapanchi?

¹⁴ Jehovapa yachachishcacunata huauquipanicuna pactachishpa causachunmi llaquishpa ayudana capanchi (1 Juan 3:10, 11, 16-18). Llaquicunahuan cashpapash randimandami ayudarina capanchi. Por ejemplo, shuj huauquipa o shuj panipa shuj juyashca familia huañujpica paicunata llaquishpa ayudangapaj, cushichingapami rina capanchi. Huaquin pushtucunapicarin huauquipanicunaca llaqui apashca pushtucunapimi causan. Chaimi Tandanajui Huasita, paicunapa propio huasicunatapash cutin shayachingapaj ayudachun minishtin. Paicunata juyaimandami ñucanchica ayudangapaj munapanchi.

15. ¿Imatata 1 Juan 4:7, 8​pi nishca shinaca rurana capanchi?

¹⁵ Jehová Diosca tucuicunatami juyan. Chaimi ñucanchicunapash shujcunata juyana capanchi (1 Juan 4:7, 8, liingui). Ñucanchicunaca juyaimandami shujcunatapash perdonana capanchi. Por ejemplo, pipash ñucanchita nali sintichijpica juyaimandami perdonana capanchi. Shinallata imata rurashcatapash cungaitapacha cungana capanchi (Col. 3:13, NM ). Cunanga Aldo shuti huauquimanda yachajupashunchi. Paita, paipura  gentecunatapash shuj huauqui nalicachishpa parlashcatami uyashcarca. Paica “chai huauquita ama nalicachishpa ricungapaj ayudahuai nishpami Jehovataca mañarcani” ninmi. Aldo huauquica ¿imatata ashtahuan rurarca? Nali sintichishca huauquitami villachingapaj jacu nirca. Chaipimi pai imashina sintirishcata Aldo huauquica tucuita villarca. Shina villajpimi huauquica, perdonahuai na shina sintichingapaj munarcanichu nirca. Chaita uyashpami Aldo huauquica ciertotami nihuajun nishpa cushilla sintirirca.

16, 17. ¿Imatata cada uno rurangapaj esforzarina capanchi?

¹⁶ Apóstol Juanga huauquipanicunata juyaimandami primera, segunda, tercera de Juan librocunata escribirca. Shinallata paicuna Jehovapi crishpa catichunbashmi ayudarca. Ungido huauquipanicunaca apóstol Juanshnallatami ñucanchitaca ninanda juyan. Paicuna mandanajujpica cushillami causanajushun (1 Juan 2:27).

¹⁷ Jehovapa yachachishcacunata yachajushpami catina capanchi. Shinami apóstol Juan yachachishcacunatapash siempre yarishpa catipashun. Chaipaca Bibliamanda yachajungapaj, Bibliapa nishcacunapi confiangapami esforzarina capanchi. Shinallata Jesuspipashmi crishpa catina capanchi. Shinami cai mundopi yachachishcacunataca na catipashun. Shinallata Jehovamanda llullacunata yachachijcunatapash na uyashun. Jehovata sirvinajushpapash cai mundomanda nali cosascunataca na ruranachu capanchi. Shinallata cai mundomanda gentecuna nali ruraicunata rurachun atichijujpipash na ruranachu capanchi. Jehovapa tucui mandashcacunata pactachishpa causapashunchi. Ñucanchi huauquipanicunahuanbash ali cangapaj esforzaripashunchi. Chaipaca perdonarina, ayudarinami capanchi. Ima llaquicunata charishpapash Jehovamanda cabalguta yachajushpami catina capanchi.